ܬܡܘܙ 24

ܟܠܝܡܘܢ ܘܚܙܝܡܘܢ ܦܘܪܩܢܐ ܕܡܪܝܐ (ܡܦܩܢܐ ܝܕ: 13)

ܐܵܗܵܐ ܝܠܹܗ ܦܘܼܩܕܵܢܵܐ ܕܡܵܪܝܵܐ ܩܵܐ ܗܲܡܸܢܵܢܵܐ ܟܲܕ ܦܝܼܫܵܐ ܝܠܹܗ ܕܸܪܝܵܐ ܓܵܘ ܟ̰ܵܬܘܿܢܘܼܝܵܬܹ̈ܐ ܘܙܲܗܡܲܬܹ̈ܐ ܓܘܼܖܹ̈ܐ. ܠܵܒܵܬ݉ܪܵܐ ܠܹܐ ܡܵܨܹܐ ܕܵܝܸܪ: ܠܵܩܲܕ݉ܡܵܐ ܠܹܐ ܡܵܨܹܐ ܕܐܵܙܹܠ: ܚܒ̣ܝܼܫܵܐ ܝܠܹܗ ܡ̣ܢ ܝܲܡܝܼܢܵܐ ܘܡ̣ܢ ܣܸܡܵܠܵܐ: ܐܵܕܝܼܵܐ ܡܘܼܕܝܼ ܥܵܒ̣ܸܕ؟ ܚܲܒܪܵܐ ܕܡܵܪܝܵܐ ܝܠܹܗ ܩܵܬܘܼܗܝ: ܟܠܝܼ. ܨܦܵܝܝܼ ܝܠܵܗ̇ ܐܸܢ ܒܗܲܕܟ̣ܵܐ ܥܕܵܢܵܐ ܕܵܒ̣ܸܩ ܢܵܬܵܐ ܐܲܚܟ̰ܝܼ ܠܚܲܒܪܵܐ ܕܐܲܠܵܗܘܼܗܝ: ܣܵܒܵܒ ܐ݉ܚܹܖ̈݉ܢܹܐ ܙܹܐ ܦܲܬܦܘܼܬܹܐ ܝܢܵܐ ܚܲܒܖܹ̈ܐ ܚܸܪܒܵܐ ܓܵܘ ܢܵܬܘܼܗܝ. ܒܹܐ ܗܹܒ̣ܝܼܘܼܬܵܐ ܒܹܐܡܵܪܵܐ ܝܠܵܗ̇: ܕܡܘܿܟ̣ ܘܪܲܦܝܼ ܐܝܼܕܵܐ ܡ̣ܢ ܐܵܗܵܐ ܫܘܼܠܵܐ. ܐܝܼܢܵܐ ܐܲܠܵܗܵܐ ܟܹܐ ܒܵܥܹܐ ܕܗܵܘܲܚ ܒܸܚܕܵܝܵܐ ܘܡܵܪܹܐ ܓ̰ܘܼܪܐܲܬ: ܘܐܘܼܦ ܒܙܲܒ̣ܢܲܢ ܕܥܹܩܘܼܝ ܓܘܼܪܬܵܐ ܣܵܒܪܲܚ ܒܚܘܼܒܘܼܗܝ ܘܒܡܗܘܼܡܢܘܼܬܘܼܗܝ. ܙܵܕܘܿܥܘܼܬܵܐ ܒܹܐܡܵܪܵܐ ܝܠܵܗ̇: ܕܘܼܪ ܠܵܒܵܬ݉ܪܵܐ: ܕܘܼܪ ܠܐܘܼܖ̈ܚܵܬܹܐ ܕܕܘܼܢܝܹܐ: ܠܹܐ ܡܵܨܹܝܬ ܥܵܒ̣ܕܸܬ ܟܪܸܣܛܝܵܢܘܼܬܵܐ: ܟ̰ܵܬܘܿܢ ܝܼܠܵܗ̇ ܩܵܬܘܼܟ̣: ܪܲܦܝܼ ܐܝܼܕܵܐ ܡ̣ܢ ܩܛܵܥܵܬܘܼ̈ܟ̣. ܐܝܼܢܵܐ ܟܡܵܐ ܕܣܵܛܵܢܵܐ ܚܵܦܸܛ ܠܘܼܟ̣ ܠܹܥܒ̣ܵܕܵܐ ܗܲܕܟ̣ܵܐ: ܠܹܐ ܡܵܨܹܝܬ ܠܡܲܨܝܘܼܬܹܐ ܐܸܠܘܼܗܝ ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ. ܦܲܪܡܵܢܘܼܗܝ ܐܲܠܵܗܵܝܬܵܐ ܦܵܩܘܿܕܘܼܟ̣ ܝܼܠܵܗ̇ ܠܹܐܙܵܠܵܐ ܡ̣ܢ ܚܲܝܠܵܐ ܠܚܲܝܠܵܐ: ܘܗܲܕܟ̣ܵܐ ܒܸܬ ܥܵܒ̣ܕܸܬ: ܘܠܵܐ ܡܵܘܬܵܐ ܘܠܵܐ ܓܹܗܲܢܵܐ ܠܹܐ ܡܵܨܝܼ ܠܡܲܕܘܼܪܘܼܟ̣ ܡ̣ܢ ܐܘܼܪܚܘܼܟ̣. ܐܘܼܦ ܐܸܢ ܩܵܐ ܚܲܕ݉ ܙܲܒ̣ܢܵܐ ܟܸܪܝܵܐ ܦܵܝܫܸܬ ܦܘܼܩܕܵܐ ܠܸܫܠܵܝܵܐ: ܐܵܗܵܐ ܙܹܐ ܦܝܵܫܵܐ ܝܠܵܗ̇ ܥܒ̣ܝܼܕܬܵܐ ܠܚܲܕܘܼܬܹܐ ܚܲܝܠܘܼܟ̣ ܩܵܐ ܐ݉ܙܵܠܬܵܐ ܠܵܩܲܕ݉ܡܵܐ ܒܘܼܫ ܙܵܘܕܵܐ ܒܥܕܵܢܵܐ ܠܵܚܘܿܡܬܵܐ. ܝܲܠܙܘܼܝ ܡܲܩܘܘܼܚܹܐ ܝܠܵܗ̇: ܥܒ̣ܘܿܕ ܚܲܕ݉ ܡܸܢܕܝܼ: ܡܲܓ̰ܘܸܓ̰ ܓܵܢܘܼܟ̣: ܠܸܟܠܵܝܵܐ ܕܠܵܐ ܓ̰ܘܵܓ̰ܬܵܐ ܟ̰ܸܡ ܒܵܛܝܼܠܘܼܬܵܐ ܝܠܵܗ̇. ܟܹܐ ܚܵܫܒ̣ܲܚ ܕܗܲܪ ܘܵܓ̰ܸܒ ܝܼܠܵܗ̇ ܕܥܵܒ̣ܕܲܚ ܚܲܕ݉ ܡܸܢܕܝܼ ܟ̰ܸܡ ܓ̰ܲܠܕܹܐ: ܡ̣ܢ ܓܹܒܵܐ ܕܚܵܝܪܲܚ ܠܡܵܪܝܵܐ ܗ̇ܘ ܕܠܵܐ ܐܲܚܟ̰ܝܼ ܒܸܬ ܥܵܒ̣ܸܕ ܚܲܕ݉ ܡܸܢܕܝܼ: ܐܝܼܢܵܐ ܒܸܬ ܥܸܒ̣ܸܕ ܟܠ ܡܸܢܕܝܼ: ܩܲܫ̃ܕܸܪܵܢܘܼܬܵܐ ܟܹܐ ܚܵܦܛܵܐ ܠܘܼܟ̣ ܒܹܐܡܵܪܵܐ: ܐܸܢ ܝܵܡܵܐ ܝܠܵܗ̇ ܩܲܕ݉ܡܘܼܟ̣: ܕܪܝܼ ܓܵܢܘܼܟ̣ ܓܵܘܘܼܗ̇ ܘܣܦܘܿܪ ܠܚܲܕ݉ ܢܝܼܫܲܢܩܵܐ. ܐܝܼܢܵܐ ܗܲܝܡܵܢܘܼܬܵܐ ܠܹܐ ܕܵܒ̣ܩܵܐ ܢܵܬܵܐ ܠܩܲܫ̃ܕܸܪܵܢܘܼܬܵܐ: ܠܵܐ ܠܩܛܵܥܬܵܐ ܕܗܹܒ̣ܝܼ: ܠܵܐ ܠܙܵܕܘܿܥܘܼܬܵܐ: ܐܘܼܦ ܠܵܐ ܠܡܲܠܝܲܙܬܵܐ: ܐܸܠܵܐ ܟܹܐ ܫܵܡܥܵܐ ܩܵܠܵܐ ܕܐܲܠܵܗܵܐ ܒܹܐܡܵܪܵܐ: ܟܠܝܼ ܫܸܠܝܵܐ. ܟܠܝܼ ܐܲܝܟ̣ ܡܲܪܕܵܐ ܘܗܵܘܢܵܢܵܐ: ܗܵܙܸܪ ܩܵܐ ܦܵܩܲܕܬܵܐ ܕܣܲܪܟܲܪܕܘܼܟ̣ ܠܟܠ ܫܘܼܠܵܐ ܕܗ̇ܘ ܡܲܚܙܹܐ.