ܚܙܝܪܢ 9
ܓܘܪܘܣ ܠܗ ܡܪܝܐ ܠܥܒ̣ܕܐ ܥܡܢ: ܗ݉ܘܐ ܠܢ ܚܕܝ̈ܐ (ܡܙܡܘܪܐ ܩܟܘ: 3)
ܚܲܕ݉ܟܡܵܐ ܟܖܸ̈ܣܛܝܵܢܹܐ ܗܲܪ ܟܹܐ ܒܵܥܝܼ ܓܲܫܩܝܼ ܠܓܹܒܵܐ ܚܘܼܒ̣ܝܵܢܵܐ ܕܟܠ ܡܸܢܕܝܼ: ܘܠܦܵܟܘܿܪܹܐ ܙܵܘܕܵܐ ܥܲܠ ܙܲܗܡܲܬܹ̈ܐ ܕܩܘܼܒܠܹܐ ܝܢܵܐ ܡ̣ܢ ܥܲܠ ܒܘܼܖ̈ܟܵܬܹܐ ܕܐܲܠܵܗܵܐ ܝܘܼܗܒ̣ܵܐ ܝܠܹܗ ܩܵܬܵܝ. ܒܲܩܸܪ ܡܸܢܵܝ: ܕܵܐܟ̣ܝܼ ܝܢܵܐ ܚܲܝܵܝ ܟܖܸ̈ܣܛܝܵܢܹܐ: ܘܐܵܢܝܼ ܒܸܬ ܫܲܪܝܼ ܠܗܲܩܘܼܝܹܐ ܒܘܼܬ ܟ̰ܲܢܟ̰ܲܠܝܵܬܵܝ̈ ܘܝܲܠܨܘܼܝܵܝ̈ ܚܲܝܠܵܢܹ̈ܐ: ܕܲܖ̈ܩܘܼܒ̣ܠܘܼܝܵܬܹܐ ܕܐܝܼܬ ܩܲܕ݉ܡܵܝ: ܘܚܲܛܵܝܘܼܬܵܐ ܕܠܸܒܵܝ: ܘܚܲܕ݉ܟ̰ܵܐ ܦܵܝܫܵܐ ܗܸܟ̃ ܠܹܐ ܡܲܕܟ̣ܸܪܝܼ ܠܖ̈ܲܚܡܹܐ ܘܗܲܝܲܪܬܵܐ ܕܐܲܠܵܗܵܐ ܡܘܼܡܛܝܼܵܐ ܝܠܹܗ ܩܵܬܵܝ. ܐܝܼܢܵܐ ܚܲܕ݉ ܟܪܸܣܛܝܵܢܵܐ ܕܐܲܗܘܵܠܘܼܗܝ ܪܘܼܚܵܢܵܝܬܵܐ ܣܵܠܵܡܲܬ ܝܼܠܵܗ̇: ܒܸܬ ܐܵܬܹܐ ܒܚܵܕܘܼܬܵܐ: ܘܒܸܬ ܐܵܡܸܪ: ܒܸܬ ܗܲܡܙܸܡ: ܠܵܐ ܒܘܼܬ ܓܵܢܝܼ: ܐܸܠܵܐ ܒܘܼܬ ܚܸܩܪܵܐ ܕܐܲܠܵܗܝܼ: ܩܵܡ ܡܲܐܣܸܩ ܠܝܼ ܡ̣ܢ ܓܘܼܒܵܐ ܕܩܵܠܡܵܩܵܠ: ܡ̣ܢ ܛܝܼܢܵܐ ܕܙܸܢܵܐ: ܘܡܘܼܩܸܡ ܠܹܗ ܥܲܠ ܩܵܝܵܐ ܐܲܩܠܵܬܝܼ̈: ܡܲܩܘܘܼܝܹܐ ܦܵܣܘܿܥܠܝܵܬܝܼ̈: ܘܡܘܼܬܸܒ̣ ܠܹܗ ܒܦܘܼܡܝܼ ܙܡܵܪܬܵܐ ܚܲܕܬܵܐ: ܬܸܫܒܘܿܚܬܵܐ ܠܐܲܠܵܗܲܢ. ܡܵܪܝܵܐ ܐܝܼܬ ܠܹܗ ܪܵܒܵܐ ܩܵܬܝܼ: ܒܘܼܬ ܐܵܗܵܐ ܒܸܦܨܵܚܵܐ ܝܘܸܢ. ܚܲܕ݉ ܒܪܘܿܢܵܐ ܕܐܲܠܵܗܵܐ ܠܹܐ ܡܵܨܹܐ ܗܲܩܹܐ ܒܘܼܬ ܓܵܢܘܼܗܝ ܚܕܵܐ ܗܲܩܝܲܬ ܒܘܼܫ ܨܦܵܝܝܼ ܡ̣ܢ ܐܵܗܵܐ. ܣܲܪܲܣܬ ܝܼܠܵܗ̇ ܕܟܹܐ ܩܲܒܠܲܚ ܓ̰ܘܼܖ̈ܵܒܹܐ: ܐܝܼܢܵܐ ܗܲܪ ܚܲܕ݉ ܗܵܕܵܐ ܣܲܪܲܣܬ ܝܼܠܵܗ̇ ܕܟܹܐ ܦܵܝܫܲܚ ܦܘܼܨܝܹܐ ܡܸܢܵܝ. ܡܸܓ̰ܸܕ ܝܼܠܵܗ̇ ܕܐܝܼܬ ܒܝܼܲܢ ܚܪܵܒ̣ܵܐ: ܘܪܵܒܵܐ ܒܦܵܫܲܡܬܵܐ ܒܝܼܕܵܥܘܼܗ̇ ܝܘܲܚ ܐܵܗܵܐ: ܐܝܼܢܵܐ ܐܘܼܦ ܟ̰ܸܡ ܣܲܪܲܣܬ ܝܼܠܵܗ̇ ܕܐܝܼܬ ܠܲܢ ܚܲܕ݉ ܦܵܪܘܿܩܵܐ ܡܨܹܐ ܟܠ: ܕܟܹܐ ܓ̣ܵܠܸܒ ܠܗ݉ܘܿܢ ܐܲܢܹܐ ܚܖ̈ܵܒ̣ܹܐ: ܘܕܟܹܐ ܦܵܠܸܛ ܠܲܢ ܡ̣ܢ ܬܚܘܿܬ ܗܘܼܟܡܵܝ. ܟܲܕ ܓܲܫܩܲܚ ܠܵܒܵܬ݉ܪܲܢ: ܠܹܐ ܡܵܨܲܚ ܣܵܪܒ̣ܲܚ ܕܢܦܝܼܠܹܐ ܝܘܲܚ ܓܵܘ ܒܲܬܠܵܓ̣ ܕܒܹܐ ܗܹܒ̣ܝܼ: ܘܕܚܕܝܼܪܹܐ ܝܘܲܚ ܓܵܘ ܪܵܘܘܿܠܵܐ ܕܡܘܼܟܵܟ̣̈ܵܐ: ܐܝܼܢܵܐ ܐܘܼܦ ܠܹܐ ܡܵܨܲܚ ܠܸܣܪܵܒ̣ܵܐ ܕܚܠܝܼܨܹܐ ܝܘܲܚ ܡܸܢܵܝ ܒܣܵܠܵܡܲܬܘܼܬܵܐ: ܗܵܘܹܐ ܚܩܝܼܪܵܐ ܒܵܠܵܕܓ̰ܝܼܲܢ ܘܗܲܝܸܪܵܢܲܢ ܚܲܝܠܵܢܵܐ: ܠܹܗ ܝܠܹܗ ܫܒ̣ܝܼܩܲܢ ܓܵܘܵܝ. ܟܡܵܐ ܕܥܵܡܘܿܩܹ̈ܐ ܗ݉ܘܝܼܹܐ ܝܢܵܐ ܝܲܠܨܘܼ̈ܝܲܢ: ܗܵܕܵܐ ܪܵܡܹܐ ܘܵܓ̰ܸܒ ܝܼܠܵܗ̇ ܕܗܵܘܝܼ ܫܘܼ̈ܒ̣ܚܲܢ ܠܐܲܠܵܗܵܐ: ܗ̇ܘ ܕܡܘܼܥܒ̣ܸܪܲܢ ܝܼܠܹܗ ܡ̣ܢ ܟܠܵܝ ܐܲܢܹܐ: ܘܢܛܝܼܪܲܢ ܝܼܠܹܗ ܗܲܠ ܐܵܕܝܼܵܐ. ܚܲܫܲܢ ܓܵܪܵܓ ܕܠܵܐ ܡܲܚܪܸܒ̣ܝܼ ܠܒܲܣܝܼܡܘܼܬܵܐ ܕܙܡܵܪܬܲܢ.