ܣܒܒ ܩܡ ܡܚܕܬ ܠܝ: ܝܐ ܡܪܝܐ: ܒܦܘܠܚܢܘ̈ܟ̣ (ܡܙܡܘܪܐ ܨܒ: 4)

ܗܲܡܘܼܢܹܐ ܝܘܸܬ ܕܚܛܝܼܵܬܘܼ̈ܟ̣ ܦܝܼܫܹܐ ܝܢܵܐ ܫܒ̣ܝܼܩܹܐ ܘܕܡܫܝܼܚܵܐ ܥܒ̣ܝܼܕܵܐ ܝܠܹܗ ܦܘܼܚܵܠܵܐ ܬܲܡܵܡ ܩܵܬܵܝ؟ ܒܲܣ ܚܲܕ݉ ܟܪܸܣܛܝܵܢܵܐ ܪܵܒܵܐ ܚܸܕܝܵܐ ܝܘܸܬ. ܘܵܓ̰ܸܒ ܝܼܠܵܗ̇ ܕܚܲܝܸܬ ܪܸܚܩܵܐ ܡ̣ܢ ܟܠܵܝ ܓ̰ܘܼܖ̈ܵܒܹܐ ܘܙܲܗܡܲܬܹ̈ܐ ܕܕܘܼܢܝܹܐ. ܐܸܢ ܚܛܝܼܵܬܘܼ̈ܟ̣ ܫܒ̣ܝܼܩܹܐ ܝܢܵܐ: ܐܝܼܬ ܬܵܦܵܘܘܿܬ ܩܵܬܘܼܟ̣ ܐ݉ܚܹܪ݉ܢܵܐ ܡܘܼܕܝܼ ܒܸܬ ܩܲܘܸܡ ܥܲܠܘܼܟ̣ ܐܵܕܝܼܵܐ؟ ܠܘܼܬܵܪ ܐ݉ܡܝܼܪܹܗ: ܡܚܝܼ ܡܵܪܝܵܐ: ܡܚܝܼ: ܣܵܒܵܒ ܚܛܝܼܵܬܝܼ̈ ܫܒ̣ܝܼܩܹܐ ܝܢܵܐ. ܐܸܢ ܐܲܚܟ̰ܝܼ ܦܘܼܚܠܵܐ ܝܘܸܬ ܐܸܠܝܼ: ܡܚܝܼ ܟܡܵܐ ܩܘܼܝܵܐ ܕܒܵܣܡܵܐ ܠܘܼܟ̣. ܘܗܲܪ ܒܪܘܼܚܵܐ ܕܗ̇ܘ ܐܘܼܦ ܐܲܢ݉ܬ ܟܹܐ ܡܵܨܹܝܬ ܠܹܐܡܵܪܵܐ: ܫܲܕܸܪ ܥܲܠܝܼ ܡܲܪܥܵܐ: ܡܸܣܟܹܢܘܼܬܵܐ: ܙܵܪܵܪ: ܙܩܝܼܦܵܐ: ܟܵܡܲܪܬܵܐ: ܘܟܠ ܡܸܢܕܝܼ ܕܗܵܘܹܐ ܐܲܝܟ̣ ܪܸܙܵܝܘܼܟ̣: ܫܒ̣ܝܼܩܵܐ ܝܘܸܬ ܚܛܝܼܵܬܝܼ̈: ܘܦܨܝܼܚܬܵܐ ܝܠܵܗ̇ ܓܵܢܝܼ. ܟܪܸܣܛܝܵܢܵܐ: ܐܸܢ ܐܲܢ݉ܬ ܗܲܕܟ̣ܵܐ ܦܝܼܫܵܐ ܝܘܸܬ ܦܘܼܪܩܵܐ: ܟܲܕ ܒܸܚܕܵܝܵܐ ܝܘܸܬ: ܗ݉ܘܝܼ ܛܵܥܢܵܢܵܐ ܕܡܸܢܬܵܐ ܘܚܘܼܒܵܢܵܐ. ܕܒ̣ܘܿܩ ܩܘܼܝܵܐ ܒܗ̇ܘ ܙܩܝܼܦܵܐ ܕܫܩܝܼܠܵܐ ܠܹܗ ܚܛܝܼܬܘܼܟ̣. ܥܒ̣ܘܿܕ ܚܸܠܡܲܬ ܠܗ̇ܘ ܕܥܒ̣ܝܼܕ ܠܹܗ ܚܸܠܡܲܬ ܩܵܬܘܼܟ̣. ܦܲܪܦܘܼܠܹܐ ܝܘܸܢ ܒܝܼܵܘܟ̣ܘܿܢ: ܐܲܚܘܿܢܘܵܬܝܼ̈: ܒܖ̈ܲܚܡܹܐ ܕܐܲܠܵܗܵܐ: ܡܲܟܠܹܝܬܘܿܢ ܦܲܓ̣ܖ̈ܵܘܟ̣ܘܿܢ ܕܸܒ̣ܚܬܵܐ ܚܵܝܬܵܐ ܘܩܲܕܝܼܫܬܵܐ ܘܡܲܩܒܘܼܠ ܠܐܲܠܵܗܵܐ: ܕܝܼܠܵܗ̇ ܚܸܠܡܲܬܵܘܟ̣ܘܿܢ ܡܵܪܹܐ ܗܵܘܢܵܐ. ܡܲܚܸܒܘܿܢ ܠܐܲܚܘܿܢܘܵܬܹ̈ܐ ܕܗ̇ܘ ܩܵܡ ܡܲܚܸܒ ܠܵܘܟ̣ܘܿܢ. ܐܸܢ ܐܝܼܬ ܚܲܕ݉ ܡܲܦܝܼܒܘܿܫܸܬ ܟ̰ܘܼܠܵܓ̣ ܝܲܢ ܣܲܩܲܬ ܒܚܕܵܐ ܕܘܼܟܵܐ: ܐ݉ܟ̣ܘܿܠܘܿܢ ܚܲܡܘܼܗܝ ܒܘܼܬ ܚܵܛܸܪ ܕܝܘܿܢܵܬܵܢ. ܐܸܢ ܐܝܼܬ ܚܲܕ݉ ܗܲܡܸܢܵܢܵܐ ܡܸܣܟܹܢܵܐ: ܒܟ̣ܹܝܡܘܿܢ ܥܲܡܘܼܗܝ ܘܛܥܘܿܢܘܿܢ ܙܩܝܼܦܘܼܗܝ ܒܘܼܬ ܚܵܛܸܪ ܕܗ̇ܘ ܕܒܟ̣ܹܐ ܠܹܗ ܥܲܠܵܘܟ̣ܘܿܢ ܘܛܥܝܼܢܹܗ ܚܛܝܼܵܬܵܘ̈ܟ̣ܘܿܢ. ܟ̰ܘܼܢܟܹܐ ܕܗܲܕܟ̣ܵܐ ܦܝܼܫܵܐ ܝܘܸܬ ܦܘܼܚܠܵܐ ܒܬܲܡܵܡܲܬܘܼܬܵܐ ܒܘܼܬ ܚܵܛܸܪ ܕܡܫܝܼܚܵܐ: ܙܹܠ݉ ܘܬܵܢܝܼ ܐܘܼܦ ܩܵܐ ܐ݉ܚܹܖ̈݉ܢܹܐ ܡܸܫܛܘܼܠܸܓ̣ ܡܲܚܕܝܼܵܢܬܵܐ ܕܖ̈ܲܚܡܹܐ ܘܫܒ̣ܵܩܵܐ. ܠܵܐ ܚܵܫܒ̣ܸܬ ܒܲܣܵܐ ܝܠܵܗ̇ ܕܐܵܗܵܐ ܒܘܼܪܟܬܵܐ ܓܘܼܪܬܵܐ ܡܛܹܐ ܠܵܗ̇ ܩܵܬܘܼܟ̣ ܒܢܲܦ̮ܫܘܼܟ̣: ܗܵܩܝܼ ܗܲܩܝܲܬ ܕܙܩܝܼܦܵܐ ܩܵܐ ܟܠ ܐ݉ܢܵܫܵܐ. ܚܵܕܘܼܬܵܐ ܩܲܕܝܼܫܬܵܐ ܘܡܲܪܕܘܼܬܵܐ ܩܲܕܝܼܫܬܵܐ ܒܸܬ ܥܵܒ̣ܕܝܼ ܠܘܼܟ̣ ܚܲܕ݉ ܡܲܟܪܸܙܵܢܵܐ ܨܦܵܝܝܼ: ܘܟܠܵܗ̇ ܕܘܼܢܝܹܐ ܒܸܬ ܗܵܘܝܵܐ ܚܲܕ݉ ܒܹܝܡ ܕܡܲܟܪܸܙܸܬ ܥܲܠܘܼܗܝ. ܩܲܕܝܼܫܘܼܬܵܐ ܒܚܸܕܝܘܼܬܵܐ ܝܼܠܵܗ̇ ܗ̇ܝ ܟܵܪܘܿܙܘܼܬܵܐ ܕܡ̣ܢ ܟܠܵܝ ܒܘܼܫ ܚܲܝܠܵܢܬܵܐ: ܐܝܼܢܵܐ ܐܵܗܵܐ ܡ̣ܢ ܐܲܠܵܗܵܐ ܟܹܐ ܡܵܨܹܝܬ ܩܲܒܠܸܬ ܠܵܗ̇. ܛܠܘܿܒ ܠܵܗ̇ ܒܐܵܗܵܐ ܡܵܘܪܹܫܵܐ ܡ̣ܢ ܩܲܕ݉ܡ ܕܦܵܠܛܸܬ ܠܒ̣ܲܕܲܪ. ܟܲܕ ܚܵܕܘܼܬܲܢ ܒܫܘܼܠܵܐ ܕܡܵܪܝܵܐ ܝܠܵܗ̇: ܠܲܝܬ ܙܕܘܼܥܬܵܐ ܕܗܵܘܲܚ ܙܵܘܕܵܐ ܡ̣ܢ ܘܵܓ̰ܸܒ ܚܸܕܝܹ̈ܐ.