ܕܗܘܝܢ ܗ݉ܘܐ ܐܝܟ̣ ܝܖ̈ܚܐ ܩܕ݉ܡܝ̈ܐ (ܐܝܘܒ̣ ܟܛ: 2)

ܪܵܒܵܐ ܟܖܸ̈ܣܛܝܵܢܹܐ ܟܹܐ ܡܵܨܝܼ ܠܸܚܝܵܪܵܐ ܠܙܲܒ̣ܢܵܐ ܕܲܥܒ̣ܲܪ ܒܒܲܣܝܼܡܘܼܬܵܐ: ܟܲܕ ܢܵܐܪܵܙܝܼ ܝܢܵܐ ܒܙܲܒ̣ܢܵܐ ܕܩܵܐܸܡ. ܟܹܐ ܕܵܟ̣ܪܝܼ ܠܝܵܘܡܵܢܹ̈ܐ ܕܡܘܼܥܒ̣ܸܪܹܐ ܝܢܵܐ ܒܨܵܘܗܒܲܬ ܥܲܡ ܡܵܪܝܵܐ ܕܒܘܼܫ ܒܲܣܝܼܡܹ̈ܐ ܝܗ݉ܘܵܘ ܡ̣ܢ ܟܠܵܝ ܙܲܒ̣ܢܹ̈ܐ ܐ݉ܚܹܖ̈݉ܢܹܐ: ܐܝܼܢܵܐ ܙܲܒ̣ܢܵܐ ܕܩܵܐܸܡ ܩܛܝܼܘܵܐ ܝܠܹܗ ܒܚܸܫܟܵܐ ܘܒܦܵܫܲܡܬܵܐ. ܒܚܕܵܐ ܥܕܵܢܵܐ ܚܝܹܐ ܝܗ݉ܘܵܘ ܩܘܼܪܒܵܐ ܠܡܫܝܼܚܵܐ: ܐܝܼܢܵܐ ܐܵܕܝܼܵܐ ܒܸܪܥܵܫܵܐ ܝܢܵܐ ܕܪܚܝܼܩܹܐ ܝܢܵܐ ܡܸܢܘܼܗܝ: ܘܒܹܐܡܵܪܵܐ ܝܢܵܐ: ܬܲܟܠܵܐ ܕܗܵܘܹܝܢ ܗ݉ܘܵܐ ܐܲܝܟ̣ ܝܲܖ̈ܚܹܐ ܩܲܕ݉ܡܵܝܹ̈ܐ. ܒܸܩܒ̣ܵܠܵܐ ܝܢܵܐ ܕܠܲܝܬ ܠܗ݉ܘܿܢ ܐܵܕܝܼܵܐ ܫܠܵܡܵܐ ܕܚܝܼܵܠ: ܝܲܢ ܕܠܲܝܬ ܠܗ݉ܘܿܢ ܚܵܕܘܼܬܵܐ ܒܦܘܼܠܚܵܢܵܐ ܕܫܵܦܵܩܲܬ: ܝܲܢ ܕܐܸܢܝܼܲܬܵܝ ܐܵܕܝܼܵܐ ܠܹܐ ܝܠܵܗ̇ ܐܘܼܚܟ̰ܵܐ ܢܵܙܸܟ: ܝܲܢ ܕܠܲܝܬ ܠܗ݉ܘܿܢ ܩܲܝܪܲܬ ܐܘܼܚܟ̰ܵܐ ܓܘܼܪܬܵܐ ܩܵܐ ܐܝܼܩܵܪܵܐ ܕܡܵܪܝܵܐ. ܣܵܒܵܒܹܐ ܕܐܵܗܵܐ ܐܲܗܘܵܠ ܡܲܦܫܸܡܵܢܬܵܐ ܬܵܗܵܖܹ̈ܐ ܬܵܗܵܖܹ̈ܐ ܝܢܵܐ. ܟܹܐ ܗܵܘܝܵܐ ܕܩܵܝܡܵܐ ܡ̣ܢ ܪܸܦܝܘܼܬܵܐ ܒܨܠܘܿܬܵܐ: ܣܵܒܵܒ ܪܸܦܝܘܼܬܵܐ ܒܨܠܘܿܬܵܐ ܝܠܵܗ̇ ܫܵܪܵܝܬܵܐ ܕܟܠܵܗ̇ ܕܝܵܪܬܵܐ ܠܵܒܵܬ݉ܪܵܐ ܒܪܘܼܚܵܢܵܝܘܼܬܵܐ. ܝܲܢ ܒܲܠܟܵܐ ܒܸܦܠܵܛܵܐ ܝܠܵܗ̇ ܡ̣ܢ ܣܓ̣ܵܕܬܵܐ ܠܨܵܢܲܡܹ̈ܐ. ܒܲܠܟܵܐ ܡܸܠܝܵܐ ܝܠܹܗ ܠܸܒܵܐ ܡ̣ܢ ܚܲܕ݉ ܡܸܢܕܝܼ ܐ݉ܚܸܪ݉ܢܵܐ: ܠܵܐ ܡ̣ܢ ܐܲܠܵܗܵܐ. ܚܘܼܒܵܐ ܦܝܼܫܵܐ ܝܠܹܗ ܝܘܼܗܒ̣ܵܐ ܩܵܐ ܡܸܢܕܝܼܵܢܹ̈ܐ ܐܲܖ̈ܥܵܢܵܝܹܐ. ܐܲܠܵܗܵܐ ܩܲܝܪܲܬܟܲܫ ܠܹܐ ܗܵܘܹܐ ܪܵܙܝܼ ܒܚܲܕ݉ ܠܸܒܵܐ ܦܘܼܠܥܵܐ. ܚܘܼܒܵܐ ܩܲܕ݉ܡܵܝܵܐ ܘܪܹܫܵܝܵܐ ܗܲܩ ܕܗ̇ܘ ܝܼܠܹܗ. ܠܹܐ ܡܵܨܹܐ ܠܡܲܙܪܘܼܩܹܐ ܫܸܡܫܵܐ ܕܗܸܙܘܼܪܘܼܗܝ ܥܲܠ ܚܲܕ݉ ܠܸܒܵܐ ܩܲܝܪܵܐ ܘܪܚܝܼܩܵܐ ܡܸܢܘܼܗܝ. ܝܲܢ: ܗ̇ܘ ܣܵܒܵܒ ܒܲܠܟܵܐ ܩܝܼܡܵܐ ܝܠܹܗ ܡ̣ܢ ܣܢܵܕܬܵܐ ܥܲܠ ܓܵܢܵܐ ܘܙܲܕܝܼܩܘܼܬܵܐ ܒܥܲܝܢܵܐ ܕܓܵܢܵܐ. ܫܘܼܒ̣ܗܵܪܵܐ ܒܸܦܠܵܚܵܐ ܝܠܹܗ ܓܵܘ ܠܸܒܵܐ: ܘܓܵܢܵܐ ܦܝܵܫܵܐ ܝܠܵܗ̇ ܡܘܼܪܸܡܬܵܐ ܡ̣ܢ ܓܹܒܵܐ ܕܗܵܘܝܵܐ ܗ݉ܘܵܐ ܪܘܼܦܝܼܬܵܐ ܩܲܕ݉ܡ ܙܩܝܼܦܵܐ. ܟܪܸܣܛܝܵܢܵܐ: ܐܸܢ ܠܹܐ ܝܘܸܬ ܐܵܕܝܼܵܐ ܐܲܝܟ̣ ܕܒܝܲܖ̈ܚܹܐ ܩܲܕ݉ܡܵܝܹ̈ܐ: ܠܵܐ ܗܵܘܹܝܬ ܪܵܗܲܬ ܗܲܠ ܕܐܵܙܸܠ݉ܬ ܓ̰ܲܠܕܹܐ ܠܸܛܥܵܝܵܐ ܠܐܲܓ̣ܵܝܘܼܟ̣ ܘܠܡܲܕܘܼܥܹܐ ܩܵܬܘܼܗܝ ܐܲܗܘܵܠܘܼܟ̣ ܡܲܦܫܸܡܵܢܬܵܐ. ܛܠܘܿܒ ܫܵܦܵܩܲܬܘܼܗܝ ܘܚܲܝܠܘܼܗܝ ܕܡܲܡܨܝܼ ܠܘܼܟ̣ ܠܸܚܕܵܪܵܐ ܒܘܼܫ ܒܩܘܼܪܒܘܼܢܝܘܼܬܵܐ ܐܸܠܘܼܗܝ. ܡܲܡܟܸܟ̣ ܓܵܢܘܼܟ̣ ܩܲܕ݉ܡܘܼܗܝ ܘܗ̇ܘ ܒܸܬ ܡܲܪܸܡ ܠܘܼܟ̣: ܘܡܸܢ݉ܕܪܸܫ݉ ܒܸܬ ܒܲܗܪܸܢ ܦܵܬܘܼܗܝ ܥܲܠܘܼܟ̣. ܙܸܠ݉ ܓ̰ܲܠܕܹܐ ܘܛܥܝܼ ܠܒܵܣܲܡܬܵܐ ܡ̣ܢ ܗܲܟܝܼܡ ܛܵܒ̣ܵܐ.