ܚܙܝܪܢ 8
ܣܒܒ ܩܛܝ̈ܠܐ ܪܒܐ ܢܦܝܠ ܠܗ݉ܘܢ: ܣܒܒ ܡ̣ܢ ܐܠܗܐ ܝܗ݉ܘܐ ܦܠܫܐ (ܐ ܒܪܝܡܝܢ ܗ: 22)
ܝܵܐ ܣܲܪܒܵܙ ܦܵܠܫܵܢܵܐ ܬܚܘܿܬ ܒܲܝܕܵܓ̣ ܕܡܵܪܝܵܐ ܡܫܝܼܚܵܐ: ܦܵܟܸܪ ܠܐܵܗܵܐ ܓ̰ܲܪܓܵܐ ܒܚܵܕܘܼܬܵܐ ܩܲܕܝܼܫܬܵܐ. ܣܵܒܵܒ ܕܵܐܟ̣ܝܼ ܕܝܼܗ݉ܘܵܐ ܒܝܵܘܡܵܢܹ̈ܐ ܩܵܕܝܼܡܝܼ: ܗܲܕܟ̣ܵܐ ܝܠܵܗ̇ ܐܘܼܦ ܐܵܕܝܼܵܐ: ܐܸܢ ܦܠܵܫܵܐ ܕܐܲܠܵܗܵܐ ܝܠܹܗ: ܓ̣ܵܠܸܒܘܼܬܵܐ ܝܵܩܝܼܢ ܝܼܠܵܗ̇. ܒܢܘܿܢܹ̈ܐ ܕܪܵܐܘܼܒܹܢ: ܘܓܵܕܵܝܹ̈ܐ: ܘܦܲܠܓܵܐ ܕܫܲܒ̣ܛܵܐ ܕܡܢܲܫܹܐ: ܒܹܝܠ ܟܠܵܝ ܒܟ̰ܵܬܘܿܢܘܼܬܵܐ ܗܵܘܝܼ ܗ݉ܘܵܘ ܐܲܪܒܥܝܼ ܘܚܲܡܫܵܐ ܐܲܠܦܹ̈ܐ ܐ݉ܢܵܫܹ̈ܐ ܕܦܠܵܫܵܐ: ܐܝܼܢܵܐ ܡܸܢ݉ܕܪܸܫ݉: ܒܦܠܵܫܵܝ ܕܥܲܡ ܗܵܓ̣ܖ̈ܵܝܹܐ ܩܛܝܼܠ ܠܗ݉ܘܿܢ ܡܐܵܐ ܐܲܠܦܹ̈ܐ ܐ݉ܢܵܫܹ̈ܐ: ܣܵܒܵܒ ܠܐܲܠܵܗܵܐ ܡܘܼܩܘܸܚ ܠܗ݉ܘܿܢ ܒܦܠܵܫܵܐ: ܘܩܘܼܒܸܠ ܠܹܗ ܨܠܘܿܬܵܝ: ܕܦܝܼܫ ܠܗ݉ܘܿܢ ܒܗܹܒ̣ܝܼ ܒܝܼܘܼܗܝ. ܡܵܪܝܵܐ ܠܹܐ ܦܲܪܸܩ ܒܪܵܒܵܐ ܝܲܢ ܒܚܲܕ݉ܟ̰ܵܐ: ܘܵܓ̰ܸܒܘܼܬܵܐ ܕܝܼܲܢ ܝܼܠܵܗ̇ ܠܹܐܙܵܠܵܐ ܠܵܩܲܕ݉ܡܵܐ ܒܫܸܡܵܐ ܕܝܹܗܘܿܘܵܐ: ܐܘܼܦ ܐܸܢ ܗܵܘܲܚ ܚܕܵܐ ܕܲܣܬܵܐ ܙܥܘܿܪܬܵܐ ܕܐ݉ܢܵܫܹ̈ܐ: ܣܵܒܵܒ ܡܵܪܝܵܐ ܐܲܠܵܗܵܐ ܨܒ̣ܵܐܘܿܬ ܝܼܠܹܗ ܣܲܪܕܵܪܲܢ. ܣܲܝܦܵܐ ܘܩܲܠܚܵܢ ܘܓܹܐܪܵܐ ܘܩܸܫܬܵܐ ܠܵܐ ܫܒ̣ܝܼܩܵܝ ܠܗ݉ܘܿܢ ܠܵܒܵܬ݉ܪܵܝܝܼ: ܐܝܼܢܵܐ ܐܘܼܦ ܠܵܐ ܡܘܼܬܸܒ̣ ܠܗ݉ܘܿܢ ܗܹܒ̣ܝܼܵܝ ܒܐܲܢܹܐ ܟ̰ܲܟܹ̈ܐ. ܐܲܚܢܲܢ ܘܵܓ̰ܸܒ ܝܼܠܵܗ̇ ܕܡܲܦܠܸܚܲܚ ܟܠܵܝ ܐܲܣܒܵܒܹ̈ܐ ܠܵܚܘܿܡܹ̈ܐ: ܐܝܼܢܵܐ ܣܒܵܪܬܲܢ ܓܵܪܵܓ ܗܵܘܝܵܐ ܒܡܵܪܝܵܐ ܒܢܲܦ̮ܫܘܼܗܝ ــ ܣܵܒܵܒ ܗ̇ܘ ܝܼܠܹܗ ܣܲܝܦܵܐ ܘܩܲܠܚܵܢ ܕܛܵܝܸܦܘܼܗܝ. ܗܲܓ̰ܲܬ ܕܡܲܢܬܵܝܬܵܐ ܓܘܼܪܬܵܐ ܐܵܗܵܐ ܝܗ݉ܘܵܐ: ܕܦܠܵܫܵܐ ܦܠܵܫܵܐ ܕܐܲܠܵܗܵܐ ܝܗ݉ܘܵܐ. ܕܵܘܣܬܝܼ̈ ܡܘܼܚܸܒܹ̈ܐ: ܒܦܠܵܫܲܢ ܕܥܲܡ ܚܛܝܼܬܵܐ ܒܲܪܵܝܬܵܐ ܝܲܢ ܓܵܘܵܝܬܵܐ: ܥܲܡ ܚܸܠܛܹ̈ܐ ܕܝܘܼܠܦܵܢܵܐ ܝܲܢ ܕܥܵܡܵܠ: ܥܲܡ ܒܝܼܫܘܼܬܵܐ ܪܘܼܚܵܢܵܝܬܵܐ ܕܒܕܘܼܟܵܢܹ̈ܐ ܖ̈ܵܡܹܐ ܝܲܢ ܟܘܼܦܹ̈ܐ: ܥܲܡ ܣܵܛܵܢܵܐ ܘܚܲܒ̣ܖ̈ܵܘܵܬܘܼܗܝ: ܦܠܵܫܵܐ ܕܝܹܗܘܿܘܵܐ ܒܸܦܠܵܫܵܐ ܝܘܲܚ: ܘܐܸܢ ܒܓܵܢܘܼܗܝ ܠܹܐ ܡܵܨܝܵܐ ܕܦܵܐܸܫ ܓ̣ܠܝܼܒܵܐ: ܐܲܚܢܲܢ ܙܹܐ ܠܹܐ ܝܠܵܗ̇ ܠܵܙܸܡ ܕܙܵܕܥܲܚ ܡ̣ܢ ܫܡܵܛܵܐ. ܠܵܐ ܫܵܥܫܝܼܬܘܿܢ ܡ̣ܢ ܩܲܕ݉ܡ ܐܵܢܝܼ ܕܝܼܢܵܐ ܪܵܒܵܐ ܒܡܸܢܝܵܢܵܐ: ܠܵܐ ܐܲܢܟܸܪܝܼܬܘܿܢ ܡ̣ܢ ܟ̰ܵܬܘܿܢܘܼܝܵܬܹ̈ܐ ܝܲܢ ܒܹܐ ܡܘܼܡܟܸܢܘܼܝܵܬܹ̈ܐ: ܠܵܐ ܙܵܕܥܝܼܬܘܿܢ ܡ̣ܢ ܕܲܪܒܲܢܬܵܐ ܝܲܢ ܡܵܘܬܵܐ: ܡܚܹܝܡܘܿܢ ܒܣܲܝܦܵܐ ܕܬܪܹܝ ܦܘܼܡܵܢܹ̈ܐ ܕܪܘܼܚܵܐ. ܕܡܵܪܝܵܐ ܝܠܹܗ ܦܠܵܫܵܐ ܘܗ̇ܘ ܒܸܬ ܣܵܦܹܐ ܠܕܸܫ̃ܡܸܢܘܼ̈ܗܝ ܒܐܝܼܕܲܢ.
ܪܚܘܿܛܘܿܢ ܥܲܣܟܵܖ̈ܘܵܬܘܼܗܝ: ܩܵܝܡܝܼ ܐܲܪܥܵܐ ܘܓܹܗܲܢܵܐ:
ܡܘܼܪܡܘܼܗ̇ ܝܠܹܗ ܗ̇ܘ ܒܲܝܕܵܓ̣ܘܼܗܝ! ܡܵܢܝܼ ܝܠܹܗ ܕܘܼܒܵܪ ܘܫܥܝܼܫܵܐ؟
ܙܲܚܡܹ̈ܐ ܙܹܠ݉ܡܘܿܢ ܗܲܪ ܒܵܬ݉ܪܘܼܗܝ: ܩܘܼܪܒܵܐ ܡܵܪܝܵܐ ܚܲܝܠܵܢܵܐ:
ܘܡܵܛܝܼܬܘܿܢ ܝܵܩܝܼܢ ܠܟܸܣܠܘܼܗܝ: ܗܘܼܟܡܹܗ ܗܲܠ ܐܵܒܵܕ ܦܝܼܫܵܐ.