ܛܒܚ 8

ܕܥܙܠܐ ܟܘܫ̈ܐ ܟܐ ܙܩܪܝ (ܐܫܥܝܐ ܢܛ: 5)

ܚܘܿܪ ܒܓܲܪܕܵܐ ܕܥܵܙܠܵܐ ܟܘܼܫܹ̈ܐ ܘܚܙܝܼ ܕܵܐܟ̣ܝܼ ܒܝܼܲܗܒ̣ܵܐ ܠܹܗ ܚܕܵܐ ܕܵܡܵܝܬܵܐ ܨܦܝܼܬܵܐ ܕܬܵܘܕܝܼܬܵܐ ܕܢܵܣܹܒ̣ ܒܐܲܦܹ̈ܐ. ܢܝܼܲܬܘܼܗܝ ܝܠܵܗ̇ ܩܵܐ ܕܒ̣ܲܩܬܵܐ ܕܨܲܝܕܵܐ. ܥܵܙܠܵܐ ܟܘܼܫܹ̈ܐ ܟܹܐ ܡܲܣܒ̣ܸܥܵܐ ܓܵܢܘܼܗ̇ ܒܕܸܕܒ̣ܹ̈ܐ: ܘܗܵܕܵܐ ܙܹܐ ܢܵܣܹܒ̣ ܒܐܲܦܹ̈ܐ ܟܹܐ ܩܲܒܸܠ ܗܵܩܘܼܗܝ. ܐ݉ܢܵܫܹ̈ܐ ܢܲܙܵܢ ܒܗܵܣܵܢܵܝܘܼܬܵܐ ܟܹܐ ܦܵܝܫܝܼ ܫܘܼܕܠܹܐ ܒܩܵܠܵܐ ܪܵܡܵܐ ܕܢܵܣܒ̣ܵܝ̈ ܒܐܲܦܹ̈ܐ: ܘܐܘܼܦ ܐ݉ܢܵܫܹ̈ܐ ܒܘܼܫ ܗܵܘܢܵܢܹ̈ܐ ܪܵܒܵܐ ܓܵܗܹ̈ܐ ܠܹܐ ܡܵܨܝܼ ܠܦܲܪܬܘܼܟܹܐ. ܦܝܼܠܝܼܦܘܿܣ ܡܘܼܥܡܸܕ ܠܹܗ ܠܫܸܡܥܘܿܢ ܡܵܓ̣ܘܿܣ: ܗ̇ܘ ܕܡܵܘܕܵܝܬܘܼܗܝ ܦܠܝܼܡܬܵܐ ܕܗܲܝܡܵܢܘܼܬܵܐ ܓ̰ܲܠܕܹܐ ܦܝܼܫ ܠܵܗ̇ ܒܘܼܛܸܠܬܵܐ ܒܡܲܢܟ̣ܲܣܬܵܐ ܩܫܝܼܬܵܐ ܕܟܹܐܦܵܐ. ܥܵܕܲܬ: ܫܸܡܵܐ: ܚܸܩܪܵܐ: ܐ݉ܙܵܠܬܵܐ ܠܵܩܲܕ݉ܡܵܐ: ܘܕܸܕܒ̣ܹ̈ܐ ܐ݉ܚܹܖ̈݉ܢܹܐ: ܐܲܢܹܐ ܝܢܵܐ ܨܲܝܕܵܐ ܕܢܵܣܹܒ̣ ܒܐܲܦܹ̈ܐ. ܓܲܪܕܵܐ ܕܥܵܙܠܵܐ ܟܘܼܫܹ̈ܐ ܚܲܕ݉ ܡܸܢܕܝܼ ܡܲܥܓ̰ܸܒܵܢܵܐ ܝܠܹܗ ܒܫܘܼܠܵܐ ܕܣܵܪܸܫܬܵܐ. ܚܘܿܪ ܒܝܼܘܼܗܝ ܘܦܵܟܸܪ ܠܦܲܢܕܹ̈ܐ ܕܨܲܝܵܕܵܐ ܨܢܝܼܥܵܐ. ܬܵܘܕܝܼܬܵܐ ܕܚܲܕ݉ ܥܲܠܕܝܼܵܢܵܐ ܠܹܐ ܝܠܵܗ̇ ܗܲܪ ܚܲܕ݉ ܗܵܕܵܐ ܡܲܥܓ̰ܸܒܵܢܬܵܐ؟ ܚܲܕ݉ ܕܘܼܓܠܵܐ ܐܘܼܚܟ̰ܵܐ ܫܘܼܠܚܵܝܵܐ ܕܵܐܟ̣ܝܼ ܒܸܡܨܵܝܵܐ ܝܠܹܗ ܠܹܥܒ̣ܵܕܘܼܗܝ ܕܡܲܒܝܸܢ ܐܲܝܟ̣ ܣܲܪܲܣܬܘܼܬܵܐ؟ ܕܵܐܟ̣ܝܼ ܟܹܐ ܡܵܨܹܐ ܕܒܸܪܸܢܓ̰ܘܼܗܝ ܥܵܒ̣ܸܕ ܠܹܗ ܒܕܵܡܵܝܬܵܐ ܕܕܲܗܒ̣ܵܐ؟ ܓܲܪܕܵܐ ܕܥܵܙܠܵܐ ܟܘܼܫܹ̈ܐ ܟܠܹܗ ܟܹܐ ܦܵܠܸܛ ܡ̣ܢ ܡܲܥܝܹ̈ܐ ܕܓܵܢܘܼܗ̇. ܕܵܒܵܫܵܐ ܡ̣ܢ ܟ̰ܘܼܟ̰ܵܓܹ̈ܐ ܟܹܐ ܓ̰ܲܡܸܥ ܠܹܗ ܕܸܒ̣ܫܵܐ: ܥܵܙܠܵܐ ܟܘܼܫܹ̈ܐ ܠܹܐ ܡܵܝܨܵܐ ܕܸܒ̣ܫܵܐ ܡ̣ܢ ܟ̰ܘܼܟ̰ܵܓܹ̈ܐ: ܐܝܼܢܵܐ ܡܸܢ݉ܕܪܸܫ݉ ܟܹܐ ܬܲܪܨܵܐ ܓܕܵܠܹ̈ܐ ܟ̰ܸܡ ܝܲܖ̈ܝܼܟ̣ܹܐ ــ ܗܲܪ ܗܲܕܟ̣ܵܐ: ܢܵܣܒ̣ܵܝ̈ ܒܐܲܦܹ̈ܐ ܙܹܐ ܟܹܐ ܡܲܬܒ̣ܝܼ ܟܠܵܗ̇ ܗܹܒ̣ܝܼܵܝ ܘܣܒܵܪܬܵܝ ܒܓܵܢܵܐ ܕܓܵܢܵܝ. ܐܵܢܝܼ ܒܓܵܢܵܝ ܡܘܼܬܸܒ̣ ܠܗ݉ܘܿܢ ܒܸܢܝܼܲܬ ܩܵܐ ܒܲܝܬܵܝ: ܘܒܐܝܼܕܵܝ̈ ܦܪܝܼܡ ܠܗ݉ܘܿܢ ܣܛܘܼܢܹ̈ܐ ܩܵܐ ܒܸܢܝܵܢܵܝ: ܡܲܚܦܘܼܠܹܐ ܡ̣ܢ ܠܸܢܦܵܠܵܐ ܬܚܘܿܬ ܡܸܢܬܵܐ ܕܫܵܦܵܩܲܬ ܕܐܲܠܵܗܵܐ. ܐܝܼܢܵܐ ܓܲܪܕܵܐ ܕܥܵܙܠܵܐ ܟܘܼܫܹ̈ܐ ܪܵܒܵܐ ܙܲܒܘܿܢ ܝܼܠܹܗ ــ ܒܦܲܢܕ ܦܝܼܫܵܐ ܝܠܹܗ ܬܘܼܪܨܵܐ: ܐܝܼܢܵܐ ܠܹܐ ܝܠܹܗ ܦܵܝܫܵܢܵܐ. ܠܹܐ ܟܵܠܹܐ ܩܲܕ݉ܡ ܟܵܢܘܿܫܬܵܐ ܕܪܹܓܵܐ ܝܲܢ ܩܲܕ݉ܡ ܚܘܼܛܪܵܐ ܕܐܘܼܪܚܵܟ̰ܝܼ ــ ܓܲܖ̈ܕܹܐ ܕܡܲܣܲܒ̣ ܒܐܲܦܘܼܬܵܐ ܓ̰ܲܠܕܹܐ ܒܸܬ ܢܵܦܠܝܼ ܟܲܕ ܟܵܢܘܿܫܬܵܐ ܕܚܪܵܒ̣ܵܐ ܫܵܪܝܵܐ ܒܫܘܼܠܘܼܗ̇ ܕܕܵܟ̣ܵܝܬܵܐ. ܐܝܼܬܵܐ ܐܵܗܵܐ ܡܲܕܟ̣ܘܼܪܲܢ ܝܼܠܵܗ̇ ܒܘܼܬ ܚܲܕ݉ ܡܸܢܕܝܼ ܐ݉ܚܹܪ݉ܢܵܐ: ܝܲܥܢܹܐ: ܕܓܲܖ̈ܕܹܐ ܕܐܲܝܟ̣ ܐܲܢܹܐ ܓܵܪܵܓ ܠܵܐ ܦܵܝܫܝܼ ܫܒ̣ܝܼܩܹܐ ܓܵܐ ܒܲܝܬܵܐ ܕܡܵܪܝܵܐ. ܗ̇ܘ ܒܸܬ ܡܲܚܪܸܒ̣ ܐܸܠܵܝ ܘܠܙܲܩܖ̈ܵܢܵܝ ܗܲܠ ܐܵܒܵܕ. ܓܵܢܝܼ: ܣܢܘܿܕܝ ܥܲܠ ܚܲܕ݉ ܡܸܢܕܝܼ ܒܘܼܫ ܦܵܝܫܵܢܵܐ ܡ̣ܢ ܓܲܪܕܵܐ ܕܥܵܙܠܵܐ ܟܘܼܫܹ̈ܐ. ܡܵܪܲܢ ܝܑܼܫܘܿܥ ܗܵܘܹܐ ܗܲܨܵܪܵܟ̣ܝ ܐܵܒܵܕܝܼܢܵܝܵܐ.