ܢܝܣܢ 30

ܘܛܘܪܛܡ ܠܗ݉ܘܢ ܥܠ ܡܘܫܐ ܘܥܠ ܐܗܪܘܢ ܟܠܝ ܒܢܝ̈ ܝܣܪܝܠ (ܡܢܝܢܐ ܝܕ: 2)

ܐܘܼܦ ܐܵܕܝܼܵܐ ܐܝܼܬ ܛܲܖ̈ܛܸܡܵܢܹܐ ܓܵܘ ܟܖܸ̈ܣܛܝܵܢܹܐ ܕܵܐܟ̣ܝܼ ܕܐܝܼܬ ܗ݉ܘܵܘ ܛܲܖ̈ܛܸܡܵܢܹܐ ܓܵܘ ܐܘܼܪܕܘܼܝ ܕܒܢܲܝ̈ ܝܼܣܪܵܝܹܠ ܒܙܲܒ̣ܢܹ̈ܐ ܩܵܕܝܼܡܝܼ. ܐܝܼܬ ܐ݉ܢܵܫܹ̈ܐ ܕܐܝܼܡܵܐ ܕܩܵܛܝܼܵܐ ܕܬܲܥܠܲܡܬܵܐ ܢܵܦܸܠ ܥܲܠܵܝ: ܟܹܐ ܛܲܪܛܸܡܝܼ ܘܐܵܡܪܝܼ: ܩܵܡܘܿܕܝܼ ܗܲܕܟ̣ܵܐ ܦܝܵܫܵܐ ܝܘܸܢ ܡܘܼܠܝܸܨܵܐ؟ ܡܘܼܕܝܼ ܥܒ̣ܝܼܕܵܐ ܝܘܸܢ ܕܦܵܝܫܸܢ ܡܘܼܠܝܸܨܵܐ ܒܐܵܗܵܐ ܬܵܗܵܪ؟ ܐܝܼܬ ܠܲܢ ܚܕܵܐ ܗܸܡܸܙܡܵܢ ܩܵܬܘܼܟ̣: ܝܵܐ ܛܲܪܛܸܡܵܢܵܐ. ܩܵܡܘܿܕܝܼ ܛܲܪܛܸܡܸܬ ܥܲܠ ܬܲܓܒܲܖ̈ܝܵܬܹܐ ܕܒܵܒܘܼܟ̣ ܫܡܲܝܵܢܵܐ؟ ܡܘܼܡܟܸܢ ܝܼܠܵܗ̇ ܕܬܲܥܠܸܡ ܠܘܼܟ̣ ܙܵܘܕܵܐ ܡ̣ܢ ܕܚܫܝܼܚܵܐ ܝܘܸܬ؟ ܬܲܚܡܸܢ ܟܡܵܐ ܥܵܨܝܼ ܝܘܸܬ ܗ݉ܘܵܐ ܒܚܕܵܐ ܥܕܵܢܵܐ: ܐܝܼܢܵܐ ܗ̇ܘ ܩܵܡ ܦܲܚܸܠ ܠܘܼܟ̣! ܐܝܼܬܵܐ ܐܸܢ ܗ̇ܘ ܒܥܵܩܸܠܕܵܪܘܼܬܘܼܗܝ ܐܵܕܝܼܵܐ ܒܸܚܙܵܝܘܼܗ̇ ܝܠܹܗ ܠܵܚܘܿܡܬܵܐ ܠܬܲܥܠܘܼܡܘܼܟ̣: ܠܹܐ ܝܠܵܗ̇ ܘܵܓ̰ܸܒ ܕܛܲܪܛܸܡܸܬ. ܐܝܼܬܵܐ ܡܸܢ݉ܕܪܸܫ݉ ܬܲܚܡܸܢ ܒܘܼܬ ܚܪܵܒ̣ܵܐ ܕܐܝܼܬ ܓܵܘ ܠܸܒܘܼܟ̣: ܗ̇ܝܓܵܗ ܠܹܐ ܥܵܓ̰ܒܸܬ ܕܩܵܛܝܼܵܐ ܠܵܙܸܡ ܝܼܠܹܗ ܩܵܐ ܦܵܠܲܛܬܘܼܗܝ ܡ̣ܢ ܬܵܡܵܐ. ܬܩܘܿܠ ܓܵܢܘܼܟ̣ ܘܡܲܫ݉ܟ̰ܸܚ ܟܡܵܐ ܚܸܠܬ ܐܝܼܬ ܚܒ̣ܝܼܛܬܵܐ ܒܕܲܗܒ̣ܘܼܟ̣. ܒܸܚܫܵܒ̣ܵܐ ܝܘܸܬ ܕܟܘܼܪܵܐ ܙܵܘܕܵܐ ܡ̣ܢ ܠܵܙܸܡ ܚܲܝܡܬܵܐ ܝܠܵܗ̇ ܩܵܐ ܦܵܠܲܛܬܵܐ ܕܚܸܠܬܘܼܟ̣؟ ܗܲܪ ܗ̇ܝ ܪܘܼܚܘܼܟ̣ ܙܵܝܵܪܬܵܐ ܘܥܵܨܝܼ ܠܹܐ ܝܠܵܗ̇ ܒܹܥܒ̣ܵܕܵܐ ܣܵܒܸܬ ܕܠܸܒܘܼܟ̣ ܠܹܐ ܝܠܹܗ ܡܩܘܼܕܫܵܐ ܒܬܲܡܵܡܲܬܘܼܬܵܐ؟ ܐܲܢܹܐ ܛܲܖ̈ܛܵܡܝܵܬܘܼܟ̣ ܠܹܐ ܝܢܵܐ ܕܲܪܩܘܼܒ̣ܠ ܕܪܘܼܚܵܐ ܕܡܲܨܝܲܬܬܵܐ ܕܒܢܘܿܢܹ̈ܐ ܕܐܲܠܵܗܵܐ؟ ܠܹܐ ܝܘܸܬ ܣܢܝܼܩܵܐ ܠܬܲܥܠܲܡܬܵܐ؟ ܐܝܼܢܵܐ ܐܸܢ ܗܲܪ ܒܸܬ ܛܲܪܛܸܡܸܬ ܒܘܼܬ ܬܲܥܠܲܡܬܵܐ: ܗܵܘܹܝܬ ܗܸܫܝܵܪ: ܣܵܒܵܒ ܛܲܖ̈ܛܸܡܵܢܹܐ ܟ̰ܵܬܘܿܢܘܼܬܵܐ ܒܸܬ ܩܲܒܠܝܼ. ܐܲܠܵܗܵܐ ܗܲܡܵܫܵܐ ܬܲܪܬܹܝ ܓܵܗܹ̈ܐ ܟܹܐ ܬܲܥܠܸܡ ܠܗ݉ܘܿܢ ܐܵܢܝܼ ܒܢܘܿܢܘܼ̈ܗܝ ܕܒܓܵܗܵܐ ܩܲܕ݉ܡܵܝܬܵܐ ܠܵܐ ܩܲܒܠܝܼ ܒܚܡܵܠܬܵܐ. ܐܝܼܢܵܐ ܚܲܕ݉ ܡܸܢܕܝܼ ܘܵܓ̰ܸܒ ܝܼܠܵܗ̇ ܕܝܲܕܥܸܬ: ܝܲܥܢܹܐ: ܕܠܐ ܡܠܝܨ ܡܢ ܠܒܘܗܝ: ܘܡܦܫܡ ܒܢܝ̈ܢܫܐ. ܟܠܵܝ ܬܲܥܠܲܡܝܵܬܘܼ̈ܗܝ ܫܘܼܕܪܹܐ ܝܢܵܐ ܒܚܘܼܒܵܐ: ܠܨܲܪܘܼܦܘܼܟ̣ ܘܠܹܓܪܵܫܘܼܟ̣ ܒܘܼܫ ܩܘܼܪܒܵܐ ܠܓܵܢܘܼܗܝ. ܡ̇ܢ ܕܡܚܒ ܠܗ ܡܪܝܐ: ܟܐ ܬܥܠܡ ܠܗ: ܘܟܐ ܓ̰ܢܓ̰ܪ ܠܟܠ ܒܪܘܢܐ ܕܗ̇ܘ ܩܒܠ. ܐܢ ܩܒܠܝܬܘܢ ܬܥܠܡܬܐ: ܐܝܟ ܕܠܟܣ ܒܢܘܢ̈ܐ ܒܦܠܚܐ ܝܠܗ ܠܟܣ ܠܘܟ̣ܘܢ ܐܠܗܐ. ܠܐ ܛܪܛܡܝܬܘܢ ܕܐܟ̣ܝ ܕܡܢܝ ܛܘܪܛܡ ܠܗ݉ܘܢ: ܘܬܠܝܩ ܠܗ݉ܘܢ ܒܝܕ ܡܚܪܒ̣ܢܐ.