ܓܘܘܗ̇ ܡܢ݉ܕܪܫ݉ ܩܠܐ ܕܒܟ̣ܝܐ (ܐܫܥܝܐ ܣܗ: 19)

ܚܩܝܼܖܹ̈ܐ ܐ݉ܚܹܪ݉ܢܵܐ ܠܹܐ ܒܵܟ̣ܝܼ ܣܵܒܵܒ ܟܠܵܝ ܣܵܒܵܒܹ̈ܐ ܒܲܖ̈ܵܝܹܐ ܕܒܸܟ̣ܝܼܵܐ ܒܸܬ ܦܵܝܫܝܼ ܫܩܝܼܠܹܐ. ܠܲܝܬ ܕܵܘܣܬܘܼܝܵܬܹ̈ܐ ܦܘܼܖ̈ܦܸܣܹܐ ܝܲܢ ܗܹܒ̣ܝܼܹ̈ܐ ܒܲܛܝܼܠܹ̈ܐ ܓܵܘ ܫܡܲܝܵܐ. ܡܸܣܟܹܢܘܼܬܵܐ: ܟܸܦܢܵܐ: ܩܹܘܲܢܕܹܢܘܿܣ: ܟܵܡܲܪܬܵܐ ܘܒܘܼܚܬܵܢ ܠܲܝܬ ܬܵܡܵܐ. ܠܲܝܬ ܥܹܩܘܼܝ ܘܨܲܢܓ̰ܘܼܝ: ܠܲܝܬ ܙܕܘܼܥܬܵܐ ܕܡܵܘܬܵܐ: ܒܟ̣ܵܝܬܵܐ ܠܲܝܬ ܬܵܡܵܐ: ܣܵܒܵܒ ܒܬܲܡܵܡܲܬܘܼܬܵܐ ܦܝܼܫܹܐ ܝܢܵܐ ܡܩܘܼܕܫܹܐ. ܠܲܝܬ ܠܸܒܵܐ ܒܝܼܫܵܐ ܕܟܝܼܡ ܗܲܝܡܵܢܘܼܬܵܐ ܕܚܵܦܸܛ ܠܗ݉ܘܿܢ ܠܸܦܪܵܫܵܐ ܡ̣ܢ ܐܲܠܵܗܵܐ ܚܵܝܵܐ: ܕܠܵܐ ܠܲܟܵܐ ܝܢܵܐ ܩܲܕ݉ܡ ܬܪܘܿܢܘܿܣܘܼܗܝ ܘܒܬܲܡܵܡܲܬܘܼܬܵܐ ܫܘܼܚܠܸܦܹܐ ܝܢܵܐ ܠܕܵܡܵܝܬܘܼܗܝ. ܠܵܚܘܿܡܬܵܐ ܝܠܵܗ̇ ܕܫܵܠܝܼ ܡ̣ܢ ܒܸܟ̣ܝܵܐ ܐܵܢܝܼ ܕܫܸܠܝܹܐ ܝܢܵܐ ܡ̣ܢ ܚܛܝܼܬܵܐ. ܠܹܐ ܒܵܟ̣ܝܼ ܐ݉ܚܹܪ݉ܢܵܐ ܣܵܒܵܒ ܟܠ ܙܕܘܼܥܬܵܐ ܕܡ̣ܢ ܫܲܚܠܲܦܝܵܬܹ̈ܐ ܒܛܝܼܠܬܵܐ ܝܠܵܗ̇. ܚܵܛܸܪܓ̰ܲܡܥ ܝܼܢܵܐ ܕܗܲܠ ܐܵܒܵܕ ܣܵܠܵܡܲܬ ܝܼܢܵܐ. ܚܛܝܼܬܵܐ ܦܝܼܫܬܵܐ ܝܠܵܗ̇ ܟܘܼܡܸܪܬܵܐ ܡ̣ܢ ܒܹܝܬ ܡܲܥܡܪܵܝ ܘܠܹܐ ܡܵܨܝܵܐ ܠܹܥܒ̣ܵܪܵܐ ܠܟܸܣܠܵܝ. ܒܹܥܡܵܪܵܐ ܝܢܵܐ ܓܵܘ ܚܕܵܐ ܡܕܝܼܢ݉ܬܵܐ ܕܗܸܟ̃ ܠܹܐ ܦܵܝܫܵܐ ܫܩܝܼܠܬܵܐ. ܒܸܫܚܵܢܵܐ ܝܢܵܐ ܩܲܕ݉ܡ ܚܲܕ݉ ܫܸܡܫܵܐ ܕܗܸܟ̃ ܠܹܐ ܓܵܢܹܐ. ܒܸܫܬܵܝܵܐ ܝܢܵܐ ܡ̣ܢ ܚܲܕ݉ ܢܲܗܪܵܐ ܕܗܸܟ̃ ܠܹܐ ܒܵܪܸܙ. ܓܲܒܘܿܝܹܐ ܝܢܵܐ ܛܥܘܼܢܝܵܬܹ̈ܐ ܕܚܲܕ݉ ܐܝܼܠܵܢܵܐ ܕܗܸܟ̃ ܠܹܐ ܟ̰ܵܡܸܟ̃. ܕܵܘܖܹ̈ܐ ܒܹܐ ܡܸܢܝܵܢܵܐ ܒܸܬ ܥܵܒ̣ܪܝܼ: ܐܵܒܵܕܘܼܬܵܐ ܠܹܐ ܬܵܝܡܵܐ ܘܟܡܵܐ ܕܐܝܼܬ ܐܵܒܵܕܘܼܬܵܐ: ܒܪܝܼܟ̣ܘܼܬܵܝ ܠܵܐ ܡܵܝܘܿܬܘܼܬܵܐ ܥܲܡܘܼܗ̇ ܒܸܬ ܗܵܘܝܵܐ. ܐܵܢܝܼ ܗܲܠ ܐܵܒܵܕ ܥܲܡ ܡܵܪܝܵܐ ܒܸܬ ܗܵܘܝܼ. ܠܹܐ ܒܵܟ̣ܝܼ ܐ݉ܚܹܪ݉ܢܵܐ ܣܵܒܵܒ ܟܠܵܝ ܡܲܛܠܲܒܵܝ̈ ܬܘܼܡܸܡܹܐ ܝܢܵܐ. ܠܹܐ ܡܵܨܝܵܐ ܕܫܲܗܘܸܬܝܼ ܠܗܸܟ̃ ܡܸܢܕܝܼ ܕܠܲܝܬ ܠܗ݉ܘܿܢ. ܥܲܝܢܵܐ ܘܢܵܬܵܐ: ܐܝܼܕܵܐ ܘܠܸܒܵܐ: ܗܵܘܢܵܐ: ܦܲܪܡܵܝܬܵܐ: ܗܹܒ̣ܝܼ: ܫܲܗܘܲܬܬܵܐ ܘܪܸܙܵܝܵܐ: ܟܠܵܝ ܡܨܵܝܵܬܹ̈ܐ ܒܬܲܡܵܡܲܬܘܼܬܵܐ ܒܸܬ ܦܵܝܫܝܼ ܡܘܼܣܒ̣ܸܥܹܐ. ܐܵܦܸܢ ܪܵܒܵܐ ܢܵܐܟܵܡܝܼܠ ܝܼܠܵܗ̇ ܦܲܪܡܵܝܬܲܢ ܒܘܼܬ ܡܸܢܕܝܼܵܢܹ̈ܐ ܕܐܲܠܵܗܵܐ ܗܘܼܕܪܹܐ ܝܠܹܗ ܩܵܬܲܢ ܡܲܚܸܒܵܢܘܼ̈ܗܝ: ܐܝܼܢܵܐ ܡܸܢ݉ܕܪܸܫ݉: ܦܝܼܫܹܐ ܝܘܲܚ ܡܘܼܠܦܹܐ ܒܪܘܼܚܵܐ ܕܩܘܼܕܫܵܐ ܕܩܲܕܝܼܫܹ̈ܐ ܕܓܵܘ ܫܡܲܝܵܐ ܒܪܝܼܟ̣ܹܐ ܝܢܵܐ ܙܵܘܕܵܐ ܡ̣ܢ ܕܡܵܨܲܚ ܚܵܫܒ̣ܲܚ. ܗܲܪ ܗ̇ܝ ܐܲܗܘܵܠ ܕܐܵܢܝܼ ܒܸܬ ܦܵܝܫܵܐ ܝܘܼܗܒ̣ܸܠܬܵܐ ܐܘܼܦ ܩܵܬܲܢ. ܒܵܬ݉ܪ ܚܲܕ݉ܟ̰ܵܐ ܙܲܒ̣ܢܵܐ ܬܲܥܙܝܼܲܢ ܒܸܬ ܦܵܝܫܵܐ ܡܘܼܚܠܸܦܬܵܐ ܒܙܡܵܪܬܵܐ ܕܚܵܕܘܼܬܵܐ: ܕܒܕܘܼܟܬܵܐ ܕܢܵܛܘܿܦܝܵܬܹ̈ܐ ܕܛܠܘܼܠܵܐ ܕܦܵܫܲܡܬܵܐ ܒܸܬ ܗܵܘܝܼ ܡܲܖ̈ܓܵܢܝܵܬܹܐ ܕܒܪܝܼܟ̣ܘܼܬܵܐ ܐܵܒܵܕܝܼܢܵܝܬܵܐ. ܒܲܣ ܗ݉ܘܹܝܡܘܿܢ ܒܝܲܗܒ̣ܵܐ ܠܸܒܵܐ ܚܲܕ݉ ܠܗ̇ܘ ܐ݉ܚܹܪ݉ܢܵܐ ܒܐܲܢܹܐ ܗܸܡܸܙܡܵܢܹ̈ܐ.