ܬܡܘܙ 23
ܐܘܦ ܐܢ݉ܬ ܐܝܟ̣ ܚܕ݉ ܡܢܝ (ܥܘܒܕܝܐ ܐ: 11)
ܐܲܕܘܼܡ ܕܲܝܢܵܢܵܐ ܝܗ݉ܘܵܐ ܠܡܲܚܙܘܼܝܹܐ ܩܵܐ ܒܢܲܝ̈ ܝܼܣܪܵܝܹܠ ܚܘܼܒܵܐ ܕܐܲܚܘܿܢܘܼܬܵܐ ܒܥܕܵܢܵܐ ܕܣܢܝܼܩܘܼܬܵܝ: ܐܝܼܢܵܐ ܡ̣ܢ ܓܹܒܵܐ ܕܗܵܕܵܐ: ܒܢܘܿܢܹ̈ܐ ܕܥܹܣܘܿ ܗ݉ܘܹܐ ܠܗ݉ܘܿܢ ܚܲܕ݉ ܥܲܡ ܕܸܫ̃ܡܸܢܵܝ̈. ܓ̰ܲܪܓܵܐ ܕܐܸܕܝܘܿܡ ܚܲܝܠܵܐ ܥܲܠܗܲܕܵܐ ܡܲܬܘܼܒ̣ܵܐ ܝܠܹܗ ܥܲܠ ܐܵܗܵܐ ܚܲܒܪܵܐ: ܐܲܢ݉ܬ. ܚܲܕ݉ ܥܵܡܵܠ ܚܸܪܒܵܐ ܟܹܐ ܗܵܘܝܵܐ ܕܚܸܪܒܵܝܘܼܬܘܼܗܝ ܡܲܒܝܸܢܵܐ ܒܘܼܫ ܓܘܼܪܬܵܐ ܗܲܪ ܣܵܒܵܒ ܚܲܕ݉ ܦܸܠܵܢ ܐ݉ܢܵܫܵܐ ܒܹܥܒ̣ܵܕܘܼܗܝ ܝܠܹܗ. ܐܝܼܡܵܐ ܐܲܚܢܲܢ ܚܵܛܲܚ: ܐܲܚܢܲܢ ܕܝܼܘܲܚ ܡܘܼܚܸܒܹ̈ܐ ܘܓܘܼܒܝܹ̈ܐ ܕܫܡܲܝܵܐ: ܚܛܝܼܬܲܢ ܒܘܼܫ ܓܘܼܪܬܵܐ ܝܠܵܗ̇: ܣܵܒܵܒ ܩܘܼܒܠܹܐ ܝܘܲܚ ܦܸܖ̈ܨܲܬܹܐ ܥܲܠܗܲܕܵܐ. ܐܸܢ ܚܲܕ݉ ܡܲܠܲܐܟ̣ܵܐ ܡܲܬܸܒ̣ ܗ݉ܘܵܐ ܠܵܗ̇ ܐܝܼܕܘܼܗܝ ܥܲܠܲܢ ܟܲܕ ܒܹܥܒ̣ܵܕܵܐ ܝܘܲܚ ܚܛܝܼܬܵܐ: ܒܸܬ ܡܵܠܝܵܐ ܗ݉ܘܵܐ ܗܲܪ ܐܵܗܵܐ ܡܲܢܟ̣ܲܣܬܵܐ ܩܵܬܲܢ: ــ ܐܘܼܦ ܐܲܢ݉ܬ؟ ܐܲܢ݉ܬ ܡܘܼܕܝܼ ܒܹܥܒ̣ܵܕܵܐ ܝܘܸܬ ܠܲܐܟ̣ܵܐ؟ ܐܲܚܢܲܢ ܕܪܵܒܵܐ ܚܛܝܼܵܬ̈ܲܢ ܦܝܼܫܹܐ ܝܢܵܐ ܫܒ̣ܝܼܩܹܐ: ܐܲܚܢܲܢ ܕܡ̣ܢ ܪܵܒܵܐ ܒܝܼܫܵܬܹ̈ܐ ܦܝܼܫ ܠܲܢ ܦܘܼܨܝܹܐ: ܕܪܵܒܵܐ ܦܝܼܫܹܐ ܝܘܲܚ ܡܘܼܠܦܹܐ: ܪܵܒܵܐ ܕܵܘܸܠܬܵܐ ܩܘܼܒܠܹܐ: ܪܵܒܵܐ ܦܝܼܫܹܐ ܒܘܼܪܟ̣ܹܐ: ܐܲܚܢܲܢ ܩܲܫ̃ܕܸܪܲܚ ܠܦܲܫܘܿܛܹܐ ܐܝܼܕܲܢ ܠܹܥܒ̣ܵܕܵܐ ܚܛܝܼܬܵܐ؟ ܚܵܣܠܹܐ!
ܩܵܪܝܵܢܵܐ ܒܲܣܝܼܡܵܐ: ܚܲܕ݉ܟ̰ܵܐ ܚܲܒܖܹ̈ܐ ܕܡܵܘܕܵܝܬܵܐ ܡܵܪܹܐ ܦܵܝܕܵܐ ܒܸܬ ܗܵܘܝܼ ܩܵܬܘܼܟ̣ ܒܐܵܗܵܐ ܡܵܘܪܹܫܵܐ. ܐܲܢ݉ܬ ܗܸܟ̃ ܠܹܐ ܝܘܸܬ ܗ݉ܘܝܼܵܐ ܐܲܝܟ̣ ܒܝܼܫܹ̈ܐ؟ ܚܕܵܐ ܓܵܗܵܐ ܢܦܝܼܠ ܠܘܼܟ̣ ܓܵܘ ܚܕܵܐ ܡܲܓ̰ܠܸܣ ܕܛܘܼܠܵܙܹ̈ܐ: ܘܚܲܕ݉ܟܡܵܐ ܡܸܢܵܝ ܗܘܼܡܙܸܡ ܠܗ݉ܘܿܢ ܚܲܒܖܹ̈ܐ ܕܡܲܣܚܵܪܘܼܬܵܐ ܘܕܠܵܐ ܕܸܟ̣ܝܘܼܬܵܐ: ܐܘܼܦ ܠܢܵܬܵܐ ܕܝܼܘܼܟ̣ ܒܲܣܝܼܡܹ̈ܐ ܝܗ݉ܘܵܘ ــ ܠܹܐ ܝܘܸܬ ܗ݉ܘܵܐ ܐܲܝܟ̣ ܚܲܕ݉ ܡܸܢܵܝ؟ ܚܕܵܐ ܓܵܗܵܐ ܟܲܕ ܚܲܒܖܹ̈ܐ ܕܟܦܘܼܪܝܵܐ ܦܝܵܫܵܐ ܝܗ݉ܘܵܘ ܗܘܼܡܙܸܡܹܐ ܒܘܼܬ ܐܘܼܖ̈ܚܵܬܹܐ ܕܐܲܠܵܗܵܐ: ܐܲܢ݉ܬ ܢܚܝܼܦ ܠܘܼܟ̣ ܠܗܲܡܙܘܼܡܹܐ: ܐܘܼܦ ܐܲܢ݉ܬ ܐܲܝܟ̣ ܚܲܕ݉ ܡܸܢܵܝ ܝܘܸܬ ܗ݉ܘܵܐ. ܟܲܕ ܕܘܼܢܝܵܓܝܼܖܹ̈ܐ ܓܵܘ ܫܘܼܩܵܐ ܒܹܥܒ̣ܵܕܵܐ ܝܗ݉ܘܵܘ ܣܲܘܕܵܐ ܒܟܠܹܗ ܚܲܝܠܵܝ ܘܚܝܼܵܠܵܝ: ܠܹܐ ܝܘܸܬ ܗ݉ܘܵܐ ܐܲܢ݉ܬ ܐܲܝܟ̣ ܚܲܕ݉ ܡܸܢܵܝ؟ ܟܲܕ ܐܵܢܝܼ ܐܲܝܟ̣ ܨܲܝܵܕܹ̈ܐ ܢܦܝܼܠܹܐ ܝܗ݉ܘܵܘ ܒܵܬ݉ܪ ܗܵܒܵܣܘܼܬܵܐ: ܠܹܐ ܝܘܸܬ ܗ݉ܘܵܐ ܐܘܼܦ ܐܲܢ݉ܬ ܐܲܝܟ̣ ܕܝܼܵܝ ܒܲܕܢܲܦ̮ܣ؟ ܒܸܬ ܡܲܫ݉ܟ̰ܸܚܸ ܗ݉ܘܵܐ ܚܲܕ݉ ܐ݉ܢܵܫܵܐ ܬܵܦܘܘܿܬ ܒܹܝܠܘܼܟ̣ ܐܸܠܵܝ؟ ܘܡܸܓ̰ܸܕ ܐܝܼܬ ܬܵܦܘܘܿܬ؟ ܠܲܐܟ̣ܵܐ ܦܝܵܫܵܐ ܝܘܸܬ ܚܠܝܼܨܵܐ. ܠܵܐ ܥܲܠܕܸܬ ܠܓܵܢܵܐ ܕܓܵܢܘܼܟ̣. ܡܲܩܘܝܼ ܓܵܢܘܼܟ̣ ܐܲܝܟ̣ ܒܪܝܼܬܵܐ ܚܲܕܬܵܐ ܒܝܑܼܫܘܿܥ ܡܫܝܼܚܵܐ: ܐܝܼܬܵܐ ܐܝܼܡܵܐ ܕܦܝܼܫܵܐ ܝܘܸܬ ܡܘܼܩܘܝܼܵܐ: ܚܕܘܿܕ ܒܗܸܫܝܵܪܘܼܬܵܐ: ܠܵܐ ܗ݉ܘܹܐ ܕܗܸܟ̃ ܚܲܕ݉ ܐܵܡܸܪ: ܐܘܼܦ ܐܲܢ݉ܬ ܐܲܝܟ̣ ܚܲܕ݉ ܡܸܢܵܝ ܝܘܸܬ ܗ݉ܘܵܐ. ܐܲܢ݉ܬ ܠܹܐ ܒܵܥܹܝܬ ܗܵܘܹܝܬ ܥܲܡܵܝ ܗܲܠ ܐܵܒܵܕ: ܒܲܣ ܩܵܡܘܿ ܚܵܕܪܸܬ ܥܲܡܵܝ ܐܵܕܝܼܵܐ؟ ܒܲܣ ܦܪܘܿܫ ܡܸܢܵܝ ܘܙܲܘܸܓ ܥܲܡ ܛܵܝܸܦܵܐ ܕܐܲܠܵܗܵܐ.