ܘܒܟܠܗ̇ ܐܗܐ: ܐܚܢܢ ܒܩܛܥܐ ܝܘܚ ܩܘܠܐ ܣܪܣܬ (ܢܚܡܝܐ ܛ: 38)

ܒܪܵܒܵܐ ܥܕܵܢܵܬܹ̈ܐ ܓܵܘ ܚܲܝ̈ܲܢ ܠܵܚܘܿܡܬܵܐ ܝܠܵܗ̇ ܘܗܲܩ ܕܚܲܕܸܬܲܚ ܩܵܘܠܲܢ ܥܲܡ ܐܲܠܵܗܵܐ. ܡ̣ܢ ܒܵܬ݉ܪ ܒܣܡܬܐ ܡ̣ܢ ܡܪܥܐ: ܐܝܼܡܵܐ ܕܐܲܝܟ̣ ܚܹܙܲܩܝܵܐ: ܚܕܵܐ ܡܵܘܗܠܲܬ ܚܲܕܬܵܐ ܟܹܐ ܦܵܝܫܵܐ ܝܘܼܗܒ̣ܸܠܬܵܐ ܩܵܬܲܢ: ܠܵܚܘܿܡܬܵܐ ܝܠܵܗ̇ ܕܥܵܒ̣ܕܲܚ ܗܲܕܟ̣ܵܐ. ܡ̣ܢ ܒܵܬ݉ܪ ܕܦܝܼܫܹܐ ܝܘܲܚ ܦܘܨܝܐ ܡ̣ܢ ܟ̰ܬܘܢܘܬܐ ܝܢ ܙܗܡܬ: ܐܝܼܡܵܐ ܕܚܵܕܘܼ̈ܝܵܬܲܢ ܬܵܙܵܐ ܒܲܪܛܸܢܝܼ: ܡܸܢ݉ܕܪܸܫ݉ ܫܒ̣ܘܿܩ ܕܐܵܙܲܠ݉ܚ ܠܟܸܣ ܙܩܝܼܦܵܐ ܘܚܲܕܸܬܲܚ ܩܲܕܵܫܬܵܐ ܕܓܵܢܲܢ. ܐܸܠܵܐܟܹܐ ܗܲܕܟ̣ܵܐ ܥܵܒ̣ܕܲܚ ܡ̣ܢ ܒܵܬ݉ܪ ܕܥܒ̣ܝܼܕܹܐ ܝܘܲܚ ܚܕܐ ܚܛܝܼܬܐ ܕܡܘܦܫܡܬܐ ܝܠܗ̇ ܠܪܘܚܐ ܕܩܘܕܫܐ: ܝܲܢ ܒܝܼܘܼܗ̇ ܡܘܼܝܬ݉ܝܹܐ ܝܘܲܚ ܠܵܘܡܵܐ ܥܲܠ ܫܸܡܵܐ ܕܥܹܕܬܵܐ ܕܐܲܠܵܗܵܐ: ܗ̇ܝܓܵܗ ܫܒ̣ܘܿܩ ܚܵܝܪܲܚ ܠܗ̇ܘ ܕܸܡܵܐ ܕܟܹܐ ܥܵܒ̣ܸܕ ܠܲܢ ܚܘܵܖܹ̈ܐ ܒܘܼܫ ܡ̣ܢ ܬܲܠܓܵܐ: ܘܡܸܢ݉ܕܪܸܫ݉ ܡܲܩܪܸܒ̣ܲܚ ܓܵܢܲܢ ܩܲܕ݉ܡ ܐܲܠܵܗܵܐ. ܠܵܐ ܐܲܚܟ̰ܝܼ ܘܵܓ̰ܸܒ ܝܼܠܵܗ̇ ܕܟ̰ܵܬܘܼܢܘܼ̈ܝܵܬܲܢ ܡܲܩܘܝܼ ܡܩܘܼܕܫܘܼܬܲܢ ܠܡܵܪܝܵܐ: ܐܝܼܢܵܐ ܐܘܼܦ ܙܲܒ̣ܢܹ̈ܐ ܕܡܲܢܬܵܝܬܲܢ ܓܵܪܵܓ ܕܗܵܕܵܐ ܥܵܒ̣ܕܝܼ. ܐܝܼܡܵܐ ܕܐܲܠܵܗܵܐ ܒܲܢܦܸܪܲܢ ܒܫܵܦܵܩܲܬܘܵܬܘܼ̈ܗܝ: ܘܵܓ̰ܸܒ ܝܼܠܵܗ̇ ܕܐܲܚܢܲܢ ܙܹܐ ܒܲܢܦܸܪܲܚ ܠܹܗ ܒܡܲܩܪܲܒ̣ܬܵܐ ܕܟܠܵܝ ܓ̰ܲܘܵܗܝܼܖܹ̈ܐ ܕܩܘܼܒܠܹܐ ܝܘܲܚ ܡ̣ܢ ܖ̈ܲܚܡܘܼܗܝ: ܘܡܲܬܒ̣ܲܚ ܠܹܗ ܐܲܠܵܗܲܢ ܥܲܠ ܬܪܘܿܢܘܿܣ ܕܚܘܼܒܲܢ: ܠܒ̣ܝܼܫܵܐ ܠܒ̣ܸܫܬܵܐ ܡܲܠܟܵܝܬܵܐ. ܐܸܢ ܝܵܠܦܲܚ ܗ݉ܘܵܘ ܠܸܫܩܵܠܵܐ ܦܵܝܕܵܐ ܒܙܲܒ̣ܢܹ̈ܐ ܕܡܲܢܬܵܝܬܲܢ: ܐܘܼܚܟ̰ܵܐ ܠܹܐ ܣܵܢܩܲܚ ܗ݉ܘܵܘ ܠܙܲܒ̣ܢܹ̈ܐ ܕܥܝܼܩܘܼܬܵܐ. ܐܸܢ ܓ̰ܲܪܒܲܚ ܗ݉ܘܵܘ ܠܩܲܒܘܿܠܹܐ ܦܵܝܕܵܐ ܓܘܼܪܵܐ ܡ̣ܢ ܢܫܵܩܝܵܬܹ̈ܐ ܕܐܲܠܵܗܲܢ: ܠܹܐ ܦܵܝܫܲܚ ܗ݉ܘܵܘ ܡܘܼܡܪܸܥܹܐ ܪܵܒܵܐ ܒܩܵܛܝܼܘܼܗܝ. ܐܸܢ ܩܘܼܒܠܹܐ ܝܘܲܚ ܖ̈ܲܚܡܹܐ ܕܠܹܐ ܝܘܲܚ ܗ݉ܘܵܘ ܒܸܣܦܵܪܵܐ ܐܸܠܵܝ: ܐܸܢ ܒܸܚܙܵܝܵܐ ܝܘܲܚ ܪܘܵܚܵܢܝܼ: ܐܸܢ ܐܝܼܬ ܠܲܢ ܗܲܓ̰ܲܬ ܠܸܙܡܵܪܵܐ ܒܘܼܬ ܖ̈ܲܚܡܘܼܗܝ ܫܦܝܼܟ̣ܹܐ: ܘܵܓ̰ܸܒ ܝܼܠܵܗ̇ ܕܐܸܕܝܘܿܡ ܕܵܒ̣ܩܲܚ ܐܝܼܕ̈ܲܢ ܒܩܲܖ̈݉ܢܵܢܹܐ ܕܡܲܕܒܚܵܐ: ܘܐܵܡܪܲܚ: ܐ݉ܣܘܿܪܝܼ ܠܲܐܟ̣ܵܐ: ܝܵܐ ܡܵܪܝܵܐ: ܐ݉ܣܘܿܪܝܼ ܠܲܐܟ̣ܵܐ ܒܬܵܢܵܦܹ̈ܐ: ܗܲܠ ܐܵܒܵܕ. ܕܵܐܟ̣ܝܼ ܐܲܚܢܲܢ ܣܢܝܼܩܹܐ ܝܘܲܚ ܠܬܲܡܲܡܬܵܐ ܕܩܵܘܠܹ̈ܐ ܚܵܕܬܹ̈ܐ ܕܐܲܠܵܗܵܐ: ܗܲܪ ܗܵܕܵܐ ܠܵܙܸܡ ܝܼܠܵܗ̇ ܕܡܵܐܣܩܲܚ ܨܠܵܘܵܬܹ̈ܐ ܕܩܵܘ̈ܠܲܢ ܥܲܬܝܼܩܹ̈ܐ ܠܵܐ ܦܵܝܫܝܼ ܫܡܝܼܛܹܐ. ܒܐܵܗܵܐ ܩܵܝܕܲܡܬܵܐ ܫܒ̣ܘܿܩ ܕܥܵܒ̣ܕܲܚ ܥܲܡܘܼܗܝ ܚܲܕ݉ ܩܵܘܠܵܐ ܣܲܪܲܣܬ ܒܘܼܬ ܗܲܓ̰ܲܬ ܕܚܲܫܹ̈ܐ ܕܡܫܝܼܚܵܐ ܐܵܢܝܼ ܕܬܘܼܚܡܸܢܹܐ ܝܘܲܚ ܥܲܠܵܝ ܒܛܥܵܢܬܵܐ ܕܡܸܢܬܵܐ ܩܵܐ ܚܲܕ݉ ܝܲܪܚܵܐ.