ܬܡܘܙ 3
ܘܐ݉ܟ̣ܝܠ ܠܗ݉ܘܢ ܐܢܝ ܬܘܖ̈ܝܬܐ ܣܖ̈ܝܐ ܒܚܙܝܬܐ ܘܒܓܝܖ̈ܐ ܒܒܣܪܐ ܠܐܢܝ ܫܒ̣ܥ ܬܘܖ̈ܝܬܐ ܫܦܝܖ̈ܐ ܒܚܙܝܬܐ ܘܛܖ̈ܝܨܐ (ܒܪܝܬܐ ܡܐ: 4)
ܚܸܠܡܵܐ ܕܦܸܪܥܘܿܢ ܪܵܒܵܐ ܓܵܗܹ̈ܐ ܬܘܼܡܸܡܵܐ ܝܠܹܗ ܒܝܼܝܼ ܟܲܕ ܪܥܝܼܫܵܐ. ܝܵܘܡܵܢܹ̈ܐ ܕܬܲܢܒܵܠܘܼܬܝܼ ܬܠܝܼܚܹܐ ܝܢܵܐ ܠܟܠ ܡܸܢܕܝܼ ܕܒܸܢܝܵܐ ܝܘܸܢ ܗ݉ܘܵܐ ܒܙܲܒ̣ܢܵܐ ܕܩܲܝܪܲܬ ܘܕܚܵܦܵܛܘܼܬܵܐ. ܟ̰ܵܓ̣ܝܼ̈ ܕܩܲܝܪܘܼܬܵܐ ܪܵܒܵܐ ܓܵܗܹ̈ܐ ܡܘܼܓܕܸܠܹܐ ܝܢܵܐ ܠܟܠܹܗ ܫܚܘܼܢܝܵܐ ܕܙܲܒ̣ܢܹ̈ܐ ܕܚܵܦܵܛܘܼܬܵܐ ܘܕܚܲܝܡܘܼܬܵܐ: ܢܦܵܠܬܝܼ ܓܵܘ ܐܘܼܖ̈ܚܵܬܹܐ ܕܥܵܠܡܵܐ ܪܵܒܵܐ ܓܵܗܹ̈ܐ ܕܪܝܼܬܝܼ ܝܠܵܗ̇ ܪܵܒܵܐ ܠܵܒܵܬ݉ܪܵܐ ܒܣܵܦܵܪܝܼ ܕܚܲܝܹ̈ܐ ܖ̈ܘܼܚܵܢܵܝܹܐ. ܣܢܝܼܩܵܐ ܝܘܸܢ ܠܹܗܘܵܝܵܐ ܗܸܫܝܵܪ ܡ̣ܢ ܨܠܵܘܵܬܹ̈ܐ ܒܵܓܝܼܖܹ̈ܐ: ܫܘܼܒ̣ܚܹ̈ܐ ܒܵܓܝܼܖܹ̈ܐ: ܘܵܓ̰ܸܒܘܼܝܵܬܹ̈ܐ ܒܵܓܝܼܖܹ̈ܐ: ܣܵܒܵܒ ܐܲܢܹܐ ܒܸܬ ܐܵܟ̣ܠܝܼ ܠܛܪܝܼܨܘܼܬܵܐ ܕܒܪܝܼܟ̣ܘܼܬܝܼ ܘܕܫܠܵܡܝܼ. ܐܸܢ ܪܲܦܸܢ ܐܝܼܕܵܐ ܡ̣ܢ ܨܠܘܿܬܵܐ ܩܵܐ ܚܕܵܐ ܥܕܵܢܵܐ ܟ̰ܸܡ ܟܪܝܼܬܵܐ: ܟܹܐ ܬܲܠܩܸܢܵܗ̇ ܟܠܵܗ̇ ܗ̇ܝ ܪܘܼܚܵܢܵܝܘܼܬܵܐ ܕܡܸܛܝܵܐ ܝܘܸܢ ܗ݉ܘܵܐ ܥܲܠܘܼܗ̇. ܐܸܢ ܠܵܐ ܓܵܪܫܸܢ ܬܘܼܪܣܵܝܵܐ ܚܵܕ݉ܬܵܐ ܡ̣ܢ ܫܡܲܝܵܐ: ܕܲܚܠܵܐ ܥܲܬܝܼܩܬܵܐ ܕܓܵܘ ܐܲܢܒܵܪܝܼ ܓ̰ܲܠܕܹܐ ܒܸܬ ܦܵܝܫܵܐ ܬܝܼܡܬܵܐ ܒܟܸܦܢܵܐ ܓܘܼܪܵܐ ܕܗܲܟܘܿܡܵܐ ܝܠܹܗ ܓܵܘ ܓܵܢܝܼ. ܐܝܼܡܵܐ ܕܬܸܪܬܸܖܹ̈ܐ ܕܒܹܐ ܚܲܡܘܼܬܵܐ ܘܬܸܘܸܠܥܹ̈ܐ ܕܥܵܠܡܵܢܵܝܘܼܬܵܐ ܘܖܸ̈ܓ̰ܒܹܐ ܕܛܲܠܲܙܬܵܐ ܕܓܵܢܵܐ ܥܵܒ̣ܕܝܼ ܠܹܗ ܠܸܒܝܼ ܘܲܝܪܵܢ: ܘܓܵܢܝܼ ܡܲܒܓܸܪܝܼ ܠܵܗ̇: ܟܠܵܗ̇ ܡܲܢܬܵܝܬܝܼ ܘܓܵܪܘܲܣܬܝܼ ܒܫܵܦܵܩܲܬ ܕܡ̣ܢ ܩܲܕ݉ܡܵܝܬܵܐ ܠܲܝܬ ܠܵܗ̇ ܗܸܟ̃ ܦܵܝܕܵܐ ܩܲܬܝܼ. ܟܡܵܐ ܢܸܓܵܪܵܢ ܘܵܓ̰ܸܒ ܝܼܠܵܗ̇ ܕܗܵܘܹܝܢ ܠܹܗܘܵܝܵܐ ܪܲܕ ܡ̣ܢ ܙܲܒ̣ܢܹ̈ܐ ܕܒܵܓܝܼܪܘܼܬܵܐ ܘܡ̣ܢ ܣܵܥܲܬܹ̈ܐ ܣܸܖ̈ܝܹܐ ܒܚܙܵܝܬܵܐ! ܐܸܢ ܟܠ ܝܵܘܡܵܐ ܐܵܙܸܠ݉ܢ ܗ݉ܘܵܐ ܠܵܩܲܕ݉ܡܝܼ ܒܣܵܦܵܪܝܼ ܠܵܐܵܡܵܓ̰ ܕܒܵܥܘܼ̈ܝܵܬܝܼ: ܓ̰ܲܠܕܹܐ ܒܸܬ ܡܵܛܹܝܢ ܗ݉ܘܵܐ ܐܸܠܘܼܗ̇: ܐܝܼܢܵܐ ܕܝܵܪܬܵܐ ܠܵܒܵܬ݉ܪܵܐ ܠܹܐ ܝܠܵܗ̇ ܒܸܫܒ̣ܵܩܵܐ ܕܩܲܪܒܸܢܹܢ ܠܢܝܼܲܬ ܕܩܪܵܝܬܝܼ ܪܵܡܬܵܐ: ܘܣܵܦܘܿܩܝܼ ܝܠܵܗ̇ ܡ̣ܢ ܐܵܢܝܼ ܡܲܙܝܲܕܝܵܬܹ̈ܐ ܙܹܐ ܕܗܲܠ ܐܵܕܝܼܵܐ ܥܒ̣ܝܼܕܵܐ ܝܘܸܢ. ܐܲܚܟ̰ܝܼ ܚܕܵܐ ܐܘܼܪܚܵܐ ܐܝܼܬ ܕܝܵܘܡܵܢܝܼ̈ ܟܠܵܝ ܗܵܘܝܼ ܐܲܝܟ̣ ܬܵܘܸܖ̈ܝܵܬܹܐ ܛܖ̈ܝܼܨܹܐ: ܝܲܥܢܹܐ: ܠܡܲܪܥܘܼܝܵܝ ܓܵܘ ܟ̰ܝܼܡܵܢܹ̈ܐ ܠܵܚܘܿܡܹ̈ܐ: ܠܡܲܥܒ̣ܘܼܪܵܝ ܥܲܡ ܡܵܪܝܵܐ: ܒܚܸܠܡܲܬܘܼܗܝ: ܒܚܲܒ̣ܪܵܘܵܝܘܼܬܘܼܗܝ: ܒܙܕܘܼܥܬܘܼܗܝ: ܘܒܐܘܼܖ̈ܚܵܬܘܼܗܝ. ܩܵܡܘܿܕܝܼ ܠܵܐ ܗܵܘܝܵܐ ܟܠ ܫܸܢ݉ܬܵܐ ܒܘܼܫ ܛܪܝܼܨܬܵܐ ܡ̣ܢ ܗ̇ܝ ܕܡ̣ܢ ܩܲܕ݉ܡܘܼܗ̇ ܒܚܘܼܒܵܐ: ܒܡܲܨܪܵܦ: ܘܒܚܵܕܘܼܬܵܐ؟ ܡܵܪܝܵܐ ܡܲܪܚܸܩ ܡܸܢܝܼ ܠܵܘܛܬܵܐ ܕܒܵܓܝܼܪܘܼܬܵܐ ܕܓܵܢܵܐ: ܘܗܲܝܸܪܝܼ ܕܐܵܟ̣ܠܸܢ ܘܦܵܝܫܸܢ ܬܘܼܪܣܝܼܵܐ ܨܦܵܝܝܼ ܓܵܘ ܒܲܝܬܘܼܟ̣ ܩܵܐ ܕܫܲܒܚܸܢ ܠܫܸܡܘܼܟ̣.