ܛܒܚ 28

ܡܫܚܐ ܩܐ ܩܢܕܝܠܐ (ܡܦܩܢܐ ܟܗ: 6)

ܓܵܢܝܼ: ܟܡܵܐ ܣܢܝܼܩܬܵܐ ܝܘܲܬܝ ܠܐܵܗܵܐ ܡܸܫܚܵܐ: ܣܵܒܵܒ ܕܫܪܵܥܵܟ̣ܝ ܠܹܐ ܠܵܗܝܵܐ ܪܵܒܵܐ ܙܲܒ̣ܢܵܐ ܕܠܵܐ ܕܝܼܘܼܗܝ. ܦܬܝܼܠܬܵܟ̣ܝ ܒܸܬ ܬܲܢܬܸܢܵܐ ܘܪܹܝܚܘܼܗ̇ ܒܸܬ ܐܵܬܹܐ ܐܸܢ ܗܵܘܝܵܐ ܕܠܵܐ ܒܲܙܪܵܐ. ܘܒܵܬ݉ܪ ܚܲܕ݉ܟ̰ܵܐ ܐܘܼܦ ܗ̇ܘ ܒܲܠܒܵܛܵܐ ܕܐܝܼܬ ܗ݉ܘܵܐ ܒܝܼܘܼܗ̇ ܒܸܬ ܟ̰ܲܡܹܐ. ܠܲܝܬ ܠܵܟ̣ܝ ܩܘܼܢܝܵܐ ܕܡܸܫܚܵܐ ܒܸܢܒ̣ܵܥܵܐ ܓܵܘ ܐܲܨܠܵܟ̣ܝ ܐ݉ܢܵܫܵܝܵܐ: ܒܘܼܬ ܐܵܗܵܐ ܠܵܙܸܡ ܝܼܠܵܗ̇ ܕܐܲܙܲܠ݉ܬܝ ܠܟܸܣ ܙܵܒܢܵܢܹ̈ܐ ܘܙܵܒ̣ܢܲܬܝ ܩܵܐ ܓܵܢܵܟ̣ܝ: ܐܸܠܵܐ ܐܘܼܦ ܐܲܢ݉ܬܝ ܐܲܝܟ̣ ܒܬܘܼܠܵܬܹ̈ܐ ܢܲܙܵܢܹ̈ܐ ܒܸܬ ܐܵܡܪܲܬܝ: ܫܪܵܥܝܼ ܟ̰ܡܹܐ ܠܵܗ̇. ܐܘܼܦ ܫܖ̈ܵܥܵܬܹܐ ܡܩܘܼܕܫܹ̈ܐ ܕܗܲܝܟܠܵܐ ܠܹܐ ܠܵܗܝܝܼ ܗ݉ܘܵܘ ܕܠܵܐ ܡܸܫܚܵܐ: ܐܘܼܦ ܐܵܢܝܼ ܠܵܙܸܡ ܝܼܗ݉ܘܵܐ ܕܦܵܝܫܝܼ ܗ݉ܘܵܘ ܬܘܼܪܣܝܹܐ ܘܐܵܦܹܢ ܦܵܘܚܹ̈ܐ ܠܹܐ ܡܵܚܝܼ ܗ݉ܘܵܘ ܥܲܠܵܝ: ܐܝܼܢܵܐ ܡܸܢ݉ܕܪܸܫ݉ ܦܬܝܼܠܝܵܬܵܝ̈ ܟܹܐ ܦܵܝܫܝܼ ܗ݉ܘܵܘ ܦܪܝܼܡܹܐ ܘܬܘܼܪܨܹܐ. ܣܢܝܼܩܘܼܬܵܐ ܕܝܼܵܟ̣ܝ ܙܹܐ ܠܹܐ ܝܠܵܗ̇ ܒܵܨܘܿܪܬܵܐ ܡ̣ܢ ܐܵܢܝܼ. ܓܵܘ ܐܲܗܘܵܠܵܬܹ̈ܐ ܟ̰ܸܡ ܡܲܢܬܝܼܵܢܹ̈ܐ ܙܹܐ ܠܹܐ ܡܵܨܝܲܬܝ ܚܵܡܝܲܬܝ ܒܲܗܪܵܟ̣ܝ ܐܘܼܦ ܩܵܐ ܚܕܵܐ ܣܵܥܲܬ ܡܵܓܲܪ ܕܫܵܩܠܲܬܝ ܡܸܫܚܵܐ ܬܵܙܵܐ ܕܫܵܦܵܩܲܬ.

ܟܠ ܡܸܫܚܵܐ ܠܹܐ ܐܵܬܹܐ ܗ݉ܘܵܐ ܠܡܲܦܠܘܼܚܹܐ ܓܵܘ ܚܸܠܡܲܬ ܕܡܵܪܝܵܐ. ܠܵܐ ܢܸܦ̮ܛܵܐ ܕܟܹܐ ܦܵܠܸܛ ܡ̣ܢ ܐܲܪܥܵܐ ܒܦܸܪܝܘܼܬܵܐ: ܘܠܵܐ ܡܸܫܚܵܐ ܕܢܘܼܢܹ̈ܐ: ܘܠܵܐ ܡܸܫܚܵܐ ܕܓܵܘܙܹ̈ܐ: ܠܹܐ ܐܵܬܝܼ ܠܡܲܦܠܘܼܚܹܐ. ܐܲܚܟ̰ܝܼ ܚܲܕ݉ ܡܸܫܚܵܐ ܦܝܼܫܵܐ ܝܗ݉ܘܵܐ ܓܘܼܒܝܵܐ ــ ܡܸܫܚܵܐ ܕܙܲܝܬܹ̈ܐ ܨܸܦܝܵܐ. ܛܵܒ̣ܘܼܬܵܐ ܟܝܵܢܵܝܬܵܐ ܙܹܐ ܗܸܟ̃ ܠܹܐ ܝܠܵܗ̇ ܡܲܩܒܘܼܠ ܩܲܕ݉ܡ ܐܲܠܵܗܵܐ: ܘܩܲܕܝܼܫܵܐ ܣܲܪܲܣܬ ܠܹܐ ܗܵܘܹܐ ܪܵܙܝܼ ܒܝܼܘܼܗ̇: ܢܲܗܖ̈ܵܘܵܬܹܐ ܕܗܲܕܟ̣ܵܐ ܛܵܒ̣ܘܼܬܵܐ ܠܹܐ ܡܵܠܝܼ ܠܵܗ̇ ܣܢܝܼܩܘܼܬܘܼܗܝ. ܗ̇ܘ ܟܹܐ ܐܵܙܸܠ ܠܟ̰ܵܪܵܣ ܕܙܲܝܬܹ̈ܐ ܕܓܲܕܣܹܡܵܢ ܘܟܹܐ ܓܵܪܸܫ ܬܘܼܪܣܵܝܘܼܗܝ ܡ̣ܢ ܗ̇ܘ ܕܓܵܘܘܼܗ̇ ܦܝܼܫ ܠܹܗ ܡܪܝܼܥܟ̰ܵܐ. ܡܸܫܚܵܐ ܕܫܵܦܵܩܲܬ ܕܐܹܘܲܢܓܵܠܝܘܿܢ ܨܸܦܝܵܐ ܝܠܹܗ ܘܪܲܕ ܡ̣ܢ ܕܘܼܪܕ ܘܚܸܠܬ: ܘܒܘܼܬ ܐܵܗܵܐ ܒܲܗܪܘܼܗܝ ܙܹܐ ܒܸܬ ܗܵܘܹܐ ܨܸܦܝܵܐ ܘܠܵܘܓ̰ܵܢܵܐ. ܥܹܕܵܬ̈ܲܢ ܝܼܢܵܐ ܩܲܢܕܝܼܠܹ̈ܐ ܕܲܗܒ̣ܵܢܵܝܹ̈ܐ ܕܦܵܪܘܿܩܲܢ: ܘܐܸܢ ܐܵܢܝܼ ܒܵܥܝܼ ܕܗܵܘܝܼ ܒܲܗܪܵܐ ܩܵܐ ܐܵܗܵܐ ܕܘܼܢܝܹܐ ܚܘܼܒ̣ܝܵܢܬܵܐ: ܓܵܪܵܓ ܗܵܘܹܐ ܠܗ݉ܘܿܢ ܪܵܒܵܐ ܡܸܫܚܵܐ ܩܲܕܝܼܫܵܐ. ܨܵܠܲܚ ܨܠܘܿܬܵܐ ܒܘܼܬ ܓܵܢܲܢ: ܒܘܼܬ ܡܲܟܖܸ̈ܙܵܢܲܢ ܘܒܘܼܬ ܥܹܕܵܬ̈ܲܢ: ܕܗܸܟ̃ ܠܵܐ ܒܵܨܸܪ ܡܸܫܚܵܐ ܩܵܐ ܒܲܗܪܵܐ. ܣܲܪܲܣܬܘܼܬܵܐ: ܩܲܕܝܼܫܘܼܬܵܐ: ܚܵܕܘܼܬܵܐ: ܝܕܲܥܬܵܐ: ܚܘܼܒܵܐ: ܟܠܵܝ ܐܲܢܹܐ ܙܲܗܪܝܼܖܹ̈ܐ ܕܒܲܗܪܵܐ ܩܲܕܝܼܫܵܐ ܝܢܵܐ: ܐܝܼܢܵܐ ܠܹܐ ܡܵܨܲܚ ܠܡܲܚܙܘܼܝܵܝ ܐܲܢܹܐ ܙܲܗܪܝܼܖܹ̈ܐ ܡܵܓܲܪ ܕܒܓܵܢܲܢ ܩܲܒܠܲܚ ܡܸܫܚܵܐ ܡ̣ܢ ܐܲܠܵܗܵܐ ܪܘܼܚܵܐ ܕܩܘܼܕܫܵܐ.