ܬܡܘܙ 22

ܘܒܬ ܛܠܒܢܟ̣ܝ ܩܬܝ ܒܣܪܣܬܘܬܐ (ܗܘܫܥ ܒ: 20)

ܝܑܼܫܘܿܥ ܡܫܝܼܚܵܐ ܙܘܼܘܸܓܵܐ ܝܠܹܗ ܥܲܡ ܛܵܝܸܦܘܼܗܝ ܒܛܵܠܵܒܘܼܬܵܐ. ܗ̇ܘ ܒܚܘܼܒܵܐ ܛܠܝܼܒܵܐ ܠܹܗ ܥܹܕܬܘܼܗܝ ܐܲܝܟ̣ ܚܕܵܐ ܒܬܘܼܠܬܵܐ ܕܟ̣ܝܼܬܵܐ ܪܵܒܵܐ ܥܕܵܢܵܐ ܡ̣ܢ ܩܲܕ݉ܡ ܕܢܦܝܼܠ ܠܵܗ̇ ܬܚܘܿܬ ܢܝܼܪܵܐ ܕܝܲܚܣܝܼܪܘܼܬܵܐ. ܡܸܠܝܵܐ ܡ̣ܢ ܡܲܚܲܒܬܵܐ ܚܲܝܡܬܵܐ ܐ݉ܟ̣ܝܼܠ ܠܹܗ ܓ̰ܵܦܵܐ ܐܲܝܟ̣ ܝܲܥܩܘܿܒ̣ ܩܵܐ ܪܵܚܹܝܠ ܗܲܠ ܕܢܸܩܕܘܼܗ̇ ܦܝܼܫ ܠܹܗ ܦܪܝܼܥܵܐ ܒܬܲܡܵܡܲܬܘܼܬܵܐ: ܘܐܵܕܝܼܵܐ ܟܲܕ ܡܘܼܫ݉ܟ̰ܚܘܼܗ̇ ܝܠܹܗ ܒܪܘܼܚܘܼܗܝ: ܘܥܒ̣ܝܼܕܘܼܗ̇ ܝܠܹܗ ܕܝܲܕܥܵܐ ܘܡܲܚܸܒܵܐ ܠܹܗ: ܒܸܣܦܵܪܵܐ ܝܠܹܗ ܠܗ̇ܝ ܣܵܥܲܬ ܒܪܝܼܟ̣ܬܵܐ ܕܙܲܘܲܓܬܵܝ ܦܵܝܫܵܐ ܚܬܝܼܡܬܵܐ ܒܐ݉ܟܸܠ݉ܪܵܡܫܵܐ ܕܚܠܘܿܠܵܐ ܕܦܹܐܪܵܐ. ܗܵܠܵܐ ܚܸܬܢܵܐ ܕܐܝܼܩܵܪܵܐ ܠܹܐ ܝܠܹܗ ܡܘܼܐܣܩܘܼܗ̇ ܡܘܼܟܡܸܠܬܵܐ ܘܗܘܼܕܸܪܬܵܐ ܠܫܡܲܝܵܐ. ܗܵܠܵܐ ܟ̰ܸܡ ܠܹܐ ܝܠܵܗ̇ ܫܘܼܪܝܼܬܵܐ ܠܩܲܒܘܿܠܹܐ ܐܝܼܩܵܪܵܐ ܘܚܵܕܘܼܬܵܐ ܐܲܝܟ̣ ܟܵܠܬܘܼܗܝ ܘܡܲܠܟܬܘܼܗܝ. ܐܵܕܝܼܵܐ ܗܵܠܵܐ ܚܵܕܘܿܪܬܵܐ ܝܠܵܗ̇ ܓܵܘ ܥܵܠܡܵܐ ܕܫ̃ܵܖܹ̈ܐ: ܫܵܪܝܵܢܬܵܐ ܓܵܘ ܡܲܫܟܵܢܹ̈ܐ ܕܩܹܕܵܪ: ܐܝܼܢܵܐ ܗܲܪ ܐܘܼܦ ܐܵܕܝܼܵܐ ܛܠܝܼܒܬܵܐ ܕܡܫܝܼܚܵܐ ܝܠܵܗ̇: ܡܘܼܚܸܒܬܵܐ ܩܵܐ ܠܸܒܘܼܗܝ: ܡܵܪܹܐ ܛܝܼܡܵܐ ܒܥܲܝܢܘܼ̈ܗܝ: ܩܝܼܪܬܵܐ ܥܲܠ ܠܲܚܬܵܐ ܕܐܝܼܕܘܼܗܝ: ܙܘܼܘܸܓܬܵܐ ܒܦܲܪܨܘܿܦܘܼܗܝ. ܓܵܘ ܕܘܼܢܝܹܐ ܡܲܦܠܘܼܚܵܐ ܝܠܹܗ ܩܵܬܘܼܗ̇ ܟܠܵܝ ܚܸܠܡܲܬܹ̈ܐ ܚܘܼܒܵܢܵܝܹ̈ܐ ܕܓܲܒ̣ܪܵܐ: ܒܸܡܠܵܝܵܐ ܝܠܹܗ ܠܣܢܝܼܩܘܼܝܵܬܘܼ̈ܗ̇ ܒܦܸܪܝܘܼܬܵܐ: ܒܸܦܪܵܥܵܐ ܝܠܹܗ ܟܠܵܝ ܕܲܝܢܘܼܗ̇: ܒܝܲܗܒ̣ܵܐ ܝܠܹܗ ܫܸܡܘܼܗܝ ܩܵܬܘܼܗ̇: ܘܫܲܪܘܼܟܘܼܗ̇ ܝܠܹܗ ܒܟܠܵܗ̇ ܕܵܘܸܠܬܘܼܗܝ. ܡܵܘܬܵܐ ܐܵܢܲܢܩܵܐܝܼܬ ܒܸܬ ܩܵܛܸܥ ܠܝܸܣܘܼܖܹ̈ܐ ܟ̰ܸܡ ܩܘܼܝܹ̈ܐ ܕܒܹܝܠ ܡܵܝܘܿܬܹ̈ܐ: ܐܝܼܢܵܐ ܠܹܐ ܡܵܨܹܐ ܠܸܩܛܵܥܘܼܗ̇ ܐܵܗܵܐ ܫܸܫܸܠܬܵܐ ܕܓܒ̣ܵܪܵܐ ܕܠܵܐ ܡܵܝܘܿܬܘܼܬܵܐ. ܓܵܘ ܫܡܲܝܵܐ ܠܹܐ ܓܵܒ̣ܪܝܼ: ܐܸܠܵܐ ܐܲܝܟ̣ ܡܲܠܲܐܟ̣ܹ̈ܐ ܕܐܲܠܵܗܵܐ ܝܢܵܐ: ܐܝܼܢܵܐ ܡܸܢ݉ܕܪܸܫ݉ ܐܝܼܬ ܐܵܗܵܐ ܚܲܕ݉ ܡܸܢܕܝܼ ܕܠܒ̣ܲܕܲܪ ܝܼܠܹܗ ܡ̣ܢ ܗ̇ܘ ܩܵܢܘܿܢܵܐ: ܝܲܥܢܹܐ ܕܓܵܘ ܫܡܲܝܵܐ ܡܫܝܼܚܵܐ ܘܥܹܕܬܘܼܗܝ ܒܸܬ ܦܵܝܫܝܼ ܙܘܼܘܸܓܹܐ ܒܓܒ̣ܵܪܵܐ. ܐܵܗܵܐ ܙܲܘܲܓܬܵܐ: ܟ̰ܘܼܢܟܹܐ ܕܒܘܼܫ ܦܵܝܫܵܢܬܵܐ ܝܠܵܗ̇: ܗܲܪ ܗܵܕܵܐ ܒܘܼܫ ܚܠܘܼܨܬܵܐ ܝܠܵܗ̇ ܡ̣ܢ ܓܒ̣ܵܪܵܐ ܐܲܪܥܵܢܵܝܵܐ. ܚܘܼܒܵܐ ܕܚܲܕ݉ ܓܲܒ̣ܪܵܐ ܐܵܦܸܢ ܕܗܵܘܹܐ ܪܵܒܵܐ ܚܲܝܡܵܐ ܘܚܲܝܠܵܢܵܐ ܒܐܵܗܵܐ ܕܘܼܢܝܹܐ: ܐܲܚܟ̰ܝܼ ܚܲܕ݉ ܕܘܼܡܝܵܐ ܒܵܨܘܿܪܵܐ ܝܠܹܗ ܕܗ̇ܘ ܚܘܼܒܵܐ ܕܒܸܠܗܵܝܵܐ ܝܠܹܗ ܓܵܘ ܠܸܒܵܐ ܕܡܫܝܼܚܵܐ. ܠܹܐ ܐܵܬܹܐ ܠܦܲܪܡܘܼܝܵܐ ܒܚܝܼܵܠ ܙܲܒܘܿܢ ܗ̇ܘ ܚܘܼܒܵܐ ܓܘܼܪܵܐ ܕܡܫܝܼܚܵܐ ܠܟܸܣ ܥܹܕܬܘܼܗܝ.