ܬܡܘܙ 2

ܒܝܘܗܝ ܒܬ ܚܕܐ ܠܒܢ (ܡܙܡܘܪܐ ܠܓ: 21)

ܒܪܝܼܟ̣ܬܵܐ ܝܠܵܗ̇ ܐܵܗܵܐ ܣܲܪܲܣܬܘܼܬܵܐ: ܕܟܖܸ̈ܣܛܝܵܢܹܐ ܐܘܼܦ ܓܵܘ ܝܲܠܨܘܝ ܟ̰ܸܡ ܥܵܡܘܿܩܬܵܐ ܟܹܐ ܡܵܨܝܼ ܠܸܚܕܵܝܵܐ. ܐܵܦܸܢ ܕܐܘܼܠܨܵܢܹ̈ܐ ܚܲܪܕܝܼ ܠܗ݉ܘܿܢ: ܟܹܐ ܙܵܡܪܝܼ ܘܐܲܝܟ̣ ܚܲܕ݉ܟܡܵܐ ܛܲܝܖܹ̈ܐ: ܓܵܘ ܩܲܦܵܣ ܗܵܠܵܐ ܒܘܼܫ ܨܦܵܝܝܼ ܟܹܐ ܙܵܡܪܝܼ. ܠܲܦܹ̈ܐ ܟܹܐ ܗܵܘܝܵܐ ܕܡܲܛܒܸܥܝܼ ܠܗ݉ܘܿܢ ܩܵܐ ܚܲܕ݉ܟ̰ܵܐ ܥܕܵܢܵܐ: ܐܝܼܢܵܐ ܓ̰ܲܠܕܹܐ ܟܹܐ ܦܵܠܛܝܼ ܠܦܵܬܵܐ ܡܸܢ݉ܕܪܸܫ݉: ܘܚܵܙܝܼ ܒܲܗܪܵܐ ܕܦܵܬܵܐ ܕܐܲܠܵܗܵܐ. ܐܝܼܬ ܠܗ݉ܘܿܢ ܚܕܵܐ ܩܵܠܘܿܠܘܼܬܵܐ ܕܟܹܐ ܚܵܡܝܵܐ ܖܹ̈ܫܵܝ ܗܲܡܵܫܵܐ ܠܥܸܠܸܠ ܡ̣ܢ ܡ̈ܝܼܵܐ: ܘܕܟܹܐ ܗܲܝܸܪܵܐ ܠܗ݉ܘܿܢ ܠܸܙܡܵܪܵܐ ܓܵܘ ܒܹܝܦܲܠܓܵܐ ܕܒܘܼܪܵܢ: ܕܗܸܫ ܥܲܡܵܝ ܝܠܹܗ ܐܲܠܵܗܵܐ. ܠܡܵܢܝܼ ܗܵܘܹܐ ܐܝܼܩܵܪܵܐ؟ ܠܡܫܝܼܚܵܐ: ܗܹܐ: ܟܠܵܗ̇ ܐܵܗܵܐ ܡ̣ܢ ܡܫܝܼܚܵܐ ܝܠܵܗ̇. ܙܲܗܡܲܬ ܗܲܡܵܫܵܐ ܠܹܐ ܡܲܝܬ݉ܝܵܐ ܝܲܗܒ̣ܵܠܬܵܐ ܕܠܸܒܵܐ ܥܲܡܘܼܗ̇ ܩܵܐ ܗܲܡܸܢܵܢܵܐ: ܐܝܼܢܵܐ ܗܸܙܘܼܪ ܕܒܪܘܿܢܹܗ ܕܐܲܠܵܗܵܐ ܒܸܚܕܵܪܵܐ ܥܲܡܘܼܗܝ ܓܵܘ ܐܲܬܘܼܢܵܐ ܕܢܘܼܪܵܐ   ܒܸܡܠܵܝܘܼܗܝ ܝܠܵܗ̇ ܠܸܒܘܼܗܝ ܡ̣ܢ ܚܵܕܘܼܬܵܐ. ܗ̇ܘ ܡܪܝܼܥܵܐ ܝܠܹܗ ܘܥܘܼܓ̰ܸܙܵܐ: ܡܫܝܼܚܵܐ ܟܹܐ ܣܲܚܒܸܪܹܗ ܘܥܵܒ̣ܸܕ ܪܵܗܲܬ ܫܘܝܼܬܵܐ ܕܡܲܪܥܘܼܗܝ. ܒܸܡܝܵܬܵܐ ܝܠܹܗ: ܡ̈ܝܼܵܐ ܡܘܼܓܕܸܠܹ̈ܐ ܕܝܘܿܪܕܢܵܢ ܒܸܓ̰ܡܵܥܵܐ ܝܢܵܐ ܠܸܚܢܵܩܘܼܗܝ: ܐܝܼܢܵܐ ܡܫܝܼܚܵܐ ܟܹܐ ܚܵܦܸܩ ܠܹܗ ܓܵܘ ܚܦܵܩܘܼܗܝ ܘܐܵܡܸܪ: ܠܵܐ ܙܵܕܥܸܬ: ܣܵܘܓܘܿܠܝܼ: ܠܸܡܝܵܬܵܐ ܒܘܼܪܟܬܵܐ ܝܠܵܗ̇: ܡ̈ܝܼܵܐ ܕܡܵܘܬܵܐ ܡ̣ܢ ܖ̈ܘܼܡܝܵܬܹܐ ܕܦܲܪܕܲܝܣܵܐ ܒܸܓ̰ܪܵܝܵܐ ܝܢܵܐ. ܠܹܐ ܝܢܵܐ ܡܲܝܖܹ̈ܐ: ܐܸܠܵܐ ܚܸܠܝܹܐ ܐܲܝܟ̣ ܕܸܒ̣ܫܵܐ: ܣܵܒܵܒ ܕܡ̣ܢ ܬܪܘܿܢܘܿܣ ܕܐܲܠܵܗܵܐ ܒܸܦܠܵܛܵܐ ܝܢܵܐ. ܟܲܕ ܡܗܘܼܡܢܵܐ ܫܵܢܝܵܢܵܐ ܒܹܥܒ̣ܵܪܵܐ ܝܠܹܗ ܠܢܲܗܪܵܐ: ܘܠܲܦܹ̈ܐ ܒܸܓ̰ܡܵܥܵܐ ܝܢܵܐ ܠܚܵܕܸܖ̈ܘܵܢܘܼܗܝ: ܠܸܒܵܐ ܘܦܲܓ̣ܪܵܐ ܒܸܢܦܵܠܵܐ ܝܢܵܐ ܗܲܪ ܗ̇ܘ ܩܵܠܵܐ ܟܹܐ ܙܲܢܓܸܪ ܓܵܘ ܢܵܬܘܼܗܝ: ܠܵܐ ܙܵܕܥܸܬ: ܣܵܒܵܒ ܥܲܡܘܼܟ̣ ܝܼܘܸܢ ܐܵܢܵܐ: ܣܵܒܵܒ ܐܵܢܵܐ ܝܘܸܢ ܐܲܠܵܗܘܼܟ̣. ܟܲܕ ܩܲܪܒܘܼܢܵܐ ܝܠܹܗ ܠܬܸܚܘܼܒ ܕܐܲܬܪܵܐ ܠܵܐ ܝܕܝܼܥܵܐ: ܚܲܕ݉ܟ̰ܵܐ ܦܵܝܫܵܐ ܒܸܙܕܵܥܵܐ ܠܹܥܒ̣ܵܪܵܐ ܡܓܵܐ ܡܲܠܟܘܼܬܵܐ ܕܛܸܠܵܢܝܼܬܵܐ ܕܡܵܘܬܵܐ: ܡܫܝܼܚܵܐ ܟܹܐ ܦܲܬܦܸܬ ܓܵܘ ܢܵܬܘܼܗܝ: ܣܵܒܵܒ ܪܸܙܵܝܵܐ ܛܵܒ̣ܵܐ ܕܒܵܒܘܼܟ̣ ܝܼܠܹܗ ܕܝܲܗܒ̣ܸܠ ܩܵܬܘܼܟ̣ ܡܲܠܟܘܼܬܵܐ. ܟܲܕ ܗܲܡܸܢܵܢܵܐ ܒܐܵܗܵܐ ܬܵܗܵܪ ܦܝܼܫܵܐ ܝܠܹܗ ܚܘܼܠܸܢܵܐܘܝܘܼܗܒ̣ܵܐ ܠܸܒܵܐ: ܠܹܐ ܙܵܕܸܥ ܡ̣ܢ ܡܵܘܬܵܐ: ܘܐܘܼܦ ܡܘܼܫܬܵܪܝܼ ܝܠܹܗ ܠܫܲܢܘܿܝܹܐ: ܣܵܒܵܒ ܗܵܐ ܡ̣ܢ ܕܚܸܙܝܘܼܗܝ ܝܠܹܗ ܡܫܝܼܚܵܐ ܐܲܝܟ̣ ܟܵܘܟ̣ܒ̣ܵܐ ܕܡܵܘܪܹܫܵܐ: ܫܲܗܘܘܼܬܹܐ ܝܠܹܗ ܕܚܵܙܹܐ ܠܹܗ ܙܹܐ ܐܲܝܟ̣ ܫܸܡܫܵܐ ܕܟܵܘܸܬܪܵܐ: ܒܲܗܪܘܼܢܹܐ ܒܟܠܹܗ ܠܵܘܓ̰ܹܗ.