ܒܩܝܛܐ ܘܒܣܬܘܐ ܒܬ ܗܘܐ (ܙܟ̣ܪܝܐ ܝܕ: 8)

ܫܵܩܝܼܵܬܹ̈ܐ ܕܡ̈ܝܼܵܐ ܚܵܝܹ̈ܐ ܕܟܹܐ ܦܵܠܛܝܼ ܡ̣ܢ ܐܘܿܪܸܫܠܸܡ ܠܹܐ ܦܵܝܫܝܼ ܡܘܼܒܪܸܙܹܐ ܒܚܸܡܵܐ ܡܲܩܕܵܢܵܐ ܕܬܵܡܘܿܙ: ܕܵܐܟ̣ܝܼ ܕܠܹܐ ܝܗ݉ܘܵܘ ܡܘܼܓܕܸܠܹܐ ܒܦܵܘܚܹ̈ܐ ܩܲܝܖܹ̈ܐ ܕܣܸܬܘܵܐ. ܦܨܘܿܚܝ: ܓܵܢܝܼ: ܕܐܲܢ݉ܬܝ ܦܝܼܫܬܵܐ ܝܘܲܬܝ ܫܒ̣ܝܼܩܬܵܐ ܠܸܣܗܵܕܵܐ ܠܡܗܘܼܡܢܘܼܬܵܐ ܕܐܲܠܵܗܵܐ. ܟ̰ܵܓ̣ܹ̈ܐ ܟܹܐ ܫܲܚܠܸܦܝܼ ܘܐܘܼܦ ܐܲܢ݉ܬܝ ܟܹܐ ܫܲܚܠܸܦܲܬܝ: ܐܝܼܢܵܐ ܡܵܪܝܵܐ ܩܲܝܵܡ ܝܼܠܹܗ ܠܐܵܒܵܕ: ܘܢܲܗܖ̈ܵܘܵܬܹܐ ܕܚܘܼܒܘܼܗܝ ܠܹܐ ܝܢܵܐ ܫܘܼܚܠܸܦܹܐ ܒܥܲܡܩܘܼܬܵܝ ܘܒܦܸܬܝܘܼܬܵܝ ܘܒܡܸܠܝܘܼܬܵܝ. ܚܸܡܵܐ ܕܫܘܼܠܹ̈ܐ ܕܕܘܼܢܝܹܐ ܘܕܓ̰ܘܼܖ̈ܵܒܹܐ ܡܲܩܕܵܢܹ̈ܐ ܟܹܐ ܥܵܒ̣ܕܝܼ ܠܝܼ ܣܢܝܼܩܵܐ ܠܟܵܪ ܡܲܦܝܸܚܵܢܵܐ ܕܢܲܗܪܵܐ ܕܫܵܦܵܩܲܬܘܼܗܝ. ܩܵܝܡܸܢ ܐܵܙܸܠ݉ܢ ܗܲܪ ܐܵܕܝܼܵܐ ܘܫܵܬܹܝܢ ܣܒ̣ܵܥܬܝܼ ܡ̣ܢ ܗ̇ܘ ܡܲܒܘܼܥܵܐ ܠܵܐ ܬܵܝܡܵܢܵܐ ܕܟܹܐ ܓ̰ܵܪܹܐ ܒܩܲܝܛܵܐ ܘܒܣܸܬܘܵܐ. ܡܲܒܘܼܥܹ̈ܐ ܥܸܠܵܝܹ̈ܐ ܗܸܟ̃ ܠܹܐ ܒܵܨܪܝܼ: ܘܗܵܘܹܐ ܚܩܝܼܪܵܐ ܫܸܡܵܐ ܕܡܵܪܝܵܐ: ܐܘܼܦ ܥܲܝܢܵܬܹ̈ܐ ܕܠܐܸܠܬܸܚ ܠܹܐ ܫܵܒ̣ܸܩ ܕܒܵܪܙܝܼ. ܫܵܩܝܼܬܵܐ ܕܟܲܪܝܲܬ ܒܪܝܼܙ ܠܵܗ̇: ܐܝܼܢܵܐ ܐܲܠܵܗܵܐ ܕܐܹܠܝܼܵܐ ܗܲܪ ܗ̇ܘ ܐܲܠܵܗܵܐ ܬܲܓܒܸܪܵܢܵܐ ܕܣܢܝܼܩܹ̈ܐ ܝܗ݉ܘܵܐ. ܐܝܼܘܿܒ̣ ܐ݉ܡܝܼܪܹܗ ܕܐܲܚܘܿܢܘܵܬܘܼ̈ܗܝ ܐܲܝܟ̣ ܫܵܩܝܼܵܬܹ̈ܐ ܥܵܠܕܝܼܵܢܹ̈ܐ ܝܗ݉ܘܵܘ: ܐܝܼܢܵܐ ܐܲܠܵܗܘܼܗܝ ܩܵܬܘܼܗܝ ܚܲܕ݉ ܢܲܗܪܵܐ ܫܵܦܟ̣ܵܢܵܐ ܕܝܲܗܒ̣ܵܠܬܵܐ ܕܠܸܒܵܐ ܝܗ݉ܘܵܐ. ܒܢܝܼܠܘܿܣ ܡܘܼܬܸܒ̣ܬܵܐ ܝܠܵܗ̇ ܟܠܵܗ̇ ܗܹܒ̣ܝܼ ܕܡܸܨܪܹܝܢ: ܐܝܼܢܵܐ ܐܘܼܦ ܡ̈ܝܼܵܐ ܕܗ̇ܘ ܫܲܚܠܸܦܵܢܹ̈ܐ ܝܢܵܐ: ܡܵܪܝܵܐ ܠܵܐ ܡܸܫܬܲܚܠܦܵܢܵܐ ܝܠܹܗ ܠܐܵܒܵܕ. ܒܡܲܚܕܲܪܬܵܐ ܕܐܘܼܪܚܵܐ ܕܢܲܗܪܵܐ ܕܦܪܵܬ: ܟܘܿܪܸܫ ܫܩܝܼܠܵܐ ܠܹܗ ܡܕܝܼܢ݉ܬܵܐ ܕܒܵܒ̣ܸܠ: ܐܝܼܢܵܐ ܗܸܟ̃ ܚܲܝܠܵܐ ܠܲܝܬ: ܠܵܐ ܡ̣ܢ ܣܵܛܵܢܵܐ ܘܠܵܐ ܡ̣ܢ ܒܲܪܢܵܫܵܐ ܕܡܵܨܹܐ ܠܫܲܚܠܘܼܦܘܼܗ̇ ܐܘܼܪܚܵܐ ܕܫܵܦܵܩܲܬ ܐܲܠܵܗܵܝܬܵܐ. ܫܵܘܦܵܦܹ̈ܐ ܕܢܲܗܖ̈ܵܘܵܬܹܐ ܩܵܕܝܼܡܝܼ ܐܵܕܝܼܵܐ ܦܝܵܫܵܐ ܝܢܵܐ ܡܘܼܫ݉ܟ̰ܚܹܐ ܒܵܖ̈ܘܿܙܹܐ ܘܡܘܼܫܲܡܝܼܪ: ܐܝܼܢܵܐ ܐܵܢܝܼ ܢܲܗܖ̈ܵܘܵܬܹܐ ܕܟܹܐ ܩܵܝܡܝܼ ܡ̣ܢ ܛܘܼܖ̈ܵܢܹܐ ܕܡܲܠܟܘܼܬܵܐ ܕܐܲܠܵܗܵܐ ܘܕܚܘܼܒܵܐ ܒܹܐ ܩܲܝܵܣ ܗܲܡܵܫܵܐ ܒܸܬ ܗܵܘܝܼ ܫܵܦܟ̣ܵܢܹ̈ܐ. ܕܵܘܖܹ̈ܐ ܒܸܦܫܵܪܵܐ ܝܢܵܐ ܘܒܹܐܙܵܠܵܐ: ܘܐܘܼܪܚܵܐ ܕܫܵܦܵܩܲܬ ܠܹܐ ܒܵܛܠܵܐ. ܛܘܼܒ̣ܵܐ ܐܸܠܵܟ̣ܝ: ܓܵܢܝܼ: ܕܦܝܵܫܵܐ ܝܘܲܬܝ ܬܘܼܓܒܸܪܬܵܐ ܥܲܠ ܫܵܩܝܼܵܬܹ̈ܐ ܕܡ̈ܝܼܵܐ ܢܝܼܚܹ̈ܐ! ܗܸܟ̃ ܠܵܐ ܐܵܙܲܠ݉ܬܝ ܠܢܲܗܖ̈ܵܘܵܬܹܐ ܐ݉ܚܸܖ̈݉ܢܹܐ: ܠܵܐ ܗ݉ܘܹܐ ܕܫܲܡܥܲܬܝ ܡܲܢܟ̣ܲܣܬܵܐ ܕܡܵܪܝܵܐ: ܘܐܵܕܝܼܵܐ ܡܵܐܠܵܟ̣ܝ ܒܐܘܼܪܚܵܐ ܕܡܸܨܪܹܝܢ: ܠܸܫܬܵܝܵܐ ܡ̣ܢ ܢܲܗܪܘܼܗ̇ ܫܸܚܬܵܢܵܐ؟