ܚܙܝܪܢ 21

ܒܘܫ ܫܦܝܪܐ ܝܘܬ ܡܢ ܒܢܝ̈ ܐ݉ܢܫܐ (ܡܙܡܘܪܐ ܡܗ: 2)

ܦܲܪܨܘܿܦܵܐ ܬܲܡܵܡ ܕܡܫܝܼܚܵܐ ܗܲܪ ܐܲܝܟ̣ ܚܲܕ݉ ܛܲܒ̣ܥܵܐ ܝܠܹܗ: ܘܟܠܵܝ ܚܲܝܘܼ̈ܗܝ ܗܲܪ ܐܲܝܟ̣ ܚܕܵܐ ܚܬܵܡܬܵܐ ܕܡܵܘܗܪܘܼܗܝ ܝܢܵܐ. ܟܠܹܗ ܒܬܲܡܵܡܲܬܘܼܬܵܐ ܟܵܡܝܼܠ ܝܼܠܹܗ: ܠܵܐ ܐܲܚܟ̰ܝܼ ܒܟܠ ܚܲܕ݉ ܡ̣ܢ ܣܵܡܘܼ̈ܗܝ ܦܖ̈ܝܼܫܹܐ ܐܝܼܢܵܐ ܐܲܝܟ̣ ܚܲܕ݉ ܒܸܬܘܿܢ ܡܫܘܼܒܚܵܐ ܘܙܲܪܝܼܦ. ܛܵܒܝܼܥܲܬܹ̈ܐ ܕܚܲܝܘܼ̈ܗܝ ܠܹܐ ܝܢܵܐ ܐܲܝܟ̣ ܚܕܵܐ ܓ̰ܲܡܥ ܕܖ̈ܲܢܓܹܐ ܦܖ̈ܝܼܫܹܐ ܚܒ̣ܝܼܛܹܐ ܒܥܘܼܕܵܠܹܐ ܕܠܵܐ ܪܹܐܙܵܐ: ܝܲܢ ܚܲܕ݉ ܩܵܘܚܵܐ ܕܟܹܐܦܹ̈ܐ ܡܵܪܹܐ ܛܝܼܡܵܐ ܓ̰ܘܼܡܥܹܐ ܥܲܠ ܥܘܼܕܵܠܹܐ ܕܠܵܐ ܣܵܪܸܫܬܵܐ. ܫܸܟܠܵܐ ܕܫܲܦܝܼܪܘܼܬܵܐ ܝܠܹܗ: ܘܐܣܵܪܵܐ ܕܨܲܕܪܵܐ ܕܚܸܩܪܵܐ. ܒܝܼܘܼܗܝ ܟܠܵܝ ܡܸܢܕܝܼܵܢܹ̈ܐ ܡܵܪܹܐ ܛܝܼܡܵܐ ܚܪܝܼܙܹܐ ܝܢܵܐ ܒܕܘܼܟܵܢܵܝ̈ ܠܵܚܘܿܡܹ̈ܐ: ܘܟܹܐ ܗܲܝܸܪܝܼ ܒܣܲܩܵܠܬܵܐ ܕܥܘܼܕܵܠܹ̈ܐ. ܗܸܟ̃ ܚܲܕ݉ ܡ̣ܢ ܫܘܼܦܖ̈ܘܼܗܝ ܠܹܐ ܒܲܛܸܠ ܠܟܵܡܝܼܠܘܼܬܵܐ ܕܐܵܢܝܼ ܐ݉ܚܹܖ̈݉ܢܹܐ: ܡܘܼܚܸܒܵܐ ܝܠܹܗ ܒܬܲܡܵܡܲܬܘܼܬܵܐ ܘܒܟܵܡܝܼܠܘܼܬܵܐ.

ܝܵܐ ܡܫܝܼܚܵܐ! ܚܲܝܠܘܼܟ̣: ܫܵܦܵܩܲܬܘܼܟ̣: ܟܹܐܢܘܼܬܘܼܟ̣: ܡܪܲܚܡܵܢܘܼܬܘܼܟ̣: ܫܲܪܝܼܪܘܼܬܘܼܟ̣: ܙܲܪܝܼܦܘܼܬܘܼܟ̣: ܘܠܵܐ ܡܸܫܬܲܚܠܦܵܢܘܼܬܘܼܟ̣: ܟܠܵܝ ܡܥܘܼܕܵܠܹܐ ܒܹܥܒ̣ܵܕܵܐ ܝܢܵܐ ܚܲܕ݉ ܗܲܕܟ̣ܵܐ ܐ݉ܢܵܫܵܐ: ܝܲܢ ܚܲܕ݉ ܗܲܕܟ̣ܵܐ ܐܲܠܵܗܵܐ ܐ݉ܢܵܫܵܐ ܕܠܵܐ ܐܲܪܥܵܐ ܘܠܵܐ ܫܡܲܝܵܐ ܚܙܹܐ ܠܗ݉ܘܿܢ ܐܲܝܟ̣ ܕܝܼܘܼܗܝ ܒܕܘܼܟܵܐ ܐ݉ܚܹܪ݉ܬܵܐ. ܬܸܦܝܼܠܘܼܬܘܼܟ̣: ܥܵܠܡܝܼܢܵܝܘܼܬܘܼܟ̣: ܚܲܫܘܼܟ̣: ܓ̣ܵܠܸܒܘܼܬܘܼܟ̣: ܡܵܘܬܘܼܟ̣: ܘܠܵܐ ܡܵܝܘܿܬܘܼܬܘܼܟ̣: ܟܠܵܝ ܙܩܝܼܪܹܐ ܝܢܵܐ ܒܚܲܕ݉ ܙܩܘܼܪܵܐ ܒܹܬܘܿܢ ܘܙܲܪܝܼܦ: ܕܠܵܐ ܚܝܼܘܼܛܵܐ ܘܕܠܵܐ ܟ̰ܲܢܟ̰ܲܪܬܵܐ. ܐܲܢ݉ܬ ܝܼܘܸܬ: ܪܵܒܵܐ ܐܝܼܢܵܐ ܠܵܐ ܦܘܼܠܥܵܐ. ܐܲܢ݉ܬ ܝܼܘܸܬ ܟܠܵܝ ܡܸܢܕܝܼܵܢܹ̈ܐ: ܐܝܼܢܵܐ ܠܵܐ ܦܖ̈ܝܼܫܹܐ ܡܥܘܼܕܵܠܹܐ. ܐܲܝܟ̣ ܟܠܵܝ ܖ̈ܲܢܓܹܐ ܙܘܼܘܸܓܹܐ ܡܥܘܼܕܵܠܹܐ ܬܵܪܘܿܨܹܐ ܝܢܵܐ ܚܕܵܐ ܩܸܫܬܝܼ ܡܵܪܲܢ ܠܵܘܓ̰ܲܢܬܵܐ: ܗܲܕܟ̣ܵܐ ܟܠܵܝ ܐܝܼܩܵܖܹ̈ܐ ܕܫܡܲܝܵܐ ܘܕܐܲܪܥܵܐ ܙܲܘܘܼܓܹܐ ܝܢܵܐ ܒܝܼܘܼܟ̣ ܐܘܼܚܟ̰ܵܐ ܒܥܵܓ̰ܸܒܘܼܬܵܐ: ܕܠܲܝܬ ܐܲܝܟ̣ ܕܝܼܘܼܟ̣ ܒܟܠܵܗ̇ ܬܹܒ̣ܹܝܠ. ܗܹܐ: ܐܘܼܦ ܐܸܢ ܟܠܵܝ ܟܵܡܝܼܠܘܼܝܵܬܹ̈ܐ ܕܐܵܢܝܼ ܕܝܼܢܵܐ ܡ̣ܢ ܟܠܵܝ ܒܘܼܫ ܟܵܡܝܼܠ ܦܵܝܫܝܼ ܝܗ݉ܘܵܘ ܐ݉ܣܝܼܪܹܐ ܒܚܕܵܐ ܕܲܣܬܵܐ: ܠܹܐ ܡܵܛܝܼ ܗ݉ܘܵܘ ܐܸܠܘܼܟ̣: ܝܵܐ ܢܵܘܪܵܐ ܕܟܠܵܗ̇ ܟܵܡܝܼܠܘܼܬܵܐ. ܐܲܢ݉ܬ ܦܝܼܫܵܐ ܝܘܸܬ ܡܫܝܼܚܵܐ ܒܡܸܫܚܵܐ ܩܲܕܝܼܫܵܐ ܕܡܘܼܪܵܐ ܘܩܲܣܝܵܐ: ܗ̇ܘ ܕܐܲܠܵܗܘܼܟ̣ ܚܘܼܡܝܵܐ ܝܠܹܗ ܩܵܬܘܼܟ̣ ܒܢܲܦ̮ܫܘܼܟ̣. ܪܹܝܚܘܼܟ̣ ܐܲܝܟ̣ ܥܸܛܪܵܐ ܩܲܕܝܼܫܵܐ ܝܠܹܗ: ܕܐܲܝܟ̣ ܕܝܼܘܼܗܝ ܠܲܝܬ ܡܘܼܡܟܸܢ ܕܐ݉ܚܹܖ̈݉ܢܹܐ ܡܵܙܓ̣ܝܼ: ܠܵܐ ܒܟܠܵܗ̇ ܥܸܠܡ ܕܟܸܡܝܵܐ. ܟܠ ܐܸܣܛܘܼܟ̰ܣܵܐ ܒܢܲܦ̮ܫܘܼܗܝ ܪܹܝܚܵܢܵܐ ܝܠܹܗ: ܐܝܼܢܵܐ ܡܘܼܙܵܓ̣ܵܝ ܐܲܠܵܗܵܝܵܐ ܝܠܹܗ.