ܐܕܪ 31
ܒܡܚܘܬܘ̈ܗܝ ܦܝܫ ܠܢ ܒܣܝܡܐ (ܐܫܥܝܐ ܢܓ: 5)
ܦܝܼܠܵܛܘܿܣ ܣܘܼܦܹܐ ܠܹܗ ܠܡܵܪܲܢ ܠܐܝܼܕܵܐ ܕܣܲܖ̈ܒܵܙܹܐ ܕܦܵܐܸܫ ܗ݉ܘܵܐ ܡܸܚܝܵܐ. ܬܵܙܝܼܵܢܹ̈ܐ ܕܖ̈ܗ݉ܘܿܡܵܝܹܐ ܪܵܒܵܐ ܙܵܠܝܼܡ ܝܼܗ݉ܘܵܘ ܠܓ̰ܲܢܓ̰ܘܼܪܹܐ. ܦܝܼܫܵܐ ܝܗ݉ܘܵܘ ܬܘܼܪܨܵܐ ܡ̣ܢ ܘܵܖ̈ܝܼܕܹܐ ܕܩܸܢܝܵܢܹ̈ܐ: ܘܓܲܖ̈ܡܹܐ ܚܵܖ̈ܝܼܦܹܐ ܦܝܼܫܵܐ ܝܗ݉ܘܵܘ ܓܕܝܼܠܹܐ ܒܐܵܪܵܠܸܓ̣ ܕܐܲܢܹܐ ܘܵܖ̈ܝܼܕܹܐ: ܠܲܐܟ̣ܵܐ ܘܬܵܡܵܐ: ܗܲܕܟ̣ܵܐ ܕܒܟܠ ܡܚܵܝܬܵܐ ܕܐܵܗܵܐ ܩܲܡܟ̰ܝܼ ܦܲܓ̣ܪܵܐ ܕܗ̇ܘ ܕܦܝܵܫܵܐ ܝܗ݉ܘܵܐ ܡܸܚܝܵܐ ܟܹܐ ܕܲܡܕܸܡ ܗ݉ܘܵܐ ܘܪܵܒܵܐ ܓܵܗܹ̈ܐ ܒܸܣܪܘܼܗܝ ܟܹܐ ܦܵܐܸܫ ܗ݉ܘܵܐ ܟ̰ܘܼܢܟ̰ܸܪܵܐ ܡ̣ܢ ܓܲܪܡܵܐ. ܐܲܠܒܲܬ ܦܵܪܘܿܩܲܢ ܙܹܐ ܦܝܼܫܵܐ ܝܗ݉ܘܵܐ ܐ݉ܣܝܼܪܵܐ ܠܣܛܘܼܢܵܐ ܘܡܸܚܝܵܐ ܒܐܵܗܵܐ ܬܵܗܵܪ. ܡ̣ܢ ܩܲܕ݉ܡ ܕܐܵܗܵܐ ܙܹܐ ܦܝܼܫܵܐ ܝܗ݉ܘܵܐ ܡܸܚܝܵܐ: ܐܝܼܢܵܐ ܥܒ̣ܘܿܕ ܒܵܘܵܪ ܐܵܗܵܐ ܡܚܵܝܬܵܐ ܕܣܲܖ̈ܒܵܙܹܐ ܖ̈ܗ݉ܘܿܡܵܝܹܐ ܒܘܼܫ ܨܵܘܵܢܬܵܐ ܝܗ݉ܘܵܐ ܡ̣ܢ ܟܠܵܝ ܡܚܵܝܵܬܹ̈ܐ ܐ݉ܚܹܖ̈݉ܢܹܐ ܕܩܘܼܒܠܹܐ ܝܗ݉ܘܵܐ. ܝܵܐ ܓܵܢܝܼ: ܟܠܝܼ ܠܲܐܟ̣ܵܐ ܘܥܒ̣ܘܿܕ ܬܵܥܙܝܼ ܒܘܼܬ ܦܲܓ̣ܪܘܼܗܝ ܓ̰ܘܼܢܓ̰ܸܪܵܐ.
ܝܵܐ ܗܲܡܸܢܵܢܵܐ ܒܡܫܝܼܚܵܐ: ܟܹܐ ܡܵܨܹܝܬ ܓܲܫܩܸܬ ܥܲܠܘܼܗܝ ܕܠܵܐ ܕܸܡܥܹ̈ܐ ܕܥܲܝܢܹ̈ܐ ܟܲܕ ܟܸܠܝܵܐ ܝܠܹܗ ܩܲܕ݉ܡܘܼܟ̣: ܨܘܼܪܬܵܐ ܕܚܘܼܒܵܐ ܩܲܒܠܵܢܵܐ ܕܓ̰ܘܼܢܓ̰ܵܪܵܐ؟ ܫܵܦܝܼܪܵܐ ܝܠܹܗ ܐܲܝܟ̣ ܫܘܼܫܲܢܹ̈ܐ ܒܚܵܠܝܼܨܘܼܬܘܼܗܝ: ܘܡܸܢ݉ܕܪܸܫ݉: ܣܡܘܼܩܵܐ ܐܲܝܟ̣ ܘܲܪܕܵܐ ܒܕܸܡܵܐ ܕܦܲܓ̣ܪܵܐ ܕܓܵܢܘܼܗܝ. ܟܲܕ ܪܵܥܫܲܚ ܒܒܣܵܡܬܵܐ ܫܲܪܝܼܪܬܵܐ ܘܒܪܝܼܟ̣ܬܵܐ ܗ̇ܝ ܕܡܲܚܘܵܬܘܼ̈ܗܝ ܥܒ̣ܝܼܕܹܐ ܝܢܵܐ ܒܝܼܲܢ: ܠܹܐ ܝܠܵܗ̇ ܘܵܓ̰ܸܒ ܕܦܵܫܪܝܼ ܠܸܒܵܘܵܬ̈ܲܢ ܒܚܘܼܒܵܐ ܘܒܥܹܩܘܼܝ؟ ܐܸܢ ܒܗܸܟ̃ ܥܕܵܢܵܐ ܡܘܼܚܸܒܹܐ ܝܘܲܚ ܠܡܵܪܲܢ ܝܼܫܘܿܥ: ܗ̇ܘ ܚܘܼܒܵܐ ܓܵܪܵܓ ܕܠܲܗܝܹܐ ܓܵܘ ܥܘܼܒܲܢ ܐܵܕܝܼܵܐ.
ܚܘܼܪܘܿܢ ܠܡܫܝܼܚܵܐ: ܟܡܵܐ ܚܵܡܠܵܢܵܐ! ܒܝܼܫܹ̈ܐ ܒܸܡܚܵܝܘܼܗܝ ܘܓ̰ܲܢܓ̰ܘܼܪܘܼܗܝ:
ܐ݉ܣܝܼܪܗ݉ܘܿܢ ܐܝܼܕܹ̈ܐ ܕܗ̇ܘ ܚܲܝܠܬܵܢܵܐ: ܗܹܐ: ܐܘܼܦ ܒܸܪܝܵܩܵܐ ܓܵܘ ܦܵܬܘܼܗܝ:
ܬܵܓ̰ܘܼܗܝ ܕܕܲܗܒ̣ܵܐ ܒܟܸܬܒ̣ܹ̈ܐ ܚܠܝܼܦܵܐ ܕܸܡܵܐ ܒܸܨܠܵܝܵܐ ܗܵܐ ܡ̣ܢ ܦܵܬܘܼܗܝ
ܚܵܨܘܼܗܝ ܒܬܵܙܝܼܵܢܹ̈ܐ ܟ̰ܠܝܼܦܵܐ ܗܵܠܵܐ ܒܘܼܫ ܓ̰ܘܼܢܓ̰ܸܪܵܐ ܠܸܒܘܼܗܝ.
ܦܲܪܦܸܠܲܚ ܒܦܵܪܘܿܩܲܢ ܕܨܘܼܪܬܵܐ ܕܦܲܓ̣ܪܘܼܗܝ ܓ̰ܘܼܢܓ̰ܸܪܵܐ ܡܵܚܹܐ ܠܵܗ̇ ܡܵܘܗܪ ܥܲܠ ܦܵܖ̈ܘܿܫܝܵܬܹܐ ܕܠܸܒܲܢ ܒܟܠܹܗ ܐܵܗܵܐ ܝܵܘܡܵܐ: ܗ̇ܝܓܵܗ ܒܪܲܡܫܵܐ ܡܸܢ݉ܕܪܸܫ݉ ܐܵܬܲܚ ܠܟܸܣܠܘܼܗܝ ܘܬܲܚܡܸܢܲܚ ܟܡܵܐ ܓ̰ܘܼܢܓ̰ܵܪܵܐ ܡܘܼܝܬܹ݉ܐ ܠܗ݉ܘܿܢ ܥܲܠܘܼܗܝ ܚܛܝܼܵܬ̈ܲܢ.