ܐܢ ܛܥܝܡ ܠܘܟ̣ܘܢ ܕܛܒ̣ܐ ܝܠܗ ܡܪܝܐ (ܐ ܦܛܪܘܣ ܒ: 3)

ܐܢ ــ ܒܲܣ ܐܝܼܬ ܡܘܼܡܟܸܢ ܘܐܘܼܦ ܐܝܼܬ ܒܵܘܵܪ ܕܚܲܕ݉ܟܡܵܐ ܐܝܼܬ ܕܠܹܐ ܝܢܵܐ ܛܥܝܼܡܹܐ ܛܵܒ̣ܘܼܬܵܐ ܕܡܵܪܝܵܐ. ܐܢ ــ ܒܲܣ ܐܵܗܵܐ ܠܹܐ ܝܠܵܗ̇ ܚܕܵܐ ܫܵܦܵܩܲܬ ܟܠܵܢܵܝܬܵܐ: ܐܸܠܵܐ ܠܚܘܿܕܵܝܬܵܐ: ܘܪܵܒܵܐ ܠܵܙܸܡ ܝܼܠܵܗ̇ ܕܨܲܚܨܲܚ ܐܸܢ ܪܥܝܼܫܹܐ ܝܘܲܚ ܠܫܵܦܵܩܲܬ ܕܐܲܠܵܗܵܐ ܓܵܘ ܠܸܒܲܢ. ܠܲܝܬ ܗܸܟ̃ ܫܵܦܵܩܲܬ ܪܘܼܚܵܢܵܝܬܵܐ ܕܠܹܐ ܐܵܬܝܼܵܐ ܠܹܥܒ̣ܵܕܵܐ ܚܕܵܐ ܗܲܓ̰ܲܬ ܩܵܐ ܨܲܚܨܵܝܬܵܐ ܕܠܸܒܵܐ.

ܐܝܼܢܵܐ ܟܲܕ ܐܵܗܵܐ ܘܵܓ̰ܸܒ ܝܼܠܵܗ̇ ܕܦܵܝܫܵܐ ܥܒ̣ܝܼܕܬܵܐ ܗܲܓ̰ܲܬ ܕܨܲܚܨܵܝܬܵܐ ܘܕܨܠܘܿܬܵܐ: ܓܵܪܵܓ ܕܗܸܟ̃ ܚܲܕ݉ ܠܵܐ ܗܵܘܹܐ ܪܵܗܲܬ ܟܡܵܐ ܕܐܝܼܬ ܐܢ ܓܵܘ ܫܘܼܠܘܼܗܝ ــ ܐܢ ܛܥܝܼܡܵܐ ܝܠܹܗ ܕܛܵܒ̣ܵܐ ܝܠܹܗ ܡܵܪܝܵܐ. ܐܲܠܒܲܬ ܡܘܼܡܟܸܢ ܝܼܠܵܗ̇ ܕܩܵܝܡܵܐ ܐܵܗܵܐ ܒܵܩܲܪܬܵܐ ܓܵܘ ܠܸܒܵܐ ܕܚܲܕ݉ ܩܲܕܝܼܫܵܐ ܪܵܒܵܐ ܪܥܝܼܫܵܐ ܘܠܵܐ ܣܵܢܕܵܢܵܐ ܥܲܠ ܓܵܢܘܼܗܝ: ܐܝܼܢܵܐ ܥܲܪܩܲܠܬܵܐ ܕܚܲܕܵܐ ܗܲܕܟ̣ܵܐ ܫܸܟ ܓܵܘ ܠܸܒܘܼܗܝ ܡܸܓ̰ܸܕ ܚܸܪܒܵܐ ܒܸܬ ܗܵܘܝܵܐ ܗ݉ܘܵܐ. ܓܵܪܵܓ ܕܠܵܐ ܫܵܠܲܚ ܗܲܠ ܕܒܚܕܵܐ ܟ̰ܵܠܝܼܫ ܚܲܝܠܵܢܬܵܐ ܚܵܦܩܲܚ ܠܹܗ ܦܵܪܘܿܩܵܐ ܓܵܘ ܚܦܵܩܵܐ ܕܗܲܝܡܵܢܘܼܬܵܐ ܘܐܵܡܪܲܚ: ܒܝܼܕܵܥܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ: ܘܚܵܛܸܪܓ̰ܲܡܥ ܝܼܘܸܢ ܕܗ̇ܘ ܟܹܐ ܡܵܨܹܐ ܠܸܢܛܵܪܵܐ ܠܗ̇ܝ ܗܵܝܡܲܢܬܵܐ ܕܣܘܼܦܝܵܐ ܝܘܸܢ ܒܝܼܘܼܗܝ. ܠܵܐ ܗܵܘܹܝܬ ܪܵܗܲܬ: ܗܲܡܸܢܵܢܵܐ: ܗܲܠ ܗܵܘܝܵܐ ܠܘܼܟ̣ ܚܵܛܸܪܓ̰ܲܡܥܘܼܬܵܐ ܟ̰ܸܡ ܩܘܝܼܬܵܐ ܕܛܥܝܼܡܵܐ ܝܘܸܬ ܖ̈ܲܚܡܹܐ ܕܝܑܼܫܘܿܥ. ܠܵܐ ܣܲܒ̣ܥܹܬ ܗܲܠ ܕܒܣܵܗܕܘܼܬܵܐ ܕܪܘܼܚܵܐ ܩܲܕܝܼܫܵܐ ܦܵܝܫܵܐ ܓܠܝܼܬܵܐ ܩܵܬܘܼܟ̣ ܕܒܪܘܿܢܵܐ ܕܐܲܠܵܗܵܐ ܝܘܸܬ. ܐܵܗܵܐ ܠܹܐ ܝܠܹܗ ܚܲܕ݉ ܡܸܢܕܝܼ ܙܥܘܿܪܵܐ. ܠܵܐ ܫܵܒ̣ܩܸܬ ܕܒܲܠܟܵܐ: ܘܡܩܵܘܡܵܐ: ܘܐܸܢ: ܘܟܹܐ ܗܵܘܝܵܐ: ܡܲܣܒ̣ܥܝܼ ܓܵܢܘܼܟ̣: ܒܢܝܼ ܥܲܠ ܣܲܖ̈ܲܣܬܘܼܝܵܬܹܐ ܐܵܒܵܕܝܼܢܵܝܹ̈ܐ: ܘܒܣܲܪܲܣܬܘܼܬܵܐ ܗܵܘܹܝܬ ܒܸܒܢܵܝܵܐ ܥܲܠܵܝ. ܩܢܝܼ ܖ̈ܲܚܡܹܐ ܝܵܩܝܼܢ ܕܕܵܘܝܼܕ: ܘܒܝܵܩܝܼܢܘܼܬܵܐ ܩܵܢܹܝܬ ܠܗ݉ܘܿܢ. ܕܪܝܼ ܠܲܢܓܵܪܘܼܟ̣ ܠܓܵܘܵܝܵܐ ܡ̣ܢ ܣܸܬܪܵܐ: ܘܗ݉ܘܝܼ ܚܵܛܸܪܓ̰ܲܡܥ ܕܓܵܢܘܼܟ̣ ܐ݉ܣܝܼܪܬܵܐ ܝܠܵܗ̇ ܠܗ̇ܘ ܠܲܢܓܵܪ ܒܚܕܵܐ ܫܸܫܸܠܬܵܐ ܕܠܹܐ ܩܵܛܥܵܐ. ܥܒ̣ܘܿܪ ܡ̣ܢ ܫܸܟܘܼܝܵܬܹ̈ܐ ܕܡܘܼܫܲܡܝܼܪܘܼܬܵܐ: ܠܵܐ ܥܲܪܩܸܠܸܬ ܐ݉ܚܹܪ݉ܢܵܐ ܓܵܘ ܒܲܪܝܼܵܐ ܕܙܕܘܼܥܝܵܬܹ̈ܐ: ܥܒ̣ܘܿܪ ܡ̣ܢ ܝܘܿܪܕܢܵܢ ܕܢܵܐܡܲܥܠܘܼܡܘܼܬܵܐ: ܥܒ̣ܘܿܪ ܠܟܢܲܥܢ ܕܫܠܵܡܵܐ: ܐܲܝܟܵܐ ܕܟܢܲܥܢܵܝܵܐ ܗܵܠܵܐ ܐܝܼܬ: ܐܝܼܢܵܐ ܐܲܪܥܵܐ ܒܕܵܝܸܡܘܼܬܵܐ ܟܹܐ ܡܲܓ̰ܪܝܼܵܐ ܚܲܠܒ̣ܵܐ ܘܕܸܒ̣ܫܵܐ.