ܗ̇ܘ ܦܐܪܐ ܝܠܗ (ܓܠܝܢܐ ܟܐ: 23)

ܬܲܚܡܸܢ ܒܫܸܠܝܘܼܬܵܐ ܥܲܠ ܦܹܐܪܵܐ ܐܲܝܟ̣ ܒܲܗܪܵܐ ܕܫܡܲܝܵܐ. ܓܵܘ ܟܬܵܒ̣ܹ̈ܐ ܩܲܕܝܼܫܹ̈ܐ ܒܲܗܪܵܐ ܛܘܼܦ̮ܣܵܐ ܕܚܵܕܘܼܬܵܐ ܝܠܹܗ. ܚܵܕܘܼܬܵܐ ܕܩܲܕܝܼܫܹ̈ܐ ܕܓܵܘ ܫܡܲܝܵܐ ܕܒ̣ܝܼܩܬܵܐ ܝܠܵܗ̇ ܒܐܵܗܵܐ: ܕܡܫܝܼܚܵܐ ܡܘܼܚܸܒܵܝ ܠܹܗ: ܙܒ̣ܝܼܢܵܝ ܠܹܗ: ܕܘܼܟ̣ܝܵܝ ܠܹܗ: ܡܘܼܠܒ̣ܸܫܵܝ ܠܹܗ: ܢܛܝܼܪܵܝ ܠܹܗ: ܘܚܩܝܼܪܵܝ ܠܹܗ. ܘܕܐܵܢܝܼ ܬܵܡܵܐ ܟܸܠܝܹܐ ܝܢܵܐ ܐܲܚܟ̰ܝܼ ܒܚܲܝܠܵܐ ܕܡܵܪܲܢ ܝܑܼܫܘܿܥ. ܟܠ ܚܕܵܐ ܡ̣ܢ ܐܲܢܹܐ ܦܸܟܝܼܖܹ̈ܐ ܩܵܬܵܝ ܐܲܝܟ̣ ܚܲܕ݉ ܩܘܼܢܛܵܝܦܵܐ ܕܐܲܫܟܘܿܠ ܝܼܠܵܗ̇. ܒܲܗܪܵܐ ܡܲܒܘܼܥܵܐ ܕܫܘܼܦܪܵܐ ܝܠܹܗ ܙܹܐ. ܟܲܕ ܒܲܗܪܵܐ ܥܵܪܸܩ: ܠܲܝܬ ܫܘܼܦܪܵܐ. ܕܠܵܐ ܒܲܗܪܵܐ ܐܲܠܡܵܣܹ̈ܐ ܠܹܐ ܠܲܓ̰ܠܸܓ̰ܝܼ: ܘܡܲܖ̈ܓܵܢܝܵܬܹܐ ܠܹܐ ܪܲܦܝܼ ܒܲܗܪܵܝ ܡܲܒܣܸܡܵܢܵܐ. ܗܲܕܟ̣ܵܐ: ܟܠܹܗ ܫܘܼܦܪܵܐ ܕܩܲܕܝܼܫܹ̈ܐ ܕܒܪܵܘܡܵܐ ܒܹܐܬܵܝܵܐ ܝܠܹܗ ܡ̣ܢ ܡܫܝܼܚܵܐ. ܐܲܝܟ̣ ܦܲܠܝܼܛܹ̈ܐ ܡܲܕܘܼܪܹܐ ܝܢܵܐ ܠܵܘܓ̰ܵܐ ܕܫܸܡܫܵܐ ܕܙܲܕܝܼܩܘܼܬܵܐ: ܘܒܹܚܵܝܵܐ ܝܢܵܐ ܐܲܝܟ̣ ܙܲܗܪܝܼܖܹ̈ܐ ܒܸܦܠܵܛܵܐ ܡ̣ܢ ܢܲܗܝܼܪܵܐ ܩܸܢܛܪܘܿܢܵܝܵܐ. ܐܸܢ ܗ̇ܘ ܓܵܪܸܫ ܗ݉ܘܵܐ ܓܵܢܘܼܗܝ: ܐܵܢܝܼ ܓܵܪܵܓ ܡܵܝܬܝܼ ܗ݉ܘܵܘ. ܐܸܢ ܠܵܘܓ̰ܵܐ ܕܗ̇ܘ ܦܵܐܸܫ ܗ݉ܘܵܐ ܡܘܼܟܸܣܵܐ ܡܸܢܵܝ: ܒܲܗܪܵܐ ܕܐܵܢܝܼ ܟ̰ܸܡ ܒܸܬ ܒܵܛܸܠ ܗ݉ܘܵܐ. ܡܸܢ݉ܕܪܸܫ݉: ܒܲܗܪܵܐ ܛܘܼܦ̮ܣܵܐ ܕܝܕܲܥܬܵܐ ܝܠܹܗ. ܓܵܘ ܫܡܲܝܵܐ ܝܕܲܥܬܲܢ ܟܵܡܝܼܠ ܒܸܬ ܗܵܘܝܵܐ: ܐܝܼܢܵܐ ܗܲܪ ܝܑܼܫܘܿܥ ܡܫܝܼܚܵܐ ܒܸܬ ܗܵܘܹܐ ܡܲܒܘܼܥܘܼܗ̇. ܣܵܡܹ̈ܐ ܚܘܼܒ̣ܝܵܢܹ̈ܐ ܒܡܕܲܒܪܵܢܘܼܬܵܐ ܕܐܲܠܵܗܵܐ: ܐܵܢܝܼ ܕܠܹܐ ܐܵܬܝܼ ܠܦܲܪܡܘܼܝܹܐ ܠܲܐܟ̣ܵܐ: ܬܵܡܵܐ ܒܨܸܦܝܘܼܬܵܐ ܒܸܬ ܦܵܝܫܝܼ ܚܸܙܝܹܐ: ܘܟܠ ܡܸܢܕܝܼ ܕܚܘܼܒ̣ܝܵܢܵܐ ܝܠܹܗ ܩܵܬܲܢ ܠܲܐܟ̣ܵܐ: ܨܸܦܝܵܐ ܒܸܬ ܗܵܘܹܐ ܩܲܕ݉ܡ ܒܲܗܪܵܐ ܕܦܹܐܪܵܐ. ܐܵܗ! ܕܵܐܟ̣ܝܼ ܓܸܠܝܵܢܹ̈ܐ ܒܸܬ ܗܵܘܝܼ: ܘܕܵܐܟ̣ܝܼ ܐܝܼܩܵܪܵܐ ܩܵܐ ܐܲܠܵܗܵܐ ܕܚܘܼܒܵܐ! ܡܸܢ݉ܕܪܸܫ݉: ܒܲܗܪܵܐ ܡܲܥܢܵܝܘܼܗܝ ܝܠܵܗ̇: ܓܠܵܝܬܵܐ. ܒܲܗܪܵܐ ܟܹܐ ܓܵܠܹܐ. ܓܵܘ ܐܵܗܵܐ ܕܘܼܢܝܹܐ ܠܹܐ ܝܠܵܗ̇ ܡܲܥܠܘܼܡ ܡܘܼܕܝܼ ܒܸܬ ܗܵܘܲܚ. ܛܵܝܸܦܵܐ ܕܐܲܠܵܗܵܐ ܐܵܕܝܼܵܐ ܛܸܫܝܵܐ ܝܠܹܗ: ܐܝܼܢܵܐ ܐܝܼܡܵܐ ܕܡܫܝܼܚܵܐ ܩܲܒܸܠ ܠܹܗ ܛܵܝܸܦܘܼܗܝ ܓܵܘ ܫܡܲܝܵܐ: ܒܸܬ ܕܵܩܸܪ ܒܝܼܵܝ ܒܩܵܛܝܼܵܐ ܕܚܘܼܒܘܼܗܝ ܘܒܸܬ ܫܲܚܠܸܦ ܠܗ݉ܘܿܢ ܠܕܵܡܵܝܬܵܐ ܕܚܸܩܪܵܐ ܓܸܠܝܵܐ ܕܓܵܢܘܼܗܝ. ܩܲܕ݉ܡܵܝܬܵܐ ܡܸܣܟܹܢܹ̈ܐ ܘܫܲܩܝܼܹ̈ܐ ܝܗ݉ܘܵܘ: ܐܝܼܢܵܐ ܐܵܕܝܼܵܐ ܚܙܝܼ ܡܘܼܕܝܼ ܫܲܚܠܲܦܬܵܐ؟ ܩܲܕ݉ܡܵܝܬܵܐ ܠܘܼܟܸܢܹܐ ܝܗ݉ܘܵܘ ܒܚܛܝܼܬܵܐ: ܐܝܼܢܵܐ ܒܚܕܵܐ ܕܩܵܪܬܵܐ ܕܐܝܼܕܘܼܗܝ ܦܝܼܫ ܠܗ݉ܘܿܢ ܥܒ̣ܝܼܕܹܐ ܫܲܦ̮ܩܵܢܹ̈ܐ ܐܲܝܟ̣ ܫܸܡܫܵܐ. ܐܵܗܵܐ ܟܠܵܗ̇ ܒܸܦܠܵܛܵܐ ܝܠܵܗ̇ ܡ̣ܢ ܦܹܐܪܵܐ ܚܩܝܼܪܵܐ ܕܒܫܡܲܝܵܐ. ܬܲܟܠܵܐ ܕܚܵܙܲܚ ܠܹܗ ܬܵܡܵܐ ܒܒܲܗܪܵܐ ܕܓܵܢܘܼܗܝ: ܡܲܠܟܵܐ ܕܡܲܠܟܹ̈ܐ ܘܡܵܪܵܐ ܕܡܵܖ̈ܵܘܵܬܹܐ.