ܬܡܘܙ 8
ܡܕܥ ܠܝ: ܦܪܦܘܠܐ ܝܘܢ: ܒܡܘܕܝ ܝܠܗ ܚܝܠܘܟ̣ ܓܘܪܐ (ܕܝܢ̈ܐ ܝܘ: 6)
ܒܡܘܼܕܝܼ ܝܠܹܗ ܚܲܝܠܵܐ ܛܸܫܝܵܐ ܕܗܲܝܡܵܢܘܼܬܵܐ؟ ܛܸܫܝܵܐ ܝܠܹܗ ܒܗ̇ܝ ܡܹܐܟ̣ܘܼܠܬܵܐ ܕܒܹܐܟ̣ܵܠܵܐ ܝܠܹܗ. ܣܵܒܵܒ ܗܲܝܡܵܢܘܼܬܵܐ ܟܹܐ ܗܲܓܝܵܐ ܥܲܠ ܡܵܢܵܝܘܼܬܵܐ ܕܩܵܘܠܵܐ ــ ܚܲܕ݉ ܦܠܵܛܵܐ ܕܫܵܦܵܩܲܬ ܐܲܠܵܗܵܝܬܵܐ: ܚܲܕ݉ ܠܲܦܵܐ ܒܸܫܦܵܟ̣ܵܐ ܡ̣ܢ ܠܸܒܵܐ ܓܘܼܪܵܐ ܕܐܲܠܵܗܵܐ: ܘܗܲܝܡܵܢܘܼܬܵܐ ܟܹܐ ܐܵܡܪܵܐ: ܐܲܠܵܗܝܼ ܠܹܐ ܝܲܗܒ̣ܸܠ ܗ݉ܘܵܐ ܠܹܗ ܐܵܗܵܐ ܩܵܘܠܵܐ ܐܸܢ ܠܹܐ ܝܗ݉ܘܵܐ ܡ̣ܢ ܚܘܼܒܵܐ ܘܫܵܦܵܩܲܬ: ܒܘܼܬ ܐܵܗܵܐ ܟ̰ܸܡ ܝܵܩܝܼܢ ܝܼܠܵܗ̇ ܕܚܲܒܪܘܼܗܝ ܒܸܬ ܦܵܐܸܫ ܬܘܼܡܸܡܵܐ. ܡܸܢ݉ܕܪܸܫ݉: ܗܲܝܡܵܢܘܼܬܵܐ ܟܹܐ ܬܲܚܡܸܢܵܐ: ܡܵܢܝܼ ܝܘܼܗܒ̣ܸܠ ܠܹܗ ܐܵܗܵܐ ܩܵܘܠܵܐ؟ ܠܹܐ ܦܵܟܪܵܐ ܐܘܼܚܟ̰ܵܐ ܥܲܠ ܓܘܼܪܘܼܬܘܼܗܝ ܐܲܝܟ̣ ܥܲܠ ܝܲܗܒ̣ܵܢܘܼܗܝ. ܟܹܐ ܕܵܟ̣ܪܵܐ ܕܝܲܗܒ̣ܵܢܘܼܗܝ ܐܲܠܵܗܵܐ ܝܠܹܗ: ܗ̇ܘ ܕܠܹܐ ܡܵܨܝܵܐ ܕܕܲܓܸܠ ــ ܐܲܠܵܗܵܐ ܡܨܹܐ ܟܠ: ܐܲܠܵܗܵܐ ܠܵܐ ܫܲܚܠܸܦܵܢܵܐ: ܘܒܘܼܬ ܐܵܗܵܐ ܒܹܗܘܵܝܵܐ ܝܠܵܗ̇ ܚܵܛܸܪܓ̰ܲܡܥ ܕܗ̇ܘ ܩܵܘܠܵܐ ܗܲܪ ܒܸܬ ܦܵܐܸܫ ܬܘܼܡܸܡܵܐ. ܡܸܢ݉ܕܪܸܫ݉: ܗܲܝܡܵܢܘܼܬܵܐ ܟܹܐ ܕܵܟ̣ܪܵܐ: ــ ܩܵܡܘܿܕܝܼ ܗ̇ܘ ܩܵܘܠܵܐ ܦܝܼܫ ܠܹܗ ܝܘܼܗܒ̣ܵܐ ــ ܝܲܥܢܹܐ: ܩܵܐ ܚܸܩܪܵܐ ܕܐܲܠܵܗܵܐ: ܘܗ̇ܝ ܟ̰ܸܡ ܚܵܛܸܪܓ̰ܲܡܥ ܝܼܠܵܗ̇ ܕܐܲܠܵܗܵܐ ܗܸܟ̃ ܠܹܐ ܡܵܝܸܬ݉ܐ ܠܵܘܡܵܐ ܠܒܲܝܕܵܓ̣ܘܼܗܝ: ܘܠܹܐ ܡܲܒܨܸܪ ܠܠܵܘܓ̰ܵܐ ܕܒܸܢܦܵܪܘܼܗܝ: ܘܒܘܼܬ ܐܵܗܵܐ: ܩܵܘܠܘܼܗܝ ܒܝܵܩܝܼܢܘܼܬܵܐ ܒܸܬ ܦܵܐܸܫ ܬܘܼܡܸܡܵܐ. ܡܸܢ݉ܕܪܸܫ݉: ܗܲܝܡܵܢܘܼܬܵܐ ܟܹܐ ܦܵܟܪܵܐ ܠܦܘܼܠܚܵܢܵܐ ܥܓ̰ܝܼܒܵܐ ܕܡܫܝܼܚܵܐ ܐܲܝܟ̣ ܣܵܒܸܬܘܼܬܵܐ ܟܵܡܝܼܠ ܒܘܼܬ ܢܝܼܲܬ ܕܐܲܠܵܗܵܐ ܠܬܲܡܘܼܡܹܐ ܚܲܒܪܘܼܗܝ. ܗ̇ܘ ܕܠܒܪܘܿܢܵܐ ܕܓܵܢܹܗ ܠܵܐ ܚܣܝܼܟ̣ ܠܹܗ: ܐܸܠܵܐ ܡ̣ܢ ܓܹܒܵܐ ܕܟܠܲܢ ܣܘܼܦܹܐ ܠܹܗ: ܕܵܐܟ̣ܝܼ ܥܲܡܹܗ ܠܹܐ ܝܲܗܒ̣ܸܠ ܩܵܬܲܢ ܟܠ ܡܸܢܕܝܼ؟ ܗܵܠܵܐ ܙܵܘܕܵܐ: ܗܲܝܡܵܢܘܼܬܵܐ ܟܹܐ ܚܵܝܪܵܐ ܥܲܠ ܙܲܒ̣ܢܵܐ ܕܲܥܒ̣ܲܪ: ܣܵܒܵܒ ܕܦܝܼܫܬܵܐ ܝܠܵܗ̇ ܚܘܼܠܸܢܬܵܐ ܒܦܠܵܫܘܼ̈ܗ̇: ܘܩܘܼܒܸܠܬܵܐ ܝܠܵܗ̇ ܓ̰ܘܼܪܐܲܬ ܒܓ̣ܵܠܸܒܘܼܝܵܬܘܼ̈ܗ̇. ܟܹܐ ܕܵܟ̣ܪܵܐ ܕܐܲܠܵܗܵܐ ܗܸܟ̃ ܠܹܐ ܝܠܹܗ ܫܒ̣ܝܼܩܘܼܗ̇: ܘܐܘܼܦ ܠܚܲܕ݉ ܡ̣ܢ ܒܢܘܿܢܘܼ̈ܗܝ ܒܗܸܟ̃ ܥܕܵܢܵܐ ܠܵܐ ܫܒ̣ܝܼܩ ܠܹܗ. ܟܹܐ ܕܵܟ̣ܪܵܐ ܙܲܒ̣ܢܹ̈ܐ ܕܩܹܘܲܢܕܹܢܘܿܣ ܓܘܼܪܬܵܐ ܐܝܼܡܵܐ ܕܩܘܼܒܸܠܵܗ̇ ܦܘܼܨܵܝܵܐ: ܘܠܣܵܥܲܬܹ̈ܐ ܕܐܘܼܠܨܵܢܵܐ ܟܲܕ ܐܲܝܟ̣ ܝܵܘܡܘܼܗ̇ ܚܲܝܠܵܐ ܡܘܼܫ݉ܟ̰ܸܚܠܵܗ̇: ܘܟܹܐ ܐܵܡܪܵܐ: ܐܵܢܵܐ ܠܹܐ ܡܵܨܝܵܢ ܠܗܲܡܘܼܢܹܐ ܕܗ̇ܘ ܒܸܬ ܫܲܚܠܸܦ ܘܒܸܬ ܓܵܪܸܫ ܐܝܼܕܵܐ ܡ̣ܢ ܪܹܓܘܼܗܝ ܐܵܕܝܼܵܐ. ܗܲܠ ܠܲܐܟ̣ܵܐ ܡܵܪܝܵܐ ܗܘܼܝܸܪܝܼ ܝܠܹܗ: ܘܐܘܼܦ ܡܐܵܕܝܼܵܐ ܠܒܵܬ݉ܪܹܐ ܒܸܬ ܗܲܝܸܪܝܼ. ܗܲܕܟ̣ܵܐ: ܗܲܝܡܵܢܘܼܬܵܐ ܒܚܵܛܸܪܓ̰ܲܡܥܘܼܬܵܐ ܩܘܝܼܬܵܐ ܟܹܐ ܐܵܡܪܵܐ: ܛܵܒ̣ܬܵܐ ܘܫܵܦܵܩܲܬ ܒܸܬ ܐܵܬܝܼ ܒܵܬ݉ܪܝܼ ܟܠܵܝ ܝܵܘܡܵܢܹ̈ܐ ܕܚܲܝܝܼ̈.