ܐܚܟ̰ܝ ܡܪܚܘܩܐ ܠܐ ܡܪܚܩܝܬܘܢ ܠܐܙܠܐ (ܡܦܩܢܐ ܚ: 28)

ܐܵܗܵܐ ܝܠܹܗ ܚܲܕ݉ ܚܲܒܪܵܐ ܕܠܹܐܒܵܐ ܡ̣ܢ ܦܵܘܡܵܐ ܕܦܸܪܥܘܿܢ ܪܹܫܵܐ ܕܙܵܠܝܼܡܹ̈ܐ. ܗ̇ܘ ܒܹܐܡܵܪܵܐ ܝܠܹܗ ܩܵܐ ܛܵܝܸܦܵܐ ܝܲܚܣܝܼܪ ܘܡܸܣܟܹܢܵܐ ܕܒܢܲܝ̈ ܝܼܣܪܵܝܹܠ: ܐܸܢ ܗܲܪ ܠܵܙܸܡ ܝܼܠܵܗ̇ ܕܦܵܠܛܝܼܬܘܿܢ ܡ̣ܢ ܡܸܨܪܹܝܢ: ܦܠܘܿܛܘܿܢ: ܐܝܼܢܵܐ ܡܲܪܚܘܼܩܹܐ ܠܵܐ ܡܲܪܚܩܝܼܬܘܿܢ. ܠܹܐ ܒܵܥܹܐ ܕܦܵܠܛܝܼ ܡ̣ܢ ܬܚܘܿܬ ܣܲܗܡ ܕܗܘܼܟܡܹܗ ܘܡ̣ܢ ܩܲܕ݉ܡ ܥܲܝܢܹ̈ܐ ܕܓ̰ܵܣܘܿܣܘܼ̈ܗܝ. ܗܲܪ ܒܐܵܗܵܐ ܬܵܗܵܪ: ܥܵܠܡܵܐ ܙܹܐ ܠܹܐ ܡܲܚܸܒ ܠܠܵܐ ܬܒܵܥܬܵܐ ܕܠܵܐ ܬܲܒܥܵܢܹ̈ܐ ܥܲܠܘܼܗܝ ܘܐܘܼܦ ܠܵܐ ܠܢܵܐܣܵܙܓܵܪܘܼܬܵܐ ܕܠܵܐ ܣܲܙܓܸܖ̈ܵܢܹܐ ܥܲܡܘܼܗܝ. ܟܹܐ ܒܵܥܹܐ ܕܗܵܘܲܚ ܚܲܕ݉ܟ̰ܵܐ ܒܘܼܫ ܖ̈ܵܟܝܼܟ̣ܹܐ: ܘܠܵܐ ܕܵܒ̣ܩܲܚ ܠܗ݉ܘܿܢ ܫܘܼܠܹ̈ܐ ܒܚܕܵܐ ܐܝܼܕܵܐ ܙܵܘܕܵܐ ܡ̣ܢ ܠܵܙܸܡ ܩܫܝܼܬܵܐ. ܡܝܼܬܘܼܬܵܐ ܠܥܵܠܡܵܐ ܘܩܒ̣ܝܼܪܘܼܬܵܐ ܥܲܡ ܡܫܝܼܚܵܐ ܐܲܗܘܵܠܹ̈ܐ ܝܢܵܐ ܕܚܝܼܵܠܹ̈ܐ ܒܸܣܖ̈ܵܢܵܝܹܐ ܟܹܐ ܡܲܣܚܸܪܝܼ ܒܝܼܵܝ: ܘܒܘܼܬ ܐܵܗܵܐ: ܦܘܼܩܕܵܢܵܐ ܠܬܲܡܘܼܡܵܝ ܒܟܠ ܕܘܼܟܵܐ ܦܝܼܫܵܐ ܝܠܹܗ ܬܒ̣ܝܼܪܵܐ ܘܐܘܼܦ ܡܘܼܣܠܝܼܵܐ. ܥܵܩܸܠܕܵܪܘܼܬܵܐ ܥܵܠܡܵܢܵܝܬܵܐ ܟܹܐ ܡܲܚܫܸܚܵܐ ܐܘܼܪܚܵܐ ܕܡܲܫܦܲܪܬܵܐ ܠܕܘܼܢܝܹܐ: ܘܚܵܦܘܿܛܹܐ ܝܠܵܗ̇ ܠܪܸܦܝܼܘܼܬܵܐ. ܡܲܨܠܵܗܲܬ ܒܸܣܪܵܢܵܝܬܵܐ ܟܹܐ ܩܲܒܠܵܐ ܕܡܸܓ̰ܸܕ ܕܸܟ̣ܝܘܼܬܵܐ ܨܦܵܝܝܼ ܡܸܢܕܝܼ ܝܠܵܗ̇: ܐܝܼܢܵܐ ܠܵܐ ܕܗܵܘܲܚ ܙܵܘܕܵܐ ܡ̣ܢ ܠܵܙܸܡ ܩܘܼܝܹ̈ܐ ܒܝܼܘܼܗ̇. ܐܲܠܒܲܬ ܓܵܪܵܓ ܕܡܲܦܠܸܚܲܚ ܣܲܪܲܣܬܘܼܬܵܐ: ܐܝܼܢܵܐ ܠܵܐ ܗܵܘܲܚ ܪܵܒܵܐ ܚܠܘܼܨܹ̈ܐ ܒܡܲܢܟ̣ܲܣܝ̈ܵܬܲܢ ܠܕܘܼܓܠܵܐ. ܗܹܐ: ܒܹܐܡܵܪܵܐ ܝܠܹܗ ܥܵܠܡܵܐ: ܐܲܠܒܲܬ ܓܵܪܵܓ ܕܗܵܘܝܼܬܘܿܢ ܖ̈ܘܼܚܵܢܵܝܹܐ: ܐܝܼܢܵܐ ܠܵܐ ܚܵܣܟ̣ܝܼܬܘܿܢ ܡ̣ܢ ܓܵܢܵܘܟ̣ܘܿܢ ܚܲܕ݉ܟ̰ܵܐ ܒܘܼܣܵܡܵܐ ܕܚܲܒ̣ܪܵܘܵܝܘܼܬܵܐ ܫܵܕ ܕܕܘܼܢܝܹܐ. ܒܹܐܡܵܪܵܐ ܝܠܹܗ: ܡܘܼܕܝܼ ܦܵܝܕܵܐ ܡ̣ܢ ܡܲܟܪܲܙܬܵܐ ܠܕܲܪܩܘܼܒ̣ܠ ܕܚܲܕ݉ ܡܸܢܕܝܼ ܟܲܕ ܟܠܵܝ ܐ݉ܢܵܫܹ̈ܐ ܟܹܐ ܡܲܚܸܒܝܼ ܘܚܵܩܪܝܼ ܠܹܗ؟ ܐܲܠܦܹ̈ܐ ܕܡܵܘܕܝܼܵܢܹ̈ܐ ܟܹܐ ܡܲܨܝܸܬܝܼ ܠܐܵܗܵܐ ܢܲܨܝܼܗܲܬ ܦܲܢܕܵܢܬܵܐ ܘܟܹܐ ܦܵܝܫܝܼ ܡܘܼܚܪܸܒ̣ܹܐ ܒܝܼܘܼܗ̇ ܗܲܠ ܐܵܒܵܕ. ܐܸܢ ܒܵܥܲܚ ܕܬܲܒܥܲܚ ܠܡܵܪܲܢ ܒܬܲܡܵܡܲܬܘܼܬܵܐ: ܓܵܪܵܓ ܕܐܵܙܲܠ݉ܚ ܠܒܲܪܝܼܵܐ ܕܦܪܝܼܫܘܼܬܵܐ ܘܫܵܒ̣ܩܲܚ ܡܸܨܪܹܝܢ ܕܕܘܼܢܝܹܐ ܒܸܣܪܵܢܵܝܬܵܐ ܠܵܒܵܬ݉ܪܲܢ. ܓܵܪܵܓ ܕܦܵܪܫܲܚ ܡ̣ܢ ܩܵܢܘܿܢܘܼ̈ܗ̇ ܘܠܲܙܲܬܘܼ̈ܗ̇ ܘܐܘܼܦ ܡ̣ܢ ܬܵܘܕܝܼܬܘܼܗ̇ ܘܪܵܚܩܲܚ ܠܐܲܝܟܵܐ ܕܡܵܪܲܢ ܟܹܐ ܩܵܪܹܐ ܠܡܩܘܼܕܫܘܼ̈ܗܝ. ܟܡܵܐ ܕܪܸܚܩܵܐ ܗܵܘܹܝܬ ܡ̣ܢ ܐܵܟ̣ܸܕܢܵܐ: ܒܘܼܫ ܣܵܠܵܡܲܬ ܝܼܘܸܬ: ܘܟܡܵܐ ܕܪܵܚܩܸܬ ܡ̣ܢ ܬܲܒܥܵܢܹ̈ܐ ܠܥܵܠܡܵܐ: ܒܘܼܫ ܨܦܵܝܝܼ. ܟܠܵܝ ܗܲܡܸܢܵܢܹ̈ܐ ܫܲܪܝܼܖܹ̈ܐ ܫܒ̣ܘܿܩ ܫܲܡܥܝܼ ܩܵܠܵܐ ܕܫܝܼܦܘܿܪܵܐ ܓܵܘ ܢܵܬܝܵܬܵܝ̈ ــ ܦܠܘܿܛܘܿܢ ܡ̣ܢ ܓܵܘܵܝ: ܘܦܘܿܫܘܿܢ ܦܪܝܼܫܹܐ ܡܸܢܵܝ.