ܬܡܘܙ 13
ܘܐ݉ܡܝܪܗ ܐܠܗܐ ܠܝܘܢܢ: ܨܦܝܝ ܝܠܗ̇ ܕܒܚܝܡܐ ܝܠܗ̇ ܐܠܘܟ̣؟ (ܝܘܢܢ ܕ: 9)
ܟܲܪܒܵܐ ܗܲܡܵܫܵܐ ܠܹܐ ܝܠܵܗ̇ ܚܛܝܼܬܵܐ: ܐܝܼܢܵܐ ܐܝܼܬ ܠܵܗ̇ ܡܵܝܠ ܠܸܙܝܵܕܵܐ ܙܵܘܕܵܐ ܡ̣ܢ ܠܵܙܸܡ: ܒܘܼܬ ܐܵܗܵܐ ܘܵܓ̰ܸܒ ܝܼܠܵܗ̇ ܕܗܵܘܲܚ ܗܸܫܝܵܪ ܕܟܠ ܥܕܵܢܵܐ ܕܟܲܪܒܵܐ ܒܸܩܝܵܡܵܐ ܝܠܵܗ̇ ܓܵܘ ܠܸܒܲܢ: ܒܲܩܪܲܚ ܒܘܼܬ ܬܵܗܵܪܘܼܗ̇ ــ ܨܦܵܝܝܼ ܝܠܵܗ̇ ܕܒܸܚܝܵܡܵܐ ܝܠܵܗ̇ ܐܸܠܘܼܟ̣؟ ܒܲܠܟܵܐ ܡܵܨܲܚ ܠܓ̰ܲܘܘܼܒܹܐ: ܗܹܐ. ܪܵܒܵܐ ܓܵܗܹ̈ܐ ܟܲܪܒܵܐ ܫܹܐܕܵܢܬܵܐ ܝܠܵܗ̇: ܐܝܼܢܵܐ ܪܵܒܵܐ ܓܵܗܹ̈ܐ ܐܲܝܟ̣ ܢܘܼܪܵܐ ܕܐܹܠܝܼܵܐ ܝܠܵܗ̇: ܕܟܹܐ ܐܵܬܹܐ ܡ̣ܢ ܫܡܲܝܵܐ. ܨܦܵܝܝܼ ܝܠܵܗ̇ ܕܚܵܝܡܵܐ ܐܸܠܲܢ ܒܘܼܬ ܚܛܝܼܬܵܐ: ܣܵܒܵܒ ܚܛܝܼܬܵܐ ܕܲܪܩܘܼܒ̣ܠ ܝܼܠܵܐ ܠܐܲܠܵܗܲܢ ܛܵܒ̣ܵܐ. ܐܘܼܦ ܨܦܵܝܝܼ ܝܠܵܗ̇ ܕܟܵܪܒܲܚ ܥܲܠ ܓܵܢܲܢ ܣܵܒܵܒ ܥܲܪܩܘܼܠܹܐ ܝܘܲܚ ܒܢܲܙܵܢܘܼܬܵܐ ܡ̣ܢ ܒܵܬ݉ܪ ܚܲܕ݉ ܐܘܼܚܟ̰ܵܐ ܡܵܠܲܦܝܵܬܹ̈ܐ ܕܡ̣ܢ ܐܲܠܵܗܵܐ. ܗܵܕܵܐ ܐܘܼܦ ܥܲܠ ܐ݉ܚܹܖ̈݉ܢܹܐ: ܟܲܕ ܟܲܪܒܲܢ ܐܲܚܟ̰ܝܼ ܦܝܵܫܵܐ ܝܠܵܗ̇ ܡܘܼܪܥܸܫܬܵܐ ܒܗ̇ܝ ܒܝܼܫܬܵܐ ܕܐܵܢܝܼ ܒܹܥܒ̣ܵܕܵܐ ܝܢܵܐ. ܗ̇ܘ ܕܠܵܐ ܟܵܪܸܒ ܡ̣ܢ ܥܵܘܠܵܐ: ܫܲܪܝܼܟܵܐ ܝܠܹܗ ܒܝܼܘܼܗܝ. ܚܛܝܼܬܵܐ ܛܲܡܹܐܐ ܘܟ̰ܲܦܵܠ ܝܼܠܵܗ̇: ܘܚܲܕ݉ ܠܸܒܵܐ ܚܘܼܕܸܬܵܐ ܠܹܐ ܡܵܨܹܐ ܠܸܚܡܵܠܵܐ ܒܝܼܘܼܗ̇. ܐܲܠܵܗܵܐ ܒܓܵܢܘܼܗܝ ܟܪܝܼܒܵܐ ܝܠܹܗ ܡ̣ܢ ܒܝܼܫܹ̈ܐ ܟܠ ܝܘܿܡ: ܘܓܵܘ ܗܸܡܸܙܡܵܢܘܼ̈ܗܝ ܒܸܩܪܵܝܵܐ ܝܘܲܚ: ܝܵܐ ܡܲܚܸܒܵܢܹ̈ܐ ܕܡܵܪܝܵܐ: ܣܢܹܝܡܘܿܢ ܠܒܝܼܫܬܵܐ.
ܐܝܼܢܵܐ ܪܵܒܵܐ ܙܵܘܕܵܐ ܘܵܓ̰ܸܒ ܝܼܠܵܗ̇ ܕܗܵܘܲܚ ܗܸܫܝܵܪ ܠܵܐ ܗ݉ܘܹܐ ܕܟܲܪܒܲܢ ܗܵܘܝܵܐ ܠܵܐ ܐܲܚܟ̰ܝܼ ܒܹܐ ܡܲܣܪܵܦ: ܐܸܠܵܐ ܐܘܼܦ ܢܵܐܗܲܩ: ܘܗ̇ܝܓܵܗ ܘܵܓ̰ܸܒ ܝܼܠܵܗ̇ ܕܓ̰ܲܘܸܒܲܚ ܠܒܵܩܲܪܬܵܐ: ܠܵܐ. ܡܘܼܕܝܼ ܠܵܙܸܡ ܗܵܘܲܚ ܒܸܟܪܵܒܵܐ ܥܲܠ ܝܵܠܹ̈ܐ ܙܥܘܿܖܹ̈ܐ: ܝܲܢ ܥܲܠ ܖܹ̈ܓܵܘܵܬܹܐ: ܘܕܟܵܪܒܲܚ ܡ̣ܢ ܚܲܒ̣ܖ̈ܵܘܵܬܲܢ؟ ܗܲܕܟ̣ܵܐ ܟܲܪܒܵܐ ܡܵܪܹܐ ܚܸܩܪܵܐ ܝܠܵܗ̇ ܩܵܐ ܬܵܘܕܝܼܬܲܢ ܟܪܸܣܛܝܵܢܵܝܬܵܐ؟ ܝܲܡ ܡܵܝܬ݉ܝܵܢܬܵܐ ܕܐܝܼܩܵܪܵܐ ܝܠܵܗ̇ ܠܫܸܡܵܐ ܕܐܲܠܵܗܵܐ؟ ܠܹܐ ܝܠܹܗ ܐܵܗܵܐ ܠܸܒܵܐ ܥܲܬܝܼܩܵܐ ܘܒܝܼܫܵܐ: ܒܸܒܥܵܝܵܐ ܠܸܩܢܵܝܵܐ ܗܘܼܟܡܵܐ؟ ܘܠܹܐ ܝܠܵܗ̇ ܘܵܓ̰ܸܒ ܕܩܵܝܡܲܚ ܕܲܪܩܘܼܒ̣ܠܘܼܗܝ ܒܟܠܵܗ̇ ܙܲܪܒ ܕܟܝܵܢܲܢ ܚܵܕ݉ܬܵܐ؟ ܪܵܒܵܐ ܡܵܘܕܝܼܵܢܹ̈ܐ ܟܹܐ ܗܵܘܝܼ ܙܲܒܛ ܠܟܲܪܒܵܐ ܐܲܝܟ̣ ܐܸܢ ܠܲܝܬ ܗ݉ܘܵܐ ܦܵܝܕܵܐ ܠܸܟܠܵܝܵܐ ܠܕܲܪܩܘܼܒ̣ܠ: ܐܝܼܢܵܐ ܫܒ̣ܘܿܩ ܕܕܵܟ̣ܸܪ ܗܲܡܸܢܵܢܵܐ: ܕܐܸܢ ܒܵܥܹܐ ܡܵܛܹܐ ܠܒܸܢܦܵܪ ܕܚܸܩܪܵܐ: ܘܵܓ̰ܸܒ ܝܼܠܵܗ̇ ܕܒܟܠ ܡܸܢܕܝܼ ܗܵܘܹܐ ܓ̣ܵܠܒܵܢܵܐ. ܐܸܢ ܠܲܝܬ ܠܲܢ ܗܘܼܟܡܵܐ ܥܲܠ ܙܵܘ̈ܥܲܢ: ܒܲܣ ܫܵܦܵܩܲܬ ܡܘܼܕܝܼ ܥܒ̣ܝܼܕܬܵܐ ܝܠܵܗ̇ ܩܵܬܲܢ؟ ܓܵܪܵܓ ܠܵܐ ܕܵܒ̣ܩܲܚ ܡܵܗܵܢܵܐ ܩܵܐ ܚܛܝܼܬܵܐ: ܐܝܼܢܵܐ ܪܵܚܛܲܚ ܠܟܸܣ ܙܩܝܼܦܵܐ: ܘܦܲܪܦܸܠܲܚ ܒܐܲܠܵܗܵܐ ܕܙܵܩܸܦ ܠܙܵܘ̈ܥܲܢ ܕܟܲܪܒܵܐ: ܘܚܲܕܸܬ ܠܲܢ ܒܢܝܼܚܘܼܬܵܐ ܘܒܡܲܟܝܼܟ̣ܘܼܬܵܐ: ܒܕܵܡܵܝܬܵܐ ܕܓܵܢܘܼܗܝ.