ܘܒܬ ܡܚܙܝܢ ܩܬܗ ܓܢܝ (ܝܘܚܢܢ ܝܕ: 21)

ܡܫܝܼܚܵܐ ܟܹܐ ܥܵܒ̣ܸܕ ܓܸܠܝܵܢܹ̈ܐ ܥܲܠܗܲܕܵܐ ܕܓܵܢܘܼܗܝ ܩܵܐ ܛܵܝܸܦܘܼܗܝ. ܐܘܼܦ ܐܸܢ ܟܬܵܒ̣ܹ̈ܐ ܩܲܕܝܼܫܹ̈ܐ ܠܹܐ ܝܗ݉ܘܵܘ ܒܹܐܡܵܪܵܐ ܗܲܕܟ̣ܵܐ: ܐܝܼܢܵܐ ܐܝܼܬ ܪܵܒܵܐ ܒܢܘܿܢܹ̈ܐ ܕܐܲܠܵܗܵܐ ܕܒܸܬ ܝܲܗܒ̣ܝܼ ܣܵܗܕܘܼܬܵܐ ܩܵܐ ܐܵܗܵܐ. ܐܵܢܝܼ ܩܘܼܒܠܹܐ ܝܢܵܐ ܓܸܠܝܵܢܹ̈ܐ ܕܡܵܪܵܝ ܘܦܵܪܘܿܩܵܝ ܝܑܼܫܘܿܥ ܡܫܝܼܚܵܐ ܒܚܲܕ݉ ܬܵܗܵܪ ܦܪܝܼܫܵܐ ـ ܓܸܠܝܵܢܹ̈ܐ ܕܠܹܐ ܐܵܬܝܼ ܠܡܲܫ݉ܟ̰ܘܿܚܹܐ ܒܩܪܵܝܬܵܐ ܝܲܢ ܒܫܡܵܥܬܵܐ. ܓܵܘ ܗܲܩܝܲܬܹ̈ܐ ܕܚܲܝܹ̈ܐ ܕܐ݉ܢܵܫܹ̈ܐ ܩܲܕܝܼܫܹ̈ܐ ܪܵܒܵܐ ܓܵܗܹ̈ܐ ܟܹܐ ܩܵܪܲܚ ܕܡܫܝܼܚܵܐ ܒܣܝܼܡܵܠܵܐ ܠܹܗ ܠܸܓܠܵܝܘܼܗ̇ ܓܵܢܘܼܗܝ ܩܵܬܵܝ ܘܠܗܲܡܙܘܼܡܹܐ ܥܲܡ ܓܵܢܵܬܵܝ̈ ܒܚܲܕ݉ ܬܵܗܵܪ ܟ̰ܸܡ ܦܪܝܼܫܵܐ: ܗܹܐ: ܐܘܼܚܟ̰ܵܐ ܚܵܕܘܼܬܵܐ ܩܘܼܒܠܹܐ ܝܢܵܐ ܓܵܘ ܓܵܢܵܝ ܕܚܫܝܼܒ̣ܹܐ ܝܢܵܐ ܕܓܵܘ ܫܡܲܝܵܐ ܝܗ݉ܘܵܘ ܟܲܕ ܠܹܐ ܝܗ݉ܘܵܘ ܬܵܡܵܐ: ܐܵܦܸܢ ܕܟ̰ܸܡ ܩܘܼܪܒܵܐ ܝܗ݉ܘܵܘ ܠܣܩܘܼܦܬܵܐ ܕܬܲܪܥܘܼܗ̇ ـ ܣܵܒܵܒ ܕܐܝܼܡܵܐ ܕܡܫܝܼܚܵܐ ܓܵܠܹܐ ܠܵܗ̇ ܓܵܢܘܼܗܝ ܩܵܐ ܐ݉ܢܵܫܹ̈ܐ: ܫܡܲܝܵܐ ܟܹܐ ܗܵܘܝܵܐ ܥܲܠ ܐܲܪܥܵܐ: ܫܘܼܪܵܝܵܐ ܕܦܲܪܕܲܝܣܵܐ ܘܕܒܪܝܼܟ̣ܘܼܬܵܐ ܟܵܡܝܼܠ. ܓܸܠܝܵܢܹ̈ܐ ܥܲܠܗܲܕܵܐ ܕܡܫܝܼܚܵܐ ܟܹܐ ܥܵܒ̣ܕܝܼ ܚܲܕ݉ ܟܵܪ ܩܲܕܝܼܫܵܐ ܥܲܠ ܠܸܒܵܐ ܕܗܲܡܸܢܵܢܵܐ. ܚܲܕ݉ ܟܵܪ ܒܸܬ ܗܵܘܹܐ: ܡܲܟܝܼܟ̣ܘܼܬܵܐ. ܐܸܢ ܚܲܕ݉ ܐ݉ܢܵܫܵܐ ܐܵܡܸܪ: ܕܐܵܢܵܐ ܦܸܠܵܢ ܘܦܸܠܵܢ ܫܲܖ̈ܝܼܟܘܼܝܵܬܹܐ ܩܘܼܒܠܵܐ ܝܘܸܢ ܡ̣ܢ ܡܫܝܼܚܵܐ: ܐܵܢܵܐ ܚܲܕ݉ ܐ݉ܢܵܫܵܐ ܡܲܫܗܘܼܪ ܝܼܘܸܢ: ܗ̇ܘ ܐ݉ܢܵܫܵܐ ܗܸܟ̃ ܫܲܪܝܼܟܘܼܬܵܐ ܠܹܐ ܝܠܵܗ̇ ܗ݉ܘܝܼܬܘܼܗܝ ܥܲܡ ܡܫܝܼܚܵܐ: ܣܵܒܵܒ ܡܵܪܝܵܐ ܠܟܘܼܦܵܐ ܟܹܐ ܚܵܙܹܐ: ܘܠܪܵܡܵܐ ܡ̣ܢ ܪܸܚܩܵܐ ܟܹܐ ܝܲܕܸܥ. ܠܹܐ ܣܵܢܸܩ ܕܩܲܪܒܸܢ ܥܲܠܵܝ ܩܵܐ ܕܝܲܕܸܥ ܠܗ݉ܘܿܢ: ܘܒܗܸܟ̃ ܥܕܵܢܵܐ ܠܹܐ ܣܲܚܒܸܪܗ݉ܘܿܢ ܒܚܘܼܒܘܼܗܝ. ܚܲܕ݉ ܟܵܪ ܐ݉ܚܸܪ݉ܢܵܐ ܒܸܬ ܗܵܘܹܐ: ܒܪܝܼܟ̣ܘܼܬܵܐ: ܣܵܒܵܒ ܩܲܕ݉ܡ ܗܸܙܘܼܪ ܕܡܵܪܝܵܐ ܐܝܼܬ ܒܘܼܣܵܡܹ̈ܐ ܗܲܠ ܐܵܒܵܕ. ܡ̣ܢ ܒܵܬ݉ܪ ܐܲܢܹܐ ܩܲܕܝܼܫܘܼܬܵܐ ܙܹܐ ܗܲܪ ܒܸܬ ܐܵܬܝܵܐ. ܚܲܕ݉ ܐ݉ܢܵܫܵܐ ܕܠܲܝܬ ܠܹܗ ܩܲܕܝܼܫܘܼܬܵܐ: ܗܸܟ̃ ܠܹܐ ܝܠܹܗ ܩܘܼܒܠܵܐ ܚܲܕ݉ ܗܲܕܟ̣ܵܐ ܓܸܠܝܵܢܵܐ. ܚܲܕ݉ܟܡܵܐ ܐ݉ܢܵܫܹ̈ܐ ܟܹܐ ܗܲܡܙܸܡܝܼ ܒܘܼܬ ܪܵܒܵܐ ܫܘܼܠܹ̈ܐ ܓܘܼܖܹ̈ܐ ܕܓܵܢܵܝ: ܐܝܼܢܵܐ ܓܵܪܵܓ ܕܠܵܐ ܗܲܡܸܢܲܚ ܥܲܠܵܝ ܐܸܢ ܥܵܡܵܠܵܝ̈ ܠܹܐ ܕܵܒ̣ܩܝܼ ܥܲܡ ܚܲܒܖ̈ܵܝ. ܗܲܕܟ̣ܵܐ: ܩܘܼܪܒܘܼܢܝܘܼܬܵܐ: ܠܡܫܝܼܚܵܐ ܬܠܵܬ݉ܐ ܟܵܖܹ̈ܐ ܒܸܬ ܗܵܘܝܼ ܠܵܗ̇ ܥܲܠ ܐ݉ܢܵܫܹ̈ܐ ـ ܡܲܟܝܼܟ̣ܘܼܬܵܐ: ܒܪܝܼܟ̣ܘܼܬܵܐ ܘܩܲܕܝܼܫܘܼܬܵܐ. ܐܲܠܵܗܵܐ ܡܲܚܠܹܥ ܠܗ݉ܘܿܢ ܩܵܬܘܼܟ̣: ܟܪܸܣܛܝܵܢܵܐ.