ܪܚܡ ܥܠܝ ܝܐ ܐܠܗܐ (ܡܙܡܘܪܐ ܢܐ: 1)

ܕܲܟܬܸܪ ܟܵܝܪܹܐ ܐܝܼܡܵܐ ܕܡܝܼܟ̣ܵܐ ܝܗ݉ܘܵܐ ܒܚܲܕ݉ ܡܲܪܥܵܐ ܚܲܝܠܵܢܵܐ: ܒܘܼܩܸܪܗ݉ܘܿܢ ܡܸܢܘܼܗܝ: ܕܐܸܢ ܡܵܝܸܬ ܗ݉ܘܵܐ ܒܗ̇ܘ ܡܲܪܥܵܐ: ܐܲܝܢܝܼ ܓ̰ܲܪܓܵܐ ܒܸܬ ܓܲܒܝܼ ܗ݉ܘܵܐ ܩܵܐ ܬܸܫܡܸܫܬܘܼܗܝ. ܗ̇ܘ ܓ̰ܘܼܘܸܒ ܠܹܗ: ܐܵܗ: ܚܲܕ݉ ܐ݉ܢܵܫܵܐ ܐܘܼܚܟ̰ܵܐ ܡܸܣܟܹܢܵܐ ܘܚܲܛܵܝܵܐ ܕܐܲܝܟ̣ ܕܝܼܝܼ ܠܹܐ ܝܠܹܗ ܚܫܝܼܚܵܐ ܕܗܸܟ̃ ܡܸܢܕܝܼ ܦܵܐܸܫ ܐ݉ܡܝܼܪܵܐ ܒܘܼܬ ܕܝܼܘܼܗܝ: ܐܝܼܢܵܐ ܐܸܢ ܗܲܪ ܡܲܚܫܸܚܝܼܬܘܿܢ ܚܕܵܐ ܟܵܪܘܿܙܘܼܬܵܐ ܩܵܐ ܬܸܫܡܸܫܬܝܼ: ܫܒ̣ܘܿܩ ܗܵܘܝܵܐ ܡ̣ܢ ܐܵܗܵܐ ܓ̰ܲܪܓܵܐ: ܥܒ̣ܘܿܕ ܖ̈ܲܚܡܹܐ ܐܸܠܝܼ: ܝܵܐ ܐܲܠܵܗܵܐ: ܐܲܝܟ̣ ܫܵܦܵܩܲܬܘܼܟ̣: ܘܐܲܝܟ̣ ܒܘܼܫܵܝܘܼܝܵܐ ܕܖ̈ܲܚܡܘܼܟ̣ ܓܪܘܿܕ ܓܢܵܗܝܼ̈. ܗܲܪ ܒܗ̇ܝ ܪܘܼܚܵܐ ܕܡܲܟܝܼܟ̣ܘܼܬܵܐ ܗ̇ܘ ܥܒ̣ܝܼܕ ܠܹܗ ܘܲܨܝܲܬ ܕܐܲܢܹܐ ܚܲܒܖܹ̈ܐ ܦܵܝܫܝܼ ܗ݉ܘܵܘ ܩܝܼܪܹܐ ܥܲܠ ܟܹܐܦܵܐ ܕܩܲܒ̣ܪܘܼܗܝ: ܘܠܵܐ ܗܸܟ̃ ܡܸܢܕܝܼ ܙܵܘܕܵܐ: ــ

ܘܠܝܡ ܟܝܪܐ: ܗ݉ܘܐ ܠܗ 17 ܒܛܒܚ 1761 ــ ܡܝܬ ܠܗ ….

ܚܕ݉ ܬܘܠܥܐ ܫܩܝ ܘܡܣܟܢܐ: ܓܘ ܚܦܩܘܟ̣ ܡܪܝܐ ܐܬܝܢ ܐܢܐ

ܩܲܕܝܼܫܹ̈ܐ ܒܘܼܫ ܡܝܘܼܩܖܹ̈ܐ ܘܒܘܼܫ ܡܵܪܹܐ ܬܲܪܒܝܲܬ ܪܘܼܚܵܢܵܝܬܵܐ ܐܲܚܟ̰ܝܼ ܥܲܠ ܒܸܢܝܲܬ ܕܫܵܦܵܩܲܬ ܟܹܐ ܡܵܨܝܼ ܠܩܲܪܒܘܼܢܹܐ ܠܐܲܠܵܗܵܝ. ܐ݉ܢܵܫܹ̈ܐ ܕܡ̣ܢ ܟܠܵܝ ܐ݉ܚܹܖ̈݉ܢܹܐ ܒܘܼܫ ܨܦܵܝܝܼ ܟܹܐ ܪܵܥܫܝܼ ܕܠܹܐ ܝܢܵܐ ܙܵܘܕܵܐ ܡ̣ܢ ܐ݉ܢܵܫܹ̈ܐ ܐ݉ܚܹܖ̈݉ܢܹܐ. ܓܵܡܝܹ̈ܐ ܣܦܝܼܩܹ̈ܐ ܟܹܐ ܢܵܦܠܝܼ ܠܦܵܬܵܐ ܕܝܵܡܵܐ: ܐܝܼܢܵܐ ܓܵܡܝܹ̈ܐ ܡܘܼܛܥܸܢܹ̈ܐ ܒܕܵܘܸܠܬܵܐ ܟܹܐ ܛܲܒܥܝܼ. ܡܵܘܕܝܼܵܢܹ̈ܐ ܕܡ̣ܢ ܦܵܬܵܐ ܟܹܐ ܡܵܨܝܼ ܚܵܬܪܝܼ: ܐܝܼܢܵܐ ܒܢܘܿܢܹ̈ܐ ܫܲܪܝܼܖܹ̈ܐ ܕܐܲܠܵܗܵܐ ܐܲܚܟ̰ܝܼ ܟܹܐ ܡܲܩܘܸܚܝܼ ܕܐܲܠܵܗܵܐ ܥܵܒ̣ܸܕ ܖ̈ܲܚܡܹܐ ܠܫܲܩܝܼܘܼܬܵܝ. ܐܲܚܢܲܢ ܣܢܝܼܩܹ̈ܐ ܝܘܲܚ ܕܡܵܪܝܵܐ ܥܵܒ̣ܸܕ ܖ̈ܲܚܡܹܐ ܥܲܠ ܦܘܼܠܚܵܢܲܢ: ܨܠܵܘܵܬ̈ܲܢ: ܟܵܖ̈ܘܿܙܘܼܝܵܬܲܢ: ܐܸܪܘܵܢܲܢ: ܘܟܠܵܝ ܫܘܼ̈ܠܲܢ ܩܲܕܝܼܫܹ̈ܐ. ܕܸܡܵܐ ܠܹܐ ܝܗ݉ܘܵܐ ܡܘܼܪܝܸܣܵܐ ܐܲܚܟ̰ܝܼ ܥܲܠ ܫܝܼܦܵܢܹ̈ܐ ܕܬܲܖ̈ܥܵܢܹܐ ܕܒܢܲܝ̈ ܝܼܣܪܵܝܹܠ: ܐܸܠܵܐ ܐܘܼܦ ܥܲܠ ܡܲܕܒܚܵܐ ܘܥܲܠ ܚܘܼܣܵܝܵܐ ܘܓܵܘ ܡܲܩܕܫܵܐ: ܣܵܒܵܒ ܚܛܝܼܬܵܐ ܗܲܪ ܟܹܐ ܥܵܒ̣ܪܵܐ ܠܕܘܼ̈ܟܵܢܲܢ ܟ̰ܸܡ ܩܲܕܝܼܫܹ̈ܐ: ܘܕܸܡܵܐ ܕܡܫܝܼܚܵܐ ܠܵܙܸܡ ܝܼܠܹܗ ܩܵܐ ܕܵܟ̣ܵܝܬܵܝ. ܟܡܵܐ ܒܲܣܝܼܡܬܵܐ ܝܠܵܗ̇ ܕܕܵܟ̣ܪܲܚ ܕܖ̈ܲܚܡܹܐ ܠܵܐ ܬܵܝܡܵܢܹ̈ܐ ܐܝܼܬ ܩܵܐ ܠܲܒܵܠܬܲܢ ܠܵܩܲܕ݉ܡܵܐ ܘܩܵܐ ܒܵܣܲܡܬܵܐ ܕܓܲܖ̈ܡܲܢ ܬܒ̣ܝܼܖܹ̈ܐ.