ܘܒܐܬܝܐ ܝܗܘܐ ܒܬ݉ܪܗ ܒܘܫܝܘܘܐ ܕܛܝܦܐ: ܘܒܟ̣ܬܬ̈ܐ ܐܢܝ

ܕܒܥܒ̣ܕܐ ܝܗܘܘ ܬܥܙܝ ܘܒܠܝܝܐ ܥܠܘܗܝ (ܠܘܩܐ ܟܓ: 27)

ܒܐܵܪܵܠܸܓ̣ ܕܟܸܢܫܵܐ ܥܵܒ̣ܕܵܢܵܐ ܕܟܘܝܼ ܕܦܠܝܼܛ ܠܹܗ ܠܹܥܒ̣ܵܕܵܐ ܬܵܡܵܫܵܐ ܒܡܵܘܬܵܐ ܕܦܵܪܘܿܩܵܐ: ܐܝܼܬ ܗ݉ܘܵܘ ܚܲܕ݉ܟ̰ܵܐ ܓܵܢܵܬܹ̈ܐ ܕܦܪܹܐ ܠܗ݉ܘܿܢ ܚܲܫܵܝ ܘܥܹܩܘܼܘܵܝ ܒܒܸܟ̣ܝܵܐ ܘܒܬܵܥܙܝܼ. ܐܝܼܡܵܐ ܕܓܵܢܝܼ ܡܵܨܝܵܐ ܡܲܝܵܬ݉ܐ ܩܲܕ݉ܡ ܥܲܝܢܘܼ̈ܗ̇ ܨܘܼܪܬܵܐ ܕܦܵܪܘܿܩܘܼܗ̇ ܛܥܝܼܢܵܐ ܙܩܝܼܦܘܼܗܝ ܒܹܐܙܵܠܵܐ ܠܓܵܓ̣ܘܿܠܬܵܐ: ܟܹܐ ܙܲܘܸܓܵܐ ܥܲܡ ܐܵܢܝܼ ܒܲܟ̣ܬܵܬܹ̈ܐ ܙܵܕܥܵܢܹ̈ܐ ܡ̣ܢ ܐܲܠܵܗܵܐ ܘܟܹܐ ܥܵܒ̣ܕܵܐ ܬܵܥܙܝܼ ܥܲܡܵܝ: ܣܵܒܵܒ ܕܡܸܓ̰ܸܵܕ ܐܝܼܬ ܗܲܓ̰ܲܬ ܩܵܐ ܦܵܫܲܡܬܵܐ ـ ܚܕܵܐ ܗܲܓ̰ܲܬ ܒܘܼܫ ܥܵܡܘܿܩܬܵܐ ܡ̣ܢ ܚܫܵܒ̣ܬܵܐ ܕܐܵܢܝܼ ܒܲܟ̣ܬܵܬܹ̈ܐ. ܐܵܢܝܼ ܒܸܒܟ̣ܵܝܵܐ ܝܗ݉ܘܵܘ ܒܘܼܬ ܡܵܘܬܵܐ ܕܚܲܕ݉ ܐ݉ܢܵܫܵܐ ܙܲܟܵܝܵܐ: ܛܵܒ̣ܵܐ: ܡܸܠܝܵܐ ܡ̣ܢ ܚܘܼܒܵܐ ܘܡܲܟܝܼܟ̣ܘܼܬܵܐ: ܐܝܼܢܵܐ ܠܸܒܵܐ ܕܝܼܝܼ ܐܝܼܬ ܠܹܗ ܚܕܵܐ ܗܲܓ̰ܲܬ ܒܘܼܫ ܥܵܡܩܘܼ ܘܒܘܼܫ ܡܲܝܪܬܵܐ ܠܸܒܟ̣ܵܝܵܐ. ܚܛܝܼܵܬܹ̈ܐ ܕܝܼܝܼ ܝܗ݉ܘܵܘ ܬܵܙܝܼܵܢܹ̈ܐ ܕܕܘܼܡܕܸܡ ܠܗ݉ܘܿܢ ܠܐܵܢܝܼ ܖ̈ܘܼܥܫܵܢܹܐ ܒܖ̈ܝܼܟܹܐ: ܘܒܘܼܢܦܸܪܗ݉ܘܿܢ ܒܟܸܬܒ̣ܹ̈ܐ ܠܗ̇ܘ ܩܸܨܵܐ ܕܸܡܵܢܵܐ. ܚܛܝܼܵܬܹ̈ܐ ܕܝܼܝܼ ܝܗ݉ܘܵܘ ܕܡܘܼܩܘܸܚ ܠܗ݉ܘܿܢ: ܡܚܝ ܠܗ ܠܙܩܝܦܐ! ܡܚܝ ܠܗ ܠܙܩܝܦܐ! ܘܡܘܼܬܸܒ̣ ܠܗ݉ܘܿܢ ܙܩܝܼܦܵܐ ܥܲܠ ܚܵܨܘܼܗܝ ܢܵܐܙܸܟ. ܐܵܒܵܕܘܼܬܵܐ ܠܹܐ ܡܵܠܝܵܐ ܩܵܐ ܦܲܫܵܡܬܵܐ ܒܘܼܬ ܡܵܘܬܘܼܗܝ: ܐܝܼܢܵܐ ܟܲܕ ܬܲܚܡܸܢܸܢ ܕܐܵܢܵܐ ܝ݉ܘܸܢ ܚܲܕ݉ ܡ̣ܢ ܙܵܩܦܵܢܘܼ̈ܗܝ ܕܸܡܥܹ̈ܐ ܕܥܲܝܢܝܼ̈ ܕܵܐܟ̣ܝܼ ܒܸܬ ܡܵܠܝܼ ܩܵܐ ܬܵܥܙܝܘܼܗܝ؟

ܐܝܼܬ ܗ݉ܘܵܘ ܗܲܓ̰ܲܬܹ̈ܐ ܚܲܝܠܵܢܹ̈ܐ ܩܵܐ ܒܸܟ̣ܝܵܐ ܕܐܵܢܝܼ ܒܲܟ̣ܬܵܬܹ̈ܐ: ܐܝܼܢܵܐ ܗܲܓ̰ܲܬܹ̈ܐ ܕܐܵܢܝܼ ܩܵܐ ܚܘܼܒܵܐ ܘܚܲܫܵܐ ܠܹܐ ܝܗ݉ܘܵܘ ܒܘܼܫ ܚܲܝܠܵܢܹ̈ܐ ܡ̣ܢ ܐܵܢܝܼ ܕܝܼܝܼ. ܒܪܘܿܢܵܐ ܕܐܲܪܡܸܠܬܵܐ ܕܢܵܐܹܝܢ ܦܝܼܫܵܐ ܝܗ݉ܘܵܐ ܡܘܼܩܸܡܵܐ ܡ̣ܢ ܡܵܘܬܵܐ ـ ܐܝܼܢܵܐ ܐܵܢܵܐ ܒܓܵܢܝܼ ܦܝܼܫܵܐ ܝܘܸܢ ܡܘܼܚܝܼܵܐ ܡ̣ܢ ܡܝܼܬܘܼܬܝܼ. ܚܡܵܬܵܐ ܕܫܸܡܥܘܿܢ ܐܲܚܟ̰ܝܼ ܡ̣ܢ ܚܲܡܚܲܡܬܵܐ ܦܝܼܫܬܵܐ ܝܗ݉ܘܵܐ ܒܘܼܣܸܡܬܵܐ ـ ܐܵܢܵܐ ܡ̣ܢ ܓܸܪܒ̣ܵܐ ܕܚܛܝܼܬܵܐ ܦܝܼܫܵܐ ܝܘܸܢ ܒܘܼܣܡܵܐ. ܡ̣ܢ ܡܲܪܝܲܡ ܡܲܓ̣ܕܠܵܝܬܵܐ ܫܲܒ̣ܥܵܐ ܫܹܐܕܹ̈ܐ ܦܝܼܫ ܠܗ݉ܘܿܢ ܦܘܼܠܛܹܐ ـ ܡܸܢܝܼ ܚܲܕ݉ ܠܸܓ̣ܝܘܿܢ ܦܝܼܫܹܐ ܝܢܵܐ ܦܘܼܠܛܹܐ. ܡܲܪܝܲܡ ܘܡܵܪܬܵܐ ܟܹܐ ܩܲܒܠܝܼ ܝܗ݉ܘܵܘ ܣܲܚܒܵܖ̈ܝܵܬܹܐ ܡ̣ܢ ܐܵܓ̣ܵܝܼܵܝ ـ ܐܝܼܢܵܐ ܥܲܡܝܼ ܒܸܫܪܵܝܵܐ ܝܠܹܗ ܒܕܵܝܸܡܘܼܬܵܐ. ܝܸܡܘܼܗܝ ܩܵܡ ܒܵܛܢܵܐ ܠܹܗ ܒܦܲܓ̣ܪܵܐ ـ ܒܝܼܝܼ ܥܡܝܼܪܵܐ ܝܠܹܗ ܒܗܹܒ̣ܝܼ ܕܚܸܩܪܵܐ. ܟܲܕ ܕܲܝܢܝܼ ܒܗܸܟ̃ ܡܸܢܕܝܼ ܠܹܐ ܝܠܹܗ ܒܘܼܫ ܩܵܠܘܿܠܵܐ ܡ̣ܢ ܕܲܝܢܵܐ ܕܐܵܢܝܼ ܒܲܟ̣ܬܵܬܹ̈ܐ ܩܲܕܝܼܫܹ̈ܐ: ܫܒ̣ܘܿܩ ܠܵܐ ܒܵܨܪܸܢ ܡܸܢܵܝ ܒܛܥܵܢܬܵܐ ܕܡܸܢܬܵܐ ܘܒܦܵܫܲܡܬܵܐ.

ܡܸܠܝܵܐ ܠܸܒܝܼ ܚܘܼܒܵܐ ܘܚܲܫܵܐ:

ܒܕܸܡܥ̈ܢܐ ܕܥܲܝܢܝܼ̈ ܐܲܩܠܘܼ̈ܗܝ ܡܲܬܪܸܢ:

ܡܗܘܼܡܢܵܐ ܠܟܸܣܠܘܼܗܝ: ܘܕܵܝܸܡ ܪܥܝܼܫܵܐ:

ܒܘܼܬ ܦܵܪܘܿܘܝܼ ܕܡܝܼܬ ܠܹܗ ܚܵܬܪܸܢ.