ܬܡܘܙ 21
ܒܬ݉ܪܘܟ̣ ܪܫܐ ܡܘܫܥܫ ܠܗ̇ ܒܪܬܐ ܕܐܘܪܫܠܡ (ܐܫܥܝܐ ܠܙ: 22)
ܒܢܲܝ̈ ܡܕܝܼܢ݉ܬܵܐ ܕܨܸܗܝܘܿܢ ܡܸܣܟܹܢܹ̈ܐ ܘܙܲܒܘܿܢܹ̈ܐ ܩܘܼܒܸܠ ܠܗ݉ܘܿܢ ܓ̰ܘܼܪܐܲܬ ܘܡܲܪܕܘܼܬܵܐ ܡ̣ܢ ܚܲܒܪܵܐ ܕܡܵܪܝܵܐ ܘܡܘܼܫܥܸܫ ܠܗ݉ܘܿܢ ܪܹܫܵܐ ܥܲܠ ܓܸܙܡܹ̈ܐ ܕܣܲܢܚܹܪܸܒ̣. ܗܲܝܡܵܢܘܼܬܵܐ ܩܘܝܼܬܵܐ ܟܹܐ ܡܲܡܨܝܼܵܐ ܠܒܢܘܿܢܹ̈ܐ ܕܐܲܠܵܗܵܐ ܠܸܚܝܵܪܵܐ ܕܠܵܐ ܙܕܘܼܥܬܵܐ ܘܒܪܘܼܚܵܐ ܕܓ̣ܵܠܸܒܘܼܬܵܐ ܥܲܠ ܕܸܫ̃ܡܸܢܵܝ̈ ܟ̰ܸܡ ܓܘܼܖܹ̈ܐ. ܟܹܐ ܝܲܕܥܲܚ ܕܕܸܫ̃ܡܸܢ̈ܲܢ ܓ̰ܲܪܘܿܒܹܐ ܝܢܵܐ ܠܹܥܒ̣ܵܕܵܐ ܡܸܢܕܝܼܵܢܹ̈ܐ ܒܹܐ ܡܘܼܡܟܸܢ. ܒܸܒܥܵܝܵܐ ܝܢܵܐ ܠܡܲܡܝܘܼܬܹܐ ܠܚܲܝܹ̈ܐ ܐܵܒܵܕܝܼܢܵܝܹ̈ܐ ܐܵܢܝܼ ܕܠܹܐ ܚܵܙܝܼ ܡܵܘܬܵܐ ܟܡܵܐ ܕܡܫܝܼܚܵܐ ܚܵܝܵܐ ܝܠܹܗ. ܒܵܥܝܼ ܠܸܬܠܵܚܵܐ ܠܗ̇ܝ ܩܲܠܥܵܐ ܕܕܲܖ̈ܘܵܙܹܐ ܕܫܝܘܿܠ ܠܹܐ ܡܵܨܝܼ ܙܲܪܒܸܢܝܼ ܠܵܗ̇. ܒܸܡܚܵܝܵܐ ܝܢܵܐ ܪܲܦܣܵܐ ܠܢܸܟܣܹ̈ܐ ܕܒܝܼܵܝ ܒܓܵܢܵܝ ܒܸܬ ܦܵܝܫܝܼ ܕܘܼܪܒܸܢܹܐ.
ܐܲܚܢܲܢ ܟܹܐ ܝܵܕܥܲܚ ܠܵܗ̇ ܙܲܒܘܼܢܘܼܬܵܝ. ܡܘܼܕܝܼ ܝܢܵܐ ܐܵܢܝܼ: ܡܵܓܵܪ ܐ݉ܢܵܫܹ̈ܐ ܕܐܲܝܟ̣ ܕܝܼܲܢ؟ ܘܡܘܼܕܝܼ ܝܠܹܗ ܒܲܪܢܵܫܵܐ ܡܵܓܵܪ ܬܸܘܸܠܥܵܐ؟ ܟܹܐ ܓܲܪܓܸܡܝܼ ܘܡܲܪܡܝܼ ܓܵܢܵܝ ܐܲܝܟ̣ ܠܲܦܹ̈ܐ ܕܝܵܡܵܐ: ܒܸܛܪܵܦܵܐ ܠܓܸܒܘܼܢܬܵܝ. ܐܝܼܡܵܐ ܕܡܵܪܝܵܐ ܩܵܝܸܡ: ܐܲܝܟ̣ ܬܸܒ̣ܢܵܐ ܒܸܬ ܦܵܝܫܝܼ ܟ̰ܘܼܡܟ̰ܸܡܹܐ ܡ̣ܢ ܦܵܘܚܵܐ: ܘܐܲܝܟ̣ ܟܘܼܠܵܫ ܒܸܬ ܦܵܝܫܝܼ ܡܘܼܩܕܹܐ. ܣܲܪܒܵܙ ܙܲܒܘܿܢ ܕܓܵܘ ܥܲܣܟܵܪ ܕܨܸܗܝܘܿܢ ܫܒ̣ܘܿܩ ܡܲܣܚܸܪ ܒܝܼܵܝ: ܣܵܒܵܒ ܠܲܝܬ ܠܗ݉ܘܿܢ ܡܨܵܝܬܵܐ ܒܗܸܟ̃ ܬܵܗܵܪ ܠܚܲܙܕܘܼܓܹܐ ܠܫܘܼܠܵܐ ܕܐܲܠܵܗܵܐ ܘܠܣܲܪܲܣܬܘܼܬܘܼܗܝ.
ܙܵܘܕܵܐ ܡ̣ܢ ܟܠ ܡܸܢܕܝܼ ܐ݉ܚܸܪ݉ܢܵܐ: ܒܹܥܕܵܥܵܐ ܝܘܲܚ ܕܥܸܠܵܝܵܐ ܥܲܡܲܢ ܝܼܠܹܗ: ܘܐܝܼܡܵܐ ܕܗ̇ܘ ܐܵܣܸܪ ܟ̰ܲܟܘ̈ܿܗܝ: ܐܲܝܟܵܐ ܝܢܵܐ ܕܸܫ̃ܡܸܢܘܼ̈ܗܝ؟ ܟܲܕ ܦܲܠܸܛ ܡ̣ܢ ܒܹܝܬ ܡܲܥܡܪܘܼܗܝ: ܒܸܬ ܦܵܠܫܝܼ ܦܹܚܵܖܹ̈ܐ ܕܟܘܼܙܵܟ̰ܝܼ ܥܲܡ ܒܵܪܝܵܢܵܝ؟ ܩܵܛܝܼܘܼܗܝ ܕܦܪܸܙܠܵܐ ܒܸܬ ܛܲܚܛܸܚ ܠܗ݉ܘܿܢ ܐܲܝܟ̣ ܡܵܐܢܵܐ ܕܟܘܼܙܵܟ̰ܝܼ: ܘܕܟ̣ܵܪܵܝ ܒܸܬ ܦܵܐܸܫ ܓܪܝܼܕܵܐ ܡܥܲܠ ܦܵܬܵܐ ܕܐܲܪܥܵܐ. ܒܲܣ ܡܲܩܘܸܚܲܚ ܒܚܵܕܘܼܬܵܐ: ܡܲܠܟܲܢ ܒܹܥܒ̣ܵܕܵܐ ܝܠܹܗ ܡܲܠܟܘܼܬܵܐ: ܘܕܸܫ̃ܡܸܢܘܼ̈ܗܝ ܒܸܬ ܦܵܝܫܝܼ ܟ̰ܘܼܡܟ̰ܸܡܹܐ ܐܲܝܟ̣ ܬܹܒ̣ܢܵܐ.
ܩܵܘܠܵܐ ܕܡܵܪܝܵܐ ܟܡܵܐ ܫܲܪܝܼܪܵܐ ܠܵܐ ܓܹܗܲܢܵܐ: ܐܘܼܦ ܠܵܐ ܐܲܪܥܵܐ
ܡܵܨܝܼ ܙܲܪܒܸܢܝܼ ܠܲܢ ܓܸܚܟܵܐ ܘܡܲܣܚܵܪܘܼܬܵܐ ܗ݉ܘܹܐ ܠܗ݉ܘܿܢ
ܡܵܪܝܵܐ ܥܲܡܲܢ: ܠܩܲܕ݉ܡܵܐ ܙܹܠ݉ܡܘܿܢ ܝܲܩܝܼܢ ܓ̣ܵܠܸܒܘܼܬܲܢ.