ܐܚܘܢܘܬܝ̈: ܨܠܹܝܡܘܢ ܨܠܘܬܐ ܒܘܬ ܕܝܢ (ܐ ܬܣܠܘܢܩܝ̈ܐ ܗ: 25)

ܐܵܗܵܐ ܚܕܵܐ ܩܵܝܕܲܡܬܵܐ ܓܵܘ ܫܹܢ݉ܬܵܐ ܚܘܼܡܝܘܼܗ̇ ܝܘܲܚ ܠܚܲܕܘܼܬܹܐ ܕܟ̣ܵܪܵܐ ܕܩܵܪܝܵܢܵܐ ܒܢܸܣܒܲܬ ܠܗܲܓ̰ܲܬ ܕܨܠܘܿܬܵܐ ܒܘܼܬ ܡܲܟܖܸ̈ܙܵܢܹܐ: ܘܒܢܸܓܵܪܵܢܘܼܬܵܐ ܓܘܼܪܬܵܐ ܦܲܪܦܘܼܠܹܐ ܝܘܲܚ ܒܟܠ ܟܸܠܦܲܬ ܕܟܖܸ̈ܣܛܝܵܢܹܐ ܕܬܲܡܸܡܵܐ ܠܒܵܥܘܼܬܵܐ ܚܲܝܡܬܵܐ ܕܐܵܗܵܐ ܓ̰ܲܪܓܵܐ ܕܩܵܝܕܲܡܬܵܐ ܦܝܼܫ ܠܹܗ ܬܘܼܢܝܵܐ ܡܦܘܼܡܵܐ ܕܚܲܕ݉ ܫܠܝܼܚܵܐ: ܘܐܵܕܝܼܵܐ ܦܝܵܫܵܐ ܝܠܹܗ ܬܸܢܝܵܐ ܡ̣ܢ ܦܘܼܡܵܐ ܕܝܼܲܢ. ܐܵܚܘܿܢܘܵܬܹ̈ܐ: ܫܘܼܠܲܢ ܚܲܕ݉ ܫܘܼܠܵܐ ܡܵܪܹܐ ܓ̰ܘܼܖ̈ܵܒܹܐ ܪܵܒܵܐ ܝܵܩܘܿܖܹ̈ܐ ܝܠܹܗ: ܘܒܸܕܒ̣ܵܩܵܐ ܝܠܹܗ ܝܲܢ ܫܲܩܝܼܘܼܬܵܐ ܝܲܢ ܒܘܼܪܟܬܵܐ ܩܵܐ ܐܲܠܦܹ̈ܐ. ܐܝܼܬ ܠܲܢ ܫܘܼܠܵܐ ܥܲܡ ܓܵܢܵܬܹ̈ܐ ܩܵܐ ܐܲܠܵܗܵܐ: ܒܢܸܣܒܲܬ ܐܵܒܵܕܝܼܢܵܝܬܵܐ: ܘܗܸܡܸܙܡܵܢ̈ܲܢ ܩܵܬܵܝ ܝܲܢ ܪܹܝܚܵܐ ܕܚܲܝܹ̈ܐ ܝܢܵܐ ܠܚܲܝܹ̈ܐ: ܝܲܢ ܪܹܝܚܵܐ ܕܡܵܘܬܵܐ ܠܡܵܘܬܵܐ. ܐܲܚܢܲܢ ܝܵܗܒ̣ܵܢܵܐ ܕܚܲܕ݉ ܓ̰ܘܼܘܵܒ ܪܵܒܵܐ ܝܵܩܘܿܪܵܐ ܝܘܲܚ: ܘܠܹܐ ܝܠܵܗ̇ ܚܕܵܐ ܫܵܦܵܩܲܬ ܙܥܘܿܪܬܵܐ ܩܵܬܲܢ ܕܒܐܚܲܪܬܵܐ ܦܵܝܫܲܚ ܡܘܼܫ݉ܟ̰ܚܹܐ ܚܵܠܝܼܨ ܡ̣ܢ ܕܸܡܵܐ ܕܟܠܵܝ ܐ݉ܢܵܫܹ̈ܐ. ܐܲܝܟ̣ ܨܵܗܸܒܡܲܢܨܵܒܹ̈ܐ ܓܵܘ ܩܵܘܫܘܿܢ ܕܡܫܝܼܚܵܐ: ܐܲܚܢܲܢ ܝܼܘܲܚ ܐܵܡܵܓ̰ ܥܲܠܗܲܕܵܐ ܩܵܐ ܓܹܐܖܹ̈ܐ ܕܕܸܫ̃ܡܸܢ ܘܕܣܵܛܵܢܵܐ. ܟܹܐ ܓܵܪܫܝܼ ܟܵܝܫܸܟ ܐܝܼܡܵܐ ܕܟܵܠܲܚ: ܕܡܵܚܝܼ ܠܥܸܩܒ̈ܲܢ. ܒܩܪܵܝܬܲܢ ܩܲܕܝܼܫܬܵܐ ܒܸܢܦܵܠܵܐ ܝܘܲܚ ܓܵܘ ܓ̰ܘܼܖ̈ܵܒܹܐ ܕܐ݉ܢܵܫܹ̈ܐ ܐ݉ܚܹܖ̈݉ܢܹܐ ܐܵܙܵܕ ܝܼܢܵܐ ܡܸܢܵܝ. ܘܙܵܘܕܵܐ ܡ̣ܢ ܟܠܵܝ: ܪܵܒܵܐ ܓܵܗܹ̈ܐ ܚܸܠܡܲܬܲܢ ܟܹܐ ܓܵܪܫܵܐ ܠܲܢ ܡ̣ܢ ܚܕܵܐ ܚܵܕܘܼܬܵܐ ܦܲܪܨܘܿܦܵܝܬܵܐ ܒܣܲܪܲܣܬܘܼܬܵܐ: ܠܓܵܫܘܿܩܹܐ ܥܲܠܘܼܗ̇ ܐܲܝܟ̣ ܚܸܠܡܲܬܟܵܖܹ̈ܐ ܘܨܵܗܸܒܡܲܢܨܵܒܹ̈ܐ. ܟܹܐ ܬܵܦܩܲܚ ܒܪܵܒܵܐ ܩܸܨܵܬܹ̈ܐ ܟܸܬܖ̈ܵܢܹܐ: ܪܵܒܵܐ ܓܵܗܹ̈ܐ ܒܸܡܛܵܝܵܐ ܠܓܵܢܲܢ: ܪܵܒܵܐ ܓܵܗܹ̈ܐ ܟܹܐ ܓ̰ܵܪܛܲܚ ܘܢܵܦܠܲܚ ܠܵܒܵܬ݉ܪܵܐ: ܘܠܸܒܵܘ̈ܵܬܲܢ ܟܹܐ ܦܵܝܫܝܼ ܕܘܼܪܒܸܢܹܐ: ܟܹܐ ܚܵܙܲܚ ܠܡܸܠܝܘܿܢܹ̈ܐ ܒܸܬܠܵܩܵܐ: ܘܪܘܼܚܲܢ ܟܹܐ ܦܵܫܡܵܐ. ܐܲܚܢܲܢ ܟܹܐ ܒܵܥܲܚ ܕܩܲܒܠܝܼܬܘܿܢ ܚܵܝܪ ܡ̣ܢ ܡܲܟܪܲܙܬܲܢ: ܟܹܐ ܒܵܥܲܚ ܕܗܵܘܲܚ ܡܲܝܬ݉ܝܵܢܹ̈ܐ ܕܒܘܼܪܟܬܵܐ ܐܘܼܦ ܥܲܠ ܝܵܠܵܕ݉ܘ̈ܟ̣ܘܿܢ: ܡܘܼܫܬܵܪܝܼ ܝܘܲܚ ܠܹܗܘܵܝܵܐ ܡܵܪܹܐ ܘܲܓ̰ܗ ܗܲܡ ܩܵܐ ܚܲܛܵܝܹ̈ܐ ܘܗܲܡ ܩܵܐ ܩܲܕܝܼܫܹ̈ܐ: ܒܘܼܬ ܐܵܗܵܐ: ܕܵܘܣܬܝܼ̈ ܡܘܼܚܸܒܹ̈ܐ: ܦܲܪܦܸܠܘܿܢ ܒܐܲܠܵܗܵܐ ܒܘܼܬ ܕܝܼܲܢ. ܐܲܚܢܲܢ ܫܲܩܝܼ ܝܘܲܚ ܐܸܢ ܠܵܐ ܩܲܒܠܲܚ ܗܲܝܲܪܬܵܐ ܡ̣ܢ ܨܠܵܘܵܬܵܘ̈ܟ̣ܘܿܢ. ܐܝܼܢܵܐ ܛܘܼܒ̣ܵܐ ܐܸܠܲܢ ܐܸܢ ܚܲܝܲܚ ܒܦܲܖ̈ܦܲܠܝܵܬܵܘܟ̣ܘܿܢ. ܐܲܠܵܗܵܐ ܪܵܒܵܐ ܓܵܗܹ̈ܐ ܟܹܐ ܡܲܡܛܹܐ ܩܵܬܵܘܟ̣ܘܿܢ ܒܘܼܖ̈ܟܵܬܹܐ ܖ̈ܘܼܚܵܢܵܝܹܐ ܒܐܲܣܒܵܒ ܕܚܸܠܡܲܬܟܵܖ̈ܘܼܗܝ ܕܐܲܝܟ̣ ܕܝܼܲܢ: ܒܲܣ ܡܸܢ݉ܕܪܸܫ݉ ܛܠܘܿܒܘܿܢ ܡܸܢܘܼܗܝ ܕܥܵܒ̣ܸܕ ܠܲܢ ܡܵܐܢܹ̈ܐ ܕܟܘܼܙܵܟ̰ܝܼ ܓܵܘ ܚܲܙܝܼܢܵܐ ܕܡܲܫܚܲܕܬܘܼܗܝ. ܐܲܚܢܲܢ: ܟܠܵܗ̇ ܕܲܣܬܵܐ ܕܡܸܫܹܢܲܝܖܹ̈ܐ: ܘܚܸܠܡܲܬܟܵܖܹ̈ܐ: ܘܐܸܣܟܘܼܠܵܝܹ̈ܐ ܩܵܐ ܩܲܫܝܼܫܘܼܬܵܐ: ܒܫܸܡܵܐ ܕܡܫܝܼܚܵܐ ܒܸܛܠܵܒܵܐ ܝܘܲܚ ܡܸܢܵܘܟ̣ܘܿܢ ܐܵܚܘܿܢܘ̈ܵܬܲܢ.

ܨܠܹܝܡܘܿܢ ܨܠܘܿܬܐ ܒܘܼܬ ܕܝܼܲܢ