ܛܒܚ 22
ܡܘܐܡܠܝ ܐܠܘܟ̣ܘܢ: ܒܢܬ̈ܐ ܕܐܘܪܫܠܡ: ܐܢ ܡܫ݉ܟ̰ܚܝܬܘܢ ܠܣܘܓܘܠܝ. ܡܘܕܝ ܡܕܥܝܬܘܢ ܐܠܗ: ܕܡܪܝܥܬܐ ܕܡܚܒܬܐ ܝܘܢ ܐܢܐ (ܬܫܒܚܝܬ̈ܐ ܗ: 8)
ܐܲܢܹܐ ܝܢܵܐ ܚܲܒܖܹ̈ܐ ܕܚܲܕ݉ ܗܲܡܸܢܵܢܵܐ ܓܵܥܝܵܢܵܐ ܒܵܬ݉ܪ ܡܫܝܼܚܵܐ: ܕܡܪܝܼܥܵܐ ܝܠܹܗ ܒܘܼܬ ܡܲܚܢܵܝܬܵܐ ܡ̣ܢ ܡܵܪܝܵܐ. ܓܵܢܵܬܹ̈ܐ ܩܘܼܒܠܹܐ ܫܵܦܵܩܲܬ ܒܗܸܟ̃ ܥܕܵܢܵܐ ܠܹܐ ܗܵܘܝܼ ܪܵܗܲܬ ܡܵܓܲܪ ܕܩܘܼܪܒܵܐ ܝܢܵܐ ܠܡܫܝܼܚܵܐ: ܣܵܒܵܒ ܕܐܝܼܡܵܐ ܕܪܵܚܩܝܼ ܡܸܢܘܼܗܝ ܟܹܐ ܬܵܠܩܝܼ ܒܲܣܝܼܡܘܼܬܵܝ. ܟܡܵܐ ܕܩܲܪܒܸܢܝܼ ܥܲܠܘܼܗܝ ܒܘܼܫ ܟܹܐ ܩܲܪܒܸܢܝܼ ܠܫܠܵܡܵܐ ܫܡܲܝܵܢܵܝܵܐ. ܟܡܵܐ ܕܩܲܪܒܸܢܝܼ ܥܲܠܘܼܗܝ ܠܸܒܵܝ ܒܘܼܫ ܟܹܐ ܗܵܘܹܐ ܡܸܠܝܵܐ ܠܵܐ ܐܲܚܟ̰ܝܼ ܡ̣ܢ ܫܠܵܡܵܐ ܐܝܼܢܵܐ ܐܘܼܦ ܡ̣ܢ ܚܲܝܘܼܬܵܐ ܘܚܲܝܠܵܐ ܘܚܵܕܘܼܬܵܐ: ܣܵܒܵܒ ܐܲܢܹܐ ܟܠܵܝ ܬܸܠܝܹܐ ܝܢܵܐ ܥܲܠ ܨܵܗܒܲܬ ܕܵܝܸܡ ܥܲܡ ܡܫܝܼܚܵܐ. ܕܵܐܟ̣ܝܼ ܕܝܼܠܹܗ ܫܸܡܫܵܐ ܩܵܐ ܝܵܘܡܵܐ: ܘܣܲܗܪܵܐ ܩܵܐ ܠܲܝܠܹܐ: ܛܠܘܿܠܵܐ ܩܵܐ ܟ̰ܘܼܟ̰ܵܓܵܐ: ܗܵܕܵܐ ܝܠܹܗ ܡܫܝܼܚܵܐ ܩܵܬܲܢ. ܕܵܐܟ̣ܝܼ ܕܝܼܠܹܗ ܠܲܚܡܵܐ ܩܵܐ ܟܦܝܼܢܵܐ: ܠܒ̣ܸܫܬܵܐ ܩܵܐ ܫܘܼܠܚܵܝܵܐ: ܛܸܠܵܢܝܼܬܵܐ ܕܐܝܼܨܵܪܵܐ ܩܵܐ ܣܵܦܵܪܟ̰ܝܼ ܓܵܘ ܐܲܪܥܵܐ ܡܘܼܫܲܡܝܼܪ: ܗܲܕܟ̣ܵܐ ܝܠܹܗ ܡܫܝܼܚܵܐ ܩܵܬܲܢ. ܒܘܼܬ ܐܵܗܵܐ: ܐܸܢ ܠܹܐ ܝܲܕܥܲܚ ܕܚܲܕ݉ ܝܼܘܲܚ ܥܲܡܘܼܗܝ: ܠܲܝܬ ܪܵܒܵܐ ܥܲܓ̰ܸܒܘܼܬܵܐ ܕܡܲܩܘܸܚܲܚ: ܡܘܼܐܡܹܠܝ ܐܸܠܵܘܟ̣ܘܿܢ: ܒܢܵܬܹ̈ܐ ܕܐܘܿܪܸܫܠܸܡ: ܐܸܢ ܡܲܫ݉ܟ̰ܚܝܼܬܘܿܢ ܠܣܵܘܓܘܿܠܝܼ. ܡܘܼܕܝܼ ܡܲܕܥܝܼܬܘܿܢ ܐܸܠܹܗ: ܕܡܪܝܼܥܬܵܐ ܕܡܲܚܲܒܬܵܐ ܝܼܘܵܢ ܐܵܢܵܐ. ܥܲܡ ܐܵܗܵܐ ܡܲܚܙܵܝܬܵܐ ܕܡܲܚܢܵܝܬܵܐ ܒܢܹܓܵܪܵܢܘܼܬܵܐ ܡ̣ܢ ܡܫܝܼܚܵܐ ܐܝܼܬ ܚܕܵܐ ܒܘܼܪܟܬܵܐ. ܛܘܼܒ̣ܵܐ ܠܐܵܢܝܼ ܕܟܵܦܢܝܼ ܘܨܵܗܝܼ ܠܟܹܐܢܘܼܬܵܐ: ܒܘܼܬ ܐܵܗܵܐ: ܚܲܕ݉ ܛܘܼܒ̣ܵܐ ܟ̰ܸܡ ܪܹܫܵܝܵܐ ܐܝܼܬ ܩܵܐ ܐܵܢܝܼ ܕܟܵܦܢܝܼ ܘܨܵܗܝܼ ܠܗ̇ܘ ܕܝܼܠܹܗ ܓ̰ܲܘܗܵܪ ܕܟܹܐܢܘܼܬܵܐ. ܒܪܝܼܟ̣ܵܐ ܝܠܹܗ ܗ̇ܘ ܟܸܦܢܵܐ ܣܵܒܵܒ ܡ̣ܢ ܐܲܠܵܗܵܐ ܒܹܐܬܵܝܵܐ ܝܠܹܗ. ܐܸܢ ܠܵܐ ܡܵܨܹܝܢ ܕܐܵܟ̣ܠܸܢ ܡ̣ܢ ܡܫܝܼܚܵܐ: ܘܵܓ̰ܸܒܘܼܬܝܼ ܝܠܵܗ̇ ܕܟܵܦܢܸܢ ܘܨܵܗܝܸܢ ܒܘܼܬ ܕܝܼܘܼܗܝ. ܐܝܼܬ ܚܕܵܐ ܩܲܕܝܼܫܘܼܬܵܐ ܒܗ̇ܘ ܟܸܦܢܵܐ ܣܵܒܵܒ ܠܲܓ̰ܠܘܼܓ̰ܵܐ ܝܠܹܗ ܓܵܘ ܛܘܼܒ̣ܹ̈ܐ ܕܡܵܪܲܢ. ܐܝܼܬܵܐ ܗ̇ܝ ܒܘܼܪܟܬܵܐ ܙܹܐ ܒܸܕܒ̣ܵܩܵܐ ܝܠܵܗ̇ ܚܲܕ݉ ܩܵܘܠܵܐ. ܟܦܝܼܢܹ̈ܐ ܒܸܬ ܣܲܒ̣ܥܝܼ ܡ̣ܢ ܗ̇ܘ ܡܸܢܕܝܼ ܕܫܲܗܘܘܼܬܹܐ ܝܢܵܐ ܥܲܠܘܼܗܝ. ܐܸܢ ܡܫܝܼܚܵܐ ܗܲܕܟ̣ܵܐ ܡܲܟܦܘܼܢܲܢ ܝܠܹܗ ܠܓܵܢܘܼܗܝ: ܐܲܠܒܲܬ ܒܸܬ ܡܲܣܒ̣ܸܥ ܠܟܸܦܢܲܢ. ܐܝܼܬܵܐ ܐܝܼܡܵܐ ܕܐܵܬܹܐ ܠܟܸܣܠܲܢ: ܟܡܵܐ ܚܠܝܼܬܵܐ ܒܸܬ ܗܵܘܝܵܐ ܐ݉ܬܵܝܬܘܼܗܝ!