ܢܝܣܢ 22
ܗܪ ܠܐܗܐ ܐܠܗܐ ܡܘܪܡ ܠܗ (ܦܪܟܣܝܣ ܗ: 31)
ܡܵܪܲܢ ܝܼܫܘܿܥ: ܗ̇ܘ ܕܡܸܚܝܵܐ ܝܗ݉ܘܵܐ ܥܲܠ ܙܩܝܼܦܵܐ: ܘܕܡܝܼܬ ܠܹܗ: ܘܕܦܝܼܫ ܠܹܗ ܩܒ̣ܝܼܪܵܐ: ܐܵܕܝܼܵܐ ܝ݉ܬܝܼܒ̣ܵܐ ܝܠܹܗ ܥܲܠ ܬܪܘܿܢܘܿܣ ܕܚܸܩܪܵܐ. ܡܲܪܬܵܒܵܐ ܒܘܼܫ ܪܵܡܵܐ ܕܫܡܲܝܵܐ ܕܝܼܘܼܗܝ ܝܠܹܗ ܒܗܵܩܘܼܬܵܐ. ܒܲܣܝܼܡܬܵܐ ܝܠܵܗ̇ ܠܸܕܟ̣ܵܪܵܐ ܕܡܵܪܲܡܬܵܐ ܕܝܼܫܘܿܥ ܓܵܘ ܫܡܲܝܵܐ ܛܘܼܦ̮ܣܵܐ ܝܠܵܗ̇ ܒܘܼܬ ܡܵܪܲܡܬܵܐ ܕܟܠܵܝ ܩܲܕܝܼܫܘܼ̈ܗܝ. ܦܝܼܫܵܐ ܝܠܹܗ ܡܘܼܪܡܵܐ ܠܝܲܡܝܼܢܵܐ ܕܒܵܒܵܐ: ܘܐܵܦܸܢ ܕܐܝܼܬ ܠܹܗ ܙܲܪܝܼܦܘܼܬܵܐ ܕܒܸܖ̈ܝܹܐ ܠܹܐ ܫܲܪܸܟܝܼ ܒܝܼܘܼܗ̇: ܐܝܼܢܵܐ ܐܝܼܬ ܠܹܗ ܐܝܼܩܵܖܹ̈ܐ ܒܸܫܡܲܝܵܐ ܕܐܘܼܦ ܩܲܕܝܼܫܘܼ̈ܗܝ ܒܸܬ ܝܵܪܬܝܼ ܠܗ݉ܘܿܢ. ܡܲܚܕܝܼܵܢܬܵܐ ܝܠܵܗ̇ ܠܬܲܚܡܘܼܢܹܐ ܟܡܵܐ ܚܠܘܼܨܬܵܐ ܝܠܵܗ̇ ܫܲܪܝܼܟܘܼܬܵܐ ܕܡܫܝܼܚܵܐ ܥܲܡ ܛܵܝܸܦܘܼܗܝ! ܚܲܕ݉ ܝܼܘܲܚ ܥܲܡܘܼܗܝ: ܗܲܕܵܡܹ̈ܐ ܕܦܲܓ̣ܪܖܼܗܝ: ܡܵܪܲܡܬܵܐ ܕܗ̇ܘ ܝܼܠܵܗ̇ ܡܵܪܲܡܬܵܐ ܕܝܼܲܢ. ܒܸܬ ܝܲܗܒ̣ܸܠ ܠܲܢ ܠܹܝܬܵܒ̣ܵܐ ܥܲܠ ܬܪܘܿܢܘܿܣܘܼܗܝ: ܕܵܐܟ̣ܝܼ ܕܗ̇ܘ ܓ̣ܠܝܼܒܵܐ ܝܠܹܗ: ܘܝ݉ܬܝܼܒ̣ܵܐ ܝܠܹܗ ܥܲܡ ܒܵܒܘܼܗܝ ܥܲܠ ܬܪܘܿܢܘܿܣܘܼܗܝ. ܗ̇ܘ ܐܝܼܬ ܠܹܗ ܒܸܢܦܵܪ: ܐܘܼܦ ܩܵܬܲܢ ܒܝܲܗܒ̣ܵܐ ܠܹܗ ܒܸܢܦܵܖܹ̈ܐ. ܐܝܼܬ ܠܹܗ ܬܪܘܿܢܘܿܣ: ܐܝܼܢܵܐ ܠܹܐ ܝܠܹܗ ܪܵܙܝܼ ܕܐܲܚܟ̰ܝܼ ܗܵܘܝܵܐ ܠܹܗ ܬܪܘܿܢܘܿܣ ܩܵܐ ܓܵܢܘܼܗܝ: ܥܲܠ ܝܲܡܝܼܢܘܼܗܝ ܓܵܪܵܓ ܝܵܬܒ̣ܵܐ ܡܲܠܟܬܘܼܗܝ: ܣܘܼܩܸܠܬܵܐ ܒܕܗܒ̣ܐ ܕܐܘܦܝܼܪ. ܠܹܐ ܡܵܨܹܐ ܕܩܲܒܸܠ ܐܝܼܩܵܪܵܐ ܒܢܲܦ̮ܫܘܼܗܝ ܕܠܵܐ ܟܵܠܬܘܼܗܝ. ܗܲܡܸܢܵܢܵܐ: ܚܘܿܪ ܠܡܫܝܼܚܵܐ ܐܵܕܝܼܵܐ. ܕܟ̣ܘܿܪ ܕܚܲܕ݉ ܝܵܘܡܵܐ ܐܲܢ݉ܬ ܙܹܐ ܒܸܬ ܗܵܘܹܝܬ ܐܲܝܟ̣ ܕܝܼܘܼܗܝ: ܘܒܸܬ ܚܵܙܹܝܬ ܠܹܗ ܐܲܝܟ̣ ܕܝܼܠܹܗ. ܠܹܐ ܗܵܘܹܝܬ ܓܘܼܪܵܐ ܐܲܝܟ̣ ܕܝܼܘܼܗܝ: ܠܹܐ ܗܵܘܹܝܬ ܐܲܠܵܗܵܐ ܐܲܝܟ̣ ܕܝܼܘܼܗܝ: ܐܝܼܢܵܐ ܡܸܢ݉ܕܪܸܫ݉: ܒܚܲܕ݉ ܩܵܕܸܪ ܒܸܬ ܩܲܒܠܸܬ ܗܲܪ ܐܵܢܝܼ ܐܝܼܩܵܖܹ̈ܐ܆ ܘܒܸܬ ܫܲܪܸܟܸܬ ܗܲܪ ܒܗ̇ܝ ܚܵܕܘܼܬܵܐ ܘܡܝܘܼܩܪܘܼܬܵܐ ܕܗ̇ܘ ܐܝܼܬ ܠܹܗ. ܗ݉ܘܝܼ ܪܵܙܝܼ ܠܹܚܵܝܵܐ ܒܢܲܦ̮ܫܘܼܟ̣ ܩܵܐ ܚܲܕ݉ܟ̰ܵܐ ܙܲܒ̣ܢܵܐ: ܘܠܸܚܕܵܪܵܐ ܒܐܘܼܪܚܘܼܟ̣ ܡܲܓ̰ܗܝܼܵܢܬܵܐ ܓܵܘ ܚܲܩܠܵܢܹ̈ܐ ܕܡܸܣܟܹܢܘܼܬܵܐ: ܝܲܢ ܠܹܐܣܵܩܵܐ ܒܖ̈ܘܼܡܝܵܬܹܐ ܕܝܲܠܨܘܼܝ: ܣܵܒܵܒ ܒܵܬ݉ܪ ܚܲܕ݉ܟ̰ܵܐ ܒܸܬ ܥܵܒ̣ܕܸܬ ܡܲܠܟܘܼܬܵܐ ܥܲܡ ܝܼܫܘܿܥ: ܣܵܒܵܒ ܩܵܡ ܥܵܒ̣ܸܕ ܠܲܢ ܡܲܠܟܹ̈ܐ ܘܟܵܗܢܹ̈ܐ ܠܐܲܠܵܗܵܐ ܒܵܒܘܼܗܝ: ܘܥܲܡܹܗ ܒܸܬ ܥܵܒ̣ܕܲܚ ܡܲܠܟܘܼܬܵܐ ܠܐܵܒܵܕ ܐܵܒܵܕܝܼܢ. ܐܘܿܗ: ܡܘܼܕܝܼ ܦܸܟܝܼܪ ܚܠܝܼܬܵܐ ܝܠܵܗ̇ ܩܵܐ ܒܢܘܿܢܹ̈ܐ ܕܐܲܠܵܗܵܐ: ܕܗܵܘܝܼ ܠܟܸܣܠܘܼܗܝ ܘܕܫܲܪܸܟܝܼ ܒܚܸܩܪܘܼܗܝ ܓܵܘ ܫܡܲܝܵܐ!