ܚܘܒܗ ܕܡܫܝܚܐ ܕܠܥܠܠ ܝܠܗ ܡܢ ܝܕܥܬܐ (ܐܦܣܝ̈ܐ ܓ: 19)

        ܚܘܼܒܵܐ ܕܡܫܝܼܚܵܐ ܒܚܸܠܝܘܼܬܘܼܗܝ: ܒܡܸܠܝܘܼܬܘܼܗܝ: ܒܓܘܼܪܘܼܬܘܼܗܝ: ܘܒܡܗܘܼܡܢܘܼܬܘܼܗܝ: ܒܹܥܒ̣ܵܪܵܐ ܝܠܹܗ ܡ̣ܢ ܗܲܕ ܕܦܲܪܡܵܝܬܵܐ ܕܒܲܪܢܵܫܵܐ. ܐܲܝܟܵܐ ܝܠܹܗ ܗ̇ܘ ܠܹܫܵܢܵܐ ܕܡܵܨܹܐ ܠܡܲܕܘܼܥܹܐ ܒܘܼܬ ܚܘܼܒܘܼܗܝ ܠܟܸܣ ܒܢܘܿܢܹ̈ܐ ܕܐ݉ܢܵܫܵܐ؟ ܐܘܼܚܟ̰ܵܐ ܪܘܝܼܚܵܐ ܝܠܹܗ ܘܒܹܐ ܗܲܕ ܕܵܐܟ̣ܝܼ ܕܣܢܘܼܢܝܼܬܵܐ ܐܲܚܟ̰ܝܼ ܟܹܐ ܕܵܩܪܵܐ ܒܡ̈ܝܼܵܐ ܘܠܹܐ ܨܵܠܝܵܐ ܓܵܘ ܥܘܼܡܩܵܝ̈: ܗܲܕܟ̣ܵܐ ܟܠܵܝ ܚܲܒܖܹ̈ܐ ܡܲܕܸܥܵܢܹ̈ܐ ܕܐܵܗܵܐ ܚܘܼܒܵܐ ܐܲܚܟ̰ܝܼ ܟܹܐ ܕܵܩܪܝܼ ܒܦܵܬܵܐ ܕܥܘܼܡܩܘܼܗܝ ܕܠܹܐ ܐܵܬܹܐ ܠܸܟܠܵܝܵܐ. ܡ̣ܢ ܩܲܕ݉ܡ ܕܡܵܨܲܚ ܦܲܪܡܲܚ ܟ̰ܸܡ ܕܘܼܙ ܡܘܼܕܝܼ ܝܠܹܗ ܚܘܼܒܵܐ ܕܡܫܝܼܚܵܐ: ܓܵܪܵܓ ܦܲܪܡܲܚ ܒܘܼܬ ܚܸܩܪܘܼܗܝ ܩܲܕ݉ܡܵܝܵܐ ܒܟܵܡܝܼܠܘܼܬܵܐ ܕܪܵܡܘܼܬܘܼܗܝ: ܘܗ̇ܝܓܵܗ ܒܘܼܬ ܫܩܵܠܬܘܼܗܝ ܒܸܣܪܵܐ ܓܵܘ ܕܘܼܢܝܹܐ ܒܟܠܹܗ ܥܘܼܡܩܵܐ ܕܟܘܼܦܘܼܬܘܼܗ̇. ܐܝܼܢܵܐ ܡܵܢܝܼ ܡܵܨܹܐ ܠܡܲܕܘܼܥܲܢ ܒܘܼܬ ܐܝܼܩܵܪܵܐ ܕܡܫܝܼܚܵܐ: ܐܝܼܡܵܐ ܕܝܬܝܼܒ̣ܵܐ ܝܗ݉ܘܵܐ ܥܲܠ ܬܪܘܿܢܘܿܣ ܒܸܫܡܲܝܹ̈ܐ ܥܸܠܵܝܹ̈ܐ ܐܲܠܵܗܵܐ ܟܵܡܝܼܠ ܝܼܗ݉ܘܵܐ: ܒܝܼܘܼܗܝ ܫܡܲܝܹ̈ܐ ܦܝܼܫ ܠܗ݉ܘܿܢ ܒܸܖ̈ܝܹܐ: ܘܟܠܵܝ ܚܲܝܠܵܘܵܬܵܝ̈. ܒܕܖ̈ܲܥܢܘܼܗܝ ܚܲܝܠܬܵܢܵܐ ܕܒ̣ܝܼܩܹܐ ܝܗ݉ܘܵܘ ܟܠܵܝ ܐܸܣܦܹܝܖܹ̈ܐ. ܬܸܫܒܘܿܚܝܵܬܹ̈ܐ ܕܟܖ̈ܘܼܒ̣ܹܐ ܘܣܖ̈ܵܦܹܐ ܚܲܪܕܘܼܝܘܼܗܝ ܝܗ݉ܘܵܘ ܒܕܵܝܸܡܘܼܬܵܐ. ܩܵܠܵܐ ܕܗܲܠܸܠܘܼܝܹ̈ܐ ܕܟܠܵܗ̇ ܒܪܝܼܬܵܐ ܒܸܡܛܵܝܵܐ ܝܗ݉ܘܵܐ ܠܬܪܘܿܢܘܿܣܘܼܗܝ ܕܠܵܐ ܫܠܵܝܬܵܐ. ܗܵܟܘܿܡܹܐ ܝܗ݉ܘܵܐ ܥܸܠܵܝܵܐ ܥܲܠ ܟܠܵܝ ܒܸܖ̈ܝܵܬܘܼܗܝ: ܐܲܠܵܗܵܐ ܕܟܠܵܝ: ܒܘܼܪܟ̣ܵܐ ܗܲܠ ܐܵܒܵܕ. ܡܵܢܝܼ ܡܵܨܹܐ ܠܡܲܕܘܼܥܹܐ ܪܵܘܡܵܐ ܕܐܝܼܩܵܪܘܼܗܝ ܒܗ̇ܝ ܥܕܵܢܵܐ؟ ܘܒܓܹܒܵܐ ܐ݉ܚܹܪ݉ܢܵܐ: ܡܵܢܝܼ ܡܵܨܹܐ ܗܵܩܹܐ ܟܡܵܐ ܟܘܼܦܵܐ ܨܠܹܐ ܠܹܗ؟ ܠܹܗܘܵܝܵܐ ܒܲܪܢܵܫܵܐ ܡܸܓ̰ܸܕ ܟ̰ܵܬܘܿܢ ܝܼܗ݉ܘܵܐ ܩܵܬܘܼܗܝ: ܐܝܼܢܵܐ ܠܹܗܘܵܝܵܐ ܐ݉ܢܵܫܵܐ ܕܚܲܫܹ̈ܐ ܪܵܒܵܐ ܒܘܼܫ ܚܸܪܒܵܐ ܝܗ݉ܘܵܐ. ܠܸܦܝܵܫܵܐ ܕܘܼܪܒܸܢܵܐ: ܠܩܲܒܘܿܠܹܐ ܚܲܫܵܐ ܘܠܸܡܝܵܬܵܐ ܪܵܒܵܐ ܝܗ݉ܘܵܐ ܩܵܐ ܗ̇ܘ ܕܝܼܗ݉ܘܵܐ ܒܪܘܿܢܵܐ ܕܐܲܠܵܗܵܐ. ܐܝܼܬܵܐ ܠܩܲܒܘܿܠܹܐ ܚܲܕ݉ ܓ̰ܘܼܢܓ̰ܵܪܵܐ ܐܘܼܚܟ̰ܵܐ ܨܵܘܵܢܵܐ ܕܠܲܝܬ ܗ݉ܘܵܐ ܒܵܪܵܒܵܪܘܼܗܝ ـ ܠܸܡܝܵܬܵܐ ܒܚܲܕ݉ ܡܵܘܬܵܐ ܕܢܚܝܼܦܬܵܐ ـ ܟܲܕ ܫܒ̣ܝܼܩܵܐ ܡ̣ܢ ܒܵܒܘܼܗܝ: ܚܲܕ݉ ܐܸܘܩܝܵܢܘܿܣ ܕܚܘܼܒܵܐ ܝܠܹܗ ܕܐ݉ܢܵܫܹ̈ܐ ܕܡ̣ܢ ܟܠܵܝ ܒܘܼܫ ܩܲܕܝܼܫܹ̈ܐ ܠܹܐ ܡܵܨܝܼ ܠܸܟܝܵܠܘܼܗܝ. ܕܘܼܝܠܹܗ ܚܘܼܒܵܐ: ܚܘܼܒܵܐ ܕܠܥܸܠܸܠ ܝܼܠܹܗ ܡ̣ܢ ܟܠܵܗ̇ ܝܕܲܥܬܵܐ. ܫܒ̣ܘܿܩ ܐܵܗܵܐ ܚܘܼܒܵܐ ܡܵܠܹܐ ܠܸܒܵܘܵܬ̈ܲܢ ܡ̣ܢ ܛܥܵܢܬܵܐ ܕܡܸܢܬܵܐ: ܘܡܲܚܙܹܐ ܒܝܼܲܢ ܢܝܼܫܵܢܩܹ̈ܐ ܕܚܲܝܠܘܼ̈ܗܝ.