ܢܝܣܢ 28
ܕܟ̣ܘܪ ܚܒܪܐ ܠܪܓܘܟ̣: ܣܒܒ ܩܡ ܡܣܦܪܬ ܠܝ (ܡܙܡܘܪܐ ܩܝܛ: 49)
ܟܠ ܕܗܵܘܝܵܐ ܣܢܝܼܩܘܼܬܘܼܟ̣ ܠܚܘܿܕܵܐܝܼܬ: ܒܗܵܣܵܢܵܝܘܼܬܵܐ ܟܹܐ ܡܵܨܹܝܬ ܡܲܫ݉ܟ̰ܚܸܬ ܚܲܕ݉ ܩܵܘܠܵܐ ܓܵܘ ܟܬܵܒ̣ܹ̈ܐ ܩܲܕܝܼܫܹ̈ܐ ܕܒܸܬ ܠܵܚܸܡ ܩܵܬܘܼܗ̇. ܙܲܒܘܼܢ ܝܼܘܸܬ: ܘܓ̰ܸܗܝܼܵܐ: ܣܵܒܵܒ ܐܘܼܪܚܘܼܟ̣ ܥܲܣܩܵܐ ܝܠܵܗ̇؟ ܕܘܼ ܝܠܹܗ ܚܲܕ݉ ܩܵܘܠܵܐ ــ ܟܐ ܝܗܒ̣ܠ ܠܟܟ̰ܝܚܐ ܚܝܠܐ. ܐܝܼܡܵܐ ܕܩܵܪܹܝܬ ܚܲܕ݉ ܗܲܕܟ̣ܵܐ ܩܵܘܠܵܐ: ܠܲܒܸܠ ܠܹܗ ܠܟܸܣ ܝܲܗܒ̣ܵܢܘܼܗܝ: ܘܛܠܘܿܒ ܡܸܢܘܼܗܝ ܕܬܲܡܸܡ ܠܹܗ. ܐܸܢ ܒܸܛܥܵܝܵܐ ܝܘܸܬ ܒܵܬ݉ܪ ܡܫܝܼܚܵܐ ܘܨܸܗܝܵܐ ܝܘܸܬ ܩܵܐ ܫܲܪܝܼܟܘܼܬܵܐ ܒܘܼܫ ܚܠܘܼܨܬܵܐ ܥܲܡܘܼܗܝ: ܕܘܼ ܝܠܹܗ ܚܲܕ݉ ܩܵܘܠܵܐ ܕܠܲܓ̰ܠܘܼܓ̰ܵܐ ܝܠܹܗ ܐܲܝܟ̣ ܟܵܘܟ̣ܒ̣ܵܐ ܥܲܠܘܼܟ̣ ــ ܛܘܒ̣ܐ ܠܐܢܝܼ ܕܟܦܢܝܼ ܘܨܗܝܝܼ ܠܟܐܢܘܬܐ: ܣܒܒ ܐܢܝܼ ܒܬ ܣܒ̣ܥܝܼ. ܠܲܒܸܠ ܠܹܗ ܐܵܗܵܐ ܩܵܘܠܵܐ ܠܟܸܣ ܬܪܘܿܢܘܿܣ ܒܕܵܝܸܡܘܼܬܵܐ: ܠܵܐ ܛܵܠܒܸܬ ܗܸܟ̃ ܡܸܢܕܝܼ ܐ݉ܚܸܪ݉ܢܵܐ: ܐܸܠܵܐ ܐܵܙܸܠ݉ܬ ܠܟܸܣ ܐܲܠܵܗܵܐ ܡܸܢ݉ܕܪܸܫ݉ ܘܡܸܢ݉ܕܪܸܫ݉: ܘܐܵܡܪܸܬ: ܡܵܪܝܵܐ: ܐܲܢ݉ܬ ܗܘܼܡܙܸܡܠܘܼܟ̣: ܥܒ̣ܘܿܕ ܕܵܐܟ̣ܝܼ ܕܗܘܼܡܙܸܡܠܘܼܟ̣. ܒܲܠܟܵܐ ܡܘܼܥܝܸܩܵܐ ܝܘܸܬ ܡ̣ܢ ܚܛܝܼܬܵܐ: ܘܝܘܼܩܪܸܢܵܐ ܝܘܸܬ ܬܚܘܿܬ ܟܵܪܬܵܐ ܝܲܩܘܼܪܬܵܐ ܕܥܵܘܠܘܼ̈ܟ̣. ܕܒ̣ܘܿܩ ܢܵܬܵܐ ــ ܐܢܐ: ܐܢܐ ܝܘܢ ܗ̇ܘ ܕܓܪܕ ܓܢܗܘ̈ܟ̣ ܒܘܬ ܚܛܪܝܼ: ܘܚܛܝܬܘ̈ܟ̣ ܠܐ ܕܟ̣ܪܢ. ܠܲܝܬ ܠܘܼܟ̣ ܨܦܵܝܘܼܬܵܐ ܕܓܵܢܘܼܟ̣ ܕܒܘܼܬ ܕܝܼܘܼܗ̇ ܫܵܒ̣ܸܩ ܚܛܝܼܵܬܘܼ̈ܟ̣: ܐܝܼܢܵܐ ܛܠܘܿܒ ܕܬܲܡܸܡ ܩܵܘܠܘܼ̈ܗܝ: ܘܒܸܬ ܬܲܡܸܡ ܠܗ݉ܘܿܢ. ܒܲܠܟܵܐ ܒܸܙܕܵܥܵܐ ܝܘܸܬ ܕܠܵܐ ܡܵܨܹܝܬ ܚܵܡܠܸܬ ܗܲܠ ܐ݉ܚܵܪܬܵܐ: ܝܲܢ ܕܡ̣ܢ ܒܵܬ݉ܪ ܕܚܫܝܼܒ̣ܘܼܗ̇ ܝܘܸܬ ܓܵܢܘܼܟ̣ ܒܪܘܿܢܵܐ ܕܐܲܠܵܗܵܐ: ܦܵܠܛܸܬ ܐܵܣܘܿܛܵܐ. ܐܸܢ ܗܵܕܵܐ ܝܠܵܗ̇ ܐܲܗܘܵܠܘܼܟ̣: ܠܲܒܸܠ ܠܹܗ ܐܵܗܵܐ ܚܲܒܪܵܐ ܕܫܵܦܵܩܲܬ ܩܲܕ݉ܡ ܬܪܘܿܢܘܿܣ ܘܛܠܘܿܒ ܕܦܵܐܸܫ ܬܘܼܡܸܡܵܐ ــ ܛܘܖ̈ܢܐ ܒܬ ܫܢܝ: ܘܖ̈ܘܡܝܬܐ ܓ̰ܘܓ̰ܝܼ: ܘܫܦܩܬܝܼ ܡ̣ܢ ܠܟܣܠܟ̣ܝ ܠܐ ܫܢܝܐ: ܘܩܘܠܐ ܕܫܠܡܝܼ ܠܐ ܓ̰ܘܓ̰. ܐܸܢ ܦܠܝܼܛܵܐ ܝܘܸܬ ܡ̣ܢ ܗܸܙܘܼܪ ܕܦܵܪܘܿܩܘܼܟ̣ ܘܒܸܛܥܵܝܵܐ ܝܘܸܬ ܒܵܬ݉ܪܘܼܗܝ ܒܚܲܕ݉ ܠܸܒܵܐ ܦܫܝܼܡܵܐ: ܕܟ̣ܘܿܪ ܐܲܢܹܐ ܩܵܘܠܹ̈ܐ ــ ܕܘܪܘܢ ܠܟܣܠܝ ܘܕܝܪܢ ܐܠܘܟ̣ܘܢ. ܒܛܦܛܦܬܐ ܙܥܘܪܬܐ ܩܡ ܫܒ̣ܩܢܟ̣ܝ: ܘܒܖ̈ܚܡܐ ܓܘܖ̈ܐ ܒܬ ܓ̰ܡܥܢܟ̣ܝ. ܩܵܐ ܟܠܵܝ ܣܢܝܼܩܘܼܝܵܬܘܼ̈ܟ̣ ܡܲܫ݉ܟ̰ܸܚ ܗܘܼܓ̰ܲܬܹ̈ܐ ܕܐܵܓ̣ܵܝܘܼܟ̣ ܘܠܲܒܸܠ ܠܗ݉ܘܿܢ ܠܟܸܣܠܘܼܗܝ ܕܬܲܡܸܡ ܠܗ݉ܘܿܢ.