ܘܦܝܫ ܠܗ݉ܘܢ ܡܠܝܐ ܟܠܝ ܒܪܘܚܐ ܕܩܘܕܫܐ (ܦܪܟܣܝܣ ܒ: 4)

ܓܘܼܖܹ̈ܐ ܒܸܬ ܗܵܘܝܼ ܗ݉ܘܵܘ ܟܠܵܝ ܒܘܼܖ̈ܟܵܬܹܐ ܕܐܵܗܵܐ ܝܵܘܡܵܐ ܐܸܢ ܐܲܚܢܲܢ ܗܵܘܲܚ ܗ݉ܘܵܘ ܡܸܠܝܹܐ ܡ̣ܢ ܪܘܼܚܵܐ ܕܩܘܼܕܫܵܐ. ܦܠܵܛܹ̈ܐ ܕܐܵܗܵܐ ܡܠܵܝܬܵܐ ܕܓܵܢܵܐ ܒܹܐ ܡܘܼܡܟܸܢ ܒܸܬ ܗܵܘܝܵܐ ܗ݉ܘܵܐ ܠܚܲܫܒܘܼܢܵܝ. ܚܲܝܹ̈ܐ܆ ܝܲܗܒ̣ܲܠܬܵܐ ܕܠܸܒܵܐ: ܕܵܟ̣ܝܘܼܬܵܐ: ܚܲܝܠܵܐ: ܒܲܗܪܵܐ: ܫܠܵܡܵܐ: ܘܪܵܒܵܐ ܒܘܼܖ̈ܟܵܬܹܐ ܐ݉ܚܹܖ̈݉ܢܹܐ: ܠܹܐ ܐܵܬܝܼ ܠܸܦܪܵܫܵܐ ܡ̣ܢ ܗܸܙܘܼܪ ܕܪܘܼܚܵܐ ܕܩܘܼܕܫܵܐ. ܐܲܝܟ̣ ܡܫܝܼܚܵܐ ܩܲܕܝܼܫܵܐ: ܒܸܡܫܵܚܵܐ ܝܠܹܗ ܠܪܹܫܵܐ ܕܟܠ ܗܲܡܸܢܵܢܵܐ: ܘܒܸܦܪܵܫܹܗ ܝܠܹܗ ܩܵܐ ܟܵܗܢܘܼܬܵܐ ܕܩܲܕܝܼܫܹ̈ܐ: ܘܒܝܼܲܗܒ̣ܘܼܗܝ ܝܠܹܗ ܫܵܦܵܩܲܬ ܠܬܲܡܘܼܡܹܐ ܚܸܠܡܲܬܘܼܗܝ ܒܬܵܗܵܪ ܡܲܩܒܘܿܠ. ܐܲܝܟ̣ ܡ̈ܝܼܵܐ ܫܲܪܝܼܖܹ̈ܐ ܕܕܵܟ̣ܵܝܬܵܐ ܗ̇ܘ ܟܹܐ ܕܵܟ̣ܹܐ ܠܲܢ ܡ̣ܢ ܟܠܹܗ ܚܲܝܠܵܐ ܕܚܛܝܼܬܵܐ ܘܟܹܐ ܥܵܒ̣ܸܕ ܠܲܢ ܡܩܘܼܕܫܹ̈ܐ: ܒܹܥܒ̣ܵܕܲܢ ܕܫܲܗܘܸܬܲܚ ܘܕܥܵܒ̣ܕܲܚ ܠܪܸܙܵܝܵܐ ܛܵܒ̣ܵܐ ܕܐܲܠܵܗܵܐ. ܐܲܝܟ̣ ܒܲܗܪܵܐ: ܗ̇ܘ ܩܲܕ݉ܡܵܝܬܵܐ ܓܠܹܐ ܠܹܗ ܩܵܬܲܢ ܡܸܢܕܝܼ ܕܬܘܼܠܩܹܐ ܝܘܲܚ ܗ݉ܘܵܘ: ܘܐܵܕܝܼܵܐ ܒܸܓܠܵܝܘܼܗܝ ܝܠܹܗ ܡܵܪܲܢ ܝܑܼܫܘܿܥ ܩܵܬܲܢ ܘܒܝܼܲܢ: ܘܬܲܓܒܘܼܪܲܢ ܝܼܠܹܗ ܒܐܘܼܪܚܵܐ ܕܙܲܕܝܼܩܘܼܬܵܐ. ܟܲܕ ܒܘܼܗܪܸܢܹܐ ܝܘܲܚ ܒܙܲܗܪܝܼܖ̈ܘܼܗܝ ܨܸܦܝܹ̈ܐ ܘܫܡܲܝܵܢܵܝܹ̈ܐ: ܐ݉ܚܹܪ݉ܢܵܐ ܠܹܐ ܝܘܲܚ ܥܲܪܩܘܼܠܹܐ ܒܚܘܼܒ̣ܝܵܐ ܐܸܠܵܐ ܒܒܲܗܪܵܐ ܕܡܵܪܝܵܐ. ܐܲܝܟ̣ ܢܘܼܪܵܐ: ܗ̇ܘ ܗܲܡ ܟܹܐ ܨܲܪܸܦ ܠܲܢ ܡ̣ܢ ܚܸܠܬ: ܗܲܡ ܟܹܐ ܬܲܦܹܐ ܠܵܗܵܐ ܒܐܲܨܠܲܢ ܡܩܘܼܕܫܵܐ. ܗ̇ܘ ܝܼܠܹܗ ܠܵܗܵܐ ܕܕܸܒ̣ܚܵܐ ܕܒܝܼܘܼܗܝ ܦܝܵܫܵܐ ܝܘܲܚ ܡܘܼܡܨܝܼܹܐ ܠܡܲܩܪܘܼܒ̣ܹܐ ܟܠܵܗ̇ ܓܵܢܲܢ ܐܲܝܟ̣ ܕܸܒ̣ܚܬܵܐ ܚܵܝܬܵܐ ܠܐܲܠܵܗܵܐ. ܐܲܝܟ̣ ܛܠܘܼܠܵܐ ܫܡܲܝܵܢܵܝܵܐ: ܟܹܐ ܥܵܒ̣ܸܕ ܠܲܢ ܪܲܕ ܡ̣ܢ ܥܲܩܪܘܼܬܲܢ ܘܚܲܝ̈ܲܢ ܟܹܐ ܥܵܒ̣ܸܕ ܠܗ݉ܘܿܢ ܡܲܝܬ݉ܝܵܢܹ̈ܐ ܕܡܲܗܨܘܼܠ. ܬܲܟܠܵܐ ܕܨܵܠܹܐ ܗ݉ܘܵܐ ܡ̣ܢ ܫܡܲܝܵܐ ܠܟܸܣ ܠܲܢ ܒܐܵܗܵܐ ܨܲܦܪܵܐ! ܐܲܝܟ̣ ܝܵܘܢܵܐ: ܒܓܘܼܠܦܵܢܹ̈ܐ ܕܚܘܼܒܵܐ ܘܕܫܠܵܡܵܐ: ܪܲܦܪܘܼܦܹܐ ܝܠܹܗ ܥܲܠ ܥܹܕܬܹܗ ܘܥܲܠ ܓܵܢܵܬܹ̈ܐ ܕܗܲܡܸܢܵܢܹ̈ܐ: ܘܐܲܝܟ̣ ܦܵܪܲܩܠܹܝܛܵܐ: ܒܸܛܪܵܕܵܐ ܝܠܹܗ ܠܚܲܡܹ̈ܐ ܘܙܕܘܼܥܝܵܬܹ̈ܐ ܕܟܹܐ ܡܲܚܪܸܒ̣ܝܼ ܫܠܵܡܵܐ ܕܡܘܼܚܸܒܘܼ̈ܗܝ. ܟܹܐ ܨܵܠܹܐ ܥܲܠ ܓܘܼܒܝܹ̈ܐ ܐܲܝܟ̣ ܕܨܠܹܐ ܠܹܗ ܥܲܠ ܡܵܪܲܢ ܒܝܘܿܪܕܢܵܢ: ܘܟܹܐ ܝܲܗܒ̣ܸܠ ܣܵܗܕܘܼܬܵܐ ܠܒܪܘܿܢܘܼܬܵܝ ܒܗ̇ܘ ܕܟܹܐ ܡܲܫܪܹܐ ܒܝܼܵܝ ܗ̇ܝ ܪܘܼܚܵܐ ܕܒܪܘܿܢܘܼܬܵܐ: ܕܒܝܼܘܼܗ̇ ܟܹܐ ܩܵܪܝܼ ܠܹܗ ܐܲܒܵܐ: ܒܵܒܵܐ. ܐܲܝܟ̣ ܦܵܘܚܵܐ ܟܹܐ ܢܵܫܸܡ ܢܵܦܵܣ ܕܚܲܝܹ̈ܐ ܒܐ݉ܢܵܫܹ̈ܐ. ܬܲܟܠܵܐ ܕܐܲܠܵܗܵܐ ܝܲܗܒ̣ܸܠ ܠܵܗ̇ ܗܸܙܘܼܪܘܼܗܝ ܥܲܡܲܢ ܐܸܕܝܘܿܡ ܘܟܠ ܝܘܿܡ.