ܚܝܪܚ ܒܝܑܫܘܥ (ܥܒ̣ܖ̈ܝܐ ܝܒ: 2)

ܗܲܡܵܫܵܐ ܫܘܼܠܵܐ ܕܪܘܼܚܵܐ ܕܩܘܼܕܫܵܐ ܝܠܹܗ ܠܡܲܦܬܘܼܠܵܝ ܥܲܝܢ̈ܲܢ ܡ̣ܢ ܓܵܢܲܢ ܠܡܫܝܼܚܵܐ: ܐܝܼܢܵܐ ܫܘܼܠܵܐ ܕܣܵܛܵܢܵܐ ܟ̰ܸܡ ܕܲܪܩܘܼܒ̣ܠ ܕܐܵܗܵܐ ܝܠܹܗ. ܣܵܒܵܒ ܗ̇ܘ ܗܲܡܵܫܵܐ ܓ̰ܲܪܘܿܒܹܐ ܝܠܹܗ ܠܹܥܒ̣ܵܕܲܢ ܕܚܵܝܪܲܚ ܠܓܵܢܲܢ ܡ̣ܢ ܓܹܒܵܐ ܕܠܡܫܝܼܚܵܐ. ܗ̇ܘ ܡܲܥܒ̣ܘܿܪܹܐ ܝܠܹܗ ܓܵܘ ܠܸܒܲܢ ܚܝܼܵܠܹ̈ܐ ܕܐܲܝܟ̣ ܕܐܲܢܹܐ ــ ܚܛܝܼܵܬܵܘ̈ܟ̣ܘܿܢ ܥܒ̣ܝܼܪܹܐ ܝܢܵܐ ܡ̣ܢ ܗܲܕ ܕܫܒ̣ܵܩܵܐ: ܠܲܝܬ ܠܵܘܟ̣ܘܿܢ ܗܲܝܡܵܢܘܼܬܵܐ: ܘܠܲܝܬ ܠܵܘܟ̣ܘܿܢ ܒܲܣܵܐ ܬܵܘܒܵܟܵܪܘܼܬܵܐ: ܗܸܟ̃ ܠܹܐ ܡܵܨܹܝܬܘܿܢ ܠܸܚܡܵܠܵܐ ܗܲܠ ܐ݉ܚܲܪܬܵܐ: ܠܲܝܬ ܠܵܘܟ̣ܘܿܢ ܚܵܕܘܼܬܵܐ ܕܒܢܘܿܢܘܼ̈ܗܝ: ܪܵܒܵܐ ܒܙܲܒܘܿܢܘܼܬܵܐ ܕܒ̣ܝܼܩܹܐ ܝܬܘܿܢ ܠܡܫܝܼܚܵܐ. ܟܠܵܝ ܐܲܢܹܐ ܦܸܟܝܼܖܹ̈ܐ ܒܘܼܬ ܓܵܢܵܐ ܝܢܵܐ: ܘܒܗܸܟ̃ ܥܕܵܢܵܐ ܠܹܐ ܡܲܫ݉ܟ̰ܚܲܚ ܝܲܗܒ̣ܵܠܬܵܐ ܕܠܸܒܵܐ ܘܓ̰ܘܼܪܐܲܬ ܐܸܢ ܓܲܫܩܲܚ ܠܓܵܘܵܝܵܐ. ܐܝܼܢܵܐ ܪܘܼܚܵܐ ܕܩܘܼܕܫܵܐ ܟܹܐ ܡܲܕܸܪܗ݉ܘܿܢ ܥܲܝܢ̈ܲܢ ܟ̰ܸܡ ܪܸܚܩܵܐ ܡ̣ܢ ܓܵܢܲܢ. ܟܹܐ ܡܲܠܸܦ ܠܲܢ ܕܒܓܵܢܲܢ ܠܵܐ ܡܸܢܕܝܼ ܝܘܲܚ: ܐܝܼܢܵܐ ܕܡܫܝܼܚܵܐ ܟܠ ܒܟܠ ܝܼܠܹܗ ܩܵܬܲܢ. ܒܲܣ ܕܟ̣ܘܿܪ: ܕܠܹܐ ܝܠܵܗ̇ ܒܕܒ̣ܵܩܬܵܐ ܕܝܼܘܼܟ̣ ܠܡܫܝܼܚܵܐ ܕܦܝܵܫܵܐ ܝܘܸܬ ܦܘܼܪܩܵܐ: ܐܸܠܵܐ ܡܫܝܼܚܵܐ ܒܓܵܢܘܼܗܝ ܝܠܹܗ ܦܵܪܩܵܢܘܼܟ̣. ܐܘܼܦ ܠܵܐ ܒܚܵܕܘܼܬܘܼܟ̣ ܒܡܫܝܼܚܵܐ ܟܹܐ ܦܵܝܫܸܬ ܦܘܼܪܩܵܐ: ܐܝܼܢܵܐ ܒܐܝܼܕܵܐ ܕܗ̇ܘ. ܗܹܐ: ܐܘܼܦ ܗܲܝܡܵܢܘܼܬܘܼܟ̣ ܒܡܫܝܼܚܵܐ ܠܹܐ ܝܠܵܗ̇ ܦܵܪܩܵܢܬܘܼܟ̣ ــ ܗ̇ܝ ܐܲܚܟ̰ܝܼ ܐܲܣܒܵܒ ܝܼܠܵܗ̇ ــ ܐܸܠܵܐ ܕܸܡܵܐ ܘܚܲܝܠܵܐ ܕܡܫܝܼܚܵܐ. ܒܘܼܬ ܐܵܗܵܐ: ܠܵܐ ܚܵܝܪܸܬ ܐܘܼܚܟ̰ܵܐ ܠܐܝܼܕܘܼܟ̣ ܕܒܝܼܘܼܗ̇ ܕܒ̣ܝܼܩܵܐ ܝܘܸܬ ܠܡܫܝܼܚܵܐ ܟ̰ܸܡ ܩܘܼܝܵܐ: ܐܝܼܢܵܐ ܒܘܼܫ ܙܵܘܕܵܐ ܠܡܫܝܼܚܵܐ ܒܓܵܢܘܼܗܝ. ܠܵܐ ܚܵܝܪܸܬ ܠܗܹܒ̣ܝܼܘܼܟ̣: ܐܸܠܵܐ ܠܡܫܝܼܚܵܐ: ܡܲܒܘܼܥܵܐ ܕܗܹܒ̣ܝܼܘܼܟ̣. ܠܵܐ ܚܵܝܪܸܬ ܠܗܲܝܡܵܢܘܼܬܘܼܟ̣: ܐܸܠܵܐ ܠܡܫܝܼܚܵܐ ܫܵܪܝܵܢܵܐ ܘܬܲܡܸܡܵܢܵܐ ܕܗܲܝܡܵܢܘܼܬܘܼܟ̣ ــ ܗܸܟ̃ ܡܘܼܡܟܸܢ ܠܲܝܬ ܕܡܲܫ݉ܟ̰ܚܲܚ ܚܵܕܘܼܬܵܐ ܒܓܵܫܲܩܬܵܐ ܠܨܠܵܘܵܬ̈ܲܢ ܘܠܥܵܡܵܠ̈ܲܢ ܘܠܦܸܟܝܼܖ̈ܲܢ. ܓܵܢܲܢ ܟܹܐ ܡܲܫ݉ܟ̰ܚܵܐ ܢܝܵܚܬܵܐ ܒܡܵܢܵܝܘܼܬܵܐ ܕܡܫܝܼܚܵܐ: ܠܵܐ ܕܓܵܢܵܐ ܕܓܵܢܘܼܗ̇. ܐܸܢ ܒܵܥܲܚ ܗܲܡ ܓ̣ܵܠܒܲܚ ܠܣܵܛܵܢܵܐ ܘܗܲܡ ܗܵܘܲܚ ܒܫܠܵܡܵܐ ܥܲܡ ܐܲܠܵܗܵܐ: ܓܵܪܵܓ ܕܚܵܝܪܲܚ ܒܝܑܼܫܘܿܥ. ܡܲܩܘܝܼ ܥܲܝܢܘܼܟ̣ ܥܲܠܘܼܗܝ: ܫܒ̣ܘܿܩ ܕܡܵܘܬܘܼܗܝ: ܚܲܫܘܼ̈ܗܝ: ܚܲܝܠܘܼ̈ܗܝ ܘܚܸܩܪܘܼܗܝ ܘܢܵܘܸܢܓ̰ܝܼܘܼܬܘܼܗܝ ܕܵܝܸܡ ܗܵܘܝܼ ܬܵܙܵܐ ܓܵܘ ܚܝܼܵܠܘܼܟ̣. ܐܝܼܡܵܐ ܕܪܲܥܫܸܬ ܒܨܲܦܪܵܐ: ܚܘܿܪ ܒܝܼܘܼܗܝ. ܟܲܕ ܕܵܡܟ̣ܸܬ ܒܠܲܝܠܹܐ: ܚܘܿܪ ܒܝܼܘܼܗܝ: ܐܵܗ! ܠܵܐ ܫܵܒ̣ܩܸܬ ܕܙܕܘܼܥܝܵܬܘܼ̈ܟ̣ ܝܲܢ ܗܹܒ̣ܝܼܘܼ̈ܟ̣ ܢܵܦܠܝܼ ܒܹܝܠܘܼܟ̣ ܒܹܝܠ ܡܫܝܼܚܵܐ. ܢܦܘܿܠ ܒܵܬ݉ܪܘܼܗܝ ܩܘܼܝܵܐ: ܘܗ̇ܘ ܠܹܐ ܪܲܦܹܐ ܠܘܼܟ̣.