ܒܢܝ̈ܢܫܐ: ܗܠ ܐܝܡܢ ܐܝܩܪܝ ܠܢܚܦܬܐ؟ (ܡܙܡܘܪܐ ܕ: 2)

        ܚܲܕ݉ ܡܲܠܦܵܢܵܐ ܟܬܝܼܒ̣ܵܐ ܝܠܹܗ ܚܲܕ݉ ܣܸܕܪܵܐ ܡܲܦܫܸܡܵܢܵܐ ܕܟܠܵܝ ܐܝܼܩܵܖ̈ܢܐ ܘܗܘܼܖ̈ܡܲܬܹܐ ܕܛܵܝܸܦܵܐ ܟܘܼܝܵܐ ܕܝܼܣܪܵܐܹܝܠ ܡܘܼܚܙܹܐ ܠܗ݉ܘܿܢ ܩܵܐ ܡܲܠܟܵܝ ܕܪܵܒܵܐ ܥܕܵܢܵܐ ܣܦܝܼܪܹܐ ܝܗ݉ܘܵܘ ܐܸܠܘܼܗܝ. (1) ܥܒ̣ܝܼܕ ܠܗ݉ܘܿܢ ܩܵܬܘܼܗܝ ܚܕܵܐ ܦܝܼܫܘܵܙ ܕܐܝܼܩܵܪܵܐ ܕܒܝܼܘܼܗ̇ ܓܘܼܖ̈ܵܢܹܐ ܕܖ̈ܗ݉ܘܿܡܵܝܹܐ: ܟܵܗܢܹ̈ܐ ܕܝܗܘܼܕܵܝܹ̈ܐ: ܘܐ݉ܢܵܫܹ̈ܐ ܕܒܲܟ̣ܬܵܬܹ̈ܐ: ܟܠܵܝ ܙܘܼܘܸܓ ܠܗ݉ܘܿܢ: ܟܲܕ ܓܵܢܘܼܗܝ ܛܥܝܼܢܘܼܗܝ ܙܩܝܼܦܘܼܗܝ. ܐܵܗܵܐ ܝܠܵܗ̇ ܦܝܼܫܘܵܙ ܕܓ̣ܵܠܸܒܘܼܬܵܐ ܕܕܘܼܢܝܹܐ ܒܹܥܒ̣ܵܕܵܐ ܝܠܵܗ̇ ܩܵܐ ܗ̇ܘ ܕܐ݉ܬܹܐ ܠܹܗ ܠܸܓ̣ܠܵܒܵܐ ܠܕܸܫ̃ܡܸܢܹ̈ܐ ܒܘܼܫ ܡܵܝܖܹ̈ܐ ܕܒܲܪܢܵܫܵܐ. ܡ̣ܢ ܓܹܒܵܐ ܕܩܲܘܲܚܬܵܐ ܕܚܸܩܪܵܐ: ܡܲܣܚܵܖ̈ܘܼܝܵܬܹܐ ܒܸܩܝܵܬܵܐ ܝܢܵܐ ܠܢܵܬܘܼܗܝ. (2) ܝܘܼܗܒ̣ܸܠ ܠܗ݉ܘܿܢ ܩܵܬܘܼܗܝ ܚܲܡܪܵܐ ܕܐܝܼܩܵܪܵܐ. ܡ̣ܢ ܓܹܒܵܐ ܕܚܲܡܪܵܐ ܓܵܘ ܦܸܢܓ̰ܵܢ ܕܕܲܗܒ̣ܵܐ ܝܘܼܗܒ̣ܸܠ ܠܗ݉ܘܿܢ ܩܵܬܘܼܗܝ ܫܬܵܝܬܵܐ ܡܲܫܢܝܼܵܢܬܵܐ ܕܡܘܼܩܲܨܝܼܖܹ̈ܐ: ܐܘܼܦ ܗ̇ܘ ܠܵܐ ܫܬܹܐ ܠܹܗ: ܩܵܐ ܕܨܦܵܝܝܼ ܪܵܥܸܫ ܗ݉ܘܵܐ ܠܛܲܥܡܵܐ ܕܡܵܘܬܵܐ: ܘܒܵܬ݉ܪ ܗܵܕܵܐ ܐܝܼܡܵܐ ܕܡܘܼܩܘܸܚ ܠܹܗ: ܨܗܝܐ ܝܘܢ: ܝܘܼܗܒ̣ܸܠ ܠܗ݉ܘܿܢ ܩܵܬܘܼܗܝ ܚܵܠܵܐ ܚܒ̣ܝܼܛܵܐ ܒܡܪܵܖܹ̈ܐ ܡܘܼܡܛܝܼܵܐ ܠܦܘܼܡܘܼܗܝ ܒܝܲܕ ܐܸܣܦܘܼܓܵܐ. (3) ܝܘܼܗܒ̣ܸܠ ܠܗ݉ܘܿܢ ܩܵܬܘܼܗܝ ܚܕܵܐ ܨܦܵܝܝܼ ܕܲܣܬܵܐ ܕܢܵܛܘܿܖܹ̈ܐ ܐܵܢܝܼ ܕܡܘܼܚܙܹܐ ܠܗ݉ܘܿܢ ܐܝܼܩܵܪܵܝ ܒܗ̇ܝ ܕܕܪܹܐ ܠܗ݉ܘܿܢ ܦܸܫܟܵܐ ܥܲܠ ܓ̰ܘܼܠܘܼ̈ܗܝ ܘܦܘܼܠܥܵܝ ܠܗܘܿܢ ܩܵܐ ܓܵܢܵܝ. ܐܵܗܵܐ ܝܗ݉ܘܵܐ ܚܵܨܵܐ ܣܲܪܒܵܙ ܕܗ̇ܘ ܚܸܩܪܵܐ ܕܫܡܲܝܵܐ. (4) ܚܕܵܐ ܬܪܘܿܢܘܿܣ ܕܚܸܩܪܵܐ ܦܝܼܫ ܠܵܗ̇ ܝܘܼܗܒ̣ܸܠܬܵܐ ܩܵܬܘܼܗܝ: ܥܲܠ ܩܲܝܣܵܐ ܕܸܡܵܢܵܐ. ܒܢܲܝ̈ܢܵܫܵܐ ܥܵܨܝܹ̈ܐ ܠܵܐ ܡܨܹܐ ܠܗ݉ܘܿܢ ܠܡܲܫ݉ܟ̰ܘܼܚܹܐ ܚܕܵܐ ܕܘܼܟܬܵܐ ܒܘܼܫ ܪܵܗܲܬ ܩܵܐ ܐܵܓ̣ܵܝܵܝ. ܙܩܝܼܦܵܐ ܨܦܵܝܝܼ ܡܲܕܘܼܥܹܐ ܝܗ݉ܘܵܐ ܦܸܟܝܼܖ̈ܵܝ ܒܘܼܬ ܕܝܼܘܼܗܝ: ܐܲܝܟ̣ ܐܸܢ ܐܵܡܪܝܼ ܗ݉ܘܵܘ: ܐܲܝ ܒܪܘܿܢܵܐ ܕܐܲܠܵܗܵܐ: ܠܐܲܠܵܗܵܐ ܒܓܵܢܘܼܗܝ ܙܹܐ ܗܲܕܟ̣ܵܐ ܒܸܬ ܥܵܒ̣ܕܲܚ ܗ݉ܘܵܘ ܐܸܢ ܡܵܨܲܚ ܗ݉ܘܵܘ ܠܸܡܛܵܝܘܼܗܝ. (5) ܫܸܡܵܐ ܕܐܝܼܩܵܪܵܐ ܕܡܘܼܬܸܒ̣ ܠܗ݉ܘܿܢ ܠܥܸܠܸܠ ܡ̣ܢ ܪܹܫܘܼܗܝ ܝܼܗܘܵܐ. ܒܩܵܠܵܡܵܐ: ܡܠܟܐ ܕܝܗܘܕܝ̈ܐ: ܐܝܼܢܵܐ ܐܲܢܹܐ ܝܗܘܼܕܵܝܹ̈ܐ ܣܸܡܝܹ̈ܐ ܡܸܓ̰ܸܕ ܒܸܩܪܵܝܘܼܗܝ ܝܗ݉ܘܵܘ: ܡܠܟܐ ܕܓ̰ܠܠܝ̈ܐ: ܒܗ̇ܝ ܕܓܘܼܒܹܐ ܠܗ݉ܘܿܢ ܠܒܲܪ ܐܲܒܵܐ ܡ̣ܢ ܓܹܒܵܐ ܗ̇ܘ: ܘܗ̇ܘ ܡܘܼܬܸܒ̣ ܠܗ݉ܘܿܢ ܒܕܘܼܟܬܵܐ ܒܘܼܫ ܡܵܪܹܐ ܢܚܸܦܬܵܐ: ܒܐܵܪܵܠܸܓ̣ ܕܬܪܹܝ ܓ̰ܵܠܵܠܝܹ̈ܐ. ܗܲܕܟ̣ܵܐ: ܒܟܠܵܝ ܡܸܢܕܝܼܵܢܹ̈ܐ ܒܢܘܿܢܹ̈ܐ ܕܐ݉ܢܵܫܵܐ ܡܘܼܚܕܸܪܗ݉ܘܿܢ ܐܝܼܩܵܪܘܼܗܝ ܠܢܚܸܦܬܵܐ: ܐܝܼܢܵܐ ܡܸܢ݉ܕܪܸܫ݉ ܐܝܼܩܵܪܘܼܗܝ ܒܸܬ ܡܲܚܕܹܐ ܠܠܸܒܵܘܵܬܹ̈ܐ ܕܩܲܕܝܼܫܹ̈ܐ ܘܕܡܲܠܲܐܟ̣ܹ̈ܐ ܗܲܠ ܐܵܒܵܕ ܐܵܒܵܕܝܼܢ.