ܚܙܝܪܢ 23

ܐܦܪܝܡ ܗ݉ܘܐ ܠܗ ܓܪܕܝܐ ܠܐ ܡܘܚܕܪܬܐ (ܗܘܫܥ ܙ: 8)

ܓܸܪܕܲܝܵܐ ܠܵܐ ܡܘܼܚܕܸܪܬܵܐ ܚܕܵܐ ܕܸܦܢܘܼܗ̇ ܢܵܝܬܵܐ ܝܠܵܗ̇: ܗܲܕܟ̣ܵܐ ܐܘܼܦ ܐܲܦܪܝܼܡ: ܒܪܵܒܵܐ ܬܵܗܵܖܹ̈ܐ: ܠܹܐ ܝܗ݉ܘܵܐ ܒܘܼܫܠܵܐ ܒܫܵܦܵܩܲܬ ܐܲܠܵܗܵܝܬܵܐ. ܐܵܦܸܢ ܕܐܝܼܬ ܗ݉ܘܵܐ ܡܲܨܝܲܬܬܵܐ ܒܚܲܕ݉ ܩܵܕܸܪ: ܡܸܢ݉ܕܪܸܫ݉ ܐܝܼܬ ܗ݉ܘܵܐ ܪܵܒܵܐ ܥܵܨܝܼܘܼܬܵܐ ܦܝܼܫܬܵܐ ܒܝܼܘܼܗܝ. ܓܵܢܝܼ، ܚܙܝܼ ܐܸܢ ܐܲܗܘܵܠ ܕܝܼܵܟ̣ܝ ܙܹܐ ܗܲܕܟ̣ܵܐ ܝܠܵܗ̇. ܬܲܡܵܡ ܝܼܘܲܬܝ ܒܡܸܢܕܝܼܵܢܹ̈ܐ ܕܐܲܠܵܗܵܐ؟ ܫܵܦܵܩܲܬ ܡܛܝܼܬܵܐ ܝܠܵܗ̇ ܠܩܸܢܛܪܘܿܢ ܕܐܝܼܬܘܼܬܵܟ̣ܝ ܒܬܲܡܵܡܲܬܘܼܬܵܐ: ܗܲܕܟ̣ܵܐ ܕܟܹܐ ܡܵܨܝܲܬܝ ܪܵܥܫܲܬܝ ܒܦܘܼܠܚܵܢܘܼ̈ܗ̇ ܐܲܠܵܗܵܝܹ̈ܐ ܒܟܠܵܝ ܚܲܝܠܵܟ̣ܝ̈: ܥܵܡܵܠܵܟ̣ܝ̈: ܘܗܸܡܸܙܡܵܢܵܟ̣ܝ̈ ܘܦܸܟܝܼܖ̈ܵܟ̣ܝ؟ ܠܸܦܝܵܫܵܐ ܩܘܼܕܸܫܬܵܐ ܒܪܘܼܚܵܐ ܘܒܓܵܢܵܐ ܘܒܦܲܓ̣ܪܵܐ ــ ܐܵܗܵܐ ܓܵܪܵܓ ܗܵܘܝܵܐ ܐܵܡܵܓ̰ܵܟ̣ܝ ܘܒܵܥܘܼܬܵܟ̣ܝ. ܘܐܵܦܸܢ ܩܵܕܲܫܬܵܐ ܠܹܐ ܝܠܵܗ̇ ܟܵܡܝܼܠ ܒܕܵܪܵܓ̰ܘܼܗ̇ ܒܝܼܵܟ̣ܝ: ܐܝܼܢܵܐ ܟܵܪܘܼܗ̇ ܓܵܪܵܓ ܡܵܛܝܼ ܠܟܠ ܕܘܼܟܵܐ. ܠܹܐ ܡܵܠܝܵܐ ܕܩܲܕܝܼܫܘܼܬܵܐ ܡܲܒܝܸܢܵܐ ܒܚܕܵܐ ܕܘܼܟܬܵܐ: ܘܚܛܝܼܬܵܐ ܗܲܟܡܵܐ ܒܚܕܵܐ ܐ݉ܚܹܪ݉ܬܵܐ: ܐܸܠܵܐ ܐܘܼܦ ܐܲܢ݉ܬ ܒܸܬ ܗܵܘܝܲܬܝ ܓܸܪܕܲܝܼܵܐ ܠܵܐ ܡܘܼܚܕܸܪܬܵܐ.

ܓܸܪܕܲܝܵܐ ܠܵܐ ܡܘܼܚܕܸܪܬܵܐ ܟܹܐ ܝܵܩܕܵܐ ܓ̰ܲܠܕܹܐ ܒܗ̇ܝ ܦܵܬܘܼܗ̇ ܕܝܼܠܵܗ̇ ܩܘܼܪܒܵܐ ܠܢܘܼܪܵܐ: ܘܗܲܕܟ̣ܵܐ: ܐܵܦܸܢ ܗܸܟ̃ ܐ݉ܢܵܫܵܐ ܠܲܝܬ ܡܘܼܡܟܸܢ ܕܗܵܘܹܐ ܙܵܘܕܵܐ ܡ̣ܢ ܠܵܙܸܡ ܩܲܝܪܲܬܟܲܫ ܒܘܼܬ ܬܵܘܕܝܼܬܘܼܗܝ: ܡܸܢ݉ܕܪܸܫ݉ ܐܝܼܬ ܚܲܕ݉ܟܡܵܐ ܐ݉ܢܵܫܹ̈ܐ ܕܡܲܒܝܘܼܢܹܐ ܝܢܵܐ ܐܲܝܟ̣ ܝܩܝܼܕܹܐ ܘܟܘܼܡܟܸܡܹܐ ܒܩܲܝܪܲܬ ܒܘܼܬ ܗ̇ܘ ܚܲܕ݉ ܣܵܡܵܐ ܕܣܲܪܲܣܬܘܼܬܵܐ ܕܩܘܼܒܠܹܐ ܝܢܵܐ. ܝܲܢ ܝܩܝܼܕܹܐ ܝܢܵܐ ܟ̰ܸܡ ܬܲܡܵܡ ܘܗ݉ܘܝܼܹ̈ܐ ܓܸܡܘܼܖ̈ܝܵܬܹܐ ܡ̣ܢ ܚܬܵܪܬܵܐ ܘܫܬܲܒ̣ܗܪܵܢܘܼܬܵܐ ܐܲܝܟ̣ ܕܦܖ̈ܝܼܫܹܐ ܒܐܵܢܝܼ ܦܘܼܠܚܵܢܹ̈ܐ ܬܵܘܕܝܼܬܵܢܵܝܹ̈ܐ ܕܟܹܐ ܐܵܬܝܼ ܠܚܵܘܫܵܝ. ܚܲܕ݉ܟܡܵܐ ܐ݉ܢܵܫܹ̈ܐ ܕܟܹܐ ܡܲܚܙܝܼ ܡ̣ܢ ܦܵܬܵܐ ܩܲܕܝܼܫܘܼܬܵܐ ܟ̰ܸܡ ܓܘܼܪܬܵܐ: ܪܵܒܵܐ ܓܵܗܹ̈ܐ ܟ̰ܸܡ ܣܦܝܼܩܹ̈ܐ ܝܢܵܐ ܡ̣ܢ ܟܠܵܗ̇ ܕܸܚܠܲܬ ܐܲܠܵܗܵܐ ܫܲܪܝܼܪܵܐ. ܩܲܕܝܼܫܵܐ ܕܩܲܕ݉ܡ ܥܲܝܢܹ̈ܐ ܕܐ݉ܢܵܫܹ̈ܐ: ܫܹܐܕܵܐ ܝܠܹܗ ܓܵܘ ܠܸܒܵܐ ܕܓܵܢܘܼܗܝ. ܒܝܵܘܡܵܐ ܟܹܐ ܝܲܗܒ̣ܸܠ ܩܵܡܚܵܐ: ܒܛܸܫܘܵܐ ܒܠܲܝܠܹܐ ܩܸܛܡܵܐ. ܗ̇ܝ ܓܸܪܕܲܝܼܵܐ ܕܝܩܝܼܕܬܵܐ ܝܠܵܗ̇ ܚܕܵܐ ܕܸܦܢܘܼܗ̇: ܠܲܝܫܵܐ ܝܠܵܗ̇ ܗ̇ܝ ܕܸܦܢܘܼܗ̇ ܐ݉ܚܹܪ݉ܬܵܐ.

ܐܸܢ ܐܵܢܵܐ ܗܲܕܟ̣ܵܐ ܝܘܸܢ: ܝܵܐ ܡܵܪܝܵܐ: ܡܲܚܕܸܪܝܼ! ܡܲܚܕܸܪ ܐܲܨܠܝܼ ܠܵܐ ܡܩܘܼܕܫܵܐ ܠܵܓܹܒܵܐ ܕܢܘܼܪܵܐ ܕܚܘܼܒܘܼܟ̣: ܘܫܒ̣ܘܿܩ ܕܸܦܢܝܼ ܝܩܝܼܕܬܵܐ ܦܵܝܚܵܐ ܚܲܕ݉ܟ̰ܵܐ ܟܲܕ ܝܵܠܦܸܢ ܠܢܵܐܩܸܨܘܼܝܵܬܹ̈ܐ ܕܓܵܢܝܼ: ܘܠܒܵܨܘܿܪܘܼܬܵܐ ܕܚܲܝܡܘܼܬܝܼ ܐܝܼܡܵܐ ܕܪܚܝܼܩܵܐ ܝܘܸܢ ܡ̣ܢ ܠܵܗܘܼܟ̣ ܫܡܲܝܵܢܵܝܵܐ. ܥܒ̣ܘܿܕ ܕܠܵܐ ܗܵܘܹܝܢ ܚܲܕ݉ ܐ݉ܢܵܫܵܐ ܡܵܪܹܐ ܬܪܹܝ ܚܝܼܵܠܹ̈ܐ: ܐܸܠܵܐ ܗܵܘܹܝܢ ܡܸܠܝܵܐ ܒܟܠܵܝ ܣܵܡܝܼ̈ ܡ̣ܢ ܟܵܪ ܕܫܵܦܵܩܲܬ.