ܒܦܠܚܐ ܝܠܗ ܐܝܟ̣ ܚܝܠ ܕܪܙܝܘܗܝ (ܐܦܣܝ̈ܐ ܐ: 11)

ܗܲܝܡܵܢܘܼܬܲܢ ܒܥܵܩܸܠܕܵܪܘܼܬܵܐ ܕܐܲܠܵܗܵܐ ܡܲܩܘܘܼܝܹܐ ܝܠܵܗ̇ ܕܗ̇ܘ ܐܝܼܬ ܠܹܗ ܚܕܵܐ ܢܝܼܲܬ ܘܡܲܨܠܵܗܲܬ ܩܛܝܼܥܬܵܐ ܒܫܘܼܠܵܐ ܕܦܘܼܪܩܵܢܵܐ. ܡܘܼܕܝܼ ܒܸܬ ܗܵܘܝܵܐ ܗ݉ܘܵܐ ܟܠܵܗ̇ ܒܪܝܼܬܵܐ ܕܠܵܐ ܡܲܨܠܵܗܲܬ ܕܗ̇ܘ؟ ܐܝܼܬ ܗ݉ܘܵܐ ܚܕܵܐ ܢܘܼܢܵܐ ܒܝܵܡܵܐ: ܝܲܢ ܚܲܕ݉ ܛܲܝܪܵܐ ܓܵܘ ܗܵܘܵܐ ܕܦܝܼܫ ܠܗ݉ܘܿܢ ܒܸܪܝܹܐ ܐܲܚܟ̰ܝܼ ܒܬܲܩܕܝܼܪ؟ ܠܵܐ: ܒܟܠ ܓܲܪܡܵܐ ܘܫܸܪܝܵܢܵܐ: ܡܵܟ̰ܵܐ: ܘܘܵܪܝܼܕܵܐ ܡܲܚܙܘܼܝܹܐ ܝܘܸܬ ܗܸܙܘܼܪ ܕܚܲܕ݉ ܐܲܠܵܗܵܐ ܕܟܹܐ ܥܵܒ̣ܸܕ ܟܠ ܡܸܢܕܝܼ ܐܲܝܟ̣ ܚܝܼܵܠ ܕܥܵܩܸܠܕܵܪܘܼܬܘܼܗܝ ܒܹܐ ܩܲܝܵܣ. ܐܝܼܬܵܐ: ܟܲܕ ܗܸܙܘܼܪ ܕܐܲܠܵܗܵܐ ܐܝܼܬ ܓܵܘ ܟܠܵܗ̇ ܒܪܝܼܬܵܐ: ܡܗܵܟܘܿܡܹܐ ܥܲܠܘܼܗ̇: ܠܹܐ ܗܵܘܝܵܐ ܡܘܼܚܙܝܼܬܵܐ ܗܸܙܘܼܪܘܼܗܝ ܐܘܼܦ ܒܫܵܦܵܩܲܬ؟ ܟܲܕ ܒܪܝܼܬܵܐ ܥܲܬܝܼܩܬܵܐ ܦܝܵܫܵܐ ܝܠܵܗ̇ ܬܘܼܓܒܸܪܬܵܐ ܒܖ̈ܵܐܝܹܐ ܐܲܠܵܗܵܝܹ̈ܐ: ܒܪܝܼܬܵܐ ܚܲܕܬܵܐ ܚܘܼ ܠܹܐ ܚܵܕܪܵܐ ܒܪܸܙܵܝܵܐ ܐܵܙܵܕ ܕܒܲܪܢܵܫܵܐ؟ ܦܵܟܸܪ ܠܡܕܲܒܪܵܢܘܼܬܵܐ! ܡܵܢܝܼ ܠܹܐ ܝܲܕܸܥ ܕܐܘܼܦ ܚܕܵܐ ܨܸܦܪܵܐ ܠܹܐ ܢܵܦܠܵܐ ܥܲܠ ܐܲܪܥܵܐ ܕܠܵܐ ܪܸܙܵܝܵܐ ܕܒܵܒܵܐ؟ ܐܘܼܦ ܡܸܨܝܵܬܹ̈ܐ ܕܖܹ̈ܫܵܘܟ̣ܘܿܢ ܟܠܵܝ ܡܸܢܝܹܐ ܝܢܵܐ. ܐܲܠܵܗܵܐ ܟܹܐ ܬܵܩܸܠ ܠܗ݉ܘܿܢ ܛܘܼܖ̈ܵܢܹܐ ܕܥܹܩܘܼ̈ܝܲܢ ܘܖ̈ܘܼܡܝܵܬܹܐ ܕܚܲܫ̈ܲܢ ܒܡܲܣܲܐܬܵܐ. ܒܲܣ ܐܝܼܬ ܐܲܠܵܗܵܐ ܒܡܕܲܒܪܵܢܘܼܬܵܐ ܘܠܵܐ ܒܫܵܦܵܩܲܬ؟ ܡܘܼܡܟܸܢ ܝܼܠܵܗ̇ ܕܩܲܠܦܵܐ ܗܵܘܹܐ ܬܘܼܪܨܵܐ ܒܥܵܩܸܠܕܵܪܘܼܬܵܐ: ܘܩܝܼܢܬܵܐ ܐ݉ܬܝܼܬܵܐ ܠܐܝܼܬܘܼܬܵܐ ܒܬܲܦܩܘܼ؟ ܠܵܐ: ܗ̇ܘ ܟܹܐ ܝܲܕܸܥ ܫܘܼܠܵܡܵܐ ܗܵܐ ܡ̣ܢ ܫܘܸܪܵܝܵܐ. ܠܵܐ ܐܲܚܟ̰ܝܼ ܠܟܹܐܦܵܐ ܕܩܸܪܢܝܼܬܵܐ ܟܹܐ ܚܵܙܹܐ ܒܕܘܼܟܬܘܼܗܝ ܠܵܚܘܿܡܬܵܐ: ܣܘܼܩܠܵܐ ܒܖ̈ܲܢܓܹܐ ܫܲܦܝܼܖܹ̈ܐ: ܐܝܼܢܵܐ ܐܘܼܦ ܟܹܐ ܚܵܙܹܐ ܒܕܘܼܟܬܵܝ ܡܘܼܪܝܸܙܬܵܐ ܠܟܠ ܚܲܕ݉ ܡ̣ܢ ܟܹܐܦܹ̈ܐ ܓܘܼܒܝܹ̈ܐ ܦܘܼܠܛܹܐ ܡ̣ܢ ܟܵܢ ܕܟܝܵܢܵܐ: ܡܘܼܫܦܸܖܹ̈ܐ ܒܫܵܦܵܩܲܬܘܼܗܝ. ܟܠܹܗ ܒܸܢܝܵܢܵܐ ܕܥܹܕܬܘܼܗܝ ܒܸܚܙܵܝܘܼܗܝ ܝܠܹܗ: ܡ̣ܢ ܩܸܪܢܝܼܬܵܐ ܠܩܸܪܢܝܼܬܵܐ: ܡ̣ܢ ܒܸܢܝܲܬ ܠܐ݉ܓܵܪܹܐ. ܗ̇ܘ ܐܝܼܬ ܠܹܗ ܚܕܵܐ ܝܕܲܥܬܵܐ ܨܦܝܼܬܵܐ ܒܘܼܬ ܟܠ ܟܹܐܦܵܐ ܕܒܸܬ ܦܵܐܸܫ ܡܘܼܬܒ̣ܵܐ ܒܕܘܼܟܬܘܼܗܝ ܗܘܼܕܸܪܬܵܐ: ܘܟܹܐ ܝܲܕܸܥ ܟܡܵܐ ܓܘܼܪܵܐ ܒܸܬ ܗܵܘܹܐ ܐܵܗܵܐ ܒܸܢܝܵܢܵܐ: ܘܟܹܐ ܝܲܕܸܥ ܐܝܼܡܵܐ ܒܸܬ ܦܵܐܸܫ ܡܘܼܝܬ݉ܝܵܐ ܟܹܐܦܵܐ ܐ݉ܚܵܪܵܝܵܐ ܐܸܠܘܼܗܝ ܒܡܲܩܘܲܚܝܵܬܹ̈ܐ ܕܫܵܦܵܩܲܬ! ܒܐ݉ܚܲܪܬܵܐ: ܒܸܬ ܦܵܝܫܵܐ ܚܙܝܼܬܵܐ ܟ̰ܸܡ ܒܨܸܦܝܘܼܬܵܐ: ܕܒܟܠ ܡܵܐܢܵܐ ܓܘܼܒܝܵܐ ܕܫܵܦܵܩܲܬ ܝܹܗܘܿܘܵܐ ܥܒ̣ܝܼܕ ܠܹܗ ܪܸܙܵܝܘܼܗܝ: ܘܬܘܼܡܸܡܵܐ ܠܹܗ ܢܝܼܲܬܘܼܗܝ: ܘܚܩܝܼܪܹܗ ܠܫܸܡܘܼܗܝ.