ܛܒܚ 25
ܚܠܝܬܐ ܝܠܗ ܠܫܡܓܝ̈ (ܬܫܒܚܝܬ̈ܐ ܒ: 3)
ܗܲܝܡܵܢܘܼܬܵܐ܆ ܓܵܘ ܟܬܵܒ̣ܹ̈ܐ ܩܲܕܝܼܫܹ̈ܐ ܐܝܼܬ ܠܵܗ̇ ܢܸܣܒܲܬ ܠܟܠܵܝ ܖܸ̈ܓ̣ܫܹܐ. ܗܲܝܡܵܢܘܼܬܵܐ ܝܼܠܵܗ̇ ܚܙܵܝܬܵܐ. ܚܘܼܪܘܿܢ ܐܸܠܝܼ ܘܦܘܼܫܘܿܢ ܦܘܼܪܩܹܐ. ܗܲܝܡܵܢܘܼܬܵܐ ܝܼܠܵܗ ܫܡܵܥܬܵܐ. ܫܡܸܥ: ܘܒܸܬ ܚܲܝܵܐ ܓܵܢܘܼܟ̣. ܗܲܝܡܵܢܘܼܬܵܐ ܝܼܠܵܗ̇ ܫܩܵܠܬܵܐ ܕܪܹܝܚܵܐ. ܡܘܼܪܵܐ: ܘܐܲܗܵܠܘܿܬ: ܩܲܣܝܵܐ: ܟܠܵܝ ܓ̰ܘܼܠܘܼ̈ܟ̣: ܡܸܫܚܵܐ ܣܘܼܦܩܵܐ ܫܸܡܘܼܟ̣. ܡܸܢ݉ܕܪܸܫ݉: ܗܲܝܡܵܢܘܼܬܵܐ ܝܼܠܵܗ̇ ܕܩܵܪܬܵܐ ܪܘܼܚܵܢܵܝܬܵܐ. ܒܐܵܗܵܐ ܬܵܗܵܪ ܕܗܲܝܡܵܢܘܼܬܵܐ ܐ݉ܬܹܐ ܠܵܗ̇ ܗ̇ܝ ܒܲܟ̣ܬܵܐ ܡ̣ܢ ܒܵܬ݉ܪܵܝܵܐ ܘܕܩܝܼܪܵܗ̇ ܒܫܸܦܘܼܠܵܐ ܕܠܒ̣ܸܫܬܵܐ ܕܡܫܝܼܚܵܐ: ܘܒܐܵܗܵܐ ܐܘܼܦ ܐܲܚܢܲܢ ܟܹܐ ܕܵܩܪܲܚ ܒܡܸܢܕܝܼܵܢܹ̈ܐ ܕܚܲܒܪܵܐ ܨܦܵܝܝܼ ܕܚܲܝܹ̈ܐ. ܗܲܪ ܗܵܕܵܐ ܙܹܐ: ܗܲܝܡܵܢܘܼܬܵܐ ܝܼܠܵܗ̇ ܫܩܵܠܬܵܐ ܕܛܲܥܡܵܐ ܪܘܼܚܵܢܵܐܝܼܬ. ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܓܝܼ̈ ܗܸܡܸܙܡܵܢܘܼ̈ܟ̣: ܒܘܼܫ ܡ̣ܢ ܕܸܒ̣ܫܵܐ ܠܦܵܘܡܝܼ. ܡܫܝܼܚܵܐ ܒܹܐܡܵܪܵܐ ܝܠܹܗ: ܕܐܸܢ ܠܵܐ ܐܵܟ̣ܠܝܼܬܘܿܢ ܦܲܓ̣ܪܹܗ ܕܒܪܘܿܢܹܗ ܕܐ݉ܢܵܫܵܐ: ܘܫܵܬܹܝܬܘܿܢ ܕܸܡܹܗ: ܠܲܝܬ ܠܵܘܟ̣ܘܿܢ ܚܲܝܹ̈ܐ ܒܓܵܢܵܘ̈ܟ̣ܘܿܢ.
ܐܵܗܵܐ ܛܲܥܡܵܐ ܗܲܪ ܗܲܝܡܵܢܘܼܬܵܐ ܝܠܹܗ ܒܦܘܼܠܚܵܢܘܼܗ̇ ܪܹܫܵܝܵܐ. ܚܲܕ݉ ܡ̣ܢ ܫܘܼܠܹ̈ܐ ܩܲܕ݉ܡܵܝܹ̈ܐ ܒܗܲܝܡܵܢܘܼܬܵܐ ܝܼܠܹܗ ܫܡܵܥܬܵܐ. ܩܵܠܵܐ ܕܐܲܠܵܗܵܐ ܟܹܐ ܫܵܡܥܲܚ ܠܹܗ ܠܵܐ ܐܲܚܟ̰ܝܼ ܒܢܵܬܵܐ ܒܲܪܵܝܬܵܐ: ܐܝܼܢܵܐ ܐܘܼܦ ܒܢܵܬܵܐ ܓܵܘܵܝܬܵܐ. ܟܹܐ ܗܲܡܸܢܲܚ ܕܚܲܒܪܵܐ ܕܐܲܠܵܗܵܐ ܝܠܹܗ: ܘܐܵܗܵܐ ܝܠܵܗ̇ ܫܡܵܥܬܵܐ ܕܗܲܝܡܵܢܘܼܬܵܐ. ܡܸܢ݉ܕܪܸܫ݉: ܚܝܼܵܠܲܢ ܟܹܐ ܚܵܝܸܪ ܠܣܲܪܲܣܬܘܼܬܵܐ ܕܵܐܟ̣ܝܼ ܕܦܝܼܫܬܵܐ ܝܠܵܗ̇ ܡܘܼܚܙܝܼܬܵܐ ܩܵܬܲܢ: ܝܲܥܢܹܐ: ܟܹܐ ܦܵܪܡܲܚ ܠܵܗ̇: ܟܹܐ ܪܵܥܫܲܚ ܠܡܲܥܢܵܝܘܼܗ̇. ܐܵܗܵܐ ܝܠܵܗ̇ ܚܙܵܝܬܵܐ ܕܗܲܝܡܵܢܘܼܬܵܐ. ܐܝܼܬܵܐ ܟܹܐ ܪܵܥܫܲܚ ܠܛܝܼܡܘܼܗ̇. ܟܹܐ ܫܲܪܲܚ ܠܡܲܚܘܼܒܘܼܗ̇: ܘܟܹܐ ܫܵܩܚܲܠ ܪܹܝܚܘܼܗ̇ ܒܲܣܝܼܡܵܐ: ܐܵܗܵܐ ܝܠܵܗ̇ ܫܩܵܠܬܵܐ ܕܪܹܝܚܵܐ ܒܗܲܝܡܵܢܘܼܬܵܐ. ܐܝܼܬܵܐ ܟܹܐ ܫܵܩܠܲܚ ܠܗ݉ܘܿܢ ܩܵܐ ܓܵܢܲܢ ܐܵܢܝܼ ܒܘܼܖ̈ܟܵܬܹܐ ܕܡܫܝܼܚܵܐ ܗܘܼܕܪܵܐ ܝܠܹܗ ܩܵܬܲܢ: ܘܐܵܗܵܐ ܝܠܵܗ̇ ܕܩܵܪܬܵܐ ܕܗܲܝܡܵܢܘܼܬܵܐ. ܡ̣ܢ ܒܵܬ݉ܪ ܐܲܢܹܐ ܒܹܐܬܵܝܵܐ ܝܢܵܐ ܒܘܼܣܵܡܹ̈ܐ ܕܫܠܵܡܵܐ ܘܚܵܕܘܼܬܵܐ ܘܫܲܪܝܼܟܘܼܬܵܐ ܥܲܡ ܥܘܼܕܵܠܹܐ: ܕܝܼܢܵܐ ܛܲܥܡܵܐ ܕܗܲܝܡܵܢܘܼܬܵܐ. ܟܠ ܚܕܵܐ ܡ̣ܢ ܐܲܢܹܐ ܐܘܼܖ̈ܚܵܬܹܐ ܕܦܠܵܚܬܵܐ ܕܗܲܝܡܵܢܘܼܬܵܐ ܒܹܗܘܵܝܵܐ ܝܠܵܗ̇ ܐܲܣܒܵܒ ܕܦܘܼܪܩܵܢܵܐ: ܘܐܝܼܡܵܐ ܕܟܠܵܝ ܡܘܼܦܠܸܚܵܝ ܝܘܲܚ: ܗ̇ܝܓܵܗ ܝܠܵܗ̇ ܕܟܹܐ ܝܵܬܒ̣ܲܚ ܬܚܘܿܬ ܛܸܠܵܢܝܼܬܘܼܗܝ ܒܚܵܕܘܼܬܵܐ ܓܘܼܪܬܵܐ ܘܟܹܐ ܪܵܥܫܲܚ ܕܛܥܘܼܢܬܘܼܗܝ ܚܠܝܼܬܵܐ ܝܠܵܗ̇ ܠܫܵܡܵܓܲܢ.