ܬܡܘܙ 6
ܘܗ̇ܘ ܕܫܡܥ ܠܝ ܒܬ ܫܪܐ ܒܐܡܝܢܝܝ: ܘܒܬ ܗܘܐ ܒܫܝܢܐ ܡܢ ܙܕܘܥܬܐ ܕܒܝܫܬܐ (ܡܬܠ̈ܐ ܐ: 33)
ܚܘܼܒܵܐ ܐܲܠܵܗܵܝܵܐ ܒܘܼܫ ܡܲܥܠܘܼܡ ܟܹܐ ܗܵܘܹܐ ܐܝܼܡܵܐ ܕܒܲܗܪܘܿܢܹܐ ܝܠܹܗ ܡܓܵܘ ܥܲܝܒ̣ܵܬܹ̈ܐ ܕܕܝܼܘܵܢܹ̈ܐ ܣܲܗܡܵܢܹ̈ܐ. ܫܲܦܝܼܪܵܐ ܝܠܹܗ ܗ̇ܘ ܟܵܘܟ̣ܒ̣ܵܐ ܬܲܟ ܕܟܹܐ ܫܲܕܸܪ ܙܲܗܪܝܼܖ̈ܘܼܗܝ ܓܵܘܵܐ ܓܵܘ ܥܲܝܒ̣ܵܐ ܘܡܝܼܫ: ܒܲܣܝܼܡܬܵܐ ܝܠܵܗ̇ ܥܲܝܢܵܐ ܕܡ̈ܝܼܵܐ ܕܒܸܢܒ̣ܵܥܵܐ ܝܠܵܗ̇ ܓܵܘ ܒܹܝܦܲܠܓܵܐ ܕܒܲܪܝܼܵܐ ܣܹܠܵܢܵܐ: ܗܲܪ ܗܵܕܵܐ ܫܲܦܝܼܪܵܐ ܘܒܲܣܝܼܡܵܐ ܝܠܹܗ ܗ̇ܘ ܚܘܼܒܵܐ ܕܟܹܐ ܦܵܠܸܛ ܒܥܕܵܢܵܐ ܕܚܸܡܬܵܐ. ܐܝܼܡܵܐ ܕܝܼܣܲܖ̈ܠܵܝܹܐ ܡܲܟܪܸܒܝܼ ܗ݉ܘܵܘ ܠܐܲܠܵܗܵܐ ܒܣܓ̣ܵܕܬܵܝ ܠܨܵܢܲܡܹ̈ܐ: ܗ̇ܘ ܟܹܐ ܬܲܥܠܸܡ ܗ݉ܘܵܐ ܠܗ݉ܘܿܢ ܒܡܲܟܠܵܝܬܵܐ ܕܡܸܛܪܵܐ ܘܛܠܘܼܠܵܐ: ܗܲܕܟ̣ܵܐ ܕܒܵܪܘܿܙܘܼܬܵܐ ܘܟܸܦܢܵܐ ܟܹܐ ܐܵܬܝܼ ܗ݉ܘܵܘ ܠܐܲܬܪܵܝ. ܐܝܼܢܵܐ ܗܲܪ ܟܲܕ ܬܲܥܠܘܼܡܵܝ ܝܗ݉ܘܵܐ: ܟܹܐ ܡܲܣܸܡ ܗ݉ܘܵܐ ܒܵܠܵܐ ܙܹܐ ܒܘܼܬ ܣܵܠܵܡܲܬܘܼܬܵܐ ܕܙܕܝܼܥܘܼ̈ܗܝ. ܐܸܢ ܟܠܵܝ ܫܵܩܝܼܵܬܹ̈ܐ ܒܵܪܙܝܼ: ܚܕܵܐ ܫܵܩܝܼܬܵܐ ܗܲܪ ܒܸܬ ܦܵܝܫܵܐ ܩܵܐ ܐܹܠܝܼܵܐ: ܘܐܘܼܦ ܐܝܼܡܵܐ ܕܗ̇ܝ ܒܵܪܙܵܐ: ܐܲܠܵܗܵܐ ܒܸܬ ܡܵܠܹܐ ܣܢܝܼܩܘܼܬܘܼܗܝ ܒܚܕܵܐ ܐܘܼܪܚܵܐ ܐ݉ܚܹܪ݉ܬܵܐ. ܘܠܵܐ ܐܲܚܟ̰ܝܼ ܗܲܕܟ̣ܵܐ: ܐܲܠܵܗܵܐ ܠܵܐ ܐܲܚܟ̰ܝܼ ܚܲܕ݉ ܐܹܠܝܼܵܐ ܐܝܼܬ ܠܹܗ: ܐܸܠܵܐ ܐܝܼܬ ܠܹܗ ܚܲܕ݉ ܣܵܡܵܐ ܦܝܼܫܵܐ: ܓܘܼܒܝܵܐ: ܒܫܵܦܵܩܲܬ: ܛܘܼܫܝܹܐ ܓܵܘ ܓܸܦܝܼܬܵܐ ܒܚܲܡܫܝܼܹ̈ܐ: ܘܐܵܦܸܢ ܕܟܠܹܗ ܐܲܬܪܵܐ ܡܝܵܬܵܐ ܝܗ݉ܘܵܐ ܡ̣ܢ ܟܸܦܢܵܐ: ܐܲܢܹܐ ܚܲܡܫܝܼܹ̈ܐ ܕܓܵܘ ܓܸܦܝܼܬܵܐ ܣܒ̣ܝܼܥܹ̈ܐ ܝܗ݉ܘܵܘ: ܡܘܼܐܟ̣ܠܹܐ ܗܲܪ ܡ̣ܢ ܨܘܼܦܪܵܐ ܕܐܵܚܵܒ̣ ܒܐܝܼܕܵܐ ܕܢܵܙܝܼܪܘܼܗܝ ܡܗܘܼܡܢܵܐ ܘܙܵܕܥܵܢܵܐ ܡ̣ܢ ܐܲܠܵܗܵܐ: ܥܘܿܒܵܕܝܼܵܐ. ܒܲܣ ܡ̣ܢ ܐܵܗܵܐ ܘܵܓ̰ܸܒ ܝܼܠܵܗ̇ ܕܝܵܠܦܲܚ: ܕܒܟܠ ܐܲܗܘܵܠ ܘܒܟܠ ܩܸܨܲܬ ܛܵܝܸܦܵܐ ܕܐܲܠܵܗܵܐ ܣܵܠܵܡܲܬ ܝܼܠܹܗ. ܖ̈ܵܘܕܵܢܹܐ ܫܒ̣ܘܿܩ ܡܲܫܥܸܫܝܼ ܠܐܲܬܪܵܐ: ܘܐܘܼܦ ܫܡܲܝܹ̈ܐ ܫܒ̣ܘܿܩ ܦܵܝܫܝܼ ܟ̰ܘܼܢܟ̰ܸܖܹ̈ܐ ܠܬܪܹܝ: ܡܸܢ݉ܕܪܸܫ݉: ܓܵܘ ܚܪܵܩܬܵܐ ܕܥܵܠܡܹ̈ܐ ܙܹܐ ܗܲܡܸܢܵܢܵܐ ܒܸܬ ܗܵܘܹܐ ܪܵܗܲܬ ܐܲܝܟ̣ ܒܣܵܥܲܬ ܕܫܸܠܝܘܼܬܵܐ ܟܵܡܝܼܠ. ܐܸܢ ܐܲܠܵܗܵܐ ܠܵܐ ܡܲܚܹܐ ܠܛܵܝܸܦܘܼܗܝ ܟܲܕ ܬܚܘܿܬ ܫܡܲܝܵܐ: ܓܵܘ ܫܡܲܝܵܐ ܗܲܪ ܒܸܬ ܡܲܚܹܐ ܠܗ݉ܘܿܢ. ܐܸܢ ܚܸܡܵܐ ܕܕܘܼܢܝܹܐ ܠܹܐ ܡܵܨܝܼ ܩܲܒܠܝܼ ܠܹܗ: ܫܡܲܝܵܐ ܒܸܬ ܗܵܘܝܵܐ ܕܘܼܟܬܵܐ ܠܩܲܒܘܿܠܵܝ ܒܣܵܠܵܡܲܬܘܼܬܵܐ ܘܒܢܝܵܚܵܢܝܼ. ܒܲܣ ܠܵܐ ܙܵܕܥܝܼܬܘܿܢ ܟܲܕ ܫܵܡܥܝܼܬܘܿܢ ܒܘܼܬ ܦܠܵܫܹ̈ܐ ܘܩܹܘܲܢܕܹܢܘܿܣܹ̈ܐ. ܠܵܐ ܦܵܝܫܝܼܬܘܿܢ ܫܓ̣ܝܼܫܹܐ ܐܸܠܵܐ ܗ݉ܘܹܝܡܘܿܢ ܪܲܕ ܡ̣ܢ ܙܕܘܼܥܬܵܐ ܕܒܝܼܫܬܵܐ. ܙܵܪܵܪ ܠܲܝܬ ܡܘܼܕܝܼ ܩܲܘܸܡ ܥܲܠ ܐܲܪܥܵܐ: ܐܲܚܬܘܿܢ ܬܚܘܿܬ ܓܘܼܠܦܵܢܹ̈ܐ ܕܝܹܗܘܿܘܵܐ ܣܵܠܵܡܲܬ ܝܼܬܘܿܢ. ܗ݉ܘܹܝܡܘܿܢ ܚܵܛܸܪܓ̰ܲܡܥ ܒܘܼܬ ܙܲܒ̣ܢܵܐ ܕܲܥܬܝܼܕ: ܣܵܒܵܒ ܕܡܗܘܼܡܢܵܐ ܝܠܹܗ ܐܲܠܵܗܵܘܟ̣ܘܿܢ. ܐܵܗܵܐ ܒܢܲܦ̮ܫܘܼܗ̇ ܗܵܘܝܵܐ ܚܲܡܵܘܟ̣ܘܿܢ: ܕܡܲܚܙܹܝܬܘܿܢ ܩܲܕ݉ܡ ܕܘܼܢܝܹܐ ܒܪܝܼܟ̣ܘܼܬܵܐ ܕܐܵܢܝܼ ܕܫܲܡܥܝܼ ܠܩܵܠܵܐ ܕܥܵܩܸܠܕܵܪܘܼܬܵܐ.