ܦܪܩܢܟ̣ܝ (ܐܫܥܝܐ ܢܕ: 5)

ܡܫܝܼܚܵܐ ܦܲܪܩܵܢܵܐ: ܕܝܼܲܢ ܝܼܠܹܗ ܒܬܲܡܵܡܲܬܘܼܬܵܐ ܗܲܠ ܐܵܒܵܕ ܐܵܒܵܕܝܼܢ. ܟܠܵܝ ܡܲܢܨܵܒܘܼ̈ܗܝ ܡܲܦܠܘܼܚܵܝ ܝܠܹܗ ܩܵܬܲܢ. ܗ̇ܘ ܝܼܠܹܗ ܡܲܠܟܵܐ ܩܵܬܲܢ: ܟܵܗܢܵܐ ܩܵܬܲܢ: ܘܢܒ̣ܝܼܵܐ ܩܵܬܲܢ. ܟܠ ܥܕܵܢܵܐ ܕܩܵܪܲܚ ܚܲܕ݉ ܫܸܡܵܐ ܚܵܕܬܵܐ ܝܘܼܗܒ̣ܵܐ ܩܵܐ ܦܵܪܘܿܩܲܢ: ܫܒ̣ܘܿܩ ܕܡܲܠܚܸܡܲܚ ܠܹܗ ܩܵܬܲܢ ܒܗ̇ܘ ܫܸܡܵܐ ܐܲܝܟ̣ ܒܟܠ ܐ݉ܚܸܪ݉ܢܵܐ. ܚܘܼܛܪܵܐ ܕܪܵܥܝܵܐ: ܩܵܛܝܼܵܐ ܕܒܵܒܵܐ: ܣܲܝܦܵܐ ܕܣܲܪܕܵܪ: ܡܲܟܲܣܬܵܐ ܕܟܵܗܢܵܐ: ܩܵܛܝܼܵܐ ܕܫܵܗܙܵܕܵܐ: ܓ̰ܘܼܒܵܐ ܕܢܒ̣ܝܵܐ: ܟܠܵܝ ܕܝܼܲܢ ܝܼܢܵܐ. ܡܫܝܼܚܵܐ ܠܲܝܬ ܠܹܗ ܗܸܟ̃ ܐܝܼܩܵܪܵܐ ܕܠܹܐ ܡܲܦܠܸܚ ܠܹܗ ܩܵܐ ܡܵܪܲܡܬܵܐ ܕܝܼܲܢ: ܘܐܘܼܦ ܠܵܐ ܚܕܵܐ ܗܲܩ ܕܠܹܐ ܡܲܦܠܸܚ ܠܵܗ̇ ܩܵܐ ܢܵܛܘܿܪܘܼܬܵܐ ܐܸܠܲܢ. ܡܸܠܝܘܼܬܵܐ ܕܐܲܠܵܗܘܼܬܘܼܗܝ ܝܼܠܵܗ̇ ܐܲܢܒܵܪܲܢ ܠܵܐ ܬܵܝܡܵܢܬܵܐ ܘܠܵܐ ܢܵܦܠܵܢܬܵܐ.

ܐܘܼܦ ܐ݉ܢܵܫܘܼܬܘܼܗܝ: ܕܠܒ̣ܝܼܫܵܐ ܠܹܗ ܒܘܼܬ ܚܵܛܸܪ ܕܝܼܲܢ: ܕܝܼܲܢ ܝܼܠܵܗ̇ ܒܟܠܵܗ̇ ܟܵܡܝܼܠܘܼܬܘܼܗ̇. ܩܵܬܲܢ ܒܝܼܵܗܒ̣ܵܐ ܝܠܹܗ ܡܵܪܲܢ ܟܵܡܝܼܠܘܼܬܵܐ ܒܹܐ ܠܲܟܵܐ ܕܚܲܝܘܼ̈ܗܝ ܩܲܕܝܼܫܹ̈ܐ. ܩܵܬܲܢ ܒܝܵܗܒ̣ܘܿܗ̇ ܝܠܹܗ ܗ̇ܘ ܛܵܒ̣ܘܼܬܵܐ ܕܒܸܦܠܵܛܵܐ ܝܠܵܗ̇ ܡ̣ܢ ܚܲܝܘܼ̈ܗܝ ܡܩܘܼܕܫܹ̈ܐ ܒܕܒ̣ܵܚܬܵܐ ܕܓܵܢܵܐ. ܩܵܬܲܢ ܒܹܥܒ̣ܵܕܵܐ ܝܠܹܗ ܗܘܼܒܵܐ ܗ̇ܘ ܦܪܵܥܵܐ ܕܒܸܬ ܗܵܘܹܐ ܩܵܐ ܡܲܨܝܲܬܬܵܐ ܒܙܲܒܛܘܼܬܵܐ ܘܚܸܠܡܲܬ ܠܵܐ ܫܵܠܝܵܢܬܵܐ. ܠܒ̣ܘܼܫܹ̈ܐ ܕܸܟ̣ܝܹ̈ܐ ܕܚܲܝܘܼ̈ܗܝ ܒܹܥܒ̣ܵܕܵܝ ܝܠܹܗ ܟܵܣܵܝܬܲܢ ܕܫܘܼܦܪܵܐ. ܟܵܡܝܼܠܘܼܝܵܬܹ̈ܐ ܠܲܓ̰ܠܸܓ̰ܵܢܹ̈ܐ ܕܛܲܒܝܼܥܲܬܘܼܗܝ ܒܹܥܒ̣ܵܕܵܝ ܝܠܹܗ ܣܵܩܲܠܬܲܢ ܘܓ̰ܲܘܵܗܝܼܖ̈ܲܢ: ܘܡܲܟܝܼܟ̣ܘܼܬܵܐ ܥܓ̰ܝܼܒܬܵܐ ܕܡܵܘܬܘܼܗܝ ܚܸܩܪܲܢ ܘܗܲܓ̰ܲܬ ܕܚܬܵܪܬܲܢ. ܩܵܬܲܢ ܒܹܥܒ̣ܵܕܘܼܗ̇ ܝܠܹܗ ܗܘܼܒܵܐ ܐܘܼܪܹܐ: ܕܡܵܢܘܼܗ̇ ܝܵܠܦܲܚ ܕܵܐܟ̣ܝܼ ܐܲܠܵܗܵܐ ܨܠܹܐ ܠܹܗ ܠܹܗܘܵܝܵܐ ܒܲܪܢܵܫܵܐ: ܘܐܘܼܦ ܙܩܝܼܦܘܼܗܝ ܠܡܲܠܘܿܦܲܢ ܕܵܐܟ̣ܝܼ ܒܲܪܢܵܫܵܐ ܡܵܨܹܐ ܠܹܐܣܵܩܵܐ ܠܟܸܣ ܐܲܠܵܗܵܐ: ܟܠܵܝ ܦܸܟܝܼܖ̈ܘܼܗܝ: ܙܵܘܥܘܼ̈ܗܝ: ܥܵܡܵܠܘܼ̈ܗܝ: ܗܲܡܙܲܡܝܵܬܘܼ̈ܗܝ: ܢܝܼܫܲܢܩܘܼ̈ܗܝ: ܘܢܵܘܸܢܓ̰ܘܼܝܵܬܘܼ̈ܗܝ: ܩܵܬܲܢ ܥܒ̣ܝܼܕܵܝ ܝܠܹܗ. ܗ̇ܘ ܬܪܝܼܥܵܐ ܝܠܹܗ ܐܘܼܪܚܵܐ ܕܚܲܫܵܐ ܡܒܵܕܵܠ ܕܝܼܲܢ: ܘܩܵܬܲܢ ܒܝܵܗܒ̣ܵܝ ܝܠܹܗ: ܐܲܝܟ̣ ܒܘܲܨܝܲܬ ܫܡܲܝܵܢܵܝܬܵܐ: ܦܠܵܛܹ̈ܐ ܡܸܠܝܹ̈ܐ ܕܟܠܵܝ ܓ̰ܵܦܹ̈ܐ ܕܚܲܝܘܼ̈ܗܝ. ܐܵܕܝܼܵܐ ܙܹܐ ܕܝܼܲܢ ܝܼܠܹܗ ܗܲܪ ܐܲܝܟ̣ ܒܙܲܒ̣ܢܵܐ ܕܚܕܵܪܬܘܼܗܝ ܓܵܘ ܕܘܼܢܝܹܐ. ܡܫܝܼܚܵܐ ܒܟܠ ܕܘܼܟܵܐ ܘܒܟܠ ܬܵܗܵܪ ܡܫܝܼܚܵܐ ܕܝܼܲܢ ܝܼܠܹܗ: ܕܚܵܕܲܚ ܒܝܼܘܼܗܝ ܗܲܠ ܐܵܒܵܕ ܐܵܒܵܕܝܼܢ. ܓܵܢܝܼ: ܒܚܲܝܠܵܐ ܕܪܘܼܚܵܐ ܩܲܕܝܼܫܵܐ ܩܪܝܼ ܝܠܹܗ ܒܐܵܗܵܐ ܩܵܝܕܲܡܬܵܐ ــ ܦܲܪܩܵܢܵܟ̣ܝ.