ܢܝܣܢ 27

ܐܠܗܐ ܐܠܗܢ (ܡܙܡܘܪܐ ܣܘ: 6)

ܥܵܓ̰ܸܒܘܼܬܵܐ ܝܠܵܗ̇ ܟܡܵܐ ܒܹܐ ܡܲܣܪܵܦ ܟܹܐ ܥܵܒ̣ܕܲܚ ܠܗ݉ܘܿܢ ܐܵܢܝܼ ܒܘܼܖ̈ܟܵܬܹܐ ܖ̈ܘܼܚܵܢܵܝܹܐ ܕܐܲܠܵܗܵܐ ܟܹܐ ܝܲܗܒ̣ܸܠ ܠܲܢ: ܐܝܼܢܵܐ ܚܕܵܐ ܥܵܓ̰ܸܒܘܼܬܵܐ ܗܵܠܵܐ ܒܘܼܫ ܓܘܼܪܬܵܐ ܝܠܵܗ̇: ܟܡܵܐ ܚܲܕ݉ܟ̰ܵܐ ܡܲܣܪܵܦ ܟܹܐ ܫܵܩܠܲܚ ܡ̣ܢ ܐܲܠܵܗܵܐ ܒܓܵܢܘܼܗܝ. ܐܵܦܸܢ ܗ̇ܘ ܐܲܠܵܗܵܐ ܕܝܼܲܢ ܝܼܠܹܗ: ܐܲܚܢܲܢ ܚܵܕ݉ܟ̰ܵܐ ܟܹܐ ܐܵܙܲܠ݉ܚ ܠܟܸܣܠܘܼܗܝ: ܘܚܲܕ݉ܟ̰ܵܐ ܟܹܐ ܛܵܠܒܲܚ ܡܸܢܘܼܗܝ. ܟܝܼܡ ܓܵܗܹ̈ܐ ܟܹܐ ܥܵܒ̣ܕܲܚ ܪܵܐܝܝܼ ܒܡܵܪܝܵܐ: ܘܪܵܒܵܐ ܓܵܗܹ̈ܐ ܟܹܐ ܫܲܪܲܚ ܠܹܥܒ̣ܵܕܵܐ ܫܘܼ̈ܠܲܢ ܕܠܵܐ ܛܠܵܒܬܵܐ ܕܬܲܓܒܲܪܬܘܼܗܝ ܥܲܡܲܢ. ܐܝܼܡܵܐ ܕܢܵܦܠܲܚ ܬܚܘܿܬ ܝܘܼܩܖܹ̈ܐ: ܪܵܒܵܐ ܓܵܗܹ̈ܐ ܟܹܐ ܓ̰ܲܪܒܲܚ ܕܛܵܥܢܲܚ ܠܗ݉ܘܿܢ ܒܓܵܢܲܢ ܡ̣ܢ ܓܹܒܵܐ ܕܕܵܪܲܚ ܗ݉ܘܵܘ ܠܗ݉ܘܿܢ ܥܲܠ ܗ̇ܘ ܩܵܐ ܕܣܵܢܸܕ ܠܲܢ. ܠܹܐ ܝܠܵܗ̇ ܕܠܲܝܬ ܠܲܢ ܪܘܼܚܨܲܬ ܠܹܥܒ̣ܵܕܵܐ ܗܲܕܟ̣ܵܐ: ܣܵܒܵܒ ܡܵܪܝܵܐ ܟ̰ܸܡ ܪܵܙܝܼ ܝܠܹܗ ܕܕܵܪܲܚ ܥܲܠܘܼܗܝ ܝܘܼܩܖ̈ܲܢ: ܘܕܫܵܩܠܲܚ ܩܵܐ ܓܵܢܲܢ ܬܘܼܪܣܵܝܵܐ ܡ̣ܢ ܐܲܢܒܵܖ̈ܘܼܗܝ. ܐܸܢ ܠܵܐ ܥܵܒ̣ܕܲܚ ܒܸܣܬܵܝܘܼܬܵܐ ܠܸܫܩܵܠܵܐ ܗܲܝܲܪܬܵܐ ܡ̣ܢ ܐܲܠܵܗܵܐ: ܓܢܵܗܵܐ ܕܓܵܢܲܢ ܝܼܠܵܗ̇. ܒܲܣ ܐܸܢ ܐܝܼܬ ܠܘܼܟ̣ ܚܲܕ݉ ܗܲܕܟ̣ܵܐ ܕܵܘܣܬ: ܘܐܸܢ ܒܸܟ̰ܝܵܕܘܼܟ̣ ܝܼܠܹܗ: ܙܸܠ ܠܟܸܣܠܘܼܗܝ ܟܠ ܝܵܘܡܵܐ. ܗܸܟ̃ ܠܵܐ ܥܲܪܩܸܠܸܬ ܒܣܢܝܼܩܘܼܬܵܐ ܟܲܕ ܐܝܼܬ ܠܘܼܟ̣ ܚܲܕ݉ ܐܲܠܵܗܵܐ ܡܵܠܝܵܢܵܐ. ܗܸܟ̃ ܠܵܐ ܙܵܕܥܸܬ ܝܲܢ ܦܵܝܫܸܬ ܒܹܐ ܠܸܒܵܐ ܟܲܕ ܐܝܼܬ ܚܲܕ݉ ܐܲܠܵܗܵܐ ܕܪܵܙܝܼ ܝܠܹܗ ܠܗܲܝܘܼܪܘܼܟ̣. ܙܸܠ ܠܟܸܣܠܘܼܗܝ ܘܫܩܘܿܠ ܡܸܢܕܝܼ ܕܒܵܥܸܬ ــ ܐܝܼܬ ܩܵܐ ܟܠܵܝ ܡܲܛܠܲܒܘܼ̈ܟ̣. ܝ݉ܠܘܿܦ ܠܹܥܒ̣ܵܕܘܼܗܝ ܐܲܠܵܗܵܐ ܟܠ ܒܟܠ ܩܵܐ ܓܵܢܘܼܟ̣. ܗ̇ܘ ܟܹܐ ܡܵܨܹܐ ܝܲܗܒ̣ܸܠ ܠܘܼܟ̣ ܟܠ ܡܸܢܕܝܼ: ܝܲܢ ܗܵܠܵܐ ܒܘܼܫ ܨܦܵܝܝܼ: ܕܗ̇ܘ ܒܓܵܢܘܼܗܝ ܗܵܘܹܐ ܩܵܬܘܼܟ̣ ܡܓܹܒܵܐ ܕܟܠ. ܨܲܠܝܼ ܨܠܘܿܬܵܐ ܪܵܒܵܐ ܓܵܗܹ̈ܐ: ܣܵܒܵܒ ܕܐܲܠܵܗܘܼܟ̣ ܝܼܠܹܗ. ܕܵܐܟ̣ܝܼ ܟܹܐ ܡܵܨ݀ܝܬ ܬܲܠܩܸܬ ܦܸܖ̈ܨܲܬܹܐ ܐܘܼܚܟ̰ܵܐ ܓ̰ܸܢܣ؟ ܙܸܠ ܠܟܸܣܠܘܼܗܝ ܘܡܲܕܸܥ ܩܵܬܘܼܗܝ ܟܠܵܝ ܣܢܝܼܩܘܼܝܵܬܘܼ̈ܟ̣. ܒܟܠܵܝ ܙܲܒ̣ܢܹ̈ܐ ܡܲܦܠܸܚ ܠܹܗ ܒܗܲܝܡܵܢܘܼܬܵܐ. ܐܸܢ ܚܘܼܒ̣ܝܵܐ ܢܦܝܼܠܵܐ ܝܠܹܗ ܒܐܘܼܪܚܘܼܟ̣: ܐܲܠܵܗܵܐ ܥܒ̣ܘܿܕ ܠܹܗ ܫܸܡܫܵܐ ܩܵܐ ܓܵܢܘܼܟ̣. ܐܸܢ ܚܲܕ݉ ܕܸܫ̃ܡܸܢ ܚܲܝܠܵܢܵܐ ܦܠܝܼܛܵܐ ܝܠܹܗ ܠܩܲܕ݉ܡܘܼܟ̣: ܝܹܗܘܼܘܵܐ ܥܒ̣ܘܿܕ ܠܹܗ ܩܲܠܚܵܢܘܼܟ̣: ܣܵܒܵܒ ܗ̇ܘ ܫܸܡܫܵܐ ܝܠܹܗ ܘܩܲܠܚܵܢ ܩܵܐ ܛܵܝܸܦܘܼܗܝ. ܐܸܢ ܐܘܼܪܚܘܼܟ̣ ܬܘܼܠܩܘܼܗ̇ ܝܘܸܬ ܓܵܘ ܒܲܪܝܼܵܐ ܕܕܘܼܢܝܹܐ: ܐܲܠܵܗܵܐ ܥܒ̣ܘܿܕ ܠܹܗ ܒܵܠܵܕܟ̰ܝܼܘܼܟ̣: ܘܗ̇ܘ ܒܸܬ ܦܲܠܸܛ ܠܘܼܟ̣ ܠܐܘܼܪܚܵܐ ܕܘܼܙ. ܟܠ ܕܝܼܘܸܬ: ܘܟܠ ܐܲܝܟܵܐ ܕܝܼܘܸܬ: ܕܟ̣ܘܿܪ ܕܐܲܠܵܗܵܐ ܝܠܹܗ ܗܲܪ ܗ̇ܘ ܡܸܢܕܝܼ ܕܒܵܥܸܬ ܘܒܕܘܼܟܵܐ ܕܒܵܥܸܬ: ܘܕܟܹܐ ܡܵܨܹܐ ܠܹܥܒ̣ܵܕܵܐ ܟܠ ܕܒܵܥܸܬ.