ܘܐܢܐ ܟܐ ܝܕܥܢ ܕܦܪܘܩܝ ܚܝܐ ܝܠܗ (ܐܝܼܘܿܒ̣ ܝܛ: 25)

ܩܸܢܬܵܐ ܕܝܲܗܒ̣ܵܠܬܵܐ ܕܠܸܒܵܐ ܕܐܝܼܘܿܒ̣ ܝܼܠܵܗ̇ ܗ̇ܘ ܚܲܒܪܵܐ ܦܪܘܩܝ: ܘܐܸܠܵܐܟܹܐ: ܒܗ̇ܝ ܕܦܪܘܩܝ ܚܝܐ ܝܠܗ. ܐܘܿܗ: ܡܘܼܕܝܼ ܒܘܼܪܟܬܵܐ ܝܠܵܗ̇ ܩܵܐ ܐ݉ܢܵܫܵܐ ܕܡܲܫ݉ܟ̰ܸܚ ܠܚܲܕ݉ ܦܵܪܘܿܩܵܐ ܚܵܝܵܐ ܩܵܐ ܓܵܢܘܼܗܝ! ܕܲܗܒ̣ܵܐ ܓܵܘ ܡܲܥܕܵܢ ܡܘܼܕܝܼ ܦܵܝܕܵܐ ܐܝܼܬ ܠܹܗ ܩܵܬܝܼ؟ ܦܹܪܘܼ ܘܟܵܠܹܦ̮ܘܿܪܢܝܼܵܐ: ܐܲܬܖ̈ܵܘܵܬܹܐ ܕܕܲܗܒ̣ܵܐ: ܥܵܡܖ̈ܵܢܵܝ ܓܹܒ̣ܵܝܹ̈ܐ ܝܢܵܐ. ܕܲܗܒ̣ܵܐ ܓܵܪܵܓ ܗܵܘܹܐ ܓܵܘ ܟܸܣܬܝܼ ܩܵܐ ܕܡܵܠܹܐ ܣܢܝܼܩܘܼܝܵܬܝܼ̈ ܘܙܵܒ̣ܸܢ ܠܲܚܡܵܐ ܠܡܲܣܒ̣ܲܥܬܝܼ. ܗܲܕܟ̣ܵܐ ܚܲܕ݉ ܦܵܪܘܿܩܵܐ ܕܠܹܐ ܝܠܹܗ ܦܵܪܘܿܩܵܐ ܕܝܼܝܼ: ܝܲܢ ܚܲܕ݉ ܦܵܠܵܫܵܐ ܕܠܹܐ ܦܵܠܸܫ ܡ̣ܢ ܓܹܒܝܼ: ܡܵܘܕܝܼ ܦܵܝܕܵܐ ܐܝܼܬ ܠܹܗ ܩܵܬܝܼ؟ ܠܵܐ ܗܵܘܹܝܬ ܪܵܗܵܬ ܗܲܠ ܕܡܵܨܹܝܬ ܠܹܐܡܵܪܵܐ: ܗܹܐ: ܕܪܹܐ ܠܝܼ ܓܵܢܝܼ ܥܲܠ ܦܵܪܘܿܩܝܼ ܚܵܝܵܐ ܕܕܝܼܝܼ ܝܠܹܗ ܗ̇ܘ. ܒܲܠܟܵܐ ܒܸܕܒ̣ܵܩܘܼܗܝ ܝܘܸܬ ܒܚܕܵܐ ܐܝܼܕܵܐ ܙܲܒܘܼܢ: ܘܚܲܕ݉ܟ̰ܵܐ ܒܸܙܕܵܥܵܐ ܝܘܸܬ ܕܗܵܘܝܵܐ ܩܲܫ̃ܕܲܪܬܵܐ ܠܸܩܪܵܝܘܼܗܝ ܦܵܪܘܿܩܵܐ ܚܵܝܵܐ ܕܝܼܘܼܟ̣: ܐܝܼܢܵܐ ܕܟ̣ܘܿܪ: ܕܐܸܢ ܗܵܘܝܵܐ ܠܘܼܟ̣ ܗܲܝܡܵܢܘܼܬܵܐ ܐܲܝܟ̣ ܚܕܵܐ ܕܲܢܕܸܟܬܵܐ ܕܚܲܪܕܵܠ: ܗ̇ܝ ܗܲܝܡܵܢܘܼܬܵܐ ܙܥܘܿܪܬܵܐ ܟܹܐ ܡܲܚܫܸܚܵܐ ܠܘܼܟ̣ ܠܹܐܡܵܪܵܐ ܗܲܕܟ̣ܵܐ. ܐܝܼܢܵܐ ܐܝܼܬ ܚܲܕ݉ ܚܲܒܪܵܐ ܐ݉ܚܹܪ݉ܢܵܐ ܠܲܐܟ̣ܵܐ ܕܡܲܚܙܘܼܝܹܐ ܝܠܹܗ ܚܵܛܸܪܓ̰ܲܡܥܘܼܬܵܐ ܩܘܝܼܬܵܐ ܕܐܝܼܘܿܒ̣: ܒܗ̇ܝ ܕܒܹܐܡܵܪܵܐ ܝܠܹܗ: ܐܢܐ ܟܐ ܝܕܥܢ. ܠܹܐܡܵܪܵܐ: ܒܗܒ̣ܝ ܝܘܢ: ܗܡܘܢܐ ܝܘܢ: ܒܲܣܝܼܡܬܵܐ ܝܠܵܗ̇: ܘܡܸܓ̰ܸܕ ܐܝܼܬ ܐܲܠܦܹ̈ܐ ܓܵܘ ܦܸܣܩܵܐ ܕܡܫܝܼܚܵܐ ܕܠܹܐ ܥܵܒ̣ܪܝܼ ܠܵܩܲܕ݉ܡܵܐ ܡ̣ܢ ܐܵܗܵܐ: ܐܝܼܢܵܐ ܐܸܢ ܒܵܥܹܝܬ ܡܵܛܹܝܬ ܠܓ̰ܲܘܵܗܵܪ ܕܝܲܗܒ̣ܲܠܬܵܐ ܕܠܸܒܵܐ: ܓܵܪܵܓ ܐܵܡܪܸܬ: ܟܐ ܝܕܥܢ. ܐܢ: ܐܝܢܐ: ܒܠܟܐ: ܐܲܢܹܐ ܝܢܵܐ ܩܵܛܠܵܢܹ̈ܐ ܕܫܠܵܡܵܐ ܘܕܝܲܗܒ̣ܲܠܬܵܐ ܕܠܸܒܵܐ. ܫܸܟܘܼܝܵܬܹ̈ܐ ܪܵܒܵܐ ܡܵܪܹܐ ܙܵܪܵܪ ܝܼܢܵܐ ܒܥܕܵܢܵܐ ܕܦܵܫܲܡܬܵܐ. ܟܹܐ ܢܵܝܨܝܼ ܠܓܵܢܵܐ ܐܲܝܟ̣ ܙܲܖ̈ܩܸܛܹܐ! ܐܸܢ ܐܝܼܬ ܠܝܼ ܫܸܟ ܕܒܲܠܟܵܐ ܡܫܝܼܚܵܐ ܠܹܐ ܝܠܹܗ ܕܝܼܝܼ: ܬܵܡܵܐ ܝܠܹܗ ܚܵܠܵܐ ܚܒ̣ܝܼܛܵܐ ܒܡܪܵܖܹ̈ܐ ܕܡܵܘܬܵܐ. ܐܝܼܢܵܐ ܐܸܢ ܝܲܕܥܸܢ ܕܡܫܝܼܚܵܐ ܚܵܝܵܐ ܝܠܹܗ ܩܵܬܝܼ: ܗ̇ܝܓܵܗ ܚܘܼܒ̣ܝܵܐ ܠܹܐ ܝܠܹܗ ܚܘܼܒ̣ܝܵܢܵܐ: ܐܘܼܦ ܠܲܝܠܹܐ ܒܲܗܪܵܢܵܐ ܝܠܹܗ ܩܵܬܝܼ. ܐܲܠܒܲܬ ܐܸܢ ܐܝܼܘܿܒ̣: ܒܐܵܢܝܼ ܕܵܘܖܹ̈ܐ ܕܡ̣ܢ ܩܲܕ݉ܡ ܐ݉ܬܵܝܬܵܐ ܕܡܫܝܼܚܵܐ ܠܕܘܼܢܝܹܐ ܟܹܐ ܡܵܨܹܐ ܝܗ݉ܘܵܐ ܠܹܐܡܵܪܵܐ: ܟܐ ܝܕܥܢ: ܐܲܚܢܲܢ ܘܵܓ̰ܸܒ ܝܼܠܵܗ̇ ܕܠܵܐ ܗܵܘܲܚ ܡܵܪܹܐ ܫܸܟ. ܚܵܣܠܹܐ ܕܚܵܛܸܪܓ̰ܲܡܥܘܼܬܲܢ ܗܵܘܝܵܐ ܩܲܫ̃ܕܲܪܬܵܐ. ܫܒ̣ܘܿܩ ܕܝܲܕܥܲܚ ܕܣܵܒܸܬܘܼܝܵܬ̈ܲܢ ܣܲܪܲܣܬ ܝܼܢܵܐ: ܠܵܐ ܗ݉ܘܹܐ ܕܒܵܢܲܚ ܚܕܵܐ ܗܹܒ̣ܝܼ ܒܹܐ ܒܸܢܝܲܬ.