ܕܫܡܫܐ: ܘܠܐ ܕܣܗܪܐ: ܩܐ ܕܝܗܒ̣ܝ ܒܗܪܐ ܓܘܘܗ̇ (ܓܠܝܢܐ ܟܐ: 23)

ܬܵܡܵܐ: ܓܵܘ ܕܘܼܢܝܹܐ ܚܲܕܬܵܐ: ܥܵܡܖ̈ܵܢܘܼܗ̇ ܠܹܐ ܝܢܵܐ ܣܢܝܼܩܹܐ ܠܗܸܟ̃ ܚܲܕ݉ ܡ̣ܢ ܒܘܼܣܵܡܹ̈ܐ ܒܸܖ̈ܝܹܐ. ܠܹܐ ܝܢܵܐ ܣܢܝܼܩܹܐ ܠܠܒ̣ܸܫܬܵܐ: ܐܸܣܛܠܵܝ̈ ܚܘܵܖܹ̈ܐ ܗܸܟ̃ ܠܹܐ ܥܲܬܩܸܢܝܼ: ܘܠܹܐ ܦܵܝܫܝܼ ܫܘܼܚܬܸܢܹܐ. ܠܹܐ ܝܢܵܐ ܣܢܝܼܩܹܐ ܠܕܲܪܡܵܢܵܐ ܩܵܐ ܒܵܣܲܡܬܵܐ ܕܡܲܖ̈ܥܵܝ: ܣܵܒܵܒ ܗܸܟ̃ ܚܲܕ݉ ܡ̣ܢ ܥܵܡܖ̈ܵܢܹܐ ܕܗ̇ܝ ܡܕܝܼܢ݉ܬܵܐ ܠܹܐ ܩܵܒ̣ܸܠ ܡ̣ܢ ܡܲܪܥܵܐ. ܠܲܝܬ ܠܗ݉ܘܿܢ ܣܢܝܼܩܘܼܬܵܐ ܠܫܸܢܬܵܐ ܩܵܐ ܚܲܕܲܬܬܵܐ ܕܚܲܝܠܵܝ ــ ܠܹܐ ܟܵܠܝܼ ܒܠܲܝܠܹܐ ܘܒܐܝܼܡܵܡܵܐ: ܐܸܠܵܐ ܒܕܵܝܸܡܘܼܬܵܐ ܫܲܟܘܿܪܹܐ ܝܢܵܐ ܐܸܠܹܗ ܓܵܘ ܗܲܝܟܠܘܼܗܝ. ܐܘܼܦ ܠܹܐ ܝܢܵܐ ܣܢܝܼܩܹܐ ܠܕܵܘܣܬܘܼܬܵܐ ܝܲܢ ܠܚܸܠܡܲܬ ܕܫܵܘܬܵܦܹ̈ܐ ܥܲܡܵܝ: ܐܵܦܸܢ ܕܒܸܬ ܩܲܒܠܝܼ ܒܘܼܣܵܡܵܐ ܡ̣ܢ ܗ̇ܝ ܫܵܘܬܵܦܘܼܬܵܐ: ܐܝܼܢܵܐ ܫܵܘܬܵܦܘܼܬܵܝ ܥܲܡ ܡܵܪܲܢ ܟܹܐ ܡܵܠܝܵܐ ܩܵܐ ܡܲܣܒ̣ܲܥܬܵܐ ܕܟܠܵܝ ܡܲܛܠܵܒܵܝ̈. ܠܹܐ ܝܢܵܐ ܣܢܝܼܩܹܐ ܠܖ̈ܵܒܝܹܐ ܬܵܡܵܐ. ܐܲܠܒܲܬ ܟܹܐ ܗܲܡܙܸܡܝܼ ܥܲܡ ܥܘܼܕܵܠܹܐ ܒܘܼܬ ܡܸܢܕܝܼܵܢܹ̈ܐ ܐܲܠܵܗܵܝܹ̈ܐ: ܐܝܼܢܵܐ ܐܘܼܦ ܠܐܵܗܵܐ ܠܹܐ ܝܢܵܐ ܟ̰ܸܡ ܣܢܝܼܩܹܐ ܐܲܝܟ̣ ܒܘܼܬ ܚܵܛܸܪ ܕܡܵܠܲܦܬܵܐ: ܟܠܵܝ ܡ̣ܢ ܡܵܪܝܵܐ ܒܸܬ ܦܵܝܫܝܼ ܡܘܼܠܦܹܐ. ܐܲܚܢܲܢ ܦܸܖ̈ܬܘܼܟ̣ܹܐ ܟܹܐ ܩܲܒܠܲܚ ܩܲܕ݉ܡ ܬܲܪܥܵܐ ܕܡܲܠܟܵܐ: ܐܲܢܝܼ ܥܲܡܘܼܗܝ ܝܬܝܼܒ̣ܹܐ ܝܢܵܐ ܥܲܠ ܨܘܼܦܪܵܐ. ܠܲܐܟ̣ܵܐ ܥܲܠ ܕܪܲܥܢܵܐ ܕܕܵܘܣܬ ܟܹܐ ܣܵܢܕܲܚ: ܬܵܡܵܐ ܟܠܵܝ ܟܹܐ ܣܵܢܕܝܼ ܥܲܠ ܕܪܲܥܢܵܐ ܕܡܘܼܚܸܒܵܝ ܐܲܚܟ̰ܝܼ. ܠܲܐܟ̣ܵܐ ܣܢܝܼܩܹܐ ܝܘܲܚ ܠܗܲܝܲܪܬܵܐ ܡ̣ܢ ܚܲܒ̣ܖ̈ܵܘܵܬܲܢ: ܐܝܼܢܵܐ ܬܵܡܵܐ ܡܫܝܼܚܵܐ ܝܠܹܗ ܟܠ ܒܟܠ ܩܵܬܵܝ. ܠܲܐܟ̣ܵܐ ܟܹܐ ܚܵܝܪܲܚ ܥܲܠ ܡܹܐܟ̣ܘܼܠܬܵܐ ܕܟܹܐ ܬܵܠܩܵܐ ܘܥܲܠ ܠܒ̣ܸܫܬܵܐ ܕܟܹܐ ܚܵܪܒ̣ܵܐ ܘܦܵܝܫܵܐ ܐ݉ܟ̣ܝܼܠܬܵܐ ܡ̣ܢ ܡܪܵܝܬܵܐ: ܬܵܡܵܐ ܟܠ ܡܸܢܕܝܼ ܒܐܲܠܵܗܵܐ ܟܹܐ ܡܲܫ݉ܟ̰ܚܝܼ. ܠܲܐܟ̣ܵܐ ܟܹܐ ܫܵܬܲܚ ܡ̈ܝܼܵܐ ܡ̣ܢ ܐܸܣܛܸܟܵܢ: ܬܵܡܵܐ ܟܹܐ ܡܲܬܒ̣ܝܼ ܦܘܼܡܵܝ ܒܪܹܫܵܐ ܕܡܲܒܘܼܥܵܐ ܘܟܹܐ ܫܵܬܝܼ ܠܣܒ̣ܵܥܬܵܝ. ܠܲܐܟ̣ܵܐ ܡܲܠܲܐܟ̣ܹ̈ܐ ܟܹܐ ܡܲܝܬ݉ܝܼ ܠܲܢ ܒܘܼܖ̈ܟܵܬܹܐ: ܬܵܡܵܐ ܠܹܐ ܣܵܢܩܲܚ ܠܐܝܼܙܓܵܕܹ̈ܐ ܡ̣ܢ ܫܡܲܝܵܐ. ܐܵܗ! ܟܡܵܐ ܒܪܝܼܟ̣ܬܵܐ ܒܸܬ ܗܵܘܝܵܐ ܗ̇ܝ ܥܕܵܢܵܐ ܕܟܠ ܡܸܢܕܝܼ ܒܸܬ ܦܵܐܸܫ ܫܩܝܼܠܵܐ ܡ̣ܢ ܐܵܪܵܠܹܓ̣ܲܢ: ܘܣܵܢܕܲܚ ܥܲܠ ܕܪܲܥܢܵܐ ܕܐܲܠܵܗܵܐ ܒܓܵܢܘܼܗܝ! ܟܡܵܐ ܚܩܝܼܪܬܵܐ ܒܸܬ ܗܵܘܝܵܐ ܗ̇ܝ ܣܵܥܲܬ ܐܝܼܡܵܐ ܕܐܲܠܵܗܵܐ ــ ܠܵܐ ܒܸܖ̈ܝܵܬܘܼܗܝ: ܡܵܪܝܵܐ: ܠܵܐ ܦܘܼܠܚܵܢܘܼ̈ܗܝ: ܒܸܬ ܗܵܘܹܐ ܗܲܓ̰ܲܬ ܕܚܸܕܝܘܼܬܲܢ ܕܵܝܸܡ.