ܬܡܘܙ 15

ܢܘܪܐ ܒܕܝܡܘܬܐ ܗܘܐ ܒܩܝܕܐ ܥܠ ܡܕܒܚܐ: ܠܐ ܦܐܫ ܡܘܟ̰ܡܝܐ (ܟܗܢ̈ܐ ܘ: 13)

ܡܲܕܒܚܘܼܟ̣ ܕܨܠܘܿܬܵܐ ܠܚܘܿܕܵܝܬܵܐ ܕܵܝܸܡ ܫܒ̣ܘܿܩ ܕܗܵܘܹܐ ܒܸܠܗܵܝܵܐ: ܐܵܗܵܐ ܝܠܵܗ̇ ܚܲܝܘܼܬܵܐ ܕܟܠܵܗ̇ ܕܸܚܠܲܬ ܐܲܠܵܗܵܐ. ܡܲܕܒܚܹ̈ܐ ܕܒܹܝܬ ܩܘܼܕܫܵܐ ܘܟܸܠܦܲܬ ܡ̣ܢ ܨܠܘܿܬܵܐ ܟܹܐ ܫܵܩܠܝܼ ܢܘܼܪܵܐ: ܒܘܼܬ ܐܵܗܵܐ ܫܒ̣ܘܿܩ ܠܵܐ ܟ̰ܲܡܝܼ ܒܗܸܟ̃ ܥܕܵܢܵܐ. ܣܓ̣ܵܕܬܵܐ ܕܒܛܸܫܘܵܐ ܝܠܵܗ̇ ܓ̰ܲܘܗܵܪ ܘܣܵܒܸܬܘܼܬܵܐ ܘܟܝܼܘܼܠܵܐ ܕܬܵܘܕܝܼܬܵܢܵܝܬܵܐ ܚܵܝܬܵܐ. ܠܲܐܟ̣ܵܐ ܡܲܩܸܕ ܬܲܪܒܵܐ ܕܕܸܒ̣ܚܘܼ̈ܟ̣. ܐܸܢ ܡܘܼܡܟܸܢ ܝܼܠܵܗ̇: ܙܲܒ̣ܢܹ̈ܐ ܕܟܘܼܚܬܘܼܟ̣ ܥܒ̣ܘܿܕ ܠܗ݉ܘܿܢ ܒܲܪܩܵܪܵܪ: ܘܥܵܡܘܿܖܹ̈ܐ: ܘܠܵܐ ܫܵܒ̣ܩܸܬ ܕܦܵܝܫܝܼ ܫܓ̣ܝܼܫܹܐ ܒܡܸܢܕܝܼܵܢܹ̈ܐ ܒܲܖ̈ܵܝܹܐ. ܓܘܼܪܵܐ ܝܠܹܗ ܚܲܝܠܵܐ ܕܨܠܘܿܬܵܐ ܗ̇ܝ ܕܙܲܕܝܼܩܵܐ ܨܲܠܹܐ ܠܵܗ̇ . ܠܲܝܬ ܚܲܕ݉ ܡܸܢܕܝܼ ܕܨܲܠܹܝܬ ܨܠܘܿܬܵܐ ܒܘܼܬ ܕܝܼܘܼܗܝ؟ ܨܲܠܝܼ ܒܘܼܬ ܥܹܕܬܵܐ: ܒܘܼܬ ܚܸܠܡܲܬܟܵܖ̈ܘܼܗ̇: ܒܘܼܬ ܓܵܢܵܐ ܕܓܵܢܘܼܟ̣: ܒܘܼܬ ܝܵܠܘܼ̈ܟ̣: ܚܸܙܡܘܼ̈ܟ̣: ܫܒ̣ܵܒ̣ܘܼ̈ܟ̣: ܐܲܬܪܘܼܟ̣: ܘܒܘܼܬ ܫܘܼܠܵܐ ܕܐܲܠܵܗܵܐ ܓܵܘ ܟܠܵܗ̇ ܕܘܼܢܝܹܐ. ܨܦܵܝܝܼ ܝܠܵܗ̇ ܕܨܲܚܨܲܚ ܓܵܢܲܢ ܒܐܵܗܵܐ ܡܸܢܕܝܼ ܓܘܼܪܵܐ. ܝܵܐ ܪܲܒ ܟܹܐ ܐܵܙܲܠ݉ܚ ܠܨܠܘܿܬܵܐ ܒܦܲܫܘܼܥܘܼܬܵܐ؟ ܢܘܼܪܵܐ ܕܣܓ̣ܵܕܬܵܐ ܚܘܼ ܠܹܐ ܝܠܹܗ ܢܝܼܚܵܐ ܒܢܝܼܚܵܐ ܬܲܢܬܘܼܢܹܐ ܓܵܘ ܠܸܒܵܘܵܬ̈ܲܢ؟ ܓܝܼܓ̣ܠܹ̈ܐ ܕܟܵܠܸܣܟܲܢ ܚܘܼ ܠܹܐ ܝܢܵܐ ܒܬܲܢܒܵܠܘܼܬܵܐ ܒܸܚܕܵܪܵܐ؟ ܐܸܢ ܗܲܕܟ̣ܵܐ ܝܠܵܗ̇: ܫܒ̣ܘܿܩ ܗܵܘܲܚ ܗܸܫܝܵܪ ܡ̣ܢ ܐܵܗܵܐ ܚܪܵܒ̣ܵܐ. ܐܵܙܲܠ݉ܚ ܒܢܵܘܢܵܝܬܵܐ ܘܛܵܠܒܲܚ ܪܘܼܚܵܐ ܕܫܵܦܵܩܲܬ ܘܕܦܲܪܦܲܠܬܵܐ. ܦܵܪܫܲܚ ܥܕܵܢܵܬܹ̈ܐ ܥܲܠܗܲܕܵܐ ܩܵܐ ܨܠܘܿܬܵܐ ܥܲܠܗܲܕܵܐ: ܣܵܒܵܒ ܐܸܢ ܐܵܗܵܐ ܢܘܼܪܵܐ ܦܵܐܸܫ ܚܢܝܼܩܵܐ ܬܚܘܿܬ ܩܸܛܡܵܐ ܕܬܒܵܥܬܵܐ ܠܥܵܠܡܵܐ: ܢܘܼܪܵܐ ܕܡܲܕܒܚܵܐ ܕܟܸܠܦܲܬ ܙܹܐ ܒܸܬ ܟ̰ܲܡܹܐ ܘܚܲܝܠܲܢ ܒܸܬ ܒܵܨܸܪ ܗܲܡ ܓܵܘ ܥܹܕܬܵܐ ܘܗܲܡ ܓܵܘ ܥܵܠܡܵܐ.

ܓ̰ܲܪܓܵܐ ܒܸܠܚܵܡܵܐ ܝܠܹܗ ܐܘܼܦ ܩܵܐ ܡܲܕܒܚܵܐ ܕܠܸܒܵܐ. ܠܸܒܵܐ ܡܸܓ̰ܸܕ ܚܲܕ݉ ܡܲܕܒܚܵܐ ܕܲܗܒ̣ܵܢܵܝܵܐ ܝܠܹܗ. ܐܲܠܵܗܵܐ ܟܹܐ ܡܲܚܸܒ ܠܸܚܙܵܝܵܐ ܠܸܒܵܘܵܬܹ̈ܐ ܕܛܵܝܸܦܘܼܗܝ ܒܸܠܗܵܝܵܐ ܠܟܸܣܠܘܼܗܝ. ܝܲܗܒ̣ܲܚ ܠܸܒܵܘܵܬ̈ܲܢ ܩܵܐ ܡܵܪܝܵܐ ܟܲܕ ܒܸܩܝܵܕܵܐ ܒܠܵܗܵܐ ܕܚܘܼܒܵܐ: ܘܛܵܠܒܲܚ ܫܵܦܵܩܲܬ ܡܸܢܘܼܗܝ ܕܠܵܗܵܝ ܒܗܸܟ̃ ܥܕܵܢܵܐ ܠܵܐ ܦܵܐܸܫ ܡܘܼܟ̰ܡܝܼܵܐ: ܣܵܒܵܒ ܗܲܪ ܒܸܬ ܟ̰ܲܡܹܐ ܐܸܢ ܐܲܠܵܗܵܐ ܠܵܐ ܚܵܡܹܐ ܠܹܗ ܒܸܠܗܵܝܵܐ. ܪܵܒܵܐ ܕܸܫ̃ܡܸܢܹ̈ܐ ܒܸܬ ܓ̰ܲܪܒܝܼ ܠܡܲܟ̰ܡܘܼܝܘܼܗܝ: ܐܝܼܢܵܐ ܐܲܚܢܲܢ ܡܲܦܠܸܚܲܚ ܟܠܵܝ ܣܵܒܵܒܹ̈ܐ ܕܫܵܦܵܩܲܬ ܩܵܐ ܡܲܠܗܵܝܬܘܼܗܝ: ܘܐܸܠܵܐܟܹܐ ܗܵܘܲܚ ܒܸܚܕܵܪܵܐ ܪܵܒܵܐ ܥܲܡ ܝܑܼܫܘܿܥ.