ܟܠܝ ܚܙܝܢܝ̈ ܟܐ ܡܣܚܪܝ ܒܝܝ: ܟܐ ܟ̰ܠܦܝ ܣܦܬܐ: ܟܐ ܫܥܫܝ ܪܫܐ (ܡܙܡܘܪܐ ܟܒ: 7)

ܚܲܕ݉ ܡ̣ܢ ܐܸܣܛܘܼܟ̣ܣܹ̈ܐ ܖܹ̈ܫܵܝܹܐ ܕܚܲܫܵܐ ܕܡܵܪܲܢ ܩܲܒܲܠܬܵܐ ܕܡܲܣܚܲܪܬܵܐ ܝܗ݉ܘܵܐ. ܝܼܗܘܼܕܵܐ ܥܒ̣ܝܼܕ ܠܹܗ ܡܲܣܚܲܪܘܼܬܵܐ ܥܲܠܹܗ ܓܵܘ ܒܲܓ̣ܟ̰ܵܐ ܕܓܲܕܣܹܡܵܢ: ܓܘܼܖ̈ܵܢܹܐ ܕܟܵܗܢܹ̈ܐ ܘܣܵܦܖܹ̈ܐ ܓܚܝܼܟ ܠܗ݉ܘܿܢ ܘܡܘܼܣܚܸܪܗ݉ܘܿܢ ܒܝܼܘܼܗܝ ܟ̰ܸܡ ܪܵܒܵܐ: ܗܹܪܘܿܕܸܣ ܩܘܼܠܩܸܠܹܗ ܐܸܠܹܗ: ܘܣܲܖ̈ܒܵܙܹܐ ܘܖܹ̈ܓܵܘܵܬܹܐ ܓܚܝܼܟ ܠܗ݉ܘܿܢ ܒܝܼܘܼܗܝ ܘܥܒ̣ܝܼܕ ܠܗ݉ܘܿܢ ܐܸܠܹܗ ܒܸܨܘܼܪ. ܦܝܼܠܵܛܘܿܣ ܡܘܼܣܚܸܪܹܗ ܒܝܼܹܗ: ܘܐܘܼܦ ܐܝܼܡܵܐ ܕܥܲܠ ܙܩܝܼܦܵܐ ܝܗ݉ܘܵܐ ܪܵܒܵܐ ܬܵܗܵܖܹ̈ܐ ܕܠܵܘܡܹ̈ܐ ܘܡܲܣܚܲܖ̈ܘܼܝܵܬܹܐ ܡܘܼܝܬܹ݉ܐ ܠܗ݉ܘܿܢ ܥܲܠܘܼܗܝ. ܗܲܡܵܫܵܐ ܟ̰ܵܬܘܿܢ ܝܼܠܵܗ̇ ܠܩܲܒܘܿܠܹܐ ܡܲܣܚܲܪܘܼܬܵܐ: ܐܝܼܢܵܐ ܐܸܠܵܐܟܹܐ ܐܝܼܡܵܐ ܕܦܝܵܫܵܐ ܝܘܲܚ ܓ̰ܘܼܢܓ̰ܸܪܹܐ: ܡܲܣܚܲܪܘܼܬܵܐ ܟܹܐ ܡܲܡܪܸܥܵܐ ܠܲܢ ܘܟܹܐ ܢܵܝܨܵܐ ܐܲܝܟ̣ ܚܘܼܘܹܐ. ܡܲܝܬ݉ܝ ܩܲܕ݉ܡ ܥܲܝܢܘܼ̈ܟ̣ ܫܸܟܠܵܐ ܕܦܵܪܘܿܩܵܐ ܬܸܠܝܵܐ ܥܲܠ ܙܩܝܼܦܵܐ: ܩܲܒܘܿܠܹܐ ܨܵܢܓ̰ܘܼܝ ܙܵܘܕܵܐ ܡ̣ܢ ܕܒܲܪܢܵܫܵܐ ܡܵܨܹܐ ܡܲܕܸܥ: ܗ̇ܝܓܵܗ ܓܵܫܸܩ ܥܲܠ ܗ̇ܘ ܟܸܢܫܵܐ ܕܝܗ݉ܘܼܕܵܝܹ̈ܐ: ܟܠܵܝ ܒܸܫܥܵܫܵܐ ܖܹ̈ܫܵܝ ܝܲܢ ܡܲܠܒܘܼܥܘܼܗܝ ܒܝܼܸܕ ܣܢܵܝܬܵܐ ܡܲܝܪܬܵܐ ܠܚܲܕ݉ ܕܩܲܒܘܿܠܹܐ ܝܠܹܗ ܐܘܼܚܟ̰ܵܐ ܓ̰ܘܼܢܓ̰ܵܪܵܐ! ܐܲܠܒܲܬ ܐܝܼܬ ܗ݉ܘܵܐ ܚܲܕ݉ ܡܸܢܕܝܼ ܙܵܘܕܵܐ ܒܐܵܗܵܐ ܕܦܝܼܫܵܐ ܝܗ݉ܘܵܐ ܙܩܝܼܦܵܐ ܡ̣ܢ ܕܒܸܚܙܵܝܵܐ ܝܗ݉ܘܵܘ ܒܥܲܝܢܵܝ̈: ܝܘܼܚܣܵܐ ܚܲܕ݉ ܟܸܢܫܵܐ ܐܘܼܚܟ̰ܵܐ ܓܘܼܪܵܐ ܟܠܹܗ ܠܹܐ ܓ̰ܲܡܸܥ ܗ݉ܘܵܐ ܒܢܝܼܲܬ ܕܡܲܣܚܲܪܘܼܬܵܐ. ܗܹܐ: ܗܲܪ ܗ̇ܝ ܒܝܼܫܬܵܐ ܕܥܡܝܼܪܬܵܐ ܝܗ݉ܘܵܐ ܒܝܼܵܝ: ܒܣܵܥܲܬ ܕܓ̣ܵܠܸܒܘܼܬܘܼܗ̇ ܪܹܫܵܝܬܵܐ ܡܵܘܕܘܿܝܹܐ ܝܠܵܗ̇ ܕܠܹܐ ܡܵܨܝܵܐ ܥܵܒ̣ܕܵܐ ܒܘܼܫ ܨܦܵܝܝܼ ܡ̣ܢ ܠܡܲܣܚܘܼܪܹܐ ܒܛܵܒ̣ܬܵܐ ܓ̣ܵܠܒܵܢܬܵܐ ܕܐܵܕܝܼܵܐ ܗܵܟܘܿܡܹܐ ܝܗ݉ܘܵܐ ܥܲܠ ܙܩܝܼܦܵܐ. ܝܵܐ ܡܫܝܼܚܵܐ: ܣܸܢܝܵܐ ܘܡܘܼܣܠܝܼܵܐ ܡ̣ܢ ܒܢܲܝ̈ܢܵܫܵܐ: ܕܵܐܟ̣ܝܼ ܡܨܹܐ ܠܘܼܟ̣ ܠܸܡܝܵܬܵܐ ܡܒܵܕܵܠ ܕܐܵܢܝܼ ܕܗܲܕܟ̣ܵܐ ܥܒ̣ܝܼܕ ܠܗ݉ܘܿܢ ܥܲܠܘܼܟ̣؟ ܠܲܐܟ̣ܵܐ ܝܠܹܗ ܚܘܼܒܵܐ ܥܓ̰ܝܼܒܵܐ: ܚܘܼܒܵܐ ܐܲܠܵܗܵܝܵܐ: ܗܹܐ ܚܘܼܒܵܐ ܒܹܐ ܗܲܕ. ܐܘܼܦ ܐܲܚܢܲܢ ܡܘܼܣܠܝܹܐ ܝܘܲܚ ܐܸܠܘܼܟ̣ ܡ̣ܢ ܩܲܕ݉ܡ ܗ݉ܘܵܝܬܲܢ ܡܸܢ݉ܕܪܸܫ݉: ܘܐܘܼܦ ܡ̣ܢ ܒܵܬ݉ܪ ܚܘܼܕܵܬܲܢ ܪܵܒܵܐ ܓܵܗܹ̈ܐ ܕܘܼܢܝܹܐ ܡܝܘܼܩܪܘܼܗ̇ ܝܘܲܚ ܙܵܘܕܵܐ ܡܸܢܘܼܟ̣: ܐܝܼܢܵܐ ܡܸܢ݉ܕܪܸܫ݉: ܐܲܢ݉ܬ ܕܲܡܕܘܼܡܹܐ ܝܘܸܬ ܩܵܐ ܕܒܵܣܡܸܬ ܠܕܲܖ̈ܒܵܬܹܐ ܕܝܼܲܢ: ܘܒܸܡܝܵܬܵܐ ܝܘܸܬ ܠܡܲܚܘܼܝܹܐ ܐܸܠܲܢ.

ܒܸܖ̈ܝܘܼܟ̣ ܒܸܙܠܵܡܘܼܟ̣: ܝܵܐ ܡܲܠܟܵܐ ܕܛܵܒ̣ܬܵܐ:

ܠܹܐ ܝܢܵܐ ܡܲܚܘܼܒܘܼܟ̣: ܠܲܝܬ ܒܝܼܵܝ ܝܕܲܥܬܵܐ.

ܙܵܘܕܵܐ ܟܹܐ ܦܲܫܡܸܢ ܕܡ̣ܢ ܚܘܼܒܘܼܟ̣ ܩܵܬܵܝ

ܫܸܕܠܹ̈ܐ ܒܵܛܝܼܠܹ̈ܐ ܟܹܐ ܡܲܚܕܝܼ ܐܸܠܵܝ.