ܝܘܢ: ܠܚܩܠܐ: ܘܓܒܝܢ ܫܒܠ̈ܐ (ܪܥܘܬ ܒ: 2)

ܟܪܸܣܛܝܵܢܵܐ ܦܫܝܼܡܵܐ ܘܡܘܼܠܝܸܨܵܐ: ܬܵܐ ܘܓܵܒܝܼ ܫܸܒܠܹ̈ܐ ܐܸܕܝܘܿܡ ܓܵܘ ܚܲܩܠܵܐ ܓܘܼܪܬܵܐ ܕܩܵܘܠܹ̈ܐ. ܕܘܼ ܝܢܵܐ ܟ̰ܸܡ ܪܵܒܵܐ ܩܵܘܠܹ̈ܐ ܡܵܪܹܐ ܛܝܼܡܵܐ ܕܠܚܝܼܡܹܐ ܝܢܵܐ ܟ̰ܸܡ ܩܵܐ ܣܢܝܼܩܘܼܝܵܬܘܼ̈ܟ̣. ܫܩܘܿܠ ܐܵܗܵܐ ܩܵܘܠܵܐ ــ ܙܹܠܵܐ ܛܘܼܚܛܸܚܵܐ ܠܹܐ ܫܵܡܸܛ: ܘܩܸܛܘܼ ܕܝܼܠܵܗ̇ ܙܲܒܘܼܢ ܠܹܐ ܡܲܟ̰ܡܹܐ. ܐܵܗܵܐ ܠܹܐ ܝܠܹܗ ܠܚܝܼܡܵܐ ܠܐܲܗܘܵܠܘܼܟ̣؟ ܚܲܕ݉ ܙܹܠܵܐ: ܒܹܐ ܩܘܼܘܲܬ: ܒܵܨܘܿܪܵܐ ܘܙܲܒܘܼܢ: ܚܲܕ݉ ܙܹܠܵܐ ܛܘܼܚܛܸܚܵܐ: ܒܘܼܫ ܙܲܒܘܼܢ ܡ̣ܢ ܙܲܒܘܼܢܘܼܬܵܐ ܒܓܵܢܘܼܗ̇: ܙܹܠܵܐ: ܘܐܘܼܦ ܗ̇ܘ ܛܘܼܚܛܸܚܵܐ: ܐܝܼܢܵܐ ܠܵܐ ܬܵܒ̣ܸܪܘܼܟ̣: ܐܸܠܵܐ ܠܕܲܪܩܘܼܒ̣ܠ ܕܐܵܗܵܐ: ܒܸܬ ܚܲܕܸܬ ܠܘܼܟ̣ ܘܒܸܬ ܚܲܠܸܢܘܼܟ̣. ܒܵܥܹܝܬ ܓܵܒܹܝܬ ܚܲܕ݉ ܫܸܒܠܵܐ ܐ݉ܚܸܪ݉ܢܵܐ؟ ܕܘܼ ܝܠܹܗ ــ ܬܹܝܡܘܿܢ ܠܟܸܣܠܝܼ ܟܠܵܘܟ̣ܘܿܢ ܓ̰ܹܗܝܹ̈ܐ ܘܫܩܝܼܠܹܐ ܟܵܖ̈ܵܬܹܐ: ܘܐܵܢܵܐ ܒܸܬ ܡܲܢܝܸܚܸܢܵܘܟ̣ܘܿܢ. ܡܘܼܕܝܼ ܚܲܒܖܹ̈ܐ ܒܲܣܝܼܡܹ̈ܐ! ܠܸܒܘܼܟ̣ ܢܵܙܸܟ ܝܼܠܹܗ: ܐܘܼܦ ܐܲܓ̣ܵܝܘܼܟ̣ ܒܝܼܕܵܥܵܐ ܝܠܹܗ ܕܗܲܕܟ̣ܵܐ ܝܠܵܗ̇: ܒܘܼܬ ܐܵܗܵܐ ܗܲܡܙܘܼܡܹܐ ܝܠܹܗ ܥܲܡܘܼܟ̣ ܗܲܕܟ̣ܵܐ ܒܡܲܟܝܼܟ̣ܘܼܬܵܐ. ܠܹܐ ܡܲܨܝܸܬܸܬ ܗܲܪ ܐܵܕܝܼܵܐ ܘܐܵܬܹܝܬ ܠܟܸܣܠܘܼܗܝ؟ ܕܘܼ ܝܠܹܗ ܚܲܕ݉ ܫܸܒܠܵܐ ܐ݉ܚܸܪ݉ܢܵܐ ــ ܠܵܐ ܙܵܕܥܲܬܝ: ܬܸܘܸܠܥܬܵܐ ܕܝܲܥܩܘܿܒ̣: ܐ݉ܢܵܫܹ̈ܐ ܕܝܼܣܪܵܝܹܠ: ܐܵܢܵܐ ܩܲܡ ܗܲܝܸܪܸܢܵܟ̣ܝ: ܒܹܐܡܵܪܵܐ ܝܠܹܗ ܡܵܪܝܵܐ: ܘܦܵܪܘܿܩܵܟ̣ܝ: ܩܲܕܝܼܫܵܐ ܕܝܼܣܪܵܝܹܠ. ܕܵܐܟ̣ܝܼ ܡܵܨܹܝܬ ܙܵܕܥܸܬ ܟܲܕ ܐܝܼܬ ܠܘܼܟ̣ ܚܕܵܐ ܚܵܛܸܪܓ̰ܲܡܥܘܼܬܵܐ ܩܘܝܼܬܵܐ ܕܐܲܝܟ̣ ܐܵܗܵܐ؟ ܟܹܐ ܡܵܨܹܝܬ ܠܓܵܒܘܿܝܹܐ ܥܸܣܪܵܐ ܐܲܠܦܹ̈ܐ ܫܸܒܠܹ̈ܐ ܕܲܗܒ̣ܵܢܵܝܹ̈ܐ ܕܐܲܝܟ̣ ܐܲܢܹܐ. ܓܪܝܼܕܠܝܼ ܐܲܝܟ̣ ܥܲܝܒ̣ܵܐ ܥܵܘܠܘܼ̈ܟ̣: ܘܐܲܝܟ̣ ܥܢܵܢܵܐ ܚܛܝܼܵܬܘܼ̈ܟ̣. ܝܲܢ ܐܵܗܵܐ ــ ܐܸܢ ܗܵܘܝܼ ܚܛܝܼܵܬܵܘ̈ܟ̣ܘܿܢ ܐܲܝܟ̣ ܩܸܪܡܝܼܙ: ܐܲܝܟ̣ ܬܲܠܓܵܐ ܒܸܬ ܚܵܘܪܝܼ: ܐܸܢ ܣܵܡܩܝܼ ܐܲܝܟ̣ ܬܸܘܸܠܥܬܵܐ: ܐܲܝܟ̣ ܥܲܡܪܵܐ ܒܸܬ ܗܵܘܝܼ. ܝܲܢ ܐܵܗܵܐ ــ ܪܘܼܚܵܐ ܘܟܵܠܬܵܐ ܒܹܐܡܵܪܵܐ ܝܢܵܐ: ܬܵܐ. ܘܗ̇ܘ ܕܝܼܠܹܗ ܨܸܗܝܵܐ ܐܵܬܹܐ. ܘܗ̇ܘ ܕܒܵܣܡܵܐ ܠܹܗ ܫܵܩܸܠ ܡ̈ܝܼܵܐ ܕܚܲܝܹ̈ܐ ܚܘܼܪܵܝܝܼ. ܚܲܩܠܵܐ ܕܐܵܓ̣ܵܝܲܢ ܪܵܒܵܐ ܫܲܡܝܼܢܬܵܐ ܝܠܵܗ̇. ܚܙܝܼ ܟܠܵܝ ܫܸܒܠܹ̈ܐ ܕܐܝܼܬ ܩܲܕ݉ܡ ܥܲܝܢܘܼ̈ܟ̣: ܗܲܡܸܢܵܢܵܐ ܙܲܒܘܼܢ ܘܡܸܣܟܹܢܵܐ! ܓ̰ܲܡܸܥ ܠܗ݉ܘܿܢ ܘܥܒ̣ܘܿܕ ܠܗ݉ܘܿܢ ܕܝܼܘܼܟ̣: ܣܵܒܵܒ ܡܫܝܼܚܵܐ ܦܵܩܘܿܕܘܼܟ̣ ܝܼܠܹܗ ܠܸܫܩܵܠܵܝ. ܠܵܐ ܙܵܕܥܸܬ: ܐܲܚܟ̰ܝܼ ܗܲܡܸܢ. ܓ̰ܲܡܸܥ ܠܗ݉ܘܿܢ ܐܲܢܹܐ ܩܵܘܠܹ̈ܐ ܚܸܠܝܹ̈ܐ: ܡܚܝܼ ܠܗ݉ܘܿܢ ܒܓ̰ܲܪܓ̰ܵܪ ܕܬܲܚܡܲܢܬܵܐ ܘܚܝܝܼ ܒܝܼܵܝ ܒܚܵܕܘܼܬܵܐ.