ܚܩܪܐ ܕܝܗܒ̣ܠܘܟ̣ ܐܠܝ: ܝܘܗܒ̣ܐ ܝܘܢ ܐܠܝ (ܝܘܚܢܢ ܝܙ: 22)

ܚܙܹܝܡܘܿܢ ܡܪܲܚܡܵܢܘܼܬܵܐ ܒܹܐ ܗܲܕ ܕܡܵܪܲܢ: ܒܗ̇ܝ ܕܝܘܼܗܒ̣ܵܐ ܝܠܹܗ ܟܠ ܕܐܝܼܬ ܗ݉ܘܵܐ ܠܹܗ ܩܵܬܲܢ. ܐܵܦܸܢ ܕܚܲܕ݉ ܥܣܝܼܪܵܝܵܐ ܕܕܵܘܸܠܬܘܼܗܝ ܒܸܬ ܡܵܠܹܐ ܗ݉ܘܵܐ ܠܹܥܒ̣ܵܕܵܐ ܕܵܘܠܲܬܡܲܢܕ ܠܖܸ̈ܒܘܵܬܹܐ ܕܡܲܠܲܐܟ̣ܹ̈ܐ ܠܥܸܠܸܠ ܡ̣ܢ ܚܫܵܒ̣ܬܲܢ: ܡܸܢ݉ܕܪܸܫ݉ ܩܵܬܲܢ ܡܘܼܚܠܹܥܘܼܗ̇ ܝܠܹܗ ܟܠܵܗ̇ ܕܵܘܸܠܬܘܼܗܝ. ܐܸܢ ܐܲܚܟ̰ܝܼ ܫܵܒ̣ܸܩ ܗ݉ܘܵܐ ܕܐܵܟ̣ܠܲܚ ܗ݉ܘܵܘ ܦܸܖ̈ܬܘܼܟ̣ܹܐ ܕܟܹܐ ܢܵܦܠܝܼ ܡ̣ܢ ܦܸܪܝܘܼܬܵܐ ܕܨܘܼܦܪܘܼܗܝ: ܗܲܪ ܐܵܗܵܐ ܚܕܵܐ ܫܵܦܵܩܲܬ ܥܓ̰ܝܼܒܬܵܐ ܝܗ݉ܘܵܐ ܩܵܬܲܢ: ܐܝܼܢܵܐ ܗ̇ܘ ܗܸܟ̃ ܡܸܢܕܝܼ ܠܹܐ ܥܵܒ̣ܸܕ ܦܲܠܓܵܓܵܐ: ܟܹܐ ܡܲܬܝܸܒ̣ ܠܲܢ ܗܲܪ ܥܲܡܘܼܗܝ ܠܫܲܪܘܼܟܹܐ ܒܩܵܘܢܵܚܠܹܓ̣ܘܼܗܝ. ܐܸܢ ܐܲܚܟ̰ܝܼ ܚܕܵܐ ܡܲܘܵܓ̰ܝܼܒ ܙܥܘܿܪܬܵܐ ܦܵܠܸܛ ܗ݉ܘܵܐ ܩܵܬܲܢ ܡ̣ܢ ܚܲܙܝܼܢܵܐ ܕܡܲܠܟܘܼܬܘܼܗܝ: ܐܵܗܵܐ ܗܲܪ ܚܕܵܐ ܗܲܓ̰ܲܬ ܝܼܗ݉ܘܵܐ ܕܟܹܐ ܡܵܠܝܵܐ ܗ݉ܘܵܐ ܠܹܥܒ̣ܵܕܲܢ ܡܲܚܸܒܵܢܘܼ̈ܗܝ ܗܲܠ ܐܵܒܵܕ: ܐܝܼܢܵܐ ܗ̇ܘ ܒܸܒܥܵܝܵܐ ܝܠܹܗ ܕܟܵܠܬܘܼܗܝ ܗܵܘܝܵܐ ܕܵܘܠܲܬܡܲܢܕ ܐܲܝܟ̣ ܓܵܢܘܼܗܝ: ܘܠܲܝܬ ܠܹܗ ܗܸܟ̃ ܐܝܼܩܵܪܵܐ ܘܗܸܟ̃ ܛܵܒ̣ܬܵܐ ܕܠܹܐ ܝܠܹܗ ܗܘܼܕܪܵܝ ܩܵܐ ܫܲܪܝܼܟܘܼܬܵܐ ܕܗ̇ܝ. ܠܵܐ ܗ݉ܘܹܐ ܠܹܗ ܪܵܙܝܼ ܗܲܠ ܕܩܵܡ ܥܵܒ̣ܸܕ ܠܲܢ ܝܵܖ̈ܘܼܬܹܐ ܒܵܪܵܒܵܪ ܥܲܡ ܓܵܢܘܼܗܝ. ܟܠܵܗ̇ ܕܵܘܸܠܬܘܼܗܝ ܣܘܼܦܩܘܼܗ̇ ܝܠܹܗ ܓܵܘ ܚܲܙܝܼܢܵܐ ܕܥܹܕܬܵܐ: ܘܟܠܵܝ ܡܸܢܕܝܼܵܢܹ̈ܐ ܓܵܘܵܢܵܝܹ̈ܐ ܝܼܢܵܐ ܒܹܝܠܘܼܗܝ ܠܦܖ̈ܝܼܩܘܼܗܝ. ܠܲܝܬ ܐܘܼܦ ܚܕܵܐ ܡܲܢܙܝܼܠ ܓܵܘ ܥܵܡܵܪܲܬܘܼܗܝ ܕܠܹܐ ܝܠܵܗ̇ ܦܬܝܼܚܝܵܐ ܩܵܐ ܛܵܝܸܦܘܼܗܝ: ܘܟܠ ܕܐܝܼܬ ܠܹܗ ܟܹܐ ܝܲܗܒ̣ܸܠ ܠܗ݉ܘܿܢ ܪܘܼܚܨܲܬ ܠܸܫܩܵܠܘܼܗܝ ܩܵܐ ܓܵܢܵܝ. ܟܵܡܝܼܠܘܼܬܵܐ ܒܹܐ ܗܲܕ ܕܡܸܠܝܘܼܬܘܼܗܝ ܒܝܵܗܒ̣ܘܼܗ̇ ܝܠܹܗ ܩܵܐ ܗܲܡܸܢܵܢܵܐ ܚܘܼܪܵܝܝܼ: ܗܲܪ ܐܲܝܟ̣ ܗܵܘܵܐ ܕܒܸܓܪܵܫܘܼܗ̇ ܝܠܹܗ ܒܢܵܦܵܣܘܼܗܝ ܡܫܝܼܚܵܐ ܡܘܼܬܒ̣ܘܼܗܝ ܝܠܹܗ ܟܵܣܵܐ ܕܚܘܼܒܘܼܗܝ ܘܕܫܵܦܵܩܲܬܘܼܗܝ ܠܦܘܼܡܵܐ ܕܗܲܡܸܢܵܢܵܐ: ܘܦܘܼܩܕܵܢܘܼܗܝ ܝܠܹܗ ܠܸܫܬܵܝܵܐ ܡܸܢܘܼܗܝ ܗܲܠ ܐܵܒܵܕ: ܘܟ̰ܘܼܢܟܹܐ ܕܠܹܐ ܬܵܝܸܡ: ܦܝܵܫܵܐ ܝܠܹܗ ܦܘܼܩܕܵܐ ܠܸܫܬܵܝܵܐ ܡܸܢܘܼܗܝ ܠܣܒ̣ܵܥܬܵܐ: ܣܵܒܵܒ ܟܠܹܗ ܕܝܼܘܼܗܝ ܝܠܹܗ. ܕܵܐܟ̣ܝܼ ܟܹܐ ܡܵܨܝܵܐ ܫܡܲܝܵܐ ܝܲܢ ܐܲܪܥܵܐ ܝܵܗܒ̣ܵܐ ܚܕܵܐ ܣܵܒܸܬܘܼܬܵܐ ܒܘܼܫ ܫܲܪܝܼܪܬܵܐ ܕܚܲܒ̣ܪܵܘܵܝܘܼܬܵܐ؟

ܐܝܼܡܵܐ ܕܟܵܠܹܝܢ ܩܲܕ݉ܡ ܬܪܘܿܢܘܿܣܘܼܟ̣: ܠܒ̣ܝܼܫܵܐ ܐܸܣܛܠܹ̈ܐ ܕܐܲܢ݉ܬ ܡܘܼܚܠܹܥܠܘܼܟ̣:

ܟܲܕ ܚܵܙܸܝܢܘܼܟ̣ ܒܫܲܪܝܼܪܘܼܬܵܐ: ܘܡܲܚܸܒܸܢܘܼܟ̣ ܒܟܠ ܕܸܟ̣ܝܘܼܬܵܐ:

ܘܗ̇ܝܓܵܗ: ܡܵܪܝܵܐ: ܝܲܕܥܸܢ ܐܵܢܵܐ:

ܩܵܬܘܼܟ̣ ܝܼܘܸܢ ܟܡܵܐ ܕܲܝܢܵܢܵܐ.