ܢܘܟ̣ܖ̈ܝܐ ܠܡܩܕܫܐ ܕܒܝܬܐ ܕܡܪܝܐ (ܐܪܡܝܐ ܢܐ: 51)

ܒܘܼܬ ܐܵܗܵܐ ܗܲܓ̰ܲܬ ܦܵܬܘܵܬܹ̈ܐ ܕܛܵܝܸܦܵܐ ܕܐܲܠܵܗܵܐ ܦܝܼܫ ܠܗ݉ܘܿܢ ܡܘܼܟܣܹܐ ܒܫܲܪܡܸܣܵܪܘܼܬܵܐ: ܣܵܒܵܒ ܚܲܕ݉ ܡܸܢܕܝܼ ܨܵܘܵܢܵܐ ܝܗ݉ܘܵܐ ܕܐ݉ܢܵܫܹ̈ܐ ܥܵܒ̣ܪܝܼ ܗ݉ܘܵܘ ܓܵܘ ܒܹܝܬ ܡܲܩܕܫܵܐ ܕܝܼܗ݉ܘܵܐ ܕܘܼܟܬܵܐ ܕܟܵܗܢܹ̈ܐ ܐܲܚܟ̰ܝܼ. ܒܟܠܵܝ ܚܵܕܸܖ̈ܘܵܢܲܢ ܟܹܐ ܚܵܙܲܚ ܣܵܒܵܒܹ̈ܐ ܕܐܲܝܟ̣ ܕܐܲܢܹܐ ܩܵܐ ܦܵܫܲܡܬܵܐ. ܟܡܵܐ ܪܵܒܵܐ ܝܢܵܐ ܐ݉ܢܵܫܹ̈ܐ ܒܹܐ ܕܸܚܠܲܬ ܐܲܠܵܗܵܐ ܕܐܵܕܝܼܵܐ ܗܲܕܘܿܪܹܐ ܝܢܵܐ ܠܹܥܒ̣ܵܪܵܐ ܠܚܸܠܡܲܬ ܩܲܕܝܼܫܬܵܐ! ܟܡܵܐ ܨܵܘܵܢܬܵܐ ܝܠܵܗ̇ ܚܛܝܼܬܵܐ ܕܝܲܗܒ̣ܲܠܬܵܐ ܕܐܖ̈ܵܙܹܐ ܩܵܐ ܠܵܐ ܚܘܼܕܸܬܹ̈ܐ: ܘܓܵܘ ܚܲܕܟܡܵܐ ܥܹܕܵܬܹ̈ܐ ܒܲܗܖ̈ܵܢܹܐ ܙܹܐ ܐܝܼܬ ܪܵܒܵܐ ܪܸܦܝܘܼܬܵܐ ܒܬܲܥܠܲܡܬܵܐ ܕܥܹܕܬܵܐ. ܐܸܢ ܟܠܵܝ ܐܲܠܦܹ̈ܐ ܩܵܖ̈ܝܵܢܹܐ ܕܐܲܢܹܐ ܚܲܒܖܹ̈ܐ ܠܲܒܠܝܼ ܠܵܗ̇ ܐܵܗܵܐ ܗܲܓ̰ܲܬ ܩܲܕ݉ܡ ܡܫܝܼܚܵܐ ܒܐܵܗܵܐ ܝܵܘܡܵܐ: ܗ̇ܘ ܒܸܬ ܡܲܟܠܹܐ ܠܵܗ̇ ܗ̇ܝ ܬܲܥܠܲܡܬܵܐ ܩܫܝܼܬܵܐ ܕܗܕܝܼܪܬܵܐ ܝܠܵܗ̇ ܠܹܐܬܵܝܵܐ ܥܲܠ ܥܹܕܬܵܐ. ܡܲܚܪܲܒ̣ܬܵܐ ܕܥܹܕܬܵܐ ܒܐܵܗܵܐ ܬܵܗܵܪ ܝܼܠܵܗ̇ ܐܲܝܟ̣ ܟ̰ܲܦܠܲܢܬܵܐ ܕܚܲܕ݉ ܩܘܼܢܝܵܐ: ܐܲܝܟ̣ ܕܪܵܝܬܵܐ ܕܡ̈ܝܼܵܐ ܥܲܠ ܢܘܼܪܵܐ: ܐܲܝܟ̣ ܙܪܵܥܬܵܐ ܕܚܲܩܠܵܐ ܒܟܹܐܦܹ̈ܐ. ܐܲܠܵܗܵܐ ܝܲܗܒ̣ܸܠ ܠܲܢ ܫܵܦܵܩܲܬ ܠܚܵܡܘܿܝܘܼܗ̇ ܕܸܟ̣ܝܘܼܬܵܐ ܕܥܹܕܬܵܐ.

ܐܝܼܢܵܐ ܩܲܝܪܲܬܲܢ ܘܵܓ̰ܸܒ ܝܼܠܵܗ̇ ܕܫܵܪܝܵܐ ܓܵܘ ܠܸܒܵܘܵܬܹ̈ܐ ܕܝܼܲܢ. ܨܲܚܨܲܚ ܓܵܢܵܬܹ̈ܐ ܕܓܵܢܲܢ ܐܸܢ ܐܝܼܬ ܠܲܢ ܗܲܩ ܠܹܐܟ̣ܵܠܵܐ ܡ̣ܢ ܣܘܼܦܪܵܐ ܕܡܵܪܝܵܐ. ܐܵܟ̣ܠܲܚ ܚܲܡ ܕܐܲܚܢܲܢ ܗܵܘܲܚ ܠܒ̣ܝܼܫܹܐ ܠܒ̣ܸܫܬܵܐ ܕܚܠܘܿܠܵܐ: ܠܵܐ ܗ݉ܘܹܐ ܕܒܓܵܢܲܢ ܗܵܘܲܚ ܢܵܐ ܡܲܩܒܘܿܠ ܓܵܘ ܡܲܩܕܫܵܐ ܕܡܵܪܝܵܐ. ܪܵܒܵܐ ܝܢܵܐ ܩܸܖ̈ܝܹܐ: ܚܲܕܟ̰ܵܐ ܝܢܵܐ ܓܘܼܒܝܹ̈ܐ. ܐܘܼܪܚܵܐ ܥܝܼܩܬܵܐ ܝܠܵܗ̇: ܘܬܲܪܥܵܐ ܥܝܼܩܵܐ ܝܠܹܗ. ܬܲܟܠܵܐ ܕܩܲܒܠܲܚ ܫܵܦܵܩܲܬ ܠܹܐܬܵܝܵܐ ܠܟܸܣ ܡܫܝܼܚܵܐ ܒܐܘܼܪܚܵܐ ܕܘܼܙ: ܒܗܲܝܡܵܢܘܼܬܵܐ ܕܓܘܼܒܝܹ̈ܐ ܕܡܵܪܝܵܐ. ܗ̇ܘ ܕܡܚܹܐ ܠܹܗ ܠܥܵܙܵܐ ܒܘܼܬ ܕܩܵܪܬܘܼܗܝ ܒܩܹܒ̣ܘܼܬܵܐ ܪܵܒܵܐ ܩܲܝܪܲܬܟܸܫ ܝܼܠܹܗ ܒܘܼܬ ܟܠܵܝ ܐܖ̈ܵܙܘܼܗܝ. ܐܲܝܟ̣ ܚܲܕ݉ ܗܲܡܸܢܵܢܵܐ ܫܲܪܝܼܪܵܐ: ܐܵܢܵܐ ܐܝܼܬ ܠܝܼ ܪܘܼܚܨܲܬ ܠܩܲܪܒܘܼܢܹܐ ܐܸܠܵܝ ܒܐܵܙܵܕܘܼܬܵܐ. ܐܲܝܟ̣ ܕܸܫ̃ܡܸܢ: ܓܵܪܵܓ ܠܵܐ ܕܵܩܪܸܢ ܒܝܼܵܝ ܠܵܐ ܗ݉ܘܹܐ ܕܡܵܝܬܸܢ. ܨܲܚܨܵܝܬܵܐ ܕܠܸܒܵܐ ܝܼܠܵܗ̇ ܘܵܓ̰ܸܒܘܼܬܵܐ ܕܟܠܵܝ ܕܦܝܼܫܹܐ ܝܢܵܐ ܡܘܼܥܡܸܕܹܐ ܠܩܲܪܒܘܼܢܹܐ ܠܣܘܼܦܪܵܐ ܕܡܵܪܝܵܐ. ܨܲܚܨܝܼ ܠܝܼ: ܝܵܐ ܡܵܪܝܵܐ: ܘܝܕܸܥ ܠܸܒܝܼ: ܬܲܦ̮ܬܸܫ ܠܝܼ: ܘܝܕܸܥ ܦܸܟܝܼܖ̈ܝܼ.