ܚܙܝܪܢ 2
ܣܒܒ ܒܣܪܐ ܟܐ ܫܗܘܬ ܕܪܩܘܒ̣ܠ ܕܪܘܚܐ:
ܘܪܘܚܐ ܟܐ ܫܗܘܬܐ ܕܪܩܘܒ̣ܠ ܕܒܣܪܐ (ܓܠܛܝ̈ܐ ܗ: 17)
ܓܵܘ ܠܸܒܵܐ ܕܟܠ ܗܲܡܸܢܵܢܵܐ ܒܕܵܝܸܡܘܼܬܵܐ ܐܝܼܬ ܚܲܕ݉ ܦܠܵܫܵܐ ܒܹܝܠ ܐܲܨܠܵܐ ܚܵܕ݉ܬܵܐ ܠܐܲܨܠܵܐ ܥܲܬܝܼܩܵܐ. ܐܲܨܠܵܐ ܥܲܬܝܼܩܵܐ ܪܵܒܵܐ ܚܵܦܛܵܢܵܐ ܝܠܹܗ: ܘܠܹܐ ܬܵܠܸܩ ܗܸܟ̃ ܦܸܪܨܲܬ ܠܡܲܦܠܘܼܚܹܐ ܐܲܣܒܵܒܘܼ̈ܗܝ ܡܲܡܝܸܬܵܢܹ̈ܐ ܠܕܲܪܩܘܼܒ̣ܠ ܕܫܵܦܵܩܲܬ ܚܲܕܬܵܐ: ܐܝܼܢܵܐ ܒܓܹܒܵܐ ܐ݉ܚܸܪ݉ܢܵܐ: ܐܲܨܠܵܐ ܚܵܕ݉ܬܵܐ ܗܲܡܵܫܵܐ ܪܥܝܼܫܵܐ ܝܠܹܗ: ܠܸܟܠܵܝܵܐ ܩܲܕ݉ܡ ܡܲܚܘܵܬܹ̈ܐ ܕܕܸܫ̃ܡܸܢܘܼܗܝ ܘܠܸܓ̣ܠܵܒܘܼܗܝ. ܫܵܦܵܩܲܬ ܕܐܝܼܬ ܒܓܵܘܲܢ ܒܸܬ ܡܲܦܠܸܚܵܐ ܠܨܠܘܿܬܵܐ ܘܠܗܲܝܡܵܢܘܼܬܵܐ: ܘܠܗܹܒ̣ܝܼ: ܘܠܚܘܼܒܵܐ: ܩܵܐ ܛܪܵܕܬܵܐ ܕܒܝܼܫܬܵܐ. ܟܹܐ ܫܵܩܠܵܐ ܟܠܵܝ ܟ̰ܲܟܹ̈ܐ ܐܲܠܵܗܵܝܹ̈ܐ: ܘܟܹܐ ܕܵܒ̣ܩܵܐ ܟܘܼܫܬܝܼ ܒܢܸܓܵܪܵܢܘܼܬܵܐ. ܐܲܢܹܐ ܬܪܹܝ ܐܲܨܠܹ̈ܐ ܕܲܖ̈ܩܘܼܒ̣ܠܵܝܹܐ ܗܸܟ̃ ܠܹܐ ܫܵܠܝܼ ܡ̣ܢ ܠܸܦܠܵܫܵܐ ܟܡܵܐ ܕܥܲܪܩܘܼܠܹܐ ܝܢܵܐ ܓܵܘ ܐܵܗܵܐ ܕܘܼܢܝܹܐ. ܦܠܵܫܵܐ ܕܟܪܸܣܛܝܵܢܵܐ ܥܲܡ ܐܵܦܘܿܠܘܿܢ ܐܲܚܟ̰ܝܼ ܬܠܵܬ݉ ܣܵܥܲܬܹ̈ܐ ܓܪܝܼܫ ܠܹܗ: ܐܝܼܢܵܐ ܦܠܵܫܵܐ ܕܟܪܸܣܛܝܵܢܵܐ ܥܲܡ ܓܵܢܵܐ ܕܓܵܢܘܼܗܝ ܓܪܝܼܫ ܠܹܗ ܗܲܪ ܡ̣ܢ ܦܠܵܛܬܘܼܗܝ ܡ̣ܢ ܒܲܝܬܘܼܗܝ ܗܲܠ ܡܛܵܝܬܘܼܗܝ ܠܢܲܗܪܵܐ ܕܝܘܿܪܕܢܵܢ. ܕܸܫ̃ܡܸܢ ܐܘܼܚܟ̰ܵܐ ܒܩܘܼܝܘܼܬܵܐ ܥܡܝܼܪܵܐ ܝܠܹܗ ܒܝܼܲܢ ܕܗܸܟ̃ ܠܹܐ ܡܵܨܲܚ ܗܵܘܲܚ ܪܲܕ ܡܸܢܘܼܗܝ ܟܡܵܐ ܕܒܐܵܗܵܐ ܦܲܓ̣ܪܵܐ ܥܡܝܼܪܹܐ ܝܘܲܚ. ܐܝܼܢܵܐ ܐܵܦܸܢ ܐܝܼܬ ܠܲܢ ܕܸܫ̃ܡܸܢܹ̈ܐ ܚܲܝܠܵܢܹ̈ܐ ܘܪܵܒܵܐ ܓܵܗܹ̈ܐ ܒܸܦܠܵܫܵܐ ܝܘܲܚ: ܐܝܼܬ ܠܲܢ ܚܲܕ݉ ܗܲܝܸܪܵܢܵܐ ܚܲܝܠܬܵܢܵܐ: ܕܝܼܠܹܗ ܡܫܝܼܚܵܐ: ܣܘܼܠܛܵܢ ܕܦܘܼܪܩܵܢܲܢ: ܗ̇ܘ ܕܥܲܡܲܢ ܝܼܠܹܗ ܕܵܝܸܡ ܘܕܒܹܥܒ̣ܵܕܲܢ ܝܼܠܹܗ ܚܵܛܸܪܓ̰ܲܡܥ ܕܒܐ݉ܚܲܪܬܵܐ ܒܸܬ ܦܵܠܛܲܚ ܙܵܘܕܵܐ ܡ̣ܢ ܓ̣ܵܠܒܵܢܹ̈ܐ ܒܝܼܘܼܗܝ. ܐܲܨܠܲܐ ܚܵܕ݉ܬܵܐ: ܟܲܕ ܐܝܼܬ ܠܹܗ ܗܲܕܟ̣ܵܐ ܥܘܼܕܪܵܢܵܐ: ܒܘܼܫ ܚܲܝܠܵܢܵܐ ܝܠܹܗ ܡ̣ܢ ܕܸܫ̃ܡܸܢܘܼ̈ܗܝ. ܐܸܕܝܘܿܡ ܒܸܦܠܵܫܵܐ ܝܘܸܬ ܥܲܡ ܕܸܫ̃ܡܸܢ؟ ܣܵܛܵܢܵܐ: ܘܥܵܠܡܵܐ: ܘܒܸܣܪܵܐ: ܟܠܵܝ ܩܝܼܡܹܐ ܝܢܵܐ ܠܕܲܪܩܘܼܒ̣ܠܘܼܟ̣؟ ܠܵܐ ܦܵܝܫܸܬ ܒܹܐ ܠܸܒܵܐ ܝܲܢ ܟܝܼܡ ܓ̰ܘܼܪܐܲܬ: ܙܹܠ݉ ܠܩܲܕ݉ܡܘܼܟ̣ ܒܦܠܵܫܵܐ: ܣܵܒܵܒ ܐܲܠܵܗܵܐ ܒܓܵܢܘܼܗܝ ܥܲܡܘܼܟ̣ ܝܼܠܹܗ: ܝܼܗܘܿܘܵܐ ܢܲܣܝܼ ܝܠܹܗ ܒܲܝܕܵܓ̣ܘܼܟ̣: ܗ̇ܘ ܝܼܠܹܗ ܒܵܣܡܵܢܵܐ ܕܕܲܖ̈ܒܵܬܘܼܟ̣. ܠܵܐ ܙܕܸܥ ܒܸܬ ܓ̣ܵܠܒܸܬ: ܣܵܒܵܒ ܡܵܢܝܼ ܡܵܨܹܐ ܫܵܡܸܛ ܠܐܲܚܝܼܕ ܟܠ؟ ܦܠܘܿܫ ܟܲܕ ܗܵܘܹܝܬ ܒܸܚܝܵܪܵܐ ܠܝܑܼܫܘܿܥ: ܘܐܵܦܸܢ ܦܠܵܫܘܼܟ̣ ܗܵܘܹܐ ܝܲܪܝܼܟ̣ܵܐ ܘܩܸܫܝܵܐ: ܚܠܝܼܬܵܐ ܒܸܬ ܗܵܘܝܵܐ ܓ̣ܵܠܸܒܘܼܬܵܐ: ܘܚܩܝܼܪܵܐ ܒܸܬ ܗܵܘܹܐ ܦܪܵܥܵܐ ܩܘܼܘܸܠܵܐ.
ܬܘܼܢܕ ܝܼܠܹܗ ܦܠܵܫܵܐ: ܟ̰ܸܡ ܝܲܪܝܼܟ̣ܵܐ
ܗܵܕܸܪ ܩܸܫܬܘܼܟ̣: ܡܬܘܿܚ
ܣܲܪܕܵܪܲܢ ܗܵܐ ܩܘܼܪܒܵܐ ܘܒܪܝܼܟ̣ܵܐ
ܦܨܘܿܚ ܝܵܐ ܚܲܒ̣ܪܝܼ: ܦܨܘܿܚ.