ܢܝܣܢ 13

ܕܣܬܐ ܕܡܘܪܐ ܝܠܗ ܣܘܓܘܠܝ ܐܠܝ (ܬܫܒܚܝ̈ܬܐ ܐ: 13)

ܠܵܚܘܿܡܬܵܐ ܝܠܵܗ̇ ܕܡܵܘܪܵܐ ܦܵܐܸܫ ܡܘܼܬ݉ܝܵܐ ܐܲܝܟ̣ ܛܘܼܦ̮ܣܵܐ ܕܡܫܝܼܚܵܐ: ܒܘܼܬ ܛܝܼܡܘܼܗܝ ܓܘܼܪܵܐ: ܒܘܼܬ ܪܹܝܚܘܼܗܝ: ܒܘܼܬ ܒܲܣܝܼܡܘܼܬܘܼܗܝ: ܒܘܼܬ ܚܲܝܠܘܼܗܝ ܕܒܵܣܲܡܬܵܐ: ܕܚܵܡܵܝܬܵܐ ܡ̣ܢ ܚܪܵܒ̣ܵܐ: ܘܕܚܵܡܵܝܬܵܐ ܕܦܲܓ̣ܪܵܐ ܡ̣ܢ ܡܲܖ̈ܥܹܐ ܬܵܦܝܵܢܹ̈ܐ: ܘܒܘܼܬ ܢܸܣܒܲܬܹܗ ܥܲܡ ܕܸܒ̣ܚܹ̈ܐ. ܐܝܼܢܵܐ ܩܵܡܘܿܕܝܼ ܦܝܵܫܵܐ ܝܠܹܗ ܡܘܼܕܡܝܼܵܐ ܠܕܣܬܐ ܕܡܘܪܐ؟ ܡܸܢܕܝܼ ܩܲܕ݉ܡܵܝܵܐ: ܒܘܬ ܦܪܝܘܬܐ. ܠܹܐ ܝܠܹܗ ܐܲܚܟ̰ܝܼ ܚܕܵܐ ܢܵܛܘܿܦܬܵܐ ܕܡܘܪܐ: ܐܸܠܵܐ ܩܘܼܬܝܼ ܡܸܠܝܵܐ. ܠܹܐ ܝܠܹܗ ܐܲܚܟ̰ܝܼ ܚܲܕ݉ ܦܸܩܚܵܐ ܝܲܢ ܦܲܥܘܵܐ ܕܐܝܼܠܵܢܵܐ ܕܡܘܪܐ: ܐܝܼܢܵܐ ܚܕܵܐ ܕܣܬܐ ܕܡܘܪܐ. ܐܝܼܬ ܒܲܣܵܐ ܒܡܫܝܼܚܵܐ ܩܵܐ ܟܠܵܝ ܣܢܝܼܩܘܼܝܵܬܝܼ̈: ܒܲܣ ܚܘܼܫ ܕܩܵܢܸܢܹܗ ܩܵܐ ܓܵܢܝܼ. ܡܸܢ݉ܕܪܸܫ݉: ܣܵܘܓܘܿܠܲܢ ܦܝܼܫܵܐ ܝܠܹܗ ܡܘܼܕܡܝܼܵܐ ܠܚܕܵܐ ܕܲܣܬܵܐ ܒܘܼܬ ܗܲܓ̰ܲܬ ܕܡܸܠܝܘܼܬܘܼܗܝ ܒܟܠ ܬܵܗܵܪ. ܣܵܒܵܒ ܠܵܐ ܐܲܚܟ̰ܝܼ ܐܝܼܬ ܠܹܗ ܚܲܕ݉ ܡܸܢܕܝܼ ܕܠܵܙܸܡ ܝܼܠܹܗ ܩܵܬܲܢ: ܐܸܠܵܐ ܒܝܗ ܒܥܡܪܐ ܝܠܗ̇ ܟܠܗ̇ ܬܡܡܬܘܬܐ ܕܐܠܗܘܬܐ ܒܓܘܫܡܐ. ܟܠ ܣܢܝܼܩܘܼܬܵܐ ܟܹܐ ܐܵܬܝܼܵܐ ܠܡܲܫ݉ܟ̰ܘܿܚܹܐ ܒܝܼܘܼܗܝ. ܚܘܼܪ ܠܡܫܝܼܚܵܐ ܒܚܲܨܝܲܬܘܼ̈ܗܝ ܦܖ̈ܝܼܫܹܐ: ܘܒܸܬ ܚܵܙܹܝܬ ܡܸܠܝܘܼܬܵܐ ܒܝܼܘܼܗܝ ܒܟܠ ܡܸܢܕܝܼ ـ ܐܲܝܟ̣ ܢܒ̣ܝܼܵܐ: ܟܵܗܢܵܐ: ܡܲܠܟܵܐ: ܓܲܒ̣ܪܵܐ: ܕܵܘܣܬ: ܘܪܵܥܝܵܐ. ܚܘܼܪ ܥܲܠܘܼܗܝ ܒܚܲܝܘܼ̈ܗܝ: ܒܡܵܘܬܘܼܗܝ: ܒܩܝܵܡܬܘܼܗܝ: ܘܒܐ݉ܣܵܩܬܘܼܗܝ ܠܸܫܡܲܝܵܐ: ܘܒܐ݉ܬܵܝܬܘܼܗܝ ܓܵܗܵܐ ܕܬܲܪܬܹܝ. ܚܘܼܪ ܐܸܠܘܼܗܝ ܒܛܵܒ̣ܘܼܬܘܼܗܝ: ܒܡܲܟܝܼܟ̣ܘܼܬܘܼܗܝ: ܒܓ̰ܘܼܪܐܵܬܘܼܗܝ: ܒܟܦܵܪܬܵܐ ܒܓܵܢܘܼܗܝ: ܒܚܘܼܒܹܗ: ܒܡܗܘܼܡܢܘܼܬܘܼܗܝ: ܒܣܲܪܲܣܬܘܼܬܘܼܗܝ: ܒܙܲܕܝܼܩܘܼܬܘܼܗܝ ـ ܒܟܠܵܝ ܐܲܝܟ̣ ܕܣܬܐ ܕܡܘܪܐ. ܒܘܼܬ ܚܲܝܠܘܼܗܝ ܕܢܵܛܘܿܪܘܼܬܵܐ ـ ܠܵܐ ܐܲܝܟ̣ ܕܲܢܕܸܟܝܵܬܹ̈ܐ ܕܡܘܪܐ ܕܢܵܦܠܝܼ ܥܲܠ ܐܲܪܥܵܐ ܘܦܵܝܫܝܼ ܕܘܼܫܕܸܫܹܐ ܬܚܘܿܬ ܐܲܩܠܹ̈ܐ: ܐܝܼܢܵܐ ܚܕܵܐ ܕܣܬܐ ܕܡܘܪܐ: ܐ݉ܣܝܼܪܬܵܐ ܘܚܘܼܡܝܼܬܵܐ ܨܲܚ. ܓܵܪܵܓ ܡܲܬܒ̣ܲܚ ܛܝܼܡܵܐ ܥܲܠܘܼܗܝ ܙܵܘܕܵܐ ܡ̣ܢ ܟܠ ܡܸܢܕܝܼ ܐ݉ܚܹܪ݉ܢܵܐ: ܓܵܪܵܓ ܡܲܬܒ̣ܲܚ ܛܝܼܡܵܐ ܥܲܠ ܚܲܒܖ̈ܘܼܗܝ ܘܦܘܼܩܕܵܢܘܼ̈ܗܝ: ܘܓܵܪܵܓ ܕܚܲܡܲܚ ܠܵܗ̇ ܝܕܲܥܬܲܢ ܕܒܘܼܬ ܕܝܼܘܼܗܝ ܐܲܝܟ̣ ܕܒ̣ܝܼܪܬܵܐ ܓܵܘ ܐܲܢܒܵܪ: ܠܵܐ ܗ݉ܘܹܐ ܕܣܵܛܵܢܵܐ ܓܵܢܸܒ̣ ܠܵܗ̇ ܡܸܢܲܢ. ܡܸܢ݉ܕܪܸܫ݉: ܡܫܝܼܚܵܐ ܒܸܕܡܵܝܵܐ ܝܠܹܗ ܠܕܣܬܐ ܕܡܘܪܐ ܒܘܼܬ ܠܚܘܕܝܘܬܘܗܝ. ܡܘܪܐ ܒܝܵܗܒ̣ܵܐ ܝܠܹܗ ܦܸܟܝܼܪ ܕܫܵܦܵܩܲܬ ܓܵܒܝܵܢܬܵܐ: ܝܲܢ ܦܵܪܫܵܢܬܵܐ. ܡ̣ܢ ܩܲܕ݉ܡ ܒܸܢܝܲܬܹ̈ܐ ܕܥܵܠܡܵܐ ܦܝܼܫܵܐ ܝܗ݉ܘܵܐ ܦܪܝܼܫܵܐ ܩܵܐ ܛܵܝܸܦܘܼܗܝ. ܛܵܝܸܦܵܐ ܓܘܼܒܝܵܐ: ܕܩܵܬܵܝ ܐܲܠܵܗܵܐ ܓܸܠܝܵܐ ܝܠܹܗ ܣܸܖ̈ܘܼܗܝ: ܘܕܩܵܬܵܝ ܦܪܝܼܫܘܼܗ̇ ܝܠܹܗ ܓܵܢܹܗ! ܚܸܕܝܹ̈ܐ ܝܢܵܐ ܘܒܖ̈ܝܼܟ̣ܹܐ ܐܵܢܝܼ ܕܦܝܵܫܵܐ ܝܢܵܐ ܡܘܼܡܨܝܹܐ ܠܹܐܡܵܪܵܐ: ܕܣܬܐ ܕܡܘܪܐ ܝܠܗ ܣܘܓܘܠܝܼ ܐܠܝܼ.