ܢܝܣܢ 26
ܐܗܐ ܗܘܝܬܘܢ ܒܥܒ̣ܕܐ ܩܐ ܕܟ̣ܪܝ (ܐ ܩܘܖ̈ܢܬܝܐ ܝܐ: 24)
ܒܲܣ ܡܲܒܝܘܼܢܹܐ ܝܠܵܗ̇ ܕܟܖܸ̈ܣܛܝܵܢܹܐ ܟܹܐ ܡܲܢܫܝܼ ܠܡܫܝܼܚܵܐ! ܐܵܗܵܐ ܢܲܨܝܼܗܲܬ ܚܘܼܒܵܢܬܵܐ ܠܹܐ ܝܗ݉ܘܵܐ ܠܵܙܸܡ ܐܸܢ ܠܲܝܬ ܗ݉ܘܵܐ ܙܕܘܼܥܬܵܐ ܕܕܟ̣ܵܖ̈ܲܢ ܗܵܘܹܐ ܒܵܨܘܿܪܵܐ. ܐܵܗܵܐ ܙܕܘܼܥܬܵܐ ܠܹܐ ܝܠܵܗ̇ ܒܹܐ ܒܸܢܝܲܬ: ܚܲܕ݉ ܡܸܢܕܝܼ ܟ̰ܸܡ ܐܲܫܟܵܪܵܐ ܝܠܵܗ̇ ܓܵܘ ܚܲܝ̈ܲܢ. ܟܹܐ ܡܲܒܝܸܢܵܐ ܚܲܕ݉ܟ̰ܵܐ ܦܵܝܫܵܐ ܒܹܐ ܡܘܼܡܟܸܢ ܕܐܵܢܝܼ ܕܦܝܼܫܵܐ ܝܢܵܐ ܦܘܼܪܩܹܐ ܒܕܸܡܵܐ ܕܦܹܐܪܵܐ ܦܪܝܼܡܵܐ ܘܕܦܝܼܫܵܐ ܝܢܵܐ ܡܘܼܚܸܒܹܐ ܒܚܘܼܒܵܐ ܐܵܒܵܕܝܼܢܵܝܵܐ ܕܒܪܘܿܢܵܐ ܕܐܲܠܵܗܵܐ: ܡܲܢܫܝܼ ܠܦܵܪܘܿܩܵܝ ܡܪܲܚܡܵܢܵܐ. ܐܝܼܢܵܐ ܐܵܦܸܢ ܕܡܲܚܓ̰ܸܠܵܢܬܵܐ ܝܠܵܗ̇ ܩܵܐ ܢܵܬܵܐ ܐܵܗܵܐ ܓܢܵܗܵܐ ܨܵܘܵܢܬܵܐ: ܕܘܼ ܝܠܵܗ̇ ܡܲܥܠܘܿܡ ܩܲܕ݉ܡ ܥܲܝ̈ܢܲܢ: ܠܹܐ ܡܵܨܲܚ ܣܵܪܒ̣ܲܚ ܠܵܗ̇. ܠܡܲܢܫܘܼܝܹܐ ܠܗ̇ܘ ܕܗܸܟ̃ ܠܵܐ ܡܘܼܢܫܹܐ ܠܹܗ ܐܸܠܲܢ! ܠܡܲܢܫܘܼܝܹܐ ܠܗ̇ܘ ܕܕܸܡܘܼܗܝ ܬܘܼܦܸܟ̣ ܠܹܗ ܡܒܵܕܵܠ ܚܛܝܼ̈ܵܬܲܢ! ܠܡܲܢܫܘܼܝܹܐ ܠܗ̇ܘ ܕܩܵܡ ܡܲܚܸܒܠܲܢ ܗܲܠ ܡܵܘܬܵܐ! ܡܘܼܡܟܸܢ ܝܼܠܵܗ̇؟ ܗܹܐ: ܠܵܐ ܐܲܚܟ̰ܝܼ ܡܘܼܡܟܸܢ ܝܼܠܵܗ̇: ܐܝܼܢܵܐ ܐܸܢܝܲܬܲܢ ܡܵܘܕܘܿܝܹܐ ܝܠܵܗ̇ ܕܟܠܲܢ ܓܘܼܢܵܗܟܵܪ ܝܼܘܲܚ ܒܝܼܘܼܗ̇. ܗ̇ܘ ܕܘܵܓ̰ܸܒ ܝܼܗ݉ܘܵܐ ܕܥܵܒ̣ܕܲܚ ܗ݉ܘܵܘ ܠܹܗ ܡܵܪܵܐ ܕܒܲܝܬܵܐ ܕܕܟ̣ܵܖ̈ܲܢ: ܐܲܚܟ̰ܝܼ ܐܲܪܚܵܐ ܕܚܕܵܐ ܥܕܵܢܵܐ ܟܪܝܼܬܵܐ ܒܹܥܒ̣ܵܕܘܼܗܝ ܝܘܲܚ. ܗ̇ܘ ܙܩܝܼܦܵܐ ܕܒܸܬ ܚܵܫܒ̣ܲܚ ܗ݉ܘܵܘ ܕܟ̣ܵܪܵܐ ܠܟܸܣܠܘܼܗܝ ܒܸܬ ܥܵܪܩܸܠ: ܘܕܡܲܢܫܵܝܬܵܐ ܠܹܐ ܩܲܫܕܸܪܵܐ ܗ݉ܘܵܐ ܠܩܲܪܒܘܼܢܹܐ ܐܸܠܘܼܗܝ: ܦܝܵܫܵܐ ܝܠܹܗ ܥܒ̣ܝܼܕܵܐ ܫܚܝܼܡܵܐ ܒܐܲܩܠܵܬܹ̈ܐ ܕܡܲܢܫܵܝܬܵܐ. ܐܸܢܝܲܬܘܼܟ̣ ܠܹܐ ܝܠܵܗ̇ ܡܵܘܕܘܿܝܹܐ ܕܐܵܗܵܐ ܕܘܼܙ ܝܼܠܵܗ̇؟ ܠܹܐ ܝܘܸܬ ܡܲܫ݉ܟ̰ܘܿܚܘܼܗ̇ ܓܵܢܘܼܟ̣ ܡܲܢܫܝܼܵܢܬܵܐ ܕܡܫܝܼܚܵܐ؟ ܚܲܕ݉ ܡܸܢܕܝܼ ܕܐܵܗܵܐ ܕܘܼܢܝܹܐ ܟܹܐ ܓܵܢܸܒ̣ ܠܹܗ ܠܸܒܘܼܟ̣ ܗܲܕܟ̣ܵܐ ܕܠܹܐ ܕܵܟ̣ܪܸܬ ܠܗ̇ܘ ܕܥܲܠܹܗ ܘܵܓ̰ܸܒ ܝܼܗ݉ܘܵܐ ܕܡܲܬܒ̣ܸܬ ܗ݉ܘܵܐ ܚܘܼܒܘܼܟ̣. ܟܲܕ ܘܵܓ̰ܸܒ ܝܼܗ݉ܘܵܐ ܕܥܲܝܢܘܼܟ̣ ܗܵܘܝܵܐ ܝܗ݉ܘܵܐ ܬܝܼܟܬܵܐ ܥܲܠ ܙܩܝܼܦܵܐ: ܚܲܕ݉ ܡܸܢܕܝܼ ܐܲܪܥܵܢܵܝܵܐ ܟܹܐ ܓܵܪܸܫ ܦܲܟܵܪܬܘܼܟ̣. ܚܒ̣ܵܛܹ̈ܐ ܠܵܐ ܫܵܠܝܵܢܹ̈ܐ ܕܕܘܼܢܝܹܐ: ܘܫܲܗܘܲܬܝܵܬܹ̈ܐ ܕܵܝܸܡ ܕܡܸܢܕܝܼܵܢܹ̈ܐ ܐܲܖ̈ܥܵܢܵܝܹܐ ܟܹܐ ܓܵܪܫܝܼ ܠܵܗ̇ ܓܵܢܵܐ ܕܐ݉ܢܵܫܵܐ ܡ̣ܢ ܡܫܝܼܚܵܐ. ܕܟ̣ܵܪܵܐ ܟܹܐ ܒܵܓ̰ܸܪ ܠܚܲܕ݉ ܥܸܕܵܐ ܣܲܡܵܢܵܐ ܒܚܲܡܚܘܵܪܘܼܬܵܐ. ܟܲܕ ܠܘܲܪܕܵܐ ܕܫܵܪܘܿܢ ܟܹܐ ܫܵܒ̣ܸܩ ܕܟ̰ܵܡܸܟ̃.